Maji 17– 23: “Vakasaqara na iYau e Uasivi Cake”

Vunau kei na Veiyalayalati 23–26

Vei ira e vuqa na tamata, na papitaiso sa dua na gauna rokovi, ka veivakacegui. Na papitaiso nei Ema Simici kei na so tale, a vakasosataki mai vei ira e dua na ilawalawa dauvakacaca ka ra a veivakalialiai, veivakarerei, ka vakasaurarataki iratou meratou dro. E muri, ni vakarau me vakadeitaki iratou na lewenilotu vou o Josefa, e a vesu ni vakavuna tiko na tiko yavavala ena itikotiko mai na nona ivunau. Ena veisaqasaqa kece oqo, ena rawa vakacava vei Ema me kunea na veivakadeitaki ni sa cakava tiko na ka dodonu? Mai na vanua vata ga eda na rawa kece ni kunea kina—ena ivakatakila mai vua na Turaga. A vosa vei Ema baleta “na iyau ena dua na [vuravura] e uasivi cake”—Na Nona matanitu—kei na nona tikina e kea. A tukuna vua me kakua ni rere, me “reki ka marau,” ka “dei tikoga ki na veiyalayalati [a cakava] o koya.” Kei na veivosa ni veivakayaloqaqataki kei na ivakasala oqo sai koya na “Domona vei ira na tamata kecega” (Vunau kei na Veiyalayalati 25:9–10, 13, 16).

Raica talega Ira na Yalododonu,, 1:89–90, 94–97.

Vakasama eso ni Vuli e Vale kei na Lotu

Vunau kei na Veiyalayalati 24

Na iVakabula e rawa ni vakacegui “au mai na [noqu] rarawa.”

Na ivakatakila ena Vunau kei na Veiyalayalati 24 a soli me “veivakaukauwataki, veivakayaloqaqataki, ka veidusimaki” vei Josefa Simici kei Oliva Kaudari ena dua na gauna ni veivakatovolei (ulutaga ni iwase; raica tale ga na Ira na Yalododonu, 1:94–96). Vakaraica na vosa ena Vunau kei na Veiyalayalati 24 o nanuma ni a veivaqaqacotaki ka veivakayaloqaqataki vei rau.

Na cava era vakatura vei iko na veitiki ni ivolanikalou e ra me baleta na sala e vukei iko kina na iVakabula ena nomu veibolebole eso?

Vunau kei na Veiyalayalati 24:1–3

Vunau kei na Veiyalayalati 24:8

Vunau kei na Veiyalayalati 121:7–8

Aisea 40:28–31

Mosaia 24:14–15

Tiki ni droini mai na He Healed Many of Diverse Diseases [A Vakabula o Koya e Vuqa na Veimataqali Mate], mai vei J. Kirk Richards

Vunau kei na Veiyalayalati 25

E tiko edua na noqu itavi bibi meu vakaitavi kina ena matanitu ni Kalou.

Ni sarava tiko o Ema Simici na kena vakayacori tiko na Veivakalesui Mai maivua na watina, o Josefa Simici, a rairai vakataroga beka se cava e nona itavi. Vakaraica na vei isau ni taro a vakarautaka na Turaga ena Vunau kei na Veiyalayalati 25. O kunea beka e dua na ka ena iwase oqo o vakila ni “Domona vei [iko]”? (tikina e 16).

Raica talega na “Thou Art an Elect Lady (O Iko edua Na Marama Digitaki),” ena Revelations in Context, 33–39; Joy D. Jones, “Edua na Veikacivi Lagilagi,” Liaona, Me 2020, 15–18.

"An Elect Lady"

(D&C 25:2-3) Video portraying events in the life of Emma Smith.

Vunau kei na Veiyalayalati 25:5, 14

“Toso tikoga ena yalo e malua.”

Na cava e kena ibalebale vei iko na malanivosa na “yalo e malua”? Navuca mo vakasaqara ena wase e 25 na veivosa kei na veimalanivosa e vukea me matata vei iko na ibalebale ni yalomalua. Na itukutuku nei Elder David A. Bednar “Yalomalua ka Yalomalumalumu” ena rawa talega ni veivuke (Liaona, Me 2018, 30–33). E ivakaraitaki vakacava ni yalomalua vei iko o Jisu Karisito? (raica na Maciu 11:28–30). Vakasamataka na veika eso ena nomu bula o rawa ni cakava “ena yalo e malua.”

Vunau kei na Veiyalayalati 25:10, 13

“Mo kakua ni domona na iyau vakavuravura, ia mo vakasaqara na iyau e uasivi cake.”

Ni o vakananuma vakatitobu na ivakasala ni Turaga ena Vunau kei na Veiyalayalati 25:10, e rawa ni veivuke me volai edua na lisi ni “iyau vakavuravura” e vinakata o Koya mo “kakua ni domona.” Mo qai cakava e dua na lisi ni “veika ni dua na [vuravura] e uasivi cake” e vinakata o Koya mo vakasaqara. E rawa nio digitaka e dua mada ga na ka mai na imatai ni lisi o na biuta vakatikitiki kei na dua na ka mai na ikarua ni lisi o na vakasaqara.

E solia o Peresitedi Russell M. Nelson na ivakasala kei na yalayala eso me baleta na “[biuta] vakatikitiki e vuqa na ka ni vuravura oqo.” Vakaraica ena tabana e 77 ni nona itukutuku “iYau Talei Vakayalo” (Liaona, Nove. 2019). O na muria vakacava na nona ivakasala?

Ni o wilika na tikina e 13, vakasamataka na veiyalayalati o sa cakava kei na Tamada Vakalomalagi kei Jisu Karisito. Na cava na kena ibalebale vei iko mo “dei tikoga” ki na veiyalayalati oqo? E vukei iko vakacava na nomu veiyalayalati “mo kakua ni domona na iyau vakavuravura, ka vakasaqara na iyau e uasivi cake”?

Oqo eso tale na ivolanikalou ka rawa ni vukei iko mo kila vakamatata na duidui ni “iyau vakavuravura” kei na “iyau e uasivi cake”: Maciu 6:19, 21, 25–34; Luke 10:39–42; 2 Nifai 9:51.

Raica talega na Ulutaga kei na Taro, “Sacrifice,” Gospel Library.

Sureta na veiwasei. Kevaka o vakavulici ira tiko na tani ena sala mera “kakua ni domona kina na iyau vakavuravura,” vakasamataka na sala eso mo sureti ira kina me ra wasea na veika era sa cakava tiko me ra muria kina na ivakasala oqo. Eda na rawa ni veivaqaqacotaki ka veivakayaloqaqataki ena noda rogoca vata na veika eda dui vakararamataki kina kei na veika eda sotava.

Vunau kei na Veiyalayalati 25:11–12

E rekitaka na Turaga na noqu “sere e lagati ena yalodina.”

Na cava eso na nomu “sere mai lomamu”—na sere e vakaraitaka na nomu nanuma me baleta na Tamada Vakalomalagi se o Jisu Karisito? Vakasamataka mo lagata se vakarogoca e vica vei ira. Na cava e tiko vei ira na sere eso oqo ka ra vakamareqeti kina vei iko?

Sa rawa mo vakasamataka vakatitobu na sala era vaka kina e dua na masu na veiserenilotu oqo. Na cava erau tautauvata kina na sere kei na ivakatagi tabu kei na masu? Sa “saumi vakacava ena veivakalougatataki” na nomu sere tabu?

Raica talega na “Oh, What Songs of the Heart,” Hymns, no. 286.

Vunau kei na Veiyalayalati 26:2

“Ia na veika kece ena lotu me na vakayacori ena duavata”

Na malanivosa na “duavata” ena tikina oqo e vakaibalebaletaki ki na laveti ni ligada me vakaraitaka ni da tokona edua na tamata e ciqoma tiko e dua na veikacivi se veitabaki ki na matabete. O na vakamacalataka vakacava vua e dua na vulagi ena dua na soqoni ni Lotu na ibalebale ni noda tokona e dua? Na isaunitaro cava o kunea ena itukutuku nei Peresitedi Henry B. Eyring “Na Kaukauwa ni Veitokoni ena Vakabauta”? (Liaona, Me 2019, 58–60).

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 24:1, 8

Na iVakabula e rawa ni vakacegui “au mai na [noqu] rarawa.”

• Me vulici eso na veivakararawataki se bolebole a sotava o Josefa Simici kei ira na Yalododonu taumada, sa rawa mo railesuva na “Wase e 11: E Vuqa Tale Era Curu ki na Lotu,” ena iTukuni mai na Vunau kei na Veiyalayalati, 46–47, se na kena vidio ena Gospel Library. Mo qai vakadikeva vata kei ira na luvemu na ka a tukuna na Turaga vei Josefa me baleta na nona vakararawataki ena Vunau kei na Veiyalayalati 24:1, 8. E rawa talega nio ni veiwaseitaka na sala edau vukei iko kina na Turaga ena veigauna dredre.

  Chapter 11: More People Join the Church: April–June 1830

• Me vulici na ibalebale ni “vosota ena [noda gauna] ni vakararawataki,” e rawa vei iko kei ira na nomu gone mo ni bulia tale na vakatovotovo ena vidio “Continue in Patience” (Gospel Library). Na cava e vakavulica vei keda na Vunau kei na Veiyalayalati 24:8 me baleta na vosota? E dau vakatakila vakacava vei keda na iVakabula ni sa “tiko vata kei [keda]” ena gauna ni noda rarawa?

  Continue in Patience

  Patience requires that we obey God's commandments and faithfully wait for His will to be fulfilled.

Vunau kei na Veiyalayalati 25:11–12

E taleitaka o Jisu “na sere sa lagati ena yalodina.”

• Ni wiliki oti na Vunau kei na Veiyalayalati 25:12, sa rawa moni veiwaseitaka na nomuni sere se sere ni Lotu taleitaki—na nomu “sere mai vuniyalomu”—ka lagata vata. Veiwaseitaka na vuna oni taleitaka kina na veisere oqo. Na cava na vuna e marau kina na Turaga nida lagata na veisere oqo? E tautauvata vakacava na noda lagasere kei na noda “masu vei [Koya]”?

Vunau kei na Veiyalayalati 25:13, 15

Na noqu veiyalayalati vata kei Na Tamada Vakalomalagi era kauta mai vei au na reki.

• Me matata vei keda na ibalebale ni “mo dei tikoga ki na veiyalayalati” (Vunau kei na Veiyalayalati 25:13), sa rawa vei ira na luvemu mera veivukevuke ni kubeta matua toka e dua na ka ena kena kaukauwa duadua era rawata. Oti dou qai rawa ni veivosakitaka na sala o “dei” tiko ga kina se o taura matua tiko ga kina na nomu veiyalayalati. Kevaka e gadrevi, railesuva vata kei ira na luvemu na veiyalayalati eda cakava (raica na Mosaia 18:8–10; Vunau kei na Veiyalayalati 20:37; kei na tabana ni itaviqaravi ni macawa oqo).

• Me soli vei ira na luvemu na itukutuku e veiwekani kei na Vunau kei na Veiyalayalati 25:13, sa rawa mo vakaraitaka ni oqo e dua na ka a tukuna na Turaga vei Ema Simici ni oti ga na nona papitaiso. Na cava na vuna e ivakasala vinaka kina oqo vua e dua e se qai papitaiso walega?

Me baleta na vakasama tale eso, raica na ilavelave ni mekasini na iTokani ni vula oqo.

Emma’s Hymns [Sere ni Lotu nei Ema], mai vei Liz Lemon Swindle