“Sa Sega Ni Dua Na Ka Me Vakatautauvatani Rawa Ena Kena Totoka kei na Kena Gasagasa me vaka Na Noqu Marau”
Na veivutuni e veisiga kei na lako mai vei Jisu Karisito sa ikoya na sala me rawati kina na reki—na reki e sivia yani na noda vakanananu.
Ena gauna taucoko ni Nona kaulotu e vuravura, a vakaraitaka na iVakabula na yalololoma cecere me baleti ira kece na luve ni Kalou—vakabibi o ira era sotava tu na rarawa se ra sa lutu tani. Ni a vakalewai mai vei ira na Farisi me baleta ni veimaliwai ka kana vata tiko kei ira na tamata ca, a sauma o Jisu ena nona vakavulica e tolu na vosa vakatautauvata kilai vinaka.1 Ena vosa vakatautauvata yadua oqo, a vakadreta kina o Koya na bibi ni nodra vakasaqarai o ira era sa sese tu, kei na reki e vakilai ni ra sa lesu mai. Me ivakaraitaki, ena vosa vakatautauvata ni sipi ka a yali a kaya kina o Koya, “Ni sa levu vakakina na reki mai lomalagi ena vuku ni tamata ivalavala ca e le dua bauga sa qai veivutuni.”2
Au gadreva meu vosa ena kena vakaukauwataki na kedrau isema na reki kei na veivutuni—vakatabakidua, na reki e dau yaco mai ni da veivutuni kei na reki eda sotava ni da sureti ira na tani mera lako mai vei Karisito ka ciqoma na Nona solibula veisorovaki ena nodra bula.
Eda Sa Sucu Meda Rawata Na Marau
Ena ivolanikalou, na vosa na reki e vakaibalebaletaki vakalevu cake mai na veigauna eso ni veivakacegui se na vakilai ni marau sara mada ga. Na reki ena vakasama oqo e sa dua na itovonibula vakalou, e kunei ena kena taucoko ni da sa lesu meda laki tiko ena iserau ni Kalou.3 E sa ka bibi, veilaveti, dauvosota vakadede, ka veisautaki-bula vakalevu cake sara mai na marau se vakacegu cava ga e rawa ni solia na vuravura oqo.
Eda a buli meda dau reki. Sa ikoya na noda icavacava nakiti vaka luve ni dua na Tama Vakalomalagi dauloloma. E vinakata o Koya me wasea na Nona reki vata kei keda. A vakatavulica na parofita o Liai ni ituvatuva ni Kalou me baleti keda yadua sa ikoya me da “rawata na marau.”4 Baleta ni da bula tiko ena dua na vuravura druka, na reki tawayalani se tawamudu e dau vakavuqa e vaka meda sega ni yacova rawa. E na tikina ka tarava, a vakamacalataka talega o Liai ni na “lako mai na Mesaia … me vueti [keda] mai na lutu tani.”5 Na veivueti, ena vuku ni iVakabula o Jisu Karisito, sa rawa kina na reki.
Na itukutuku ni kosipeli e sa dua na itukutuku ni inuinui, ni “itukutuku vinaka mo dou reki vakalevu kina,”6 kei na sala ena vakilai kina na vakacegu kei na veigauna ni reki ena bula oqo ka rawati kina na taucoko ni reki ena bula sa bera mai.7
Na reki eda tukuna tiko e sa dua na isolisoli me baleti ira na yalodina, ia e lako vata mai na kena isau. Na reki e sega ni sau lailai se soli vakarawarawa. Ia, e a voli “ena dra talei ga i [Jisu] Karisito.”8 Kevaka meda kila vinaka sara na talei ni reki dina, vakalou, eda na sega ni lomalomarua meda solivaka na iyau vakavuravura cava ga se cakava na veisau ni bula cava ga e ganita meda na rawata kina.
A kila vinaka na ka oqo e dua na tui kaukauwa ia ka yalomalua ena iVola i Momani. “Io a cava meu kitaka,” a taroga o koya, “meu sucu kina vua na Kalou, me cavuraki kina na yalo ca mai na lomaserequ, ka ciqoma na Yalona, ka meu vakasinaiti ena marau … ? Raica, a sa kaya ko koya, au na solia yani na veika kece au sa taukena, io, au na solia yani na noqu matanitu me rawa ni’u ciqoma kina na marau levu oqo.”9
Ni sauma na nona taro na tui, a kaya yani o Eroni na daukaulotu, “Kevaka ko sa gadreva na veika oqo, … mo na cuva sobu vua na Kalou … [ka] veivutunitaka na nomu ivalavala ca kecega.”10 Na veivutuni sa ikoya na sala ki na reki,11 baleta ni sa ikoya na sala ka veimuataki kivua na iVakabula o Jisu Karisito.12
Na Reki e Lako Mai ena Veivutuni Dina
Kivei ira eso, na vakasamataki ni veivutuni me sala ki na reki ena rairai veisaqasaqa beka. Na veivutuni, ena so na gauna, e rawa ni dau mosimosi toka ka dredre. E gadrevi kina na tusanaki ni so na noda vakanananu kei na ivalavala—so sara mada ga na noda vakabauta—ka ra a cala. Na veivutuni e gadrevi talega kina na veisau, ka, ena so na gauna, e rawa ni tawailasa. Ia na reki kei na veivakacegui e rau sega ni tautauvata. Na ivalavala ca—oka kina na ivalavala ca ni dokadokai keda—e yalana noda reki.
Me vaka e tukuna na daunisame, “Sa ia na tagi ena bogi, Ia sa yaco ena mataka na marau.”13 Ni da veivutunitaka noda ivalavala ca, e dodonu meda vakanamata ena reki cecere ka muria mai. Ena rairai balavu beka na bogi, ia na mataka e dau yaco mai, ka, isa, sa vakaevei na kena totoka na vakacegu kei na reki uasivi eda vakila ni sa sereki keda na Veisorovaki ni iVakabula mai na ivalavala ca kei na rarawa.
“Sa Sega ni Dua na Ka me Vakatautauvatani Rawa ena Kena Totoka kei na Kena Gasagasa”
Vakasamataka mada na veika sotava o Alama ena iVola i Momani. A “kuretaki [koya] na rarawa tawamudu” ka “cukiraki” na yalona me baleta na nona ivalavala ca. Ia na gauna ga a vuki kina o koya kivua na iVakabula me baleta na yalololoma, a “sa sega ni nanuma tale na [nona] mosi” o koya.14
“Ia oqo, sa dua na ka na marau,” a tukuna o koya, “kei na kena totoka na rarama au sa raica; io, … sa sega tale ga ni dua na ka me vakatautauvatani rawa ena kena totoka kei na kena gasagasa me vaka na noqu marau.”15
Oqo na mataqali reki e tu vei ira era lako mai vei Jisu Karisito ena veivutuni.16 Me vaka e vakatavulica o Peresitedi Russell M. Nelson:
“Sa dolava na veivutuni na katuba meda taura na kaukauwa ni Veisorovaki i Jisu Karisito. …
“Ni da sa digitaka meda veivutuni, eda sa digitaka meda veisau! Eda sa vakatara na iVakabula me vakavoutaki keda ki na keda ituvaki vinaka duadua. Eda sa digitaka meda tubu vakayalo ka ciqoma na reki—na reki ni noda vueti mai Vua. Ni da sa digitaka meda veivutuni, eda sa digitaka meda vakataki Jisu Karisito vakalevu cake!”17
Na veivutuni e kauta mai na reki baleta e vakarautaka na yaloda me ciqoma na veivakayarayarataki ni Yalo Tabu. Na vakasinaiti ena Yalo Tabu e kena ibalebale meda vakasinaiti ena reki. Ni da vakasinaiti ena reki e kena ibalebale eda sa vakasinaiti ena Yalo Tabu.18 Ena tubu noda reki ni da cakava e veisiga meda kauta mai na Yalotabu ki na noda bula. Me vaka a vakavulica na parofita o Momani: “Ia era sa daulolo ka masu vakawasoma, ka sa tubu ka kaukauwa cake tikoga na nodra yalomalumalumu, ka sa dei ka tudei tikoga na nodra vakabauta na Karisito, ka vakasinaiti kina na yalodra ena marau kei na vakacegu.”19 Sa yalataka na Turaga kivei ira kece era muri Koya, “Au na solia vei iko na Yaloqu, ia ena vakararamataka na nomu vakasama, ka na vakasinaiti na yalomu ena reki.”20
Na Reki ni Nodra Vukei na Tani Mera Veivutuni
Ni oti noda vakila na reki e lako mai na veivutuni dina, eda na gadreva me wasea na reki oya kei ira na tani. Ia ni da vakayacora vakakina, e vakalevutaki na noda reki. Oqori sara ga na ka a yaco vei Alama.
“Oqo na noqu lagilagi,” a kaya o koya, “de na rawa meu iyaya ni cakacaka ena liga ni Kalou meu kauta mai eso na yalo ki na veivutuni; ka sa ikoya oqo na noqu marau.
“Io raica, sa vakasinaiti na yaloqu ena marau, ni’u sa raica ni ra sa veivutuni vakaidina e vuqa na wekaqu, ka ra lako mai ki vua na Turaga na nodra Kalou; ia ka’u nanuma na ka sa kitaka vei au na Turaga, … io, au a qai nanuma ni sa dodoka tu mai vei au ko koya na ligana dauloloma.”21
Na vukei ira na tani mera veivutuni e sa dua na ivakaraitaki matau ni noda vakavinavinaka kivua na iVakabula; ka sa dua na ivurevure ni reki uasivi. E sa yalataka na Turaga:
“Ia kevaka sa yaco mo … kauta mai e dua mada ga na yalo kivei au, sa na vuabale sara na [nomu] marau vata kei koya ena matanitu i Tamaqu!
“Ia oqo, kevaka sa vuabale na [nomu] marau ena dua na yalo [ko] sa kauta mai vei au … , sa na vakacava na levu ni [nomu] marau kevaka [ko] sa kauta mai e levu na yalo kivei au!”22
Sa na Levu Vakaidina Na Nona Marau ena Yalo Sa Veivutuni
Au raica ni dau veivuke meu tovolea me raitayaloyalotaka na reki e vakila na iVakabula e veigauna yadua eda ciqoma kina na veivakalougatataki ni Nona solibula veisorovaki ena noda bula.23 Me vaka a cavuta o Peresitedi Nelson,24 na iApositolo o Paula ena nona ivola kivei ira na Iperiu a wasea na raititobu malumu oqo: “Meda biuta laivi … na ivalavala ca eda sa tao rawarawa kina, … ka meda vakaraici Jisu o koya sa vakatekivuna ena sauma talega na noda vakabauta; o koya ena vuku ni marau sa viritu e matanasa vosota na kauveilatai … a sa qai tiko sobu ko koya ena liga imatau ni tikotiko‑vakaturaga ni Kalou.”25 Eda dau tukuna wasoma me baleta na yaluma kei na rarawa e Kecisemani kei Kalivari, ia ka sega so na noda tukuna me baleta na reki uasivi ka a rairai nanamaki kina na iVakabula ni a cabora o Koya na Nona bula ena vukuda. E sa matata kina, ni Nona yaluma kei na Nona rarawa e a baleti keda, meda rawata kina na reki ni lesu vata kei Koya ki na iserau ni Kalou.
Ni vakavulici ira oti na tamata e Amerika makawa, a vakaraitaka na iVakabula na Nona loloma cecere ena vukudra ni a kaya:
“Ia sa vuabale na noqu marau ena vukumudou … ; a sa marau talega ko Tamada, kei ira na agilosi yalosavasava. …
“… Sa vuabale na noqu marau ena [vukumudou] … .”26
Lako Mai kivei Karisito ka Ciqoma na Nona Reki
Kemuni na taciqu kei na ganequ, meu tinia ena wasei ni noqu ivakadinadina, ka’u dau okata me dua na isolisoli vakalou. Au vakadinadinataka ni o Jisu Karisito esa iVakabula ka Dauveivueti kei vuravura. Au kila ni lomani keda yadua o Koya. Na Nona vakanamata vakatabakidua, na Nona “cakacaka kei na [Nona] lagilagi,”27 sa ikoya me vukei keda meda rawata na vuabale ni reki vei Koya. Oi au edua au vakadinadinataka ni veivutuni e veisiga kei na lako mai vei Jisu Karisito sa ikoya na sala me rawati kina na reki—na reki e sivia yani na noda vakanananu.28 Oqori na vuna eda tiko kina qo e vuravura. Oqori na vuna a vakarautaka kina na Kalou na Nona ituvatuva cecere ni marau me baleti keda. Sa i Jisu Karisito dina “na sala, na vu‑ni‑dina, kei na vu‑ni‑bula”29 ka sa ikoya duadua ga na “yaca sa soli e rukui lomalagi mera vakabulai kina na tamata ki na matanitu ni Kalou.”30 Au sa vakadinadinataka vakakina ena yaca tabu i Jisu Karisito, emeni.