27 ni Janueri–2 ni Feperueri: “Na Noqu Cakacaka ena Vakayacori Ga”

Vunau kei na Veiyalayalati 3–5

E a se sega ni kila na veika kece me baleta na “cakacaka veivakurabuitaki” a lesi me cakava o Josefa Simici ena imatai ni vica nona yabaki vaka parofita ni Turaga. Ia e dua na ka a vakavulica vua na veika a sotava taumada oya me vakayacori na cakacaka ni Kalou, na matana me sa “vakatabakidua ki na lagilagi ni Kalou” (Vunau kei na Veiyalayalati 4:1, 5). Me kena ivakaraitaki, kevaka e vakasalataki koya na Turaga me cakava e dua na ka ka sega ni vakadeitaka o koya ni via cakava, ena gadrevi vua me muria na ivakasala ni Turaga. Ia kevaka sara mada ga e “levu na nona ivakatakila …, ka tiko vua na kaukauwa me vakayacora kina na cakacaka kaukauwa e vuqa,” ke vakila ni ka e vinakata a bibi cake mai na lewa ni Kalou, sa “na bale vakaidina” (Vunau kei na Veiyalayalati 3:4). Ia a vulica o Josefa e dua tale na ka e bibi talega ena cakacaka ni Kalou: “Na Kalou sa rui yalololoma,” ia kevaka sa veivutuni vakaidina o Josefa, o koya ena “digitaki tikoga” (tikina e 10). Na cakacaka ni Kalou, e rui bibi, baleta ni cakacaka ni veivueti. Ka na “sega ni rawa ni dua e tarova” na cakacaka oqori (tikina e 1).

Vakasama eso ni Vuli e Vale kei na Lotu

Vunau kei na Veiyalayalati 3:1–16

Au rawa ni vakararavi vua na Kalou.

Ena itekivu ni veiqaravi nei Josefa Simici, a dredre sara me kunei na itokani vinaka—vakabibi na itokani me vakai Matini Erisi, e dua na tamata dokai, rawati koya, ka vakayacora na solibula levu me tokona na cakacaka nei Josefa. Ia ni kerea o Matini na veivakadonui me vakaraitaka na imatai ni 116 na draunipepa volai ni ivakadewa ni iVola i Momani vei watina, a vinakata sara ga o Josefa me rokova na nona kerekere, e dina ga ni a vakarota na Turaga me kua ni cakava. Ka ni rarawa, ni a yali na draunipepa e ligai Matini, ka rau a cudruvi vakaukauwa mai vua na Turaga o Josefa kei Matini (raica na Ira na Yalododonu, 1:51–53).

Ni o wilika na Vunau kei na Veiyalayalati 3:1–15, vakasamataka vakatitobu na veika e vinakata na Turaga mo vulica mai na veika erau a sotava. Me ivakaraitaki, na cava o sa vulica me baleta:

• Na cakacaka ni Kalou? (raica na tikina e 1–3, 16).

• Na isau ni rerevaka na tamata ka sega ni vakararavi vua na Kalou? (raica na tikina e 4–8).

• Na veivakalougatataki e yaco mai ni da yalodina tikoga? (raica na tikina e 8).

• Na sala a vakadodonutaki Josefa ka vakauqeti koya kina na Turaga? (raica na tikina e 9–16).

Ena nona itukutuku o Elder Lynn G. Robbins ena “O Qara Tu iVei?,” e solia o koya e vuqa na ivakaraitaki mai na ivolanikalou ni tamata era dau rerevaka na Kalou kei ira na tamata era dau soro ki na veivakasaurarataki mai vei ira tale eso (Liaona, Nove. 2014, 9–11). Navuca mo wilika na ivakaraitaki eso oqo ena ivolanikalou e tukuna tiko o koya. Na cava o vulica rawa mai na ivakaraitaki eso oqo? Na cava soti o sa bau sotava ena nomu vakararavi vua na Turaga nio sotava na veivakasaurarataki mo cakava e dua na ka duidui? Na cava a qai yaco mei isau ni veika o a cakava?

Raica talega na Dale G. Renlund, “E Dua na iTuvatuva ni iVakatakila ni Tamata Yadua,” Liaona, Nove. 2022, 16–19; “The Contributions of Martin Harris,” ena Revelations in Context (2016), 1–9; Topics and Questions [Ulutaga kei na Taro], “Seeking Truth and Avoiding Deception [Vakasaqara na Dina ka Levea na Veivakacalai],” Gospel Library; “Lawa Ni Turaga,” Serenilotu, naba 69.

Vunau kei na Veiyalayalati 4

Au rawa ni qarava na Kalou ena yaloqu taucoko, igu, vakasama kei na kaukauwa.

Na wase e 4 edau vakayagataki wasoma vei ira na daukaulotu tudei. Ia, e taleitaki ni da kila ni a soli taumada na ivakatakila oqo vei Josefa Simici Levu, ka a sega ni kacivi ki na kaulotu ia a “gadreva me qarava na Kalou” (tikina e 3).

E dua na sala me wiliki kina na iwase oqo oya me raitayaloyalotaki me vaka e dua na ivakamacala ni cakacaka vua e dua e gadreva me veivuke ena cakacaka ni Turaga. Na cava e vakasaqara tiko na Turaga? Na veika yaga cava soti e vakarautaka tu o Koya?

Na cava o sa vulica me baleta na veiqaravi vua na iVakabula mai na ivakatakila oqo?

E vakatoka o Peresitedi Russell M. Nelson na vakasoqoni vata nei Isireli me “bolebole levu duadua, na inaki cecere duadua, kei na cakacaka cecere duadua e vuravura” (“Nuinui nei Isireli” [lotu ni itabagone ni vuravura raraba, June 3, 2018], Gospel Library). Na cava o kunea ena nona vosa e vakauqeti iko mo vakaitavi ena cakacaka oqo?

O ira kece e tiko na nodra gagadre mera qarava na Kalou era kacivi ki na cakacaka.

Vunau kei na Veiyalayalati 5

Au rawa ni rawata edua na ivakadinadina ni iVola i Momani, mai vua na Yalo Tabu.

Ena Maji ni 1829, e a veilewaitaki Josefa Simici kina o Lusi na wati Matini Erisi ena nona tukuna nio Josefa a vakacalai ira tiko na tamata ni kaya tiko ni a vakadewataka tiko na peleti koula (raica na Yalododonu, 1:56–58). A mani tarogi Josefa kina o Matini me raica eso tale na ivakadinadina nira tiko dina na peleti koula. Na Vunau kei na Veiyalayalati 5 e dua na ivakatakila me isau ni kerekere nei Matini. Na cava o sa vulica mai na wase oqo me baleta na veika ka koto e ra:

• Na ka e tukuna na Turaga ni na yaco kevaka a vakaraitaki na peleti koula me raica o vuravura (raica na Vunau kei na Veiyalayalati 5:7). Cava na vuna o nanuma ni na vakakina?

• Na nodra itavi na ivakadinadina ena cakacaka ni Turaga (raica na tikina e 11–15; raica talega na 2 Korinica 13:1).

• Na sala mo rawata kina e dua na ivakadinadina ni iVola i Momani vakataki iko (raica na tikina e 16, 24; raica talega na Moronai 10:3–5).

Vunau kei na Veiyalayalati 5:1–10

O Jisu Karisito a solia vei keda na Nona vosa mai vei Josefa Simici.

Na cava e vakavulica vei iko na Vunau kei na Veiyalayalati 5:1–10 me baleta na itavi nei Josefa Simici ena noda gauna oqo—ka vakakina ena nomu bula? (Raica talega na 2 Nifai 3:6–24.)

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 3:5–10; 5:21–22

Au rawa ni digitaka na dodonu ni ra saga na tani meu caka cala.

• Me tekivutaki e dua na veivosaki me baleta na vulici ni vakararavi vua na Tamada Vakalomalagi, o na gadreva beka mo railesuva na italanoa ni draunipepa volai ka yali (raica na iTukuni mai na Vunau kei na Veiyalayalati, 18–21). Ena qai rawa mo matanataka kei ira na nomu gone na ituvaki eso era na rawa ni temaki kina me ra cakava e dua na ka era kila ni sega ni dodonu. Na vosa se malanivosa cava ena Vunau kei na Veiyalayalati 3:5–8; 5:21–22 e rawa ni vukei ira ena ituvaki vakaoqo?

  Chapter 4: Martin Harris and the Lost Pages: 1827–1828

Vunau kei na Veiyalayalati 4

Sa sureti au na Turaga meu veivuke ena Nona cakacaka.

• Na veitikina yadua ena Vunau kei na Veiyalayalati 4 e tiko kina na dina talei ka na rawa ni vukei ira na luvemu mera vulica na veiqaravi vua na Kalou. Oqo eso na vakasama me vukei ira mera kunea na veidina oqo:

  • Sa rawa mo ni wilika vata na Vunau kei na Veiyalayalati 4:1 ka vakaraitaka na iyaloyalo e dusia na cakacaka “veivakurabuitaki” ni Kalou ena gauna oqo (me vakataki ira na daukaulotu, na valetabu, kei na iVola i Momani).

  • O ira na nomu gone era rawa ni vakasamataka na ivukivuki eso se droinitaka na iyaloyalo e tukuni tiko ena malanivosa “qaravi koya ena yalomudou taucoko, igu, vakasama kei na kaukauwa” (Vunau kei na Veiyalayalati 4:2).

  • E rawa ni o ni raica vata na iyaya ni cakacaka e dau vakayagataki ena cakacaka ena dua na were. E vukei keda vakacava na veiyaya oqo? Era qai rawa ni vakaraica na luvemu eso na ka ena Vunau kei na Veiyalayalati 4:5–6 era vaka na iyaya ni cakacaka me caka kina na cakacaka ni Kalou.

  • O ira na gone qase cake era rawa ni vaqaqara vakai ira ena Vunau kei na Veiyalayalati 4 ka cakava e dua na ituvatuva ni veika era sa vulica me baleta na cava na ibalebale ni qaravi Kalou.

  • E rawa moni lagata vata e dua na sere baleta na cakacaka ni kaulotu, me vaka na “Au Bole Meu sa Kaulotu Edai” (iVolanisere na Gonelalai, 90).

Au rawa ni veivuke ena cakacaka ni Kalou ena noqu qaravi ira na tani.

Moica na itaviqaravi eso me okati ira na vakaleqai tu vakayago. Na moici vakalailai ni itaviqaravi eso ena rawa ni vakadeitaka ni na soli vei keda kece sara na madigi meda vuli. Me vaka oqo, ke dua na itaviqaravi e vakatura me vakaraitaki e dua na iyaloyalo, e rawa moni lagata e dua na sere me kena isosomi mera okati mai kina o ira e vakaleqai tu na nodra rai.

Vunau kei na Veiyalayalati 5:1–7, 11, 16, 23–24

Sa rawa niu dua na ivakadinadina ni sa dina na iVola i Momani.

• Mera vakavulici na nomu gone me baleti ira na ivakadinadina, e rawa ni o kerei ira mera raitayaloyalotaka ni tukuna vei ira e dua na itokani nira raica e dua na pusi ni lako tiko ena yavana e liu. Era na vakabauta beka? Vakacava ke a kaya e dua tale na itokani na ka vata ga o ya? Veivosakitaka se cava na “ivakadinadina” kei na vuna era bibi kina na ivakadinadina. Mo qai vukei ira na nomu gone mera vakasaqara ena Vunau kei na Veiyalayalati 5:1–3, 7, 11 na isau ni taro vakaoqo:

  • Na cava a vinakata o Matini Erisi me kila?

  • E rawa ni vakaraitaka vei cei o Josefa Simici na peleti koula?

  • Na cava na vuna ena sega beka ni vakadeitaka kina edua ni dina na iVola i Momani ke raica na peleti?

  • Na cava eda rawa ni cakava me da ivakadinadina kina ni iVola i Momani? (raica na Vunau kei na Veiyalayalati 5:16; Moronai 10:3–5).

Me baleta na vakasama tale eso, raica na ilavelave ni mekasini na iTokani ni vula oqo.

Devastating Weight of 116 Pages [Na Bibi Veivakarusai ni 116 na Draunipepa], mai vei Kwani Povi Winder