“Domo Eso ni Veivakalesui Mai: Matavuvale nei Josefa Simici,” Lako Mai, Mo Muri Au—Me Baleta na iTikotiko kei na Lotu: Vunau kei na Veiyalayalati 2025 (2025)
“Na Matavuvale nei Josefa Simici,” Lako Mai, Mo Muri Au—Me Baleta na iTikotiko kei na Lotu: 2025
Domo Eso ni Veivakalesui Mai
Matavuvale nei Josefa Simici
O keda vakayadua e tarai vakabibi na noda bula mai na noda bula vakamatavuvale, ka vakakina vei Josefa Simici. Na nodrau vakabauta dina kei na ivalavala vakalotu na nona itubutubu a teivaki kina na sore ni vakabauta me rawa kina na Veivakalesui Mai. E volai ena ivolaniveisiga i Josefa na veivakacaucautaki oqo: “E sega na vosa kei na ivosavosa [e] ganita meu vakaraitaka kina na noqu vakavinavinaka vua na Kalou ena nona solia vei au na itubutubu dokai vakaoqo.”
Na malanivosa era tarava oqo mai vei tinana, o Lusi Meki Simici; tacina o Viliame Simici; kei na Parofita vakataki koya e vakamatatataka vei keda na veivakayarayarataki vakalotu e loma ni nodratou vale na Simici.
Joseph Smith Family [Matavuvale nei Josefa Simici], mai vei Dan Baxter
Lusi Meki Simici
“[Rauta na 1802], Au a tauvimate kina. … Au a kaya lo, au se bera ni vakarautaki au meu mate niu se sega ni kila na sala i Karisito, ka vaka vei au ni tiko edua na qakilo butobuto ka galili ena keirau tadrua kei Karisito kau sega ni doudou meu takosova. …
“Au a rai vua na Turaga ka vakatakekere ka masuta na Turaga me vakabulai au me rawa niu susugi ira cake na luvequ ka vakaceguya na yalo i watiqu; kau davo tu vakaoqori ena bogi taucoko. … Au a veiyalayalati kei na Kalou [ni] kevaka ena vakatara meu bula au na sasaga meu rawata na matalotu ka na vukei au meu qaravi Koya vakadodonu, se tiko ena iVola Tabu se vanua cava ga ena kunei kina, ke mani rawati sara ga mai lomalagi ena masu kei na vakabauta. E muri a qai vosa vei au e dua na domo ka kaya, ‘Vakasaqara ka ona kunea, tukituki ka na dolavi vei iko. Me kakua ni rarawa na yalomu. Vakabauta na Kalou; ka vakabauti au talega.’ …
“Tekivu mai na gauna oqori ka lako yani au sa vakaukauwataki tikoga. Au a sega ni dau vosa vakalevu ena veika vakalotu ka dina ga ni dau vakatawana tu na noqu vakanananu e veigauna, kau nanuma niu na saga sara vagumatua ena gauna e rawa kina meu vaqara e dua na tamata daulotu ka kila tu na sala ni Kalou me vakasalataki au ena veika vaka Lomalagi.”
Viliame Simici
“O tinaqu, e dua na marama daulotu ka dau malele ki na nodratou tiko vinaka na luvena, eke kei na kena se bera mai, a vakayagataka vinaka na madigi eso a rawata ena nona loloma vakatina, me vakaogai keitou ena kena qarai me vakabulai na yaloi keitou, se (me vaka na kena ivosavosa ena gauna oya) ‘ena rawati ni lotu.’ A dau qarauna o koya me keitou tiko ena veisoqoni, ka yaco me malele sara kina na matavuvale taucoko, ka yaco me dauqara na dina.”
“Keitou dau masu vakamatavuvale mai na gauna au nanuma rawa. Au nanuma vinaka ni dau tawana toka o tamaqu na nona matailoilo ena taga ni nona kote e loma, … kei na gauna keitou raica kina na tagane ni ucuna mai na nona matailoilo, keitou kila sara ni oya na sikinala me keitou vakarau ki na masumasu, ia ke keitou sega ni siqema rawa ena kaya o tinaqu, ‘Viliame,’ se ocei ga e vakawelewele tiko, ‘vakarau ki na masumasu.’ Ni oti na masu a tiko edua na sere me keitou lagata.”
Erau a vakatavulica o Josefa Levu kei Lusi Simici na nodrau matavuvale me ratou vulica na ivolanikalou.
Josefa Simici
“Au kaya oqo, ni [o tamaqu] a sega sara ni cakava e dua na ivalavala sega ni loloma ka me tukuni kina ni a sega ni dau lomasoli, ena nona bula, mai na noqu kila. Au lomana na tamaqu kei na kena ivakananumi; kei na ivakananumi ni nona ivalavala vakaturaga, sa toka matua sara ki na noqu vakasama; ka vuqa na nona vosa ni loloma vakaitubutubu vei au, esa volai tu ena peleti ni lomaqu. Sa ka tabu sara vei au na vakanananu au dau vakamareqeta me baleta na itukutuku ni nona bula, ka sa dau curuma na noqu vakasama, ka sa teivaki tu e kea, ena noqu didigo ga vakataki au, me tekivu niu se qai sucu mai. … O tinaqu talega e dua vei ira na tina vakamarama ka uasivi sara vei ira kecega na tina.”