Disyembre 30–Enero 5: “Ang Ginpromisa nga Pagpanumbalik Nagaabante”

Ang Pagpanumbalik sang Kabug-osan sang Ebanghelyo ni Jesucristo

Paano mo saulugon ang ika-200 nga anibersaryo sang isa ka hitabo nga nagbag-o sang kalibutan? Amo ina ang pamangkot nga ginbinagbinag sang Unang Pangulohan kag Korum sang Dose ka Apostoles sang nagahilapit ang Abril 2020, nga tanda sang 200 ka tuig halin sang Una nga Palanan-awon ni Joseph Smith. “Namensar kami kon dapat bala magpatindog sang monumento,” siling ni Pangulong Russell M. Nelson. “Pero samtang ginapamensar namon ang pinasahi nga kasaysayan kag internasyonal nga epekto sang Unang Palanan-awon, ginpabatyag sa amon nga maghimo sang monumento indi sang granate ukon bato kundi sang mga pulong … , nga indi ikurit sa ‘mga tapi-tapi nga bato’ kundi ikurit sa ‘tapi-tapi nga unod’ sang aton mga tagipusuon [2 Mga Taga-Corinto 3:3]” (“Pamatii Sia,” Liahona, Mayo 2020, 90).

Ang monumento sang mga tinaga nga ila ginhimo gintug-ulohan “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Proklamasyon sa Kalibutan.” Monumento ini indi lang para sa Unang Palanan-awon kundi sa tanan nga ginhimo ni Jesucristo—kag ginahimo gihapon karon—halin sadto. Ang Pagpanumbalik sang Iya ebanghelyo nagsugod sang ang isa ka tawo nagdangop sa Dios kag nagpamati sa Iya. Nagapadayon ini sa amo gihapon nga paagi karon: isa ka tagipusuon, isa ka sagrado nga eksperiyensya tagsa ka tion—dala na ang sa imo.

Mga Ideya sa Pagtuon sa Puluy-an kag sa Simbahan

“Palangga sang Dios ang Iya mga anak sa tagsa ka nasyon sang kalibutan.”

Sa imo opinyon, ngaa ang proklamasyon parte sa Pagpanumbalik magsugod sa pahayag parte sa gugma sang Dios? Samtang ginatun-an mo ang proklamasyon, pangitaa ang mga pagpahayag sang pagpalangga sang Dios sa “Iya mga anak sa tagsa ka nasyon sang kalibutan”. Paano ka nabuligan sang Pagpanumbalik sang ebanghelyo nga mabatyagan ang Iya pagpalangga?

Tan-awa man sa Gerrit W. Gong, “Tanan nga Nasyon, Kaliwat, kag Lengguahe,” Liahona, Nob. 2020, 38–41.

Ang Pagpanumbalik nagsugod upod ang sabat sa isa ka pamangkot.

Masiling nga ginsugdan sang Manluluwas ang Pagpanumbalik sang Iya ebanghelyo paagi sa pagsabat sa isa ka pamangkot. Ano sa banta mo ang mensahe sang proklamasyon sang Pagpanumbalik sa tawo nga may mga pamangkot parte sa Dios, sa ebanghelyo, ukon sa “kaluwasan sang iya kalag”? Pwede mo man tun-an ang Joseph Smith—Kasaysayan 1:5–20 para makita kon ano ang imo matun-an kay Joseph Smith parte sa pagpangita sang mga sabat sa mga pamangkot parte sa ebanghelyo.

Detalye halin sa The Desires of My Heart [Ang mga Handum sang Akon Tagipusuon], ni Walter Rane

Ginpanumbalik ni Jesucristo ang Iya Simbahan.

Ano ang nahibal-an mo parte sa “Bag-ong Katipan nga Simbahan ni Cristo,” nga ginpanumbalik sang Manluluwas paagi kay Joseph Smith? Pamensara nga tun-an ining balaan nga kasulatan kag ilista ang pila ka kinaiya sang Iya Simbahan:

• Mateo 16:15–19

• Marcos 16:15–18

• Lucas 6:12–13

• Mga Binuhatan 4:34–35

• 1 Mga Taga-Corinto 15:29

• Mga Taga-Efeso 4:11–15

Dason, pwede mo parison ang balaan nga kasulatan sa ibabaw sa sinang mga ara sa idalom, nga nagahambal kon paano ginpanumbalik ni Jesucristo ina nga kinaiya sang Iya Simbahan paagi kay Joseph Smith:

• Doktrina kag mga Kasugtanan 18:37–38; 107:23–24

• Doktrina kag mga Kasugtanan 51:3; 70:14

• Doktrina kag mga Kasugtanan 84:64–72

• Doktrina kag mga Kasugtanan 110:11–16

• Doktrina kag mga Kasugtanan 124:31, 36

• Mga Artikulo sang Pagtuo 1:6

Ngaa nagapasalamat ka sa Pagpanumbalik sang ebanghelyo ni Jesucristo?

Si Elder Jeffrey R. Holland kag ang iya asawa sadto nagtilaw nga hunahunaon kon ano ayhan ang mabatyagan nila kon nagkabuhi sila antes ginpanumbalik ang Simbahan. “Ano ayhan ang ginhandum naton nga maangkon?” pamangkot nila sa ila kaugalingon. Basaha ang parte sa ila eksperiyensya sa “A Perfect Brightness of Hope” (Liahona, Mayo 2020, 81–82). Paano nakabulig ang Pagpanumbalik nga matuman ang imo espiritwal nga mga handum?

“Ang ginpromisa nga Pagpanumbalik nagaidog paabante.”

Nahunahuna mo bala ang imo kaugalingon nga parte sang Pagpanumbalik sang ebanghelyo? Pamensara ining mga tinaga ni Pangulong Dieter F. Uchtdorf: “Kon kaisa ginapanumdom naton nga ang Pagpanumbalik sang ebanghelyo tapos na, naglipas na sa aton. … Sa pagkamatuod, ang Pagpanumbalik isa ka nagapadayon nga hitabo; nagakabuhi kita subong sa amo sina nga tion” (“Are You Sleeping through the Restoration?,” Liahona, Mayo 2014, 59).

Samtang nagahanda ka sa pagtuon kon paano ginpanumbalik ang ebanghelyo sang mga tinuig sang 1800, pwede mo sugdan sa pagbinagbinag kon paano ini ginpanumbalik sa imo kabuhi. Basaha ang proklamasyon sang Pagpanumbalik nga may ginapensar na nga mga pamangkot pareho sini: Paano ko nabal-an nga matuod ini? Paano ako nagapartisipar sa Pagpanumbalik sa karon nga panahon?

“Ang kalangitan bukas.”

Ano ang buot silingon sa imo sang dinalan nga “ang kalangitan bukas?” Ano ang nakita mo nga ebidensya—sa proklamasyon sang Pagpanumbalik, sa Simbahan sa karon, sa balaan nga kasulatan, kag sa imo kabuhi—nga bukas tuod ang kalangitan?

Tan-awa man sa Quentin L. Cook, “The Blessing of Continuing Revelation to Prophets and Personal Revelation to Guide Our Lives,” Liahona, Mayo 2020, 96–100.

Magtuon sing ululupod. Gin-imbitar kita ni Pangulong Nelson nga “tun-an ang [proklamasyon sang Pagpanumbalik] nga kita lang kag upod ang mga miyembro sang [aton] pamilya kag mga abyan” (“Pamatii Sia,” 92). Pamensara kon paano mo dalhon ang iban sa imo pagtuon.

Para sa dugang nga mga ideya, tan-awa sa mga isyu sini nga semana sang Liahona kag sang Para sa Kusog sang mga Lamharon nga mga magasin.

Mga Ideya para sa Pagtudlo sang mga Kabataan

“Hugot namon nga ginapahayag.”

• Samtang ginabasa mo ang mga bahin sang proklamasyon sang Pagpanumbalik upod sa imo kabataan (ukon nagatan-aw sang video ni Pangulong Nelson nga ginabasa ini), buligi sila nga pangitaon ang mga pahayag nga nagasugod sa “amon ginapahayag,” “amon ginadeklarar,” ukon “nagasaksi kami.” Ano nga mga kamatuoran ang ginadeklarar sang aton mga propeta kag apostoles? Pwede mo kag sang imo kabataan nga ipakigbahin ang inyo mismo mga testimonya parte sa pila sining pareho nga mga kamatuoran.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

“Si Joseph Smith … may mga pamangkot.”

• Basi masadyahan ang imo kabataan nga hambalan ang pila sa mga pamangkot ni Joseph Smith nga nagresulta sa Pagpanumbalik sang ebanghelyo sang Manluluwas. Buligi sila nga magpangita sang pila ka halimbawa sa Joseph Smith—Kasaysayan 1:10, 29, 68. Paano kita ginabugayan subong tungod ginsabat sang Dios ang mga pamangkot ni Joseph Smith?

• Pwede mo man hatagan ang imo kabataan sang tsansa nga hambalan ang ila mga pamangkot. Ano ang matun-an naton kay Joseph Smith parte sa pagpangita sang mga sabat? (tan-awa sa Joseph Smith—Kasaysayan 1:8–17.

“Ang langitnon nga mga mensahero nagkari sa pagtudlo kay Joseph.”

• Sin-o ang “langitnon nga mga mensahero [nga] nagkari sa pagtudlo kay Joseph”? Basi manamian ang imo kabataan sa pagpangita sang mga litrato nila sa Libro sang mga Larawan nga Pang-Ebanghelyo (tan-awa sa mga nos. 91, 93, 94, 95). Paano nagbulig ang tagsa sining mga mensahero sa “pagpasad liwat sang Simbahan ni Jesucristo”? Ang balaan nga mga kasulatan nga ginpanugyan sa pahina para sa kahiwatan sini nga semana makabulig sa imo kabataan nga masabat ining pamangkot.

Ginpanumbalik ni Jesucristo ang Iya Simbahan

• Paano mo buligan ang imo kabataan nga maintiendihan kon ano ang kahulugan sang mapanumbalik ang Simbahan sang Manluluwas? Basi pwede sila maghimo sang simple nga tore gamit ang mga bloke ukon mga tasa, kag “ipanumbalik,” ukon tukuron ini liwat. Ukon, kon nakatilaw na ang imo kabataan nga ulian ang isa ka butang kay nadula ini ukon naguba, pwede mo ikumparar ina nga eksperiyensya sa Manluluwas nga ginapanumbalik ang Iya Simbahan. Buligi sila nga pangitaon ang pila ka butang nga ginmitlang sa proklamasyon sang Pagpanumbalik nga ginpanumbalik sang Manluluwas.

“Ang kalangitan bukas.”

• Para ipakita kon ano ang buot silingon sang “ang kalangitan bukas,” basi pwede ka maghambal sang mensahe sa imo kabataan, una sa pihak sang sirado ang pwertahan kag dayon ihambal ang amo man nga mensahe nga bukas ang pwertahan. Pabulos-bulosa sila sa paghambal man sang ila mensahe. Ano nga mga mensahe ang ginatigana sang Ginuo para sa aton? Ano nga mga eksperiyensya ang nakabulig sa aton nga mahibal-an nga ang kalangitan bukas?

Para sa dugang nga mga ideya, tan-awa ang isyu sang Abyan nga magasin sini nga bulan.