Veikau Tabu, mai vei Greg K. Olsen

13–19 ni Janueri: “Au a Raica edua na Duru Bukawaqa”

Josefa Simici—Ai Tukutuku 1:1–26

Ko na rawa ni kaya ni Vunau kei na Veiyalayalati e ivola ni isau ni masu: e vuqa na ivakatakila tabu ena ivola oqo era yaco mai me isau ni vakatataro. Na taro ka tekivu kece kina—na kena ka vakavuna na kena sovaraki mai na ivakatakila ni siga edaidai—a tarogi maivua e dua na gonetagane yabaki 14. E dua na “ivalu vaka-vosa kei na veivakasosataki ni vakasama” (Josefa Simici—Ai Tukutuku 1:10) a yaco kina vei Josefa Simici na veilecayaki me baleta na lotu kei na nona veiwekani kei na Kalou. E rairai rawa nio vakila talega na veika oqori. Eda kunea e vuqa na veisaqasaqa ni vakasama kei na domo veirawai ena noda gauna. Ni da via vakararai ena veiitukutuku oqo me kunea na dina, eda rawa ni cakava na ka a cakava o Josefa. Eda rawa ni taroga na taro, vulica na ivolanikalou, vakanananu vakatitobu, ka qai kerekere vua na Kalou. Me isau ni masu nei Josefa, edua na duru bukawaqa qai siro sobu mai lomalagi. Rau a rairai mai na Kalou na Tamada kei Jisu Karisito ka sauma na nona vakatataro. Na ivakadinadina nei Josefa me baleta na veika mana oya sa tukuna kina vakadoudou ni kevaka e dua “e [lailai] vua na vuku me na kerea vua na Kalou, io ena soli vua” (Josefa Simici—Ai Tukutuku 1:26). Eda rawa kece ni ciqoma, ke sega ni raivotu vakalomalagi, ia e dua mada ga na rai e matata cake, ka serauni tu ena rarama vakalomalagi.

Vakasama eso ni Vuli e Vale kei na Lotu

Josefa Simici—Ai Tukutuku 1:5–26

O Josefa Simici e Parofita ni Veivakalesui Mai.

Na inaki ni tukutuku ni bula nei Josefa Simici sai koya me da “kila kina na dina” baleta na dina me baleti Josefa sa dau vakatanitaki wasoma (Josefa Simici—Ai Tukutuku 1:1). Ni o wilika na Josefa Simici—Ai Tukutuku 1:1–26, na cava e vaqaqacotaka na nomu ivakadinadina me baleta na nona ilesilesi vakalou?

Raica talega na Ira na Yalododonu, 1:3–19.

Josefa Simici—Ai Tukutuku 1:5–25

Au na ciqoma vakacava na isau ni noqu masu?

Sa bau dua na gauna e “lailai na vuku” vei iko se o veilecayaki me baleta edua na vakatulewa e gadrevi mo cakava? (Josefa Simici—Ai Tukutuku 1:13). Na veika a sotava o Josefa Simici ena 1820 sa rawa ni dua na iwalewale vinaka mo rawata kina na nomu ivakatakila yadua. Me ivakaraitaki, ni o vakasaqaqara ena Josefa Simici—Ai Tukutuku 1:5–25, vakaraica na veika sotavi o rawa ni sema kina. Na cava o sa vulica baleta na:

• Nona vakavakarau o Josefa ki na dua na gauna vakatabui ni masu? (raica na tikina e 8, 11, 14–15).

• iTavi ni vulici ni ivolanikalou ena vakasaqarai ni ivakatakila? (raica na tikina e 11–12).

• Cava mo cakava ni o sotava na veisaqasaqa? (raica na tikina e 15–16, 21–26).

• Ciqomi kei na cakacakataki ni isaunitaro o ciqoma? (raica na tikina e 18–25).

Sureta na veiwasei. Na vakasaqaqara ena ivolanikalou e sureta na veivakauqeti maivua na Yalo Tabu. Na wasei ni veivakauqeti oqo e rawa ni sureta na Yalo Tabu me vakadinadina vei ira na tani, ka vakakina vei koya e veiwasei tiko.

Na cava eso tale na ikuri ni vakasama o rawa ni rawata mai na itukutuku nei Peresitedi Henry B. Eyring “Na iMatai ni Raivotu: E Dua na iVakarau ni iVakatakila Yadua”? (Liaona, Fepe. 2020, 12–17).

Sa rawa talega mo vaqara eso tale na ivakaraitaki ena ivolanikalou baleti ira na tamata era veitaratara kei na Kalou. Na iyaloyalo ena iVola ni iYaloyalo Vakosipeli se so tale na ivola ni Lako Mai, Mo Muri Au e rawa ni solia vei iko eso na vakasama. Tovolea mo sauma na taro e volai mai cake me baleta na ivakaraitaki yadua o kunea. Na cava soti o sa bau vakila ena nomu ciqoma na isau ni masu? Na cava o rawa ni cakava mo vukei ira kina na tani me ra sotava talega na veika vinaka?

Raica talega na Russell M. Nelson, “Mo Rogoci Koya,” Liaona, Me 2020, 88–92.Topics and Questions, “Personal Revelation (iVakatakila Yadua),” Gospel Library.

Josefa Simici—Ai Tukutuku 1:15–20

O Josefa Simici a raica na Kalou na Tamada kei Na Luvena, o Jisu Karisito.

A vakabauta o Josefa Simici ni na sauma na nona masu na Kalou, ia a sega ni namaka na sala ena veisautaka kina na nona bula kei na vuravura—na isaunitaro oya. Ni o wilika na veika a sotava o Josefa, vakasamataka vakatitobu na sala esa veisautaka kina na nomu bula nai Matai ni Raivotu.

Me ivakaraitaki, na iMatai ni Raivotu a vakatakila e vica na dina me baleta na Kalou na Tamada kei na Luvena, o Jisu Karisito, ka duidui mai na veika era vakabauta e vuqa na tamata ena gauna nei Josefa Simici. Ni o wilika na Josefa Simici—Ai Tukutuku 1:15–20, nanuma mo vola na veisala duidui eso me vakacavari kina e dua na iyatuvosa vakaoqo: “Baleta ni a yaco na iMatai ni Raivotu, au kila ni …”

Na cava o vakila ni o vakasamataka vakatitobu na veika a sotava o Josefa kei na veika kece a yaco kina?

Raica talega na “Ask of God: Joseph Smith’s First Vision (Kerea vua na Kalou: iMatai ni Raivotu nei Josefa Simici)” (vidio), Gospel Library; “Matai Ni Masu Nei Josefa Simici,” Serenilotu, naba 14.

Kerea vua na Kalou: Matai ni Raivotu nei Josefa Simici

Yaloyalo lekaleka ni Tukutuku Makawa ni Lotu ni Matai ni Raivotu nei Josefa Simici, oka kina na itukutuku matailalai baleti Josefa Simici.

Tiki ni droini mai na If Any of You Lack Wisdom [Kevaka E Dua sa Lailai Vua na Vuku], mai vei Walter Rane

Josefa Simici—Ai Tukutuku 1:15–20

Cava na vuna era duidui kina na itukutuku ni Matai ni Raivotu?

Ena gauna ni nona bula, a vola vaka va o Josefa Simici na veika a sotava ena Veikau Tabu, ena nona dau vakayagataka edua na vunivola. Me kena ikuri, e vica tale na itukutuku a volai mai vei ira na tamata era a rogoci Josefa ni tukuna na nona raivotu. E dina ga ni ra duidui na itukutuku oqo ena so na tikina, vakatau vua ka vola, o ira na rogoca, kei na ituvaki, ia era veisotari vinaka sara. Ka vakuri ki na veitukutuku yadua na veika matailalai eso ka vukei keda meda kila vinaka na veika a sotava o Josefa Simici, me vaka ga na kena vukei keda na va na Kosipeli ni Veiyalayalati Vou meda kila vakamatata na ilesilesi ni iVakabula.

Raica talega na Topics and Questions (Ulutaga kei na Taro), “iTukutuku ni Matai ni Raivotu,” Gospel Library.

Josefa Simici—Ai Tukutuku 1:21–26

Au rawa ni dina tikoga ki na ka au sa kila, veitalia ke ra vakanadakui au na tani.

Ni oti nonai Matai ni Raivotu vakasakiti, o Josefa Simici a vinakata sara ga me wasea na veika a sotava vei ira na tani. A kurabuitaka o koya na veisaqasaqa a sotava. Ni o wilika na nona itukutuku, na cava e vakauqeti iko mo dinata tikoga na nomu ivakadinadina? Na ivakaraitaki cava tale eso—mai na ivolanikalou, maivua edua na qase e liu, se tamata o kila—e sa vakayaloqaqataki iko mo dinata tikoga na veika vakayalo o sa sotava?

Raica talega na Gary E. Stevenson, “Na Susugi kei na Wasei ni Nomu iVakadinadina,” Liaona, Nove. 2022, 111–14.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Josefa Simici—Ai Tukutuku 1:3–14

A sa vakarautaki tu mai o Josefa Simici me dua na parofita ni Kalou.

• Na vulici ni nona bula vakaitabagone o Josefa Simici sa rawa ni vukei ira na luvemu mera sema kina vei koya nira vuli mai na veika a sotava. Sa rawa mera taura tu edua na itaba kei Josefa Simici ka wasea na veika era kila me baleti koya. Kevaka e gadrevi, e rawa ni o vakuria eso na ka dina me baleti koya mai na Josefa Simici—Ai Tukutuku 1:3–14 (raica talega na “Wase e 1: Josefa Simici kei na Nona Matavuvale,” ena iTukuni mai na Vunau kei na Veiyalayalati, 6–8, se na kena vidio ena Gospel Library). Na cava a sotava o Josefa ka a vukei koya me vakarautaki koya me yaco me dua na parofita? Na cava beka e rawa ni vakarautaki keda tiko kina na Kalou meda cakava?

  Chapter 1: Joseph Smith and His Family: 1805–1820

Tiki ni droini mai na Joseph Smith’s First Vision [iMatai ni Raivotu nei Josefa Simici], mai vei Greg K. Olsen

Josefa Simici—Ai Tukutuku 1:10–13

Sa rawa ni sauma na Kalou na noqu taro mai na ivolanikalou.

• Vakasamataka mo vakaraitaka vei ira na luvemu e vica vata na ivola, oka kina na ivolanikalou. Vukei ira me ra vakasamataka na taro ka rawa ni saumi mai vei ira na ivola oqo. Qai wilika vata na Josefa Simici—Ai Tukutuku 1:10–11 me kunei kina na taro cava soti a tiko vei Josefa Simici kei na isau ni taro cava a kunea o koya ena ivolanikalou.

• Ena rawa nira kunea na nomu gone na veivosa eso ena tikina e 12 ka vakamacalataka na kena tarai Josefa na wiliki ni Jemesa 1:5 . Sa qai rawa mo dou veiwaseitaka vakai kemudou na veika dou sotava ka a vakauqeti mai na dua na tiki ni ivolanikalou. Sa rawa talega mo dou lagata vata edua na sere me baleta na wili ivolanikalou, me vaka na “Vaqaqara ka Masu” (iVolanisere ni Gonelalai, 66). Na cava e vakavulica na sere me baleta na vuna eda wilika kina na ivolanikalou?

Josefa Simici—Ai Tukutuku 1:10–17

Sa dau rogoca ka sauma na Tamada Vakalomalagi na noqu masu.

• Me tekivutaki e dua na veivosaki me baleta na sala eda veitaratara kina kei na Tamada Vakalomalagi, sa rawa vei iko kei ira na nomu gone mo dou veitarogi vakaikemudou ena kena vakayagataki na iwalewale eso ni veitaratara, me vaka na vakau itukutuku ena talevoni, qiri ena talevoni, se dua na ivola volai. Eda na taroga vakacava na taro vua na Tamada Vakalomalagi? Eda na vakaraitaka vakacava Vua ni da lomani Koya ka dokai Koya ena noda masu? Wilika vata na Josefa Simici—Ai Tukutuku 1:16–19 ka veivosakitaka na sala a sauma kina na Tamada Vakalomalagi na masu nei Josefa Simici. Sa qai rawa vei iko kei ira na nomu gone mo dou wasea na veika a sotavi ena gauna dou a kerea kina vua na Kalou na veivuke ka ciqoma e dua na kena isau.

Josefa Simici—Ai Tukutuku 1:17–19

A raica o Josefa Simici na Tamada Vakalomalagi kei na Luvena, o Jisu Karisito.

• Era na taleitaka beka na gonelalai me ra tucake ka dodoliga tu me vaka na veivunikau ena Veikau Tabu ni o tukuna tiko vei ira na iMatai ni Raivotu. Kerei ira na gone mera sua me vaka era liwavi cagi tiko ni o vosa tiko me baleta nona masu o Josefa. Qai kerei ira me ra tu vakadua ka vagagalu ni o tukuna vei ira na rairai mai nei Tamada Vakalomalagi kei Jisu vei Josefa.

• O ira na gone qase cake e rawa ni ra taleitaka me ra vakayagataka e dua se sivia na iyaloyalo ena ituvatuva oqo mera tukuna vei iko na veika era kila me baleta na iMatai ni Raivotu. Vakayaloqaqataki ira mera raica na Josefa Simici—Ai Tukutuku 1:14–17 ka wasea na nodra nanuma kei na veika e vakilai me baleta na veika a sotava o Josefa (raica talega na “Wase e 2: iMatai ni Raivotu nei Josefa Simici,” ena iTukuni mai na Vunau kei na Veiyalayalati, 9–12, se na kena vidio ena Gospel Library).

  Chapter 2: Joseph Smith’s First Vision: 1820

Me baleta na vakasama tale eso, raica na ilavelave ni vula oqo ni mekasini na iTokani .

Truth Restored [Vakalesui Mai na Dina], mai vei Leon Parson