“Domo Eso ni Veivakalesui Mai: Ema Ele Simici,” Lako Mai, Mo Muri Au—Me Baleta na iTikotiko kei na Lotu: Vunau kei na Veiyalayalati 2025 (2025)
“Ema Ele Simici,” Lako Mai, Mo Muri Au—Me Baleta na iTikotiko kei na Lotu: 2025
Domo Eso ni Veivakalesui Mai
Ema Ele Simici
Na vosa ni Turaga vei Ema Simici ka volai tu ena Vunau kei na Veiyalayalati 25 e vakaraitaka na vakanananu ni Turaga me baleti koya kei na cau e rawa ni solia o koya ki na Nona cakacaka. Ia a vakaevei tu mada na itovo ni bula nei Ema? Na cava eda kila me baleta na nona itovo, nona veimaliwai, kei na veika e kaukauwa kina? E dua na sala me kilai kina na “marama digitaki” oqo (Vunau kei na Veiyalayalati 25:3) oya me wiliki na nodra vosa o ira era kilai koya vakavoleka.
Josefa Simici Lailai, na watina
“Ena marau sega ni tukuni rawa, kei na reki vakaitamera a vakasinaita na lomaqu, au a tauri Ema e ligaqu na noqu daulomani, ena bogi ko ya—o koya na watiqu, io na watiqu ni noqu gauna ni cauravou, na digidigi ni utoqu. E a ka levu na veiciciyaki ni noqu vakanananu ena noqu vakasamataka ena dua na tiki ni gauna lailai e vuqa na veika eso a sa lesi tu me keirau lako curuma. Na oca kei na buno, na yaluma kei na rarawa, na reki kei na vakacegu, ena veigauna eso, a dau sotavi wasoma ena neirau ilakolako ka vakalougatataka na neirau bula. Isa, sa dua na ka na veinanuyaki ni noqu vakasama ena gauna oya. Sa tu tale oqo o koya, ena dua tale na gauna dredre, sega ni bau yalolailai, tudei, ka sega ni yavalati, sega ni veisau, ko Ema dau taleitaki.”
Lusi Meki Simici, na nona nei
“Ni se gone o koya, a dau matau vua me dau cakacaka vagumatua, na yalona taucoko a tu ga ena cakacaka ni Turaga, ka vakila ni sega ni dua tale na ka e taleitaka vakavo ga na lotu, kei na vaqarai ni veika dina. Se cava ga e cakava e ligana, e a kitaka ena nona igu ka sega ni taroga na taro ni nanumi koya vakikoya ‘Ena yaga beka vakalevu vei au mai vua e dua tale?’ Kevaka era talai yani na italatala qase me ra lai vunau, e dau imatai o koya me bolea me veiqaravi me veivuke ni vakaisulutaki ira ena nodra ilakolako, se mani vakacava tu na nona leqa vakaikoya.”
Josefa Simici Levu, na nona momo
Na veivakalougatataki vakapeteriaki nei Ema, mai vei Josefa Simici Levu, ka veiqaravi voli vaka-peteriaki ni Lotu:
“Ema, na vugoqu, o sa vakalougatataki mai vua na Turaga, ena nomu yalododonu kei na dina: ko na vakalougatataki vata kei watimu, ka rekitaka na lagilagi ena yaco vua: Sa vakararawataki na yalomu ena vuku ni nodra caka ca na tamata ena sagai ni nona vakarusai na nomu itokani, ka o sovaraka na yalomu taucoko ena masumasu me baleta na nona sereki: mo reki, ni sa rogoca na Turaga na nomu Kalou na nomu vakatakekere.
“O sa lolositaka tu na kaukauwa ni lomadra na vuvale nei tamamu, ka o gadreva tu na nodra vakabulai. Na Turaga ena rokova na nomu tagi, ka ena nona lewa dodonu ena vakavuna me so vei ira me ra raica rawa na nodra cala ka veivutunitaka na nodrai valavala ca; ia ena vuku ni nodra vakararawataki era na vakabulai kina. Ko na raica e vuqa na siga; io, na Turaga ena karoni iko me yacova ni ko sa yalo vakacegu, ni ko na raica na nomu Dauniveivueti. Ena reki na yalomu ena cakacaka levu ni Turaga, ka sega ni dua ena kauta tani mai vei iko na nomu bula marau.
“Mo dau nanuma tikoga na cecere ni nona lako sobu mai na nomu Kalou ena nomu vakatarai mo veitomani kei na luvequ tagane ena gauna a solia kina na agilosi vua na kedra ivolatukutuku na Nifai me maroroya. Ko sa raica e levu na ka rarawa baleta ni sa kauta tani vei iko na Turaga e tolu na luvemu: ena ka oqo ko sa sega ni bilitaki kina, ni sa kila ko Koya na nomu gagadre savasava mo susuga cake e dua na matavuvale, me rawa ni vakalougatataki kina na yaca i luvequ tagane. Ia raica, au sa kaya vei iko, ni sa kaya vakaoqo na Turaga, kevaka o na vakadinata, ko na vakalougatataki ena vuku ni ka oqo ka vakatubura tale eso na gone, me reki ka yalo vakacegu kina na yalomu, ka ra marau kina na nomu itokani.
“Ko na vakalougatataki ena kilaka, ka na rawa kina mo veivakavulici vei ira na marama. Vakavulica na nomu matavuvale ena bula dodonu, kei ira na nomu lalai ena ivakarau ni bula, ka ra na wanonovi iko na agilosi yalosavasava: ka yaco mo na vakabulai ena matanitu ni Kalou; ka na vakakina. Emeni.”
Ema Simici kei iratou na luvena. Time to Laugh [Gauna ni Dredre], mai vei Liz Lemon Swindle