iVakatakarakara ni imatai ni ivolavolai ni iVola i Momani

10–16 ni Feperueri: “Me Rawa Ni Nomu Na Qaqa”

Vunau kei na Veiyalayalati 10–11

Ni toso tiko na vakadewataki ni iVola i Momani, a basika cake edua na vakatataro: na cava me rau na cakava o Josefa Simici kei Oliva Kaudari me baleta na veidraunipepa ni ivakavakadewa a sa mai yali? E rawa ni vinaka me vakadewataki tale na tikina oya, ia a raica na Turaga edua na ka erau sega ni raica: era a nakita tiko na nodrau meca mera veisautaka na veivosa ena veidraunipepa oqori me vakatitiqataki kina na vakalou ni cakacaka nei Josefa. E a tiko edua na ituvatuva ni Kalou me levei kina na leqa oya me toso tikoga kina ki liu na cakacaka. Ena vica vata na udolu na yabaki yani ki liu, a vakauqeti Nifai na Kalou me vola edua tale na itukutuku ka kovuta na gauna vata oqori “ena Nona i naki vuku” (1 Nifai 9:5).

A kaya na Turaga vei Josefa, “Na noqu yalomatua e uasivia sara na ilawaki qaseqase ni tevoro” (Vunau kei na Veiyalayalati 10:43). Oqori e itukutuku ni veivakadeitaki ni noda siga, ena nona saga vakaukauwa tiko na meca me vakamalumalumutaka na vakabauta. Me vakataki Josefa, eda sa rawa ni “yalodina ka tomana tikoga” na cakacaka sa kacivi keda kina na Kalou meda cakava (tikina e 3). Eda na qai raica ni sa vakarautaka oti tu o Koya edua na sala me “sega ni rawati [keda] kina na matamata ki eli” (tikina e 69).

Raica na Ira na Yalododonu, 1:51–61.

Vakasama eso ni Vuli e Vale kei na Lotu

Vunau kei na Veiyalayalati 10:1–33

Na Kalou “ena sega ni vakatarai Setani me vakayacora na nona inaki ca.”

E gadreva cake o Setani me da guilecava ni bula tiko o koya—se me da kua mada ga ni kidava na nona sasaga me vakayarayarataki keda (raica na 2 Nifai 28:22–23). Ia na vosa ni Turaga ena Vunau kei na Veiyalayalati 10 e vakadeitaka ni o Setani e bula—ka saqata vagumatua tiko na cakacaka ni Turaga. Ena tikina e 1–33, vakaraica na veika e kila na Kalou me baleta na sasaga nei Setani (raica talega na tikina e 62–63). Sa rawa talega mo kerea vua na Turaga me vukei iko mo raica se temaki iko tiko vakacava o Setani. Ni o wilika na wase e 10, vakasamataka vakatitobu na sala e rawa ni vukei iko kina na iVakabula mo vorata na sasaga nei Setani.

Vunau kei na Veiyalayalati 10:34–52

Na “yalomatua ni” Turaga “e uasivia sara na ilawaki qaseqase ni tevoro.”

A sega ni kila o Nifai na vuna a vakauqeti kina me cakava e rua na iwasewase ni ivolatukutuku baleti ira na nona tamata. Ka sega ni kila o Momani na vuna a vakauqeti kina me okata na ikarua ni iwasewase vata kei na peleti koula. Ia o irau ruarua na parofita erau a nuitaka ni tiko “na nona inaki vuku” na Kalou (1 Nifai 9:5; Na Vosa i Momani 1:7). Nikua eda sa kila tu edua wale ga na tiki ni inaki oya: me sosomitaka na 116 na draunipepa ka yali ni iVola i Momani. Na cava o nanuma ni vinakata vei iko na Turaga mo vulica mai na veika kece oqo? Vakasamataka vakatitobu na taro oqo ni o wilika na Vunau kei na Veiyalayalati 10:34–52. E rawa talega ni volai edua na lisi ni veidina o vulica me baleta na Turaga mai na veitikina oqo. Era vakayaco ka vakacava ki na nomu veiwekani vata kei Koya na veidina oqo? Na cava e veilauti vei iko me baleta na vuku kei na raiyawa ni Turaga ena Nona vakavakarau ki na yali ni 116 na draunipepa?

O na rairai vakauqeti talega mo vakaraica na ivakadinadina ni Nona vuku kei na raiyawa ena nomu bula. Wilika na itukutuku eso ena vosa nei Elder Ronald A. Rasband ena “Mai na iTuvatuva Vakalou”—e rawa ni o nanuma kina eso na ivakaraitaki (Liaona, Nove. 2017, 55–57). Navuca mo volai ira nira yaco mai vei iko. E sa cakacaka tiko beka vakacava na Turaga ena nomu bula? Me ivakaraitaki, na veika e “yaco tubu koso” vakacava e sa vakarautaka o Koya? Na yavu cava sa vakotora o Koya me baleta na nomu vakalougatataki? Na gauna cava a tuberi iko kina o Koya mo veiqaravi vua edua e vakaleqai tu?

Raica talega na Roma 8:28; Vunau kei na Veiyalayalati 90:24; Topics and Questions [Ulutaga kei na Taro], “Plan of Salvation [Yavu ni Veivakabulai],” Gospel Library.

Tiki ni droini mai na Mormon Abridging the Plates [Vakalailaitaka tiko na Peleti o Momani], mai vei Tom Lovell

Vunau kei na Veiyalayalati 11

“Vakararavi ki na Yalo [ni Turaga].”

A gadreva sara vakaukauwa o Airame na tuakai Josefa me kila na loma ni Turaga me baleti koya, ka mani kerei Josefa me vakasaqara edua na ivakatakila ena vukuna. A marau na Parofita me cakava vakakina, ia edua mada ga na itukutuku ena ivakatakila oya (Vunau kei na Veiyalayalati 11) sai koya nio Airame e rawa talega ni vakasaqara vakai koya na nona ivakatakila. Ka vakakina o “ira kece era sa gadreva na ka vinaka, ka ra sa curumaka na nodra isele takelo mera tatamusuki” (tikina e 27). Ni o wilika na wase e 11, na cava o vakila ni vakavulica tiko vei iko na Turaga me baleta na ivakatakila yadua? E semati vakacava oqo ki na ka a vakavulica o Koya vei Oliva Kaudari ena wase e 6–9? Na itukutuku cava so tale sa vakarautaka tu o Koya vei iko?

Raica talega na “Yalo Tabu Liutaka,” Serenilotu, naba 81.

Sureti ira na vuli mera dau taro. Na taro edau vakavuqa me veimuataki ki na ivakatakila. Kevaka o vakavulica tiko na nomu matavuvale se kalasi ni Lotu, vakayaloqaqataki ira mera taro, ka vukei ira mera kunea na isaunitaro ena ivolanikalou. Me ivakaraitaki, kevaka e tiko na nodra vakatataro me baleta na ivakatakila ki na tamata yadua, vakaraica vata na kena isau ena Vunau kei na Veiyalayalati 11:12–14.

Vunau kei na Veiyalayalati 11:15–26

Ni’u segata me’u “vulica na vosa [ni Kalou],” au na ciqoma na Nona Yalotabu kei na kaukauwa.

Ni se bera mada ga ni vakadewataki oti na iVola i Momani, a sa maqusa sara o Airame Simici me veivuke ena cakacaka ni Veivakalesui Mai. Ni o wilika na vosa ni Turaga ni sauma nona gagadre, vakasamataka na kena ibalebale vei iko mo “vulica na vosa [ni Kalou]” (tikina e 21). E vukei iko vakacava na vulici ni vosa ni Kalou mo veiqaravi Vua ena kaukauwa?

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 10:5

Au dau ciqoma na kaukauwa mai vua na Kalou, niu dau masu tiko ga.

• Me vakaveikilaitaki taumada na tikina oqo vei ira na nomu gone, e rawa ni o tarogi ira ena veika era dau cakava “e veigauna”. Na cava e kaya na Turaga meda dau cakava tikoga ena Vunau kei na Veiyalayalati 10:5? Na cava e vinakata kina o Koya meda cakava na ka oqo?

• Na sala cava o rawa ni vukei ira kina na nomu gone mera dau masu tikoga? Sa rawa mera kumuna vata e vica na vatu lailai, dravia, ka boroi ira “Vunau kei na Veiyalayalati 10:5” se boroya kina na “Dau Masu Tikoga.” E rawa ni ra biuta na nodra vatu ena veivanua eso era na via vakananumi kina mera masu, me vaka na volekata nodra idavodavo, vata kei na nodra ivola ni vuli, se vanua era dau kana kina. Me vaka na Vunau kei na Veiyalayalati 10:5, ena vakalougatataki keda vakacava na Kalou ni da masu? E rawa niratou kunea na nomu gone na ikuri ni isaunitaro ena sere me vaka na “Tamaqu Mai Lagi” (iVolanisere ni Gonelalai, 6).

Vunau kei na Veiyalayalati 11:12–13

Sa dau tuberi au na Yalo Tabu meu caka vinaka.

• E rawa ni ra vulica na gone mera kila na gauna edau vosa kina vei ira na Yalo. Me veivuke vei ira, e rawa ni o vunitaka edua na matanicina se icina livaliva kei na dua na itaba ni dua na mata mamarau ena dua ga na vanua ena rumu; qai kerei ira na nomu gone mera vaqara na veika oqo. Wilika na Vunau kei na Veiyalayalati 11:13, ka vukei iratou nomu gone meratou vakaraica na vosa eso e semati ki na veiyaya eratou kunea. Na cava e vakavuvulitaka na vosa eso oqo me baleta na sala e vukei keda kina na Yalo Tabu?

• Na wasei ni veika vakayalo o sa sotava oti ena rawa ni vukei iratou na luvemu meratou kila na veivakayarayarataki ni Yalo Tabu ena nodratou bula. Ni o veiwasei tiko, kerei iratou meratou wasea talega na veika eratou sa sotava oti. Sa rawa talega mo ni wilika vata na Vunau kei na Veiyalayalati 11:12–13, ka vakaraica na sala eda rawa ni kila kina na gauna e dusimaki keda tiko na Yalo Tabu. Vakadinadinataka ni Tamada Vakalomalagi e vinakata meda dau tuberi mai vua na Yalo Tabu.

Vunau kei na Veiyalayalati 11:21, 26

Ena gadrevi meu kila na kosipeli me rawa niu vukei ira kina eso tale mera kunea na dina.

• Me vakataki Airame Simici, ena tu beka vei iratou na luvemu e vuqa na madigi me wasea na kosipeli vei ira na tani. Sa rawa mo dou wilika vata na Vunau kei na Veiyalayalati 11:21, 26 ka kerei iratou na luvemu me vakaraica na veika a tukuna na Turaga vei Airame ka a gadrevi vua me cakava me rawa ni vakavulica kina na kosipeli. Na cava na kena ibalebale meda “vulica” na vosa ni Kalou? Eda na cakava vakacava na ka oqo? Eda na “tugana sara” vakacava na vosa ni Kalou e lomada? E rawa beka ni ra matanataka na luvemuni na wasei ni dua na ka baleti Jisu Karisito se na iVola i Momani vei ira na tani.

Me baleta na vakasama tale eso, raica na ilavelave ni mekasini na iTokanini vula oqo.

Josefa kei Airame Simici, mai vei Ken Corbett