10–16 ni Maji: “Na Cadra Cake ni Lotu i Karisito”

Vunau kei na Veiyalayalati 20–22

Sa mai vakacavari na cakacaka ni iVakabula ena kena kau mai na iVola i Momani. Ia na Nona cakacaka ni Veivakalesui Mai se qai tekivu walega. Me ikuri ni kena vakalesui mai na ivunau kei na lewa ni matabete, na Turaga a sa vakamatatataka mai na so na ivakatakila taumada ni gadreva talega o Koya me vakalesuya mai e dua na isoqosoqo vakadonui—na Nona Lotu (raica na Vunau kei na Veiyalayalati 10:53; 18:5). Enai ka 6 ni Epereli, 1830, e sivia na 40 na tamata vakabauta era a osota yani na valetolonikau ni matavuvale na Witima e Feieti, Niu Ioka, me vakadinadinataka kina na tauyavutaki ni iSoqosoqo ni Lotu i Jisu Karisito.

Eso na tamata era vakataroga se cava na vuna e gadrevi kina edua na Lotu e vakaituvatuva. Na kena isau ena rawa ni kunei, vakatikina ga, e na ivakatakila ka semati ki na imatai ni soqoni ni Lotu ena 1830. Era vakamacalataka na veivakalougatataki ka na sega ni rawa ni rawati kevaka me a sega ni “tauyavutaki ka cokonaki” na Lotu dina i Jisu Karisito ena veisiga emuri oqo (Vunau kei na Veiyalayalati 20:1).

Raica talega na Ira na Yalododonu, 1:84–86; “Build up My Church [Tara Cake na Noqu Lotu],” ena Revelations in Context, 29–32.

Vakasama eso ni Vuli e Vale kei na Lotu

Vunau kei na Veiyalayalati 20–21

Sa Vakalesuya Mai o Jisu Karisito na Nona Lotu.

Na cava na vuna e tiko kina e dua na Lotu vakaituvatuva? E rairai na kena isau vinaka duadua o ya “Baleta ni a cokonaka o Jisu Karisito e dua.” Ni o vulica na Vunau kei na Veiyalayalati 20–21, o na rawa ni raica na veika e tautauvata me baleta na Lotu a tauyavutaka ena gauna makawa kei na kena sa vakalesuya mai o Koya nikua. Vakayagataka na veitikina e ra mo vulica kina na veika baleta na Lotu ni iVakabula ena gauna makawa: Maciu 16:15–19; Joni 7:16–17; Efeso 2:19–22; 3 Nifai 11:23–26; Moronai 4–5. Vakayagataka na veitikina oqo mo vulica kina na Lotu vakalesui mai: Vunau kei na Veiyalayalati 20:17–25, 60, 72–79; 21:1–2. Ena rawa nio vola na veika o kunea ena dua na ituvatuva me vakaoqo:

	iVunau	Cakacaka Vakalotu	Lewa ni matabete	Parofita
Lotu makawa i Karisito	iVunau	Cakacaka Vakalotu	Lewa ni matabete	Parofita
Lotu vakalesui mai i Karisito	iVunau	Cakacaka Vakalotu	Lewa ni matabete	Parofita

Na cava o vulica mai na itaviqaravi oqo me baleta na vuna a tauyavutaka kina o Jisu Karisito—ka vakalesui mai—na Nona Lotu?

Raica talega na Dallin H. Oaks, “Na Gagadre me Dua na Lotu,” Liaona, Nove. 2021, 24–26.

Sureta na veiwasei. Ni o sureti ira na tamata me ra wasea na veika era vulica tiko vakataki ira, era na vakauqeti me ra tomana tiko na nodra vuli vakai ira. Na cava eso tale na ka o rawa ni sureti ira kina eso tale me ra wasea?

Vunau kei na Veiyalayalati 20:37, 75–79; 22

Na veicakacaka tabu vakalotu era vukei keda meda ucuya na iVakabula.

Ena kena a tauyavutaki na Lotu, a vakavulici ira na Nona Yalododonu na Turaga me baleta na veicakacaka tabu vakalotu, oka kina na papitaiso kei na sakaramede. Ni o wilika na veicakacaka vakalotu oqo, vakasamataka vakatitobu na sala era vukei iko kina mo vakila ni o semati vua na iVakabula. Me ivakaraitaki, era vukei iko vakacava na veicakacaka vakalotu oqo mo maroroya na nomu “inaki dei ni qaravi [Jisu Karisito] me yacova na ivakataotioti”? (tikina e 37). Sa rawa talega mo wiliki rau na masu ni sakaramede (tikina e 77, 79) ka raitayaloyalotaka nio qai rogoci rau tiko ena imatai ni gauna. Na veivakararamataki cava so o ciqoma?

Raica talega na D. Todd Christofferson, “Na Cava na Vuna me Salatu kina ni Veiyalayalati,” Liaona, Me 2021, 116–19.

Vunau kei na Veiyalayalati 20:38–60

Na veiqaravi ni matabete e vakalougatataki ira na lewe ni Lotu kei na nodra matavuvale.

O sa bau vakasamataka mada na vuna e bibi kina vua na iVakabula me vakalesuya mai na matabete ena Nona Lotu? Na wiliki ni veika a kerea o Koya vei ira na lewe ni matabete me ra cakava ena Vunau kei na Veiyalayalati 20:38–60 ena rawa ni solia vei iko eso na veivakararamataki. E sa vakalougatataki iko vakacava na iVakabula kei na nomu matavuvale ena vuku ni cakacaka e vakamacalataki ena veitikina oqo?

Me ikuri vei ira era sa tabaki ki na matabete, o ira na marama era vakatikori mera veiqaravi ena Lotu era vakayagataka talega na lewa ni Kalou nira vakaitavi ena Nona cakacaka. Mo vulica na kena sala, raica na vosa nei Peresitedi Dallin H. Oaks “Na iDola kei na Lewa ni Matabete” (Liaona, Me 2014, 49–52).

Raica talega Topics and Questions, “Joseph Smith’s Teachings about Priesthood, Temple, and Women,” Gospel Library.

Vunau kei na Veiyalayalati 21

Na talairawarawa ki na vosa ni Kalou mai vei ira na Nona parofita ena solia vei au na veitaqomaki vakalou.

Vunau kei na Veiyalayalati 21:4–9 e tu kina na veisureti me da muria na parofita ni Turaga kei na yalayala mana vei ira na tamata era cakava vakakina. Na veivakasama e ra ena rawa ni vukei iko mo vakasamataka vakatitobu na veitikina oqo:

• Na vosa cava ena tikina e 4–5 e vakamacalataka na veika e vinakata vei iko na iVakabula mo cakava ki na nona vosa na Nona parofita bula? Na cava na vuna o vakila kina ni gadrevi na “vosota kei na vakabauta” me vakayacori kina na ka oqo?

• Vakasamataka vakatitobu na ivakatakarakara e vakayagataka na iVakabula ena tikina e 6 me vakamacalataka na veivakalougatataki ni muri na Nona parofita. Na cava o nanuma e ibalebale ni “matamata mai eli”? E “vakatalabusesetaka vakacava na kaukauwa ni butobuto” mai vei iko na Turaga? Na cava na kena ibalebale me “yavavala ko lomalagi ena vukumudou”?

• Na cava e kerea tiko vei iko na Turaga mo cakava mai vua na Peresitedi ni Lotu ena gauna oqo? Sa vakayacora vakacava na Turaga na Nona yalayala ni o muria na Nona ivakasala?

Vola na ikuri ni veivakararamataki o rawata mai na veiwase oqo ni itukutuku nei Elder Neil L. Andersen “Na Parofita ni Kalou” (Liaona, Me 2018, 24–27):

• Na Vuni Noda Muria na Parofita:

• Na iVakatawa ena Vale Cecere:

• Kakua ni Kurabui:

Raica talega na “Watchman on the Tower” (vidio), ChurchofJesusChrist.org; Topics and Questions [Ulutaga kei na Taro], “Prophets [Ira na Parofita],” Gospel Library.“We Listen to a Prophet’s Voice,” Hymns, no. 22.

Watchman on the Tower

(Ezekiel 33:1-7) The Lord calls prophets to be the "watchmen" on the tower.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 20–21

Sa vakalesui tale mai na Lotu i Jisu Karisito.

• Vakasamataka mo vakayagataka na ulutaga ni iwase ni Vunau kei na Veiyalayalati 21, wase e 9 ni iTukuni mai na Vunau kei na Veiyalayalati, se na vidio “Organization of the Church (Na Tauyavutaki ni Lotu)” (ChurchofJesusChrist.org) me vukei ira na luvemu me matata vei ira na veika a yaco ena siga a tauyavutaki kina na Lotu.

  Chapter 9: Organization of the Church of Jesus Christ: 6•April 1830

• E rawa nira vakasotara vata na luvemu na iyaloyalo kei Jisu Karisito, dua e veiqaravi tiko, dua na papitaiso, kei na sakaramede vata kei na veitikina ena wase e 20 (raica na tikina e 21–23, 47, 72–74, 75–79). Vakayagataka na iyaloyalo kei na veitikina oqo me veivosakitaki kina na veivakalougatataki e noda baleta ni a vakalesuya mai o Jisu Karisito na Nona Lotu.

Vunau kei na Veiyalayalati 20:37, 41, 71–74

Ena gauna au a papitaiso ka vakadeitaki kina, au a yalataka meu muri Jisu Karisito.

• Era na marautaka beka na luvemu nira raica e dua na iyaloyalo ni dua na gone e papitaiso ka vakadeitaki tiko. E rawa ni ra tukuna na kena veisotari kei na ivakaro ena Vunau kei na Veiyalayalati 20:41, 71–74. Na cava eda vulica mai na Vunau kei na Veiyalayalati 20:37 me baleti ira na tamata era via papitaiso? Sa rawa talega moni lagata vata na ‘Vaqara Drodrolagi Ni Bula Vesu No” (iVolanisere ni Gonelalai, 53) se sarava na vidio “The Baptism of Jesus” (Gospel Library).

  The Baptism of Jesus

  Jesus seeks out John the Baptist and is baptized in order to fulfill all righteousness.

  

• Kevaka era sa papitaiso ka vakadeitaki oti na luvemu, tarogi ira me baleta na veika era a vakila. E tiko beka na kedra itaba era rawa ni wasea? Veivosakitaka vata kei ira na veika era sa cakava tiko mera muri Jisu Karisito kina kei na sala sa vakalougatataki ira tiko kina o Koya.

Vunau kei na Veiyalayalati 20:75–79

Au rawa ni taura vei au na yaca i Jisu ka dau nanumi Koya tikoga.

• E rawa ni ra vakasaqara na luvemu na vosa “ka sa lomadra” ena Vunau kei na Veiyalayalati 20:37 (me baleta na papitaiso) kei na tikina e 77 (na masu ni sakaramede). Na cava e vinakata vei keda o Jisu Karisito meda lomasoli meda cakava? Ena rawa beka vei ira na luvemu mera vakaraica edua na ka e vakayacani tu (vaka e dua na yaca ni kabani se yaca vakaitaukei). Na cava e tukuna vei keda na yaca me baleta na iyaya oya? Na cava na kena ibalebale me da taura vei keda na yaca i Jisu Karisito?

• Wilika vata na Vunau kei na Veiyalayalati 20:77 ka kerei ira na luvemu mera raica na yalayala eso eda vakayacora me tiki ni sakaramede. E rawa beka ni ra veivukevuke ena kena matanataki e dua na ka mera “dau nanuma tiko ga” na iVakabula ka vakilakila se cava era dui matanataka tiko. Me vaka na tikina 77, eda sa vakalougatataki vakacava nida dau nanuma tikoga na iVakabula?

Vunau kei na Veiyalayalati 21:4–6

E vakalougatataki au o Jisu niu muria na Nona parofita.

• Ni sa kunei na veisureti kei na yalayala ena Vunau kei na Veiyalayalati 21:4–6, sa rawa vei ira na luvemu mera raica e dua na itaba ni noda parofita nikua ka wasea e dua na ka era sa vulica se rogoca mai vua. Veiwaseitaka na veisala eso sa vakalougatataki iko kina o Jisu Karisito ena nomu muria na Nona parofita.

Me baleta na vakasama tale eso, raica na ilavelave ni mekasini na iTokani ni vula oqo.

Sa Tabaki Josefa Simici o Oliva Kauderi, mai vei Walter Rane