Tiki ni droini mai na He Called Me by Name [E Kacivi Au o Koya ena Yacaqu], mai vei Michael Malm

20–26 ni Janueri: “Ena Gole na Lomadra na Gone vei Ira na Nodra Qase”

Vunau kei na Veiyalayalati 2; Josefa Simici—Ai Tukutuku 1:27–65

A sa oti yani e tolu na yabaki mai na gauna a rairai kina vei Josefa Simici ena loma ni veikau na Kalou na Tamada kei na Luvena, o Jisu Karisito, ka se sega ni ciqoma tale o Josefa e dua na ikuri ni ivakatakila mai na gauna oya. A tekivu me lomatarotarotaka se sa rarawataki koya beka na Turaga. Me vakataki keda ga, a caka cala o koya, ka vakila ni sa cudruvi kina. Ia se tu e dua na cakacaka mai vua na Kalou me vakayacora o koya. Ia na cakacaka a kacivi kina o Josefa me cakava esa semati tiko ki na ka e kerea vei keda na Kalou. O Josefa ena kauta mai na iVola i Momani; eda sa sureti meda wasea na kena itukutuku. O Josefa ena ciqoma na idola ni matabete me vagolea na lomadra na gone vei ira na nodra qase; eda sa rawa ni ciqoma oqo na cakacaka vakalotu baleti ira na noda qase e liu e valetabu. A tukuni vei Josefa na parofisai eso ka sa na vakarau vakayacori sara ga; eda kacivi meda veivuke ena kena vakayacori na veiparofisai oqo. Ni da vakaitavi ena cakacaka ni Kalou, e rawa ni da namaka me da sotava na veisaqasaqa kei na veivakacacani sara mada ga, me vaka a sotava na Parofita. Ia e rawa talega ni da vakabauta ni na cakava na Turaga me da nona liga ni cakacaka, me vaka a cakava vei Josefa.

Raica talega na Ira na Yalododonu, 1:20–48.

Vakasama eso ni Vuli e Vale kei na Lotu

Josefa Simici—Ai Tukutuku 1:27–33

E tiko vua na Kalou edua na cakacaka meu cakava.

Edua na ka me da vakabauta ni tiko vua na Kalou edua na cakacaka me cakava o Josefa Simici—e rawa nida railesuva na nona bula ka raica vakamatata na veika sa rawata. Ia o sa bau vakasamataka beka ni tiko talega vua na Kalou edua na nomu cakacaka? Ni o wilika na Josefa Simici—Ai Tukutuku 1:27–33, vakasamataka se cakacaka cava mada oya. Ena veivuke vakacava ki na tomani tiko ni Vakalesui Mai ni kosipeli ni iVakabula?

O Elder Gary E. Stevenson e vakavulica: “Ni da lako mai vei Karisito ka vukei ira na tamata mera kitaka vakakina, eda sa vakaitavi tiko ena cakacaka ni veivakabulai kei na bula vakacerecerei ni Kalou, ka vakanamata tiko ki na itavi e lesi vakalou. … Na itavi oqo e rawarawa, veivakayarayarataki, veivakauqeti, ka rawa ni caka. Sai ira oqo:

• Bulataki ni kosipeli i Jisu Karisito

• Nodra vukei o ira era gadreva tu na veivuke

• Sureti ira na tamata kecega me ra ciqoma na kosipeli

• Vakaduavatataki ni matavuvale ki na tawamudu” (“Rawarawa ka Totoka—Totoka qai Rawarawa,” Liaona, Nove. 2021, 47).

Vakasamataka vakatitobu na veika o sa sotava oti nio vakaitavi ena veiitavi lesi vakalou oqo. Na cava beka ena vinakata na iVakabula mo cakava tarava oqo? E tiko e dua na tabana ni Topics and Questions (Ulutaga kei na Taro) me baleta na itavi yadua oqo (raica na “Our Role in God’s Work of Salvation and Exaltation (Na Noda iTavi ena Nona Cakacaka ni Veivakabulai kei na Vakacerecerei na Kalou),” Gospel Library). Ena rawa mo vakadikeva na veitabana oqo me vukei iko mo sauma na taro oqo.

Ena so na gauna ona vakila beka ni Turaga e sega ni rawa ni vakayagataki iko ena vuku ni cala o a cakava. Na cava eda vulica mai na ka a sotava o Josefa Simici ena Josefa Simici—Ai Tukutuku 1:28–29? O na kila vakacava na vanua o “ tu kina e mata ni [Kalou]”?

Taroga na taro e vakauqeta na veivosaki e vakaibalebale cake. Na taro ka dau levu na kena isau dodonu e sureti ira na vakavulici mera sauma na taro ka yavutaki ena nodra vakanananu vakayadua, na ka era vakila, kei na veika era sa sotava oti. Na taro ena ituvatuva oqo era sa ivakaraitaki ni ka oqo.

Raica talega na “Youth Responsibility in the Work of Salvation (Na iTavi ni iTabagone ena Cakacaka ni Veivakabulai)” (vidio), ChurchofJesusChrist.org; “Na Cakacaka ni Veivakabulai kei na Bula Vakacerecerei,” iVoladusidusi Raraba, 1.2.

Youth Responsibility in the Work of Salvation

Elder Bednar wants the youth to recognize that recent adjustments to Young Women classes and Aaronic Priesthood quorums give them operational and executional responsibility in the work of salvation. When the youth are focused, miracles will come.

Josefa Simici—Ai Tukutuku 1:34–47

Na iVakabula sa mai vakavotukanataka na parofisai eso mai na veigauna makawa ena Nona vakalesuya mai na Nona kosipeli.

Ni a rairai o Moronai vei Josefa Simici, e a cavuvosataka e vica na parofisai mai na Veiyalayalati Makawa kei na Veiyalayalati Vou, me vakataka na Aisea 11; Cakacaka 3:22–23; kei na Joeli 2:28–32. Ni o wilika na Josefa Simici—Ai Tukutuku 1:34–47, vakasamataka na vuna a rairai bibi kina vei Josefa me kila na veiparofisai oqo. Cava na vuna e sa bibi kina vei iko mo kila?

E rawa talega ni o wilika na veika a vakavulica o Elder David A. Bednar me baleta na imatai ni nona sikovi Josefa Simici o Moronai “Ena Kaukauwa ni Kalou ena Lagilagi Cecere” (Liaona, Nove. 2021, 28).

Ena Kaukauwa ni Kalou ena Lagilagi Cecere

E vakavulica o Elder Bednar ni da rokova na noda veiyalayalati ena vukea meda ciqoma na kaukauwa ni bula vakalou ena noda bula.

Raica talega na “Agilosi mai Cake.” Serenilotu, naba 8.

Josefa Simici—Ai Tukutuku 1:48–60

Ena vakarautaki au na Kalou meu cakacaka ena Nona matanitu.

A se qai yabaki 17 ga o Josefa ena imatai ni gauna a raica kina na peleti koula. Era a sega ni soli vua me maroroya, me yacova, ni oti e va na yabaki. Wilika na Josefa Simici—Ai Tukutuku 1:48–60, ka vaqara na ka a yaco ena bula nei Josefa ena gauna vata oya. Na cava na nomu nanuma ni veika a yaco oqo e a vakarautaki koya ki na cakacaka a kacivi koya kina na Kalou me cakava? Na cava soti o sa sotava ka sa vakarautaki iko mo qarava kina na Kalou kei ira na tani? Na cava o sa sotava tiko ena gauna oqo e rawa ni vukei iko mo vakavakarau ki na veiqaravi mai muri?

Delana o Kumora, mai vei Al Rounds

Vunau kei na Veiyalayalati 2

A talai Ilaija mai na Turaga me vagolea na yaloqu vei ira na noqu qase e liu.

Na cava e vakavulica vei iko na vosa eso vaka na “tea,” “lomadra,” kei na “vagolea” ena iwase oqo me baleta na ilesilesi i Ilaija kei na veivakalougatataki ni idola ni matabete a vakalesuya mai okoya? O sa vakila vakacava na vagolei ni lomamu vei ira na nomu qase e liu? Vakasamataka na sala eso o rawa ni vakila vakawasoma kina na veika oqori. Nodra vakasaqarai na nomu qase e liu kei na qaravi ni cakacaka vakalotu ena vukudra e valetabu sa dua na sala (raica na FamilySearch.org). Na cava eso tale na sala o rawa ni vakasamataka?

Raica talega na Vunau kei na Veiyalayalati 110:13–16; Gerrit W. Gong, “Marau ka Tawamudu,” Liaona, Nove. 2022, 83–86.

Me baleta na vakasama tale eso, raica na ilavelave ruarua ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Josefa Simici—Ai Tukutuku 1:28–29

Au rawa ni veivutuni meu vosoti.

• Eda dau vakila ena so na gauna ni da “cudruvi ena vuku ni [noda] malumalumu kei na itovo tawakilikili,” me vaka a yaco vei Josefa Simici. Sa rawa mo dou vulica vata kei ira na nomu gone na Josefa Simici—Ai Tukutuku 1:29 ka vakasaqara na veika a cakava o Josefa ni vakila na veika vaka oya. Na cava eda rawa ni vulica mai na nona ivakaraitaki ka rawa ni vukei keda nida caka cala? Na cava e bibi kina me kilai ni o Josefa a kacivi maivua na Kalou dina ga ni a se sega ni vinaka sara?

Josefa Simici—Ai Tukutuku 1:27–54

A kacivi Josefa Simici na Tamada Vakalomalagi me veivuke ena vakayacori ni Nona Cakacaka.

• E rawa ni taleitaka na nomu gone me ratou matanataki Josefa Simici ni o tukuna tiko nai talanoa ni veisiko nei Moronai ena Josefa Simici—Ai Tukutuku 1:27–54 se “Wase e 3: Na Agilosi o Moronai kei na Peleti Koula” (ena iTukuni mai na Vunau kei na Veiyalayalati, 13–17, se na kena vidio ena Gospel Library). Me ivakaraitaki, e rawa niratou roqoliga me vaka niratou masu tiko se matanataka niratou kabata tiko na Delana o Kumora, kei na so tale. Sa rawa mo qai kerei iratou meratou veivosakitaka na ka a kacivi Josefa Simici kina na Kalou me cakava kei na sala eda sa vakalougatataki kina ena vuku ni ka oya. Me ivakaraitaki, eda sa vakalougatataki vakacava baleta nona vakadewataka o Josefa Simici na iVola i Momani? Sa vukei keda vakacava na nona cakacaka meda toro voleka kina vua na Tamada Vakalomalagi kei Jisu Karisito?

Vunau kei na Veiyalayalati 2

Sa vinakata tu na Tamada Vakalomalagi me ra vauci na matavuvale ena valetabu.

• Ena rawa beka ni dou sarava vata kei ira na nomu gone eso na itaba ni nomudou matavuvale, ke rawa me oka talega kina e dua na taba ni nomudou matavuvale ena dua na valetabu (se raica na iVola ni iYaloyalo Vakosipeli, naba 120). Sa rawa mo dou qai wilika na Vunau kei na Veiyalayalati 2 ka veiwaseitaka vakai kemudou na nomudou nanuma me baleta na vuna era tiko kina vei keda na valetabu kei na vuna e vinakata kina na Tamada Vakalomalagi me ra duavata tawamudu na matavuvale. Vakasamataka me lagati vata na “Rawa Ni Tawamudu Na Vuvale” (Sere ni Lotu, 184). Na cava e tukuni ena sere oqo eda rawa ni cakava me da tiko vata kina kei na noda matavuvale me tawamudu?

Valetabu e Palmyra Niu Ioka

Vunau kei na Veiyalayalati 2

Sa rawa ni vakamarautaki au na vulici ni veika me baleti ira na tubuqu.

• E rawa nira marautaka ka vakila na gone lalai na rekitaki ni tuva kawa. Me veivuke vei ira, e rawa ni o wasea na italanoa se kedra iyaloyalo na nomu qase e liu. Veitalanoa kei ira na luvemu me baleta se a vakacava tu na bula vei ira na nodra qase e liu nira a se gonelalai. Era na rawa talega ni marautaka na luvemu eso na itaviqaravi ni tuva kawa ena FamilySearch.org/discovery.

Me baleta na vakasama tale eso, raica na ilavelave ni mekasini na iTokani ni vula oqo.

Joseph Receives the Plates [Ciqoma o Josefa na Peleti], mai vei Gary E. Smith