24 ni Feperueri–2 ni Maji: ”Sa Ka Talei na Yalo ni Tamata“

Vunau kei na Veiyalayalati 18

E tu e vuqa na sala duidui me vakarautaki kina na kena talei edua na tamata. Na taledi, vuli, iyau, kei na irairai vakayago ena rawa ni vakayaco-ka ki na sala eda veidikevi kina vakai keda—vakakina noda dikevi keda. Ia ena mata ni Kalou, na keda talei e rawarawa sara vakalevu, ka tukuni vakamatata ena Vunau kei na Veiyalayalati 18: “Nanuma tiko ni sa ka talei ena mata ni Kalou na yalo ni tamata” (tikina e 10). Na dina rawarawa oqo e vakamacalataka vakavinaka na veika edau cakava na Kalou kei na vuni Nona cakava. Na cava na vuna a vakasalataki Josefa Simici kina kei Oliva Kaudari o Koya merau tauyavutaka na Lotu i Jisu Karisito ena noda siga? (raica na tikina e 1–5). Baleta ni sa ka talei na yalo ni tamata kecega. Na cava na vuna e “vakaroti ira kina na tamata kecega ena veivanua kecega” o Koya “mera veivutuni” ka talai ira na iApositolo me ra vunautaka na veivutuni? (tikina e 9). Baleta ni sa ka talei na yalo ni tamata kecega. Na cava na vuna a sotava kina o Jisu Karisito na “mate vakayago” kei na “nodra rarawa na tamata kecega”? (tikina e 11). Baleta ni sa ka talei na yalo ni tamata kecega. Kevaka edua mada ga vei ira na yalo oqo e digitaka me ciqoma na iloloma ni iVakabula, e marau o Koya, ni “sa levu vakaidina na nona marau ena yalo sa veivutuni” (tikina e 13).

Vakasama eso ni Vuli e Vale kei na Lotu

Vunau kei na Veiyalayalati 18:1–5

“Tara cake na noqu lotu.”

Ena wase e 18, na Turaga a solia vei Oliva Kaudari na ivakasala me vukea na kena vakadavori na yavu ni Lotu i Jisu Karisito. Na cava o raica me baleta na ivakasala a solia o Koya—vakabibi ena tikina e 1–5? Sa rawa mo vakasamataka na sala e yaga kina vei iko na ivakasala vata oqo ni o “tara cake” na nomu vakabauti Karisito. Me kena ivakaraitaki:

• Na cava o “gadreva mo kila” me baleta na Turaga? (tikina e 1).

• Na cava na kena ibalebale vei iko mo “vakanuinui ki na veika sa volai tu”? (tikina e 3). E sa dau “vakatakila vakacava vei iko” na Yalo nira sa dina na veika oqo? (tikina e 2; raica talega na Vunau kei na Veiyalayalati 6:22–24).

• Ona tara cake vakacava na nomu bula ena “yavu ni kosipeli ni [iVakabula] kei na [Nona] uluvatu”? (tikina e 5).

Taroga na taro. E ivakadinadina na Vunau kei na Veiyalayalati ni taro e veimuataki ki na ivakatakila. Ni ko vulica na ivolanikalou, vola na taro eso e yaco mai vei iko. Qai vakasamataka vakatitobu ka masu nio vakasaqara na isau ni taro.

Vunau kei na Veiyalayalati 18:10–13

“Sa ka talei ena mata ni Kalou na yalo ni tamata.”

Eda na vakatulewataka vakacava na kena talei edua na ka? Me kena ivakaraitaki, na cava na vuna e sau levu cake kina e dua na ka ena makete mai na dua tale na ka? Ni o wilika na wase e 18 ena macawa oqo, vakabibi na tikina e 10–13, e rawa mona veidutaitaka na ivakarau era vakatulewataka kina na tamata na talei ni dua na ka kei na cava e talei kina edua na yalo e mata ni Kalou. Navuca mo sosomitaka na yacamu ena vanua e tiko kina na vosa na “yalo,” kei na “tamata kecega.” E rawa vakacava ni vukea e dua e lomatarotarotaka tiko na kena talei ena veitikina oqo?

Oqo eso tale na malanivosa e vakavulica na talei ni dua na yalo: Luke 15:1–10; Joni 3:16–17; 2 Nifai 26:24–28; Mosese 1:39. Yavutaki ena veimalanivosa oqo, ona vakalekalekataka vakacava na ivalavala ni Nona dau nanumi iko na Kalou? Sa rawa talega mo vakasaqaqara ena itukutuku nei Peresitedi Dieter F. Uchtdorf “O Iko o Dua na Ka Vua” (Liaona, Nove. 2011, 19–22) mo raica kina na vosa kei na malanivosa ena vukei iko mo kila na kemu talei vua na Kalou.

E vakaraitaka vakacava vei iko na Kalou nio sa ka talei sara vei Koya? E vakayaco ka vakacava na ka oqo ki na veika o vakila me baleti iko kei ira na tani?

Raica talega na Joy D. Jones, “Yavubula Tawayalani,” Liaona, Nove. 2017, 13–15; Topics and Questions [Ulutaga kei na Taro], “Children of God [Luve ni Kalou],” Gospel Library.

Vunau kei na Veiyalayalati 18:11–16

E reki na Turaga niu veivutuni.

Raica na wasoma ni kena dau vakayagataki na vosa na veivutuni kei na veivutuni ena Vunau kei na Veiyalayalati 18. Vakasamataka vakatitobu na veika o vulica ena veigauna e vakayagataki kina na vosa oqo. Vakasamataka vakabibi na tikina e 11–16. E vakayaco-ka vakacava na veitikina oqo ki na veika o vakila me baleta na veivutuni—ki na nomu veivutuni kei na nomu itavi mo sureti ira na tamata me ra veivutuni ka vinaka cake? Oqo e dua na sala mo vola kina na veika o sa vulica: vola e vica na sala o na vakacavara kina na iyatuvosa “Na Veivutuni sai koya .”

Raica talega na Alama 36:18–21; iDusidusi ki na iVolanikalou, “Veivutuni,” Gospel Library; Dale G. Renlund, “Veivutuni: Dua na Digidigi Rekitaki,” Liaona, Nove. 2016, 121–24.

Tiki ni droini ni The Prodigal Son [Na Gone Cidroi], mai vei Clark Kelley Price

Vunau kei na Veiyalayalati 18:14–16

Na reki edau yaco mai nira vukei na tani mera lako mai vei Karisito.

Ni o wilika na tikina e 14–16, vakasamataka vakatitobu na ibalebale ni “vunautaka na veivutuni”—kei na vuna e kauta mai kina na reki vakaoya. Na cava eso na sala o sa kunea mo vukei ira kina na tani me ra lako mai vua na iVakabula ka ciqoma na veivosoti? Era sa cakava vakacava vakaoqo vei iko na tani?

Raica talega na Craig C. Christensen, “Sa Sega Ni Dua Na Ka Me Vakatautauvatani Rawa Ena Kena Totoka kei na Kena Gasagasa me vaka Na Noqu Marau,” Liaona, Me 2023, 45–47.

Vunau kei na Veiyalayalati 18:34–36

Au rawa ni rogoca na domo ni Turaga mai na ivolanikalou.

Na cava o na kaya, kevaka e dua e tarogi iko se vakacava tu na domo ni Turaga? Vakasamataka na taro oqo ni o wilika na Vunau kei na Veiyalayalati 18:34–36. Na cava o sa vulica me baleta na domo ni Turaga mai na wiliki ni Vunau kei na Veiyalayalati? Na cava o rawa ni cakava mo rogoca vakamatata cake kina na Domona?

Raica talega na “Niu Qara na iVolatabu,” Serenilotu, naba 169.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 18:10–13

Eda sa ka talei vakayadua kivua na Kalou.

• Ni o wilika vata kei ira na luvemu na Vunau kei na Veiyalayalati 18:10–13, vakasamataka mo ni vakaisosomitaka na yacamuni yadua ena vanua e tiko kina na vosa na “yalo,” kei na “tamata kecega.” Sa rawa nio ni qai veivosakitaka na sala e vukei keda kina na veitikina oqo me da kila vakavinaka na veika e vakila na Tamada Vakalomalagi me baleti keda yadua.

• E rawa talega ni o tarogi ira na nomu gone me baleta na veika era vakasamataka na tamata me ka talei. Se o rawa ni vakaraitaka vei ira e dua na ka e talei vakalevu vei iko. Na cava eda dau cakava ki na veika e talei vakalevu vei keda? Me ra qai veivukevuke ni rai ena dua na iloilo. Ni ra vakayacora vakakina, tukuna vei ira na gone ni ra sa luve ni Kalou ka ra sa taleitaki sara vakalevu. Eda na vakaraitaka vakacava vei ira na tani ni “sa ka talei na [yalodra]” kivei keda?

• Me vakamatatataki ni tamata kece era sa talei vakalevu sara vua na Tamada Vakalomalagi, sa rawa vei ira na luvemu me ra raica na iyaloyalo ena mua ni ituvatuva oqo ni o wilika na Vunau kei na Veiyalayalati 18:10–13. Lagata vata e dua na sere me vaka na “Every Star Is Different” (Children’s Songbook, 142–43) e rawa ni vaqaqacotaka na tikina oqo.

Tiki ni droini mai na Worth of a Soul [Na Talei ni dua na Yalo], mai vei Liz Lemon

Vunau kei na Veiyalayalati 18:13–16

Sa kauta mai na reki levu na wasei ni kosipeli.

• Me vakauqeti ira na luvemu me ra wasea na kosipeli i Jisu Karisito, sa rawa mo veitalanoataka vakai kemuni na veika e dau yaco nio kunea e dua na ka o vinakata mo wasea vei ira na nomu itokani se matavuvale. Na cava na vuna o via wasea kina, ka cava o vakila ena nomu wasea tiko? Mo qai wilika na Vunau kei na Veiyalayalati 18:13, 16. Na cava e vakavu reki vua na Turaga? Na cava e tukuna o Koya ena vakavu reki kivei keda? E rawa nio ni veivosakitaka kei ira na luvemu edua na veika o a sotava nio wasea tiko na reki ena kosipeli ni iVakabula.

• E dua na sere me baleta na wasei ni kosipeli, me vaka na “Au Bole Meu sa Kaulotu Edai” (iVolanisere ni Gonelalai, 90), ena rawa ni vukei ira na gone me ra vakasamataka na sala eso e rawa ni ra wasea kina na kosipeli.

Vunau kei na Veiyalayalati 18:34–36

Au rawa ni rogoca na domo ni Turaga mai na ivolanikalou.

• E rawa ni ra marautaka na luvemu e dua na qito era na dau tovolea kina mera kila na domodra na tamata duidui eso, me vakataki ira na lewe ni matavuvale, itokani, se iliuliu ni Lotu. Eda na kila vakacava na dui domoda yadua? Eda na kila vakacava na domo ni Turaga? Sa rawa mo ni wilika vata na Vunau kei na Veiyalayalati 18:34–36 me veivosakitaki kina na taro oqo. E rawa talega nio ni veiwaseitaka na sala o a rogoca kina na domo ni Turaga ena ivolanikalou.

Me baleta na vakasama tale eso, raica na ilavelave ni mekasini na iTokani ni vula oqo.

Sa ka talei na yalo ni tamata yadua vua na Kalou.