Domo Eso ni Veivakalesui Mai

Ira Na iVakadinadina ni iVola i Momani

A vakaraitaka na agilosi o Moronai na peleti koula vei Josefa Simici, Oliva Kaudari, Tevita Witima, kei Matini Erisi ena loma ni veikau volekata na nodratou vale na Witima e Feiete, Niu Ioka. Rau a sikovi iratou tiko na Witima na itubutubu i Josefa ena gauna o ya. A vakamacalataka o Lusi Meki Simici, na tinai Josefa, na revurevu mana ni veika a sotavi oqo vei iratou na vakadinadina:

“Ena maliwa ni tolu kei na va na kaloko. O Mrs. Witima kei Mr. Simici kei au keitou a dabe toka ena dua na rumu ni moce. Au a dabe toka ena yasa ni loga. Ni curu ga mai o Josefa, a daberaki koya sobu sara e yasaqu. ‘Tamaqu! Tinaqu!’ a kaya o koya. ‘O drau sega ni kila na levu ni noqu marau. E sa vakavuna na Turaga me vakaraitaki na peleti ki na lewe tolu tale, ka ratou sa raica talega e dua na agilosi ka sa dodonu me ratou na vakadinadinataka na dina ni veika au a tukuna. Ni ratou sa kila vakataki ratou niu sega ni veilakoyaki voli me vakaisini ira na tamata. Kau vakila tu niu sa vakacegui mai na dua na icolacola vakadomobula, ka sa via sivia vei au meu vosota rawa. Ia eratou sa na cola oqo e dua na tikina, ka sa marau na yaloqu niu sa na sega tale ni tiko duadua voli e vuravura.’ E a qai curu mai o Matini Erisi. Ka vaka e vakasinaiti tu o koya ena reki vuabale. A qai vakadinadinataka o koya na veika a raica ka rogoca, me vakataki rau talega na rua, o Oliva kei Tevita. E a tautauvata na lewe ni nodratou ivakadinadina me vaka na kena e tu ena iVola i Momani. …

“O Matini Erisi duadua a vaka me sega sara ga ni rawa vua me biuta vakavosa na veika a vakila. A kaya o koya, ‘Au sa qai raica oqo e dua na agilosi mai Lomalagi ka a vakadinadinataka na dina ni veika kece au a rogoca me baleta na ivolatukutuku, kau sa raici koya ena mataqu. Au sa raica talega na peleti eso ka tarai ira e ligaqu ka sa rawa ni vakadinadinataka vakakina ki vuravura taucoko. Ia au sa ciqoma vakaiau e dua nai vakadinadina ka sega ni tukuni rawa, ni sega na yame e rawa ni vakamacalataka, ka’u sa vakalougatataka kina na Kalou ena yalodina mai vu ni yaloqu ni sa lako sobu mai o koya me vakarautaki au, io oi au, meu dua nai vakadinadina ni nona cakacaka kei na ituvatuva cecere ena vukudra [na] luve ni tamata.’ Erau a tomani koya talega o Oliva kei Tevita ena veivakacaucautaki bibi vua na Kalou ena vuku ni nona vinaka kei na loloma cecere. Keitou a lesu ki vale [ki Palimaira, Niu Ioka,] ena siga ka tarava vaka e dua na ilawalawa lailai mamarau ka reki voli.”

Oliva Kaudari, Tevita Witima, kei Matini Erisi

A tiko talega o Lusi Meki Simici niratou lesu mai na Lewe Walu na Vakadinadina mai na ka eratou a sotava:

“Ni oti na nodratou lesu ki vale nai vakadinadina oqo, a rairai tale na agilosi vei Josefa; ka ena gauna vata oya a solia tale kina vua na peleti o Josefa. Keimami a soqoni vata ena yakavi o ya, ka ra wasea kece kina nai vakadinadina na veika me vaka sa tukuni toka e cake; kei ira kece na neimami matavuvale, ka yaco sara vei Don Carlos [Simici], ka se qai yabaki 14 ga, a vakadinadinataka na dina ni itabagauna oqo—ni sa qai vakacurumi taucoko mai.”

ceuceu baleti Josefa Simici kei iratou na Lewe Walu na iVakadinadina

Me ikuri ni Tolu na iVakadinadina kei na Walu na iVakadinadina, o Meri Witima, na tinai Tevita Witima, a vakalougatataki talega me ivakadinadina ni peleti koula. A vakaraitaka vei koya na agilosi o Moronai me idole ni solibula a cakava o koya ena gauna eratou a tiko kina ena nona vale o Josefa, Ema, kei Oliva. “O sa yalodina tiko ka gugumatua ena nomu cakacaka,” a kaya vua o Moronai. “Sa dodonu kina, oqo, mo sa ciqoma e dua na ivakadinadina me vaqaqacotaki kina na nomu vakabauta.”

iDusidusi

1. Lucy Mack Smith, History, 1844–1845, ivola 8, 11 ki na ivola 9, 1, josephsmithpapers.org; vakavoui na matanivola lelevu kei na itoqa.

2. Lucy Mack Smith, History, 1845, 156–57, josephsmithpapers.org.

3. Ena Ira na Yalododonu, 1:70–71.