Gauna Cava Mo Ciqoma Kina na Nomu Veivakalougatataki Vakapeteriaki

Mai vei Elder Kazuhiko Yamashita

Ena Vitusagavulu

Ni o sa ciqoma na nomu veivakalougatataki, kemuni na raica ka vakila na Nodrau lomani iko na Tamada Vakalomalagi kei Jisu Karisito kei na Nodrau vakatabakidua ena nodrau raici iko.

Noqu itokani vinaka o Elder Randall K Bennet a vosa ena veivakalougatataki vakapeteriaki ena noa. Sa dua dina na vosa vinaka ka vakauqeti keimami kece. Kemuni na taciqu kei na ganequ, e rawa talega meu vosa ena veivakalougatataki vakapeteriaki? Kemuni na Peteriaki, ni sa toso cake na kerekere ni wiliwili ni veivakalougatataki vakapeteriaki, au masulaka ni na vakalougatataki iko na Turaga mo tomana tiko na nomu qarava vinaka na nomu itavi.

Niu lako ena koniferedi ni iteki,au dau sikovi peteriaki ni iteki kei na watina. Era yalo malua na Peteriaki, dau vakarorogo, ka iliuliu vakasakiti e sa kaciva na Kalou. Era wasea vei au e vuqa na veika vakayalo era lakocuruma. Au taroga vei ira na kedra yabaki koya e gone duadua se koya e qase duadua vei ira era sa ciqoma oti na nodra veivakalougatataki. Ena gauna qo, koya e gone duadua a yabaki 11, koya e qase duadua e yabaki 93.

Au ciqoma na noqu veivakalougatataki vakapeteriaki niu se lewenilotu vou ena yabaki 19, ni oti e rua na yabaki na noqu papitaiso. Noqu peteriaki a sa qase sara. A curu ena Lotu ena 1916 ka a dua na painia ni Lotu e Japani. Dua na madigi talei na noqu ciqoma na noqu veivakalougatataki vakapeteriaki mai vua e dua na tisaipeli vakasakiti ni Turaga. A bau dredre toka meu kila na nona vosa vaka Japani, ia e sa bau kaukauwa.

O ira na peteriaki au mai sotava oqo ni vuqa vei ira na tamata yadua era ciqoma na nodra veivakalougatataki vakapeteriaki ni bera ni ra lei kaulotu. Kemuni na cauravou, goneyalewa, itubutubu, kei na bisovi, na veivakalougatataki vakapeteriaki e sega walega ni vakavakarau mo laki kaulotu. Na lewenilotu era bula kilikili e rawa mera ciqoma na nodra veivakalougatataki vakapeteriaki ena gauna esa donu kina vei ira.¹

Vei kemuni na lewenilotu matua, eso vei kemuni e se sega ni ciqoma na nomuni veivakalougatataki Vakapeteriaki. Nanuma tiko, ni sega ni dua na iyalayala ni yabaki.

Na noqu nei, a dua na lewenilotu yalodina ena Lotu, a veiqaravi vaka qasenivuli ena Soqosoqo ni Veivukei me yacova ni mate ena yabaki 90. Au rarawataka noqu qai mai kila ni a sega ni bau ciqoma na nona veivakalougatataki vakapeteriaki. A vuqa na dredre a lakocuruma ena nona bula, baleta ni sega ni dua na matabete a tiko ena nona lomanivale, a sega ni ciqoma vakalevu na veivakalougatataki ni matabete. Na veivakalougatataki vakapeteriaki ke a solia vua na vakacegu ena gauna e dau gadreva kina vakalevu.

Kemuni na matua, kevaka e sega ni o se ciqoma na nomu veivakalougatataki vakapeteriaki, kakua ni o leqa! E duidui kece tu na nodra gauna vakalou na tamata. Kevaka o yabaki 35, se 85 ka tiko vei iko na gagadre, vosa vua na nomu bisopi me baleta na nomu veivakalougatataki.

Kemuni na lewenilotu vou, o ni sa rogoca beka na veivakalougatataki vakapeteriaki? Au sega ni kila ni tiko na noqu madigi meu ciqoma e dua ena gauna au curuvou mai kina ena Lotu, ia na noqu bisopi lomani a qai wasea vei au na veivakalougatataki vakapeteriaki ka vakauqeti au meu vakavakarau meu ciqoma na noqu ena gauna au papitaiso kina. Kemuni na lewenilotu curuvou mai, e rawa talega mo ni ciqoma na nomu veivakalougatataki vakapeteriaki. Ena vukei kemuni na Turaga ena nomuni vakavakarau ki na madigi tabu oqo.

Me da raica vata mada e rua na inaki ni veivakalougatataki vakapeteriaki:

Na veivakalougatataki vakapeteriaki e solia na ivakasala mai vua na Turaga vei iko.²
Na veivakalougatataki vakapeteriaki e vakamacalataka na nomu itutu ena vale vaka Isireli.

Na nomu veivakalougatataki vakapeteriaki e tukutuku mai vei Tamada Vakalomalagi ka oka talega kina na iyalayala vakauqeti me dusimaki iko ena nomu bula. Na veivakalougatataki vakapeteriaki ena sega ni vaka e dua na mape ni nomu bula ia ena sauma taucoko na nomu taro. Kevaka e sega ni tukuni kina e dua na gauna bibi ni nomu bula, kakua ni nanuma ni sega ni tiko na madigi oya ena nomu bula. Vakakina, e sega ni dua na veivakadeitaki ni na yaco na veika kece e tukuni tiko ena nomu veivakalougatataki ena bula oqo. Na veivakalougatataki vakapeteriaki e tawamudu, kevaka me kilikili na nomu bula, na iyalayala e sega ni yaco ena bula oqo ena vakayacori ena bula tarava.⁶

Ni o sa ciqoma na ivakamacala ni nomu itutu ena kawa vaka Isireli, o na mai kila taumada kina ni o cavu mai ena vuvale vaka Isireli ka kawa i Eparama.³ Mo kila vinaka na bibi ni veika oqo, vakatabakidua nomu rai ki na iyalayala ni Turaga vei ira na vuvale i Isireli kivei Eparama.

Na iyalayala oqo e oka kina na:

“Ena vakalewevuqatakasara na Nona kawa (raica na Vakatekivu17:5–6; Eparama 2:9; 3:14).
“Na nomu kawa era na muri mai, ena ciqoma na kosipeli ka kauta na matabete (raica na Eparama 2:9).
Na kawa i Eparama era na muri mai “era na vakalougatataki kina na vei matavuvale kece sara ni vuravura, na veivakalougatataki ni Kosipeli, sai koya na veivakalougatataki ni veivakabulai, io na bula tawamudu” (Eparama 2:11 ⁴

Ni da lewena na Lotu, eda sa gone ni veiyalayalati.⁵ Eda sa ciqoma na veivakalougatataki ni veiyalayalati i Eparama ni da bulataka tiko na lawa kei na cakacaka vakalotu ni kosipeli.

Na vakavakarau ni nomu veivakalougatataki vakapeteriaki ena vukea me vakalevutaka na nomu vakabauta vei Tamada Vakalomalagi kei Jisu Karisito. Ni o sa ciqoma na nomu veivakalougatataki ka wilika ka vakasamataka, o na vakanamata tiko kina vakavuqa.

E vakavulica o Peresitedi Thomas S. Monson: “Na Turaga vata ga a solia na Liaona vei Liai sa vakarautaka vei iko kei au nikua e dua na isolisoli duatani sara ka yaga sara me mai dusimaka na noda bula, e makataka na leqa ni tataqomaki, ka dua na sala taqomaki—sega walega ki na vanua yalataki, ia ki noda itikotiko vakalomalagi.”⁷

Kemuni na bisopi, itubutubu, peresitedi ni kuoramu ni talatalaqase kei na Soqosoqo ni Veivukei, liuliu ni kaulotu ena tabanalevu, dauniveiqaravi marama kei na turaga, kerekere ni vakauqeti ira na cauravou kei na goneyalewa, lewenilotu matua kei na lewenilotu vou era sebera ni ciqoma na nodra veivakalougatataki vakapeteriaki mera vakasaqara na veidusimaki ni Turaga ka mo veivuke ena nodra vakavakarau.

Au dau wilika ka masulaka vakawasoma na veivakalougatataki vakapeteriaki; edau vakayaloqaqataki au. Au raica na veika e niutaka vei au na Turaga, ka edau vukei au meu veivutuni ka yalomalumalumu. Niu dau wilika ka vakasamataka, au dau gadreva meu bula kilikili meu ciqoma na veivakalougatataki e yalataki.

Vaka ga na ivolanikalou eda wilika vakalevu edau kauta mai na ibalebale vou, na noda veivakalougatataki vakapeteriaki ena kauta mai eso na ibalebale duidui ena kena gauna donu. Na noqu e sa mai duatani sara na kena ibalebale gauna au yabaki 30 kina mai na gauna au sa 50 kina. E sega ni veisau na vosa e volai, ia eda raica ga ena dua na sala duidui.

Tukuna o Elder Dallin H. Oaks na veivakalougatataki vakapeteriaki “e soli mai ena veivakauqeti ni Yalo Tabu ka me wilika ka vakadewataki mai na veivakauqeti ni Yalo Tabu. Na ibalebale kei na kena bibi na veivakalougatataki vakapeteriaki ena vakavulica na ivunau ena vunau ena loma ni dua na gauna mai na kaukauwa ni Yalo vata ga e vakauqeta.”⁸

Taciqu kei na ganequ au vakadinadinataka ni Tamada Vakalomalagi kei na Luvena Duabau, na Turaga o Jisu Karisito e bula tiko. E Rau lomani keda. Na veivakalougatataki vakapeteriaki e isolisoli tabu mai vei Rau. Ni o sa ciqoma na nomu veivakalougatataki, kemuni na raica ka vakila na Nodrau lomani iko kei na Nodrau vakatabakidua ena nodrau raici iko.

Na iVola i Momani sa dua tale na ivakadinadina kei Jisu Karisito. Au vakavinavinakataka ni da liutaki mai vua na parofita bula, o Peresitedi Russell M. Nelson.

Au vakavinavinakataka na noda iVakabula, o Jisu Karisito. Na Sigatabu ni Mate oqo au na vakanamata vei Koya kei na Nona Tucaketale, ka qaravi Koya ka vakavinavinakata Nona solibula. Au kila ni a vakila na veivakararawataki titobu baleta ni lomani keda vakatitobu ko Koya. Au kila ni a tucaketale baleta ni lomani keda ko Koya. Sa tiko vakaidina o Koya. Au vakadinadinataka oqo ena yaca i Jisu Karisito, emeni.