3–9 ni Feperueri: “Sai Koya Oqo na Yalo ni iVakatakila”

Vunau kei na Veiyalayalati 6–9

Ena vula i mago ni 1828, e dua na qasenivuli gone na yacana o Oliva Kaudari e a taura edua na cakacaka vakaqasenivuli e Menijesita, Niu Ioka, ka lai tiko vata kei na matavuvale nei Lusi kei Josefa Simici Levu. A sa rogoca oti o Oliva na veika vakasakiti me baleta na luvedrau tagane o Josefa, ia ko Oliva, ka raici koya me dua e vakasaqara tiko na dina, a vinakata me kila vakalevu cake. E rau a vakamacalataka na Simici na veisiko eso mai vei ira na agilosi, e dua na ivolatukutuku makawa, kei na isolisoli ni vakavakadewa ena kaukauwa ni Kalou. A rawai na yalo i Oliva. Ena rawa beka ni dina? E rau a soli ivakasala vua o Lusi kei Josefa Levu, na ivakasala vei ira kecega era vakasaqara tiko na dina: masu ka kerea na Turaga.

A cakava o Oliva, ka qai sauma na Turaga, “ni a vakaceguya na [nona] vakasama” (Vunau kei na Veiyalayalati 6:23). A kunea o Oliva, ni ivakatakila e sega walega ni yaco vei ira na parofita me vakai Josefa Simici. E baleti ira yadua era vinakata ka vakasaqara vagumatua. Se levu tiko ga na ka me vulica o Oliva, ia sa tiko vua eso na kila me taura o koya na ikalawa e tarava. A kila o koya ni Turaga a vakayacora tiko edua na ka bibi maivei Josefa Simici, ka vinakata o Oliva me tiki ni cakacaka oya.

Raica talega na Ira na Yalododonu, 1:58–64.

Days of Harmony

Witness Oliver Cowdery’s experience as Joseph Smith’s scribe during the translation of the Book of Mormon.

Vakasama eso ni Vuli e Vale kei na Lotu

Vunau kei na Veiyalayalati 6; 8–9

E dau vosa vei au na Tamada Vakalomalagi mai vua na Yalo Tabu.

Ena vula itubutubu ni 1829, a bole o Oliva Kaudari me vunivola nei Josefa Simici ena nona tomana tiko me vakadewataka na iVola i Momani. Na veika a sotava oqo a vakamarautaki koya, ka a nanuma de rawa talega ni vakalougatataki ena isolisoli ni vakavakadewa. Ia ena imatai ni nona tovolea, e a sega ni lako vinaka.

Kevaka o a sa bau kunea na dredre mo ciqoma se kila vakavinaka na ivakatakila, ena rawa beka mona vakila talega na veika a sotava o Oliva—ka vuli mai kina. Ni o wilika na Vunau kei na Veiyalayalati 6, 8, kei na 9, raica na veika a vakavulica na Turaga vei Oliva me baleta na ivakatakila yadua. Me kena ivakaraitaki:

• Na cava e vakatura na Vunau kei na Veiyalayalati 6:5–7; 8:1; 9:7–8 me baleta na veika e gadreva vei iko na Turaga ni bera ni vakatakila mai o Koya na Lomana?

• Na cava o vulica mai na Vunau kei na Veiyalayalati 6:14–17, 22–24; 8:2–3; 9:7–9 me baleta na sala duidui eso e yaco mai kina na ivakatakila? O na kila vakacava?

• Na cava tale o vulica me baleta na ivakatakila mai na vei iwase oqo?

Na veika a sotava o Oliva ena rawa ni vakavuna mo “nanuma lesu” na veigauna o a vakila kina ni vosa tiko vei iko na Turaga (Vunau kei na Veiyalayalati 6:22). O sa bau volaitukutukutaka beka na nomu nanuma se veika o vakila me baleta na veika sotavi oqo? Ke vakakina, nanuma mo wilika na veika o a vola. Ke sega, taura e dua na gauna mo vola kina na veika o nanuma rawa. Vakasamataka na sala e rawa ni o tomana tikoga kina mo vaqaqacotaki mai na veika oqo. Ena vakasama eso, raica na itukutuku nei Elder Neil L. Andersen “Balolo ni Vakanananu Vakayalo Veivakatakilai” (Liaona, Me. 2020, 18–22).

E vica vata na iliuliu ni Lotu era sa wasea na veika era sa kila ena ivakatakia ena vidio sokumuni ni“Hear Him”. Ni oti nomu sarava e dua se sivia vei ira na vidio oqo, o na vakauqeti beka mo vola na veika o sotava, ka wasea na ivakarau sa vosa kina vei iko na Turaga.

Raica talega na Topics and Questions [Ulutaga kei na Taro], “Personal Revelation [iVakatakila Yadua],” Gospel Library; “Oliver Cowdery’s Gift [iSolisoli nei Oliva],” ena Revelations in Context [Veika e Semati ki na iVakatakila], 15–19.

Vunau kei na Veiyalayalati 6:18–21, 29–37

Rai vei Karisito ena vakasama kece.

Sa kila tu na Turaga ni na sotava o Josefa Simici na “veituvaki dredre” ena veiyabaki mai liu (Vunau kei na Veiyalayalati 6:18). E kila talega o Koya na veivakatovolei sa tu ena nomu veisiga ni mataka. Na cava o kunea ena Nona ivakasala vei Josefa kei Oliva ena Vunau kei na Veiyalayalati 6:18–21, 29–37 e vukei iko mo vakararavi vei Koya?

Na cava na kena ibalebale me da “vakararavi vei [Karisito] ena vakasama kece”? (tikina e 36). Ena rawa vakacava mo vakayacora vagumatua na veika oqo—ena gauna vinaka kei na “veituvaki dredre”? Vakasamataka mada na ivakasala oqo mai vei Peresitedi Russell M. Nelson: “Sa dua na cakacaka bibi vakavakasama me segata meda vakararavi vei Koya ena vakasama kecega. Ia ni da vakayacora, ena dro tani na noda vakatitiqa kei na rere” (“Vagolea Mai na Mana nei Jisu Karisito ki na Noda Bula,” Liaona, 41).

Raica talega Neil L. Andersen, “A Taura tu na Lomaqu na Vakasama oqo me Baleti Jisu Karisito,” Liaona, Me 2023, 91–94.

Tiki ni droini mai na Behold My Hand [Raica na Ligaqu], mai vei Jeffrey Ward

Vunau kei na Veiyalayalati 6:29–37

“Kakua ni rere ni kitaka na ka vinaka”

Na cava na vuna eda dau “rere kina … ni kitaka na ka vinaka” ena so na gauna”? (tikina e 33). Na cava o kunea ena Vunau kei na Veiyalayalati 6:29–37 e solia vei iko na yaloqaqa mo caka vinaka? Vakasamataka mo lagata se vakarogoca e dua na serenilotu e vakauqeti iko mo yaloqaqa vei Karisito, me vaka na “Me da Sa Gu Tiko” (Serenilotu, naba 146).

Vunau kei na Veiyalayalati 6–7; 9:3, 7–14

“Me vaka ko sa gadreva mai vei au sa na vaka dina kina.”

Raica na levu ni gauna e rairai mai kina na vosa na “gadreva” se na “gagadre” ena wase e 6 kei na 7. Na cava o vulica mai na vei iwase oqo me baleta na kena bibi vua na Kalou na nomu gagadre? Tarogi iko ena nona taro na Turaga ena Vunau kei na Veiyalayalati 7:1: “A cava ko sa gadreva?”

E dua na gagadre dodonu nei Oliva Kaudari—me vakavakadewa me vakataki Josefa Simici—a sega ni vakayacori. Ni o wilika na Vunau kei na Veiyalayalati 9:3, 7–14, na veivauqeti cava so o ciqoma ka na rawa ni vukei iko ni sega ni vakayacori na nomu gagadre dodonu ena gauna oqo?

Raica talega na Vunau kei na Veiyalayalati 11:8; Dallin H. Oaks, “Gagadre,” Liaona, Me 2011, 42–45.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 6:5, 15–16, 22–23; 8:2; 9:7–9

Edau vosa vei au na Tamada Vakalomalagi mai vua na Yalo Tabu.

• Na dina a vulica o Oliva Kaudari me baleta na ivakatakila ki na tamata yadua e rawa ni vukei ira na nomu gone mera vakatorocaketaka na nodratou rawata me kila na Yalo Tabu. E rawa ni o vakayagataka na “Wase e 5: Josefa Simici kei Oliva Kaudari” (ena iTukuni mai na Vunau kei na Veiyalayalati, 22–25). Veiwaseitaka na nomu veitikina taleitaki mai na italanoa. Ni o cakava, vakabibitaka na veika a vakavulica na Turaga vei Oliva me baleta na sala ni kena rogoci na domo ni Kalou, ka wilika na veitikina veiwekani eso, me vaka na Vunau kei na Veiyalayalati 6:23 se 9:7–9.

  Chapter 5: Joseph Smith and Oliver Cowdery: February–April 1829

  

  A vulica o Oliva Kaudari na veika me baleta na ivakatakila ena nona a vukei Josefa Simici tiko me vakadewataka na iVola i Momani.

• E rawa nio sureti iratou na luvemu mera tara na uludra kei na seredra ni o wilika na vosa “vakasama” kei na “vu ni yalomu” ena Vunau kei na Veiyalayalati 8:2. Tukuna vei iratou na luvemu, mai na veika o sa sotava oti, se vakacava tu na kena vakilai ni vosa ki na nomu vakasama kei na vu ni yalomu na Yalo Tabu. Vukei iratou me kunea na isau ni taro “E dau vosa vakacava vei keda na Yalo Tabu?” ena veitikina oqo: Vunau kei na Veiyalayalati 6:15–16, 22–23; 8:2; 9:7–9.

Vakayagataka na italanoa eso. Na italanoa ena vukei ira na gone mera kila vakavinaka na ivakavuvuli ni kosipeli baleta nira vakaraitaka na sala era bulataka kina eso tale na tamata na veiivakavuvuli oqo. Ni o veivakavulici, raica na veisala eso mo okata kina na italanoa—mai na ivolanikalou, mai na itukutuku makawa ni Lotu, se mai na nomu bula—e vakaraitaka na ivakavuvuli era tiko ena ivolanikalou.

Vunau kei na Veiyalayalati 6:34

“Ena vuku i Jisu Karisito, au na “sega ni rere.”

• A kaya na Turaga vei Josefa kei Oliva, “Ni kakua ni rere, na qele ni sipi lalai” (Vunau kei na Veiyalayalati 6:34). Sa rawa mo sureti ira na luvemu mera cavuta vakavica vata kei iko na malanivosa oya. Era na marautaka talega mera matanataki ira tiko edua na qele ni sipi era rere tiko. Na cava era na rairai rerevaka tu na sipi? E rawa nio qai raica vata kei iratou na luvemu edua na iyaloyalo ni iVakabula me vaka e dua na ivakatawa (e dua e tiko ena mua ni ituvatuva oqo) ka veivosakitaka na sala edau wanonovi keda kina me vaka na nona dau wanonovi ira na Nona sipi edua na ivakatawa.

• Navuca mo vakatagitaka se dou lagata vata e dua na sere ni yaloqaqa, vaka na “Mo Bolea Mo Dina Tu” (iVolanisere ni Gonelalai, 80) se “Me Da sa Gu Tiko” (Serenilotu, naba 146). Na cava e vakavulica na sere me baleta na sala e vukei keda kina na iVakabula meda kakua ni rere?

Vunau kei na Veiyalayalati 6:36

Au rawa ni vakararavi vei Jisu Karisito ena vakasama kece.

• Ni oti na wiliki vata ni Vunau kei na Veiyalayalati 6:36, sa rawa nio cakava kei iratou na luvemu eso na droini me vukei kemudou mo dou nanuma me “vakararavi vei [Jisu Karisito] ena vakasama kece.” Veiwaseitaka vakaikemudou na nomudou droini, ka vukei iratou na luvemu me vakasamataka na vanua eso e rawa ni vakabi kina me rawa niratou dau raica vakawasoma.

Me baleta na vakasama tale eso, raica na ilavelave ni mekasini na iTokani ni vula oqo.

Sa Noqu iVakatawa ko Jiova, mai vei Yongsung Kim