Dua na Parofita Bula ni Gauna Oqo

Mai vei Elder Allen D. Haynie

Ena Vitusagavulu

Sa digitaka na Tamada Vakalomalagi na ituvatuva ni kena vakatakilai na dina vei ira na Luvena mai vua na parofita.

Niu a se gonetagane lailai, au taleitaka na Vakarauwai baleta ni ka kece au cakava ena siga oya e tiki tu ni dua na ilakolako talei. Ia veitalia na ka au cakava, e sa dau tekivu tu ga ena ka bibi duadua saraga—na sara kisitoni ena retio yaloyalo. Ena dua na mataka ni Vakarauwai, niu duri tikiva tu na retio yaloyalo ka veisautaka tiko na jenala, au raica na kisitoni au a namaka tu ni sarava esa sosomitaki ena kakaburaki ni koniferedi raraba ni Lotu i Jisu Karisito ni Yalododonu Edaidai. Niu raica tu na retio yaloyalo ka luvuci voli ni sa sega na kisitoni, au raica e dua na turaga ulu-sikoa vakaisulu vinaka ni dabe tiko ena dua na idabedabe totoka.

A duidui tu e dua na ka me baleti koya, au mani tarogi tuakaqu sara, “O cei ya?”

A kaya, “Oya o Peresitedi David O. McKay; o koya na parofita.”

Au a vakila saraga e dua na ka, ka’u kila tu ni sa parofita o koya. Ia, baleta niu se tagane gone taleitaki kisitoni tu, au a veisautaka na jenala. Ia au sega ni guileceva tu na ka au a vakila ena gauna lekaleka tawanamaki vakatakilai oya. Eso na gauna, e vagauna me rawa ni da kila, e dua na parofita.¹

Na kena kilai ena vakatakila ni sa dua tiko na parofita bula ena vuravura esa veisautaka tu na ka kecega.² E sa vakavuna e dua me vakawalena na kena vakatarogi na gauna cava e vosa tiko kina na parofita me vaka na parofita se sa vakacegui tu e dua ena veidusimaki cala ni vakasala vakaparofita.³ Na kilaka vakatakilai vakaoqo sa sureta e dua me vakararavi ki na vakasala ni parofita bula, ke da sega mada ga ni kila vinaka tu.⁴ Ni sa oti, sa digitaka tu na Tamada lomani e Lomalagi na ivakarau ni kena vakatakilai na dina vei ira na Luvena mai vua na parofita, e dua ka sega ni qara na veikacivi tabu oqo ka sega ni gadreva tu na noda veivuke me kila kina na nona tawakilikili vakai koya.⁵ Na parofita e dua esa vakarautaka, kaciva, vakadodonutaka, vakauqeta, vakavulica, vakatabuya, ka tokona tu na Kalou.⁶ O ya na vuna eda sega ni taqaya tu kina vakayalo ena muri ni vakasala vakaparofita.

Eda vinakata se sega, eda a digitaki taucoko ena so na iwalewale ena bula taumada meda mai sucu ena veigauna oqo. E rua tu na ka vakaidina e okati ki na veigauna oqo. Na matai ni ka vakaidina oya na tauyavutaki tale ni Lotu i Karisito e vuravura. Na karua ni ka vakaidina oya na kena veibolei dina tu na ka eso. E vakatakila na ivolanikalou ni otioti ni gauna ena “talai mai e dua na cava rerevaki me vakarusa na veika sa teivaki e vuravura,””⁷ na mate dauveitauvi,⁸ “na ivalu kei na irogorogo ni valu, ena yavavala ko vuravura taucoko, … ka tubu vakalevu sara na itovo ca.”⁹

Niu a se gone, a vakarerei au na veiparofisai ni otioti ni gauna ka vakavuna meu masulaka ni na sega ni yaco ena noqu gauna na Karua ni Lako Mai—au na rawa ni vakuria tu ke sa rawa. Ia au sa masulaka oqo na kena veibasai, dina ga ni sa vakadeitaki tu na bolebole parofisaitaki eso,¹⁰ baleta ni sa lesu mai o Karisito me veiliutaki, ena “koto sobu ena vakacegu” na Nona ibulibuli kecega.”¹¹

Na veika ni vuravura ena gauna oqo sa vakataqayata tu eso. Vaka na luvena ni veiyalayalati na Kalou, e sega ni gadrevi meda muria qo se ya me kilai na sala meda lako curuma kina na veigauna dredre oqo. E sega ni gadrevi meda rere.¹² Na vunau kei na vakavuvuli sa dodonu me muri meda bula vakayalo ka vosota vakayago kina sa kune ena vosa ni parofita bula.¹³ O ya na vuna a cauraka kina o Peresitedi M. Russell Ballard “e sega ni ka lailai … me tiko na parofita ni Kalou ena keda maliwa.”¹⁴

Sa vakadinadinataka o Peresitedi Russell M. Nelson “Na ivakarau yavutaki balavu ni Kalou ena nodra vakatavulici na Luvena mai vei ira na parofita sa vakadeitaka ni na vakalougatataka o Koya na parofita yadua ka na vakalougatataki ira ka rogoca na vakasala vakaparofita.”¹⁵ Sai lutua ga na muri ni parofita bula.¹⁶ Kemuni na taciqu kei na ganequ, sega ni vakataka na ivola ni komiki makawa kei na motoka mareqeti eso, era sega ni ka makawa sara na ivakavuvuli vakaparofita. O ya na vuna meda kakua ni qara kina meda vakayagataka na nodra vosa na parofita oti yani me vakatanitaka na nodra ivakavuvuli na parofita bula.¹⁷

Au taleitaka na vosa vakatautauvata e vakayagataka o Jisu Karisito me vakatavulica kina na ivakavuvuli ni kosipeli eso. Au via wasea vata kei kemuni ena mataka oqo e dua na vosa vakatautauvata ni bula dina e veiwaki.

Dua na siga au a curuma na vale ni kana ena valenivolavola liu ni Lotu meu laki vakasigalevu. Niu sa taura oti mai na tere ni kakana, au curuma sara na vanua ni kana ka siqema na teveli eratou dabe toka kina na lewe tolu ni Mataveiliutaki Taumada, kei na dua na dabedabe lala. Na veika au vakila niu luluqa kina a vakavuna meu yawaki au vakatotolo mai na teveli oya, kau qai rogoca na domo ni noda parofita, o Peresitedi Russell M. Nelson, ni kaya, “Allen, e dua na idabedabe e lala tiko oqo. Lako mai ka dabe vata kei keitou.” Au sa cakava vakakina.

Ni vakarau cava na vakasigalevu, au a kurabui ni rogoca e dua na rorogo bi kaukauwa, niu rai cake yani, au raica ni sa vakaduria vakadodonu tu o Peresitedi Nelson na nona tavaya wai palasitiki ka qai vakadasilataka ka sogota tu.

A qai taroga o Peresitedi Dallin H. Oaks na taro au a via taroga tu, “Peresitedi Nelson, cava na vuna o vakadasilataka kina na nomu tavaya wai palasitiki?”

Sauma o koya, “E vakarawarawataka vei ira ka qarava tu na veika qaqi lesu tale baleta ni sega ni vakaosooso ena koniteina ni ka qaqi lesu tale.”

Ni vakasamataki tu na sausaumi oya, au a rogoca tale na rorogo bi vata ga oya. Au a rai ki nai matau, ka sa vakadasilataka tu o Peresitedi Oaks na nona tavaya ni wai palasitiki vakataki Peresitedi Nelson ga. Au qai rogoca eso na rorogo enai mawi, ka sa vakadasilataka tiko o Peresitedi Henry B. Eyring na nona tavaya wai palasitiki, dina ga ni duidui na nona kitaka ni vakababa tu na tavaya, ka dredre mai na kena duri vakadodonu na tavaya. Ni siqemi tu oqo, a vakaraitaka vua ena yalovinaka o Peresitedi Nelson na iwalewale ni tavaya me rawarawa cake na kena vakasababataki na tavaya.

Ena gauna oya, au a raviti Peresitedi Oaks ka taroga vakamalua, “E sa dua li na gagadre vou ni ka qaqi lesu tale ena vale ni kana na vakasababataki ni nomu tavaya wai palasitiki?”

A sauma ena matadredredre o Peresitedi Oaks, “I Allen, sa gadrevi mo muria na parofita.”

Au yalodei ni a sega ni cauraka tiko o Peresitedi Nelson ena vale ni kana eso na vunau vou vu mai na qaqi lesu tale ena siga oya. Ia eda rawa ni vuli mai na sausaumi maqosa¹⁸ i Peresitedi Oaks kei Peresitedi Eyring ki na ivakaraki i Peresitedi Nelson kei na nona tuvakarau me vakatavulici ira ka donuya ena sala vinaka cake.¹⁹

Ena vica na yabaki sa oti, a wasea o Elder Neal A. Maxwell na rai kei na vakasala eso esa veidonui tu vakaparofita ki na noda gauna:

“Ena vula kei na yabaki sa tu ki liu, ena rairai gadrevi ki na lewenilotu yadua me navuca ena muria o koya se sega na Mataveiliutaki Taumadfa ena ka eso. Ena dredre vakalevu ki na lewenilotu mera cegu vakadede ena rua na nanuma. …

“… Me da sa volaitukutukutaka me rawa ni matata tu na digidigi, ka vakayaco ka na tani vakai ira ena muri ni vakasala vakaparofita. …

“Kaya o Jisu ni gauna sa vakadrauna kina na vu ni lolo, ‘sa voleka na vulaikatakata.’ … Eda sa vakaroti ni sa vulaikatakata tu oqo, meda kakua sara ni kudruvaka na katakata!”²⁰

Na itabatamata cadra mai sa tubu cake tiko ena gauna sa levu tu kina na drau ni lolo kei na katakata. Na ka dina oya sa vakavurea na itavi bibi sara ki na itabatamata cadra mai sa tiko rawa, vakabibi na kena muri na ivakasala vakaparofita. Ni ra vakaseva na itubutubu na ivakasala ni parofita bula, era sega wale ga ni vakayalia na veivakalougatataki yalataki kivei ira ia ka rerevaki sara na nodra vakatavulici na luvedra ni sa tawayaga na vosa ni parofita se na rawa ni vakawaleni tu na tauri ni vakasala vakaparofita ka sega ni kauwaitaki na kena vatuka malumalumu vakayalo.

A dikeva tu o Elder Richard L. Evans: “Era nanuma cala eso na itubutubu ni rawa ni ra cegu vakalailai ena veiliutaki kei na vakaraitaki … ni rawa ni ra cegu vakalailai ena veika yaga ka sega ni vakaseva na nodra matavuvale se na icavacava ni nodra matavuvale. Ia ke lako tani vakalailai na itubutubu, sa rawa ni ra sivita na gone na ivakaraitaki ni tubutubu.”²¹

Vaka na tabatamata sa vakatabui tu me vakarautaki ira na tabatamata cadra tiko mai ena nodra itutu parofisaitaki ena gauna oqo,²² na itavi sa dodonu me taucoko tu ena gauna e veivakayarayarataki kaukauwa tu kina na vunica,²³ eda sega ni rawa ni vurevure veilecayaki tu ena bibi ni keni muri na ivakasala vakaparofita. Sai koya na vakasala sara ga oya ena vakatara na tabatamata cabe mai mera raica “na meca ni sa yawa sara; ka qai [rawa ni] vakarau tu” me ra vorata na kabakoro ni meca.²⁴ Na vei duidui lalai e tu vei keda, kudra eso, se vakalelewa lo ena sausaumi ki na vakasala vakaparofita sa rawa ni sau ni vakarerevaki ni noda lakova volekata tiko na tutuni salatu ni veiyalayalati; ia ni vakalevutaka na vunica ki na nodra bula na tabatamata cabe mai, sa rawa ni vakayarayarataki ira na ka oqo me ra biuta vakaoti na salatu. Na ka vakaoqo esa isau vakaitamera sara vakatabatamata.²⁵

Eso vei kemuni ena rairai nanuma ni sa lekata tu na nomuni sasaga ni muria na vakasala i Peresitedi Russell M. Nelson. Ke sa vakakina, veivutuni sara; tekivu tale ni muria na vakasala ni parofita digitaki ni Kalou. Vakatikitikitaka na veirawai ni kisitoni vagonegonea ka vakararavi vua nai lumuti ni Turaga. Marau tu ni sa “tiko [tale] na parofita e Isireli.”²⁶

Ke tawamatata mada ga vei iko, au vakadinadinataka ni da rawa ni ulabaleta na katakata ena gauna oqo ka rawaka tu kina. Eda sa Yalododonu ni gauna oqo, ka sa ka levu na veisiga oqo. Eda a nuinui tu ni lako mai ki vuravura ena gauna oqo, ka nuidei tu ni da na sega ni vakatarabetaki ni sotava na kabu levu loaloa ka veivakacalai ni vunica²⁷ ia meda tauri vakasala kei na veidusimaki mai vei koya esa vakadonui tu me kaya vei keda kei na vuravura raraba, “Sa kaya vakaoqo na Turaga ko Jiova.”²⁸ Ena yaca tabu ni parofita ka vakatubura na Kalou, na Yalo Savasava ni Isireli,²⁹ io o Jisu Karisito, emeni.

iDusidusi

1. A sureti ira o Peresitedi Russell M. Nelson wale toka ga oqo na gonevuli ni Brigham Young University mera vakila na ka vakatakilai oya: “Taroga na Tamamu Vakalomalagi ke keimami sa apositolo ka parofita vakaidina tu ni Turaga. Taroga ke keimami sa ciqoma na vakatakila ena ka oqo kei na ka tale eso” (“Na Loloma kei na Lawa ni Kalou” [Lotu ena Brigham Young University, 17 ni Sepi. 2019], speeches.byu.edu). Raici Neil L. Andersen talega, “Na Parofita ni Kalou,” LiaonaMe 2018, 26: “Sa noda na madigi vaka Yalododonu Edaidai meda ciqoma na noda ivakadinadina ni sa kacivi mai vua na Kalou o Peresitedi Nelson.” Na italanoa ni saumaki i Alama ena vakarorogo tu kivua na parofita o Apinatai sa vakarautaka tu na vakadinadina ni sa tiko vei keda taucoko na vakatakila me baleta na parofita (raica na Mosaia 13:5; 17:2).

2. “Me tiko vei keda na parofita se me kakua; ia me tiko na parofita, sa tiko vei keda na ka kecega” (Gordon B. Hinckley, “We Thank Thee, O God, for a Prophet,” Ensign, Jan. 1974, 122).

3. “Era sa tekivu sega ni vakabauta na yalo ni parofisai kei na yalo ni vakatakila; ka sa waraki ira tu na lewa ni Kalou” (Ilamani 4:23; raica talega na Vunau kei na Veiyalayalati 11:25). “Eda lagata ke kitaka wasoma tu, ‘Turaga Keimami Vuabale Parofita me dusimaki keda ena veisiga e muri oqo.’ E vuqa sara [sa dodonu me] biuta kina e dua na itini ni vosa me kaya: ‘Ni dusimaki keda o koya me ganita na noda vakasama kei na noda gagadre’” (Nodra iVakavuvuli na Peresitedi ni Lotu: Heber J. Grant [2002], 80).

4. “Eda na ciqo vakasala ena so na gauna eda sega ni kila deivaki tu se sega beka ni ganiti keda, ni oti mada ga na masu kei na vakasama bibi. Kakua ni vakawaletaka na ivakasala, ia taura matua. Ke dua o nuitaka e solia vei iko e dua na ka e vakataka tu na nuku ka yalataka ni sa tiko kina na koula, o na rairai taura tu e ligamu ena yalomatua me dua na gauna, ka kuretaka malua tu. Na gauna kece au sa kitaka oya ena vakasala mai vua na parofita, oti e dua na gauna sa ra tekivu basika na koula matailalai kau sa vakavinavinaka tu” (Henry B. Eyring, “Finding Safety in Counsel,” Ensign, May 1997, 26; raica talega na 3 Nifai 1:13; Vunau kei na Veiyalayalati 1:14

5. Raica na 2 Nifai 4:17–18. Dou kakua ni vosa vakacacataki au ena vuku ni noqu malumalumu, se vosa vakacacataki tamaqu ena nona malumalumu, … ia mo dou vakavinavinaka ga vua na Kalou, ni sa vakatakila vei kemudou na neimami malumalumu mo dou vuku cake kina mai vei keimami.” (Momani 9:31).

6. Raica na Vunau kei na Veiyalayalati 3:6–8; raica talega na Vunau kei na Veiyalayalati 93:47.

7. Vunau kei na Veiyalayalati 29:16.

8. Raica na Vunau kei na Veiyalayalati 84:97; raica talega na Vunau kei na Veiyalayalati 87:6.

9. Vunau kei na Veiyalayalati 45:26, 27.

10. Raica na Vunau kei na Veiyalayalati 1:38.

11. Osea 2:18. “Niu na vakaraitaki au mai lomalagi ena kaukauwa kei na lagilagi cecere, kei ira kece na lewei lomalagi, kau na mai tiko ena buladodonu vata kei ira na tamata e vuravura me dua na udolu na yabaki, ia ko ira na dau caka ca era na sega ni vosota rawa” (Vunau kei na Veiyalayalati 29:11).

12. Raica na 1 Nifai 22:16–17; raica talega na Vunau kei na Veiyalayalati 59:23.

13. “Raica e ra sa cata na nodra vosa na parofita. Ia, kevaka me a tiko ga ena vanua ko tamaqu ni sa vakaroti oti vua me dro tani mai kina, raica, ena mate talega ko koya” (1 Nifai 3:18; raica talega na 2 Nifai 26:3; Vunau kei na Veiyalayalati 90:5).

14. M. Russell Ballard, “Nona Vosa Dou Na Ciqoma,” Liaona, Julai 2001, 65.

15. Russell M. Nelson, “Kerekere, Vakasaqara, Tukituki,” Liaona, Nove. 2009, 82. “Sa sega ni rawa ni marau sara na tamata ia mai na talairawarawa ki na ivakasala ni parofita bula” (Na iVakavuvuli i Lorenzo Snow, ed. Clyde J. Williams [1996], 86).

16. “Raici ira matua na vakatulewa ena Lotu nikua, se nimataka, ka vakatauvatana na nomu bula kivei ira mai na kena kilai tu na veika era na raica, vakasamataka, se tukuna na parofita ena gauna eliu” (Na iVakavuvuli i Harold B. Lee [1996], 525).

17. A dikeva ena dua na gauna o Peresitedi Spencer W. Kimball ni “o ira ka ukutaka na ibulubulu ni parofita mate sa tekivu oqo me vakaviriki ira na bula tiko” (Na iVakavuvuli i Spencer W. Kimball, ed. Edward L. Kimball [1982], 462). “Na vosa bibi duadua eda rawa ni rogoca, tugana, ka muria sai ira ka vakatakilai mai vua na noda parofita bula” (Ronald A. Rasband, ““Na Veika ni Lomaqu,” Liaona; Nove. 2021, 40).

18. “Ni da rogoca na vakasala ni Turaga era tukuni ena vosa ni Peresitedi ni Lotu, na noda sausaumi sa dodonu me dei ka matau” (M. Russell Ballard, “Nona Vosa Dou Na Ciqoma,” Liaona, Julai 2001, 65).

19. “Na Lotu i Jisu Karisito e sa dau liutaki tu ga mai vei ira na parofita kei na apositolo bula. Dina ga ni ra vakayago ka tiko talega na nodra malumalumu vakatamata, sa vakauqeti nai talai ni Turaga mera vukei keda ni levea na dredre eso e vakarerea tu na bula vakayalo ka vukei keda ni lako curuma vinaka na bula vakayago ki na noda icavacava, vakaoti, mai lomalagi” (M. Russell Ballard, “Na Kalou sa Veidusimaki Tu,” Liaona, Nove. 2015, 24)

20. Neal A. Maxwell, “A More Determined Discipleship,” Ensign, Feb. 1979, 69–70.

21. Richard L. Evans, “Foundations of a Happy Home,” in Conference Report, Oct. 1964, 135–36.

22. Raica na Vunau kei na Veiyalayalati 123:11; raica talega na Robert D. Hales, “Na Noda iTavi vua na Kalou: Na iLesilesi ni Tubutubu kei na iLiuliu ki na iTabatamata Cadra Mai,” Liaona; Me 2010, 95–98.

23. Raica na Vunau kei na Veiyalayalati 52:14.

24. Vunau kei na Veiyalayalati 101:54.

25. Raica na Mosaia 26:1–4.

26. 2 Tui 5:8.

27. “[Mo dou] muria na vosa kei na ivakaro kecega sa vakatakilai vua me tukuna vei kemudou, … ni kena vakayacori na veika oqo … na Turaga na Kalou ena vakatalabusesetaka na kaukauwa ni butobuto e matamudou, ka vakavuna me yavavala o lomalagi ena vukumudou, me vakalagilagi kina na yacana” (Vunau kei na Veiyalayalati 21:4, 6). “E sega na tamata ka muria tu na ivakavuvuli se tauri vakasala mai vei koya ka duri tu vaka mata ni Turaga e sa lako sese” (iVunau ni Bula Sautu: iVakavuvuli kei na Volavola i Joseph Fielding Smith, ed. Bruce R. McConkie [1998], 243).

28. Isikeli 3:27. “Ni dou na rogoca na nona vosa, me vaka ga ni dou rogoca mai gusuqu, ena yalovosota kei na vakabauta” (Vunau kei na Veiyalayalati 21:5).

29. Raica na 1 Nifai 22:20–21; raica talega na 3 Nifai 20:23.