Veiqaravi
Na vanua cava ga eda tu kina, me da dodoliga yani ka kauwai me vakataka na iVakabula, vakabibi vei ira e noda na madigi me da lomana ka lesi me da veiqaravi kina.
Kemuni na taciqu kei na ganequ, kei na itokani, au kidavaki kemuni ki na koniferedi raraba!
Ni oti na koniferedi raraba ena Okotova sa oti, keirau taubaletaka na Vale ni Koniferedi kei Sister Gong me keirau vakabula ka rogoca na veika vakosipeli o ni sotava.
Era tukuna na noda lewenilotu mai Mexivo, “Hoy es el tiempo de Mexico.”
Keirau mai kila ni rau veitokani mai Igiladi o Gilly kei Mary. Ni oti nona lewena na Lotu o Mary, a sa sega na vanua me tiko kina. Veisureti ena yalo loloma o Gilly me rau laki vakaitikotiko vata. Vakasinaiti tu ena vakabauta, tukuna o Gilly, “Au sega ni vakatitiqataka vakadua ni tiko vata kei au na Turaga.” Ena koniferedi, a sota ena mamarau o Gilly kei rau na marama daukaulotu a vakavulici koya ena 47 na yabaki sa oti.
Sa qai matai ni gauna me rau lako mai na koniferedi o Jeff kei na watina, o Melissa. A dau qito baseball saumi o Jeff (dau ciqociqo) ia ena gauna oqo e sa vuniwai ni veivakamoceri. A tukuna o koya vei au, “Au sega ni namaka, ia au sa mua sara tiko meu papitaiso baleta niu vakila ni oqo na sala dina ka dodonu ni bula.”
A dua na gauna, a kere veivosoti o Melissa vei koya lesi me dauniveiqaravi vei Jeff, “E sega ni taleitaka o Jeff na sote vulavula ena loma ni vale.” Sauma mai na dauniveiqaravi, “Au na vakasaqara tale e dua na gaunisala.” Ia oqo erau sa itokani vinaka sara kei Jeff. Ena nona siga ni papitaiso o Jeff, au sotava e dua na ilawalawa ni tabanalevu ni Yalododonu Edaidai eratou sa mai taleitaka sara o Jeff, Melissa kei na luvedrau o Charlotte.
Ni da daumuri Jisu Karisito, eda sa sureti me da veiqaravi me vakai Koya, baleta ni waraki me da veisautaka noda bula.
Nona wasea vei au o Peggy ni na watina o John ni oti e 31 na yabaki ni nodrau vakamau, sa na qai vakarau papitaiso. au taroga sara na cava a qai veisau.
Tukuna o Peggy, “Keirau a vulica tiko na Veiyalayalati Vou ena Lako Mai, Mo Muri Au, qai taroga o John na ivakavuvuli ni Lotu.”
Tukuna o Peggy, “Daru sureti rau na daukaulotu.”
Tukuna o John, “E se sega ni dua na daukaulotu—vakavo ga na noqu itokani e rawa ni lako mai.” Ni oti e 10 na yabaki, na tacina dauveiqaravi o John sa mai yaco me nona itokani niutaki. (Au nanuma, Vakacava mada me a muduka na nona dau lako mai na tacina dauniveiqaravi o John ni oti e dua se rua, se ciwa na yabaki?)
A vakarorogo o John. E a wilika na iVola i Momani ena yalona dina. Nodrau veisureti na daukaulotu vei John me papitaiso, e qai vaka io. Kaya o Peggy “au lutu mai ena noqu idabedabe ka tekivu me tagi.”
Tukuna o John, “Au veisau niu sa toro voleka vua na Turaga.” Emuri, erau vauci o John kei Peggy ena valetabu. Ena Tiseba sa oti, e leqa kina o John ena yabaki 92. Tukuna o Peggy, “Dua na tamata vinaka o John, ia mai duatani sara ena dua na sala vakasakiti ni oti na nona papitaiso.”
Keirau kei Sister Gong a sotavi Meb kei Jenny ena video ena gauna ni matedewa na COVID-19. (Keirau sotava e vuqa na veiwatini kei na tamata yadua totoka ena video ena gauna ni COVID, a masulaki na nodra digitaki mai na nodratou peresitedi ni iteki.)
Rau tukuna ena vakarokoroko o Meb kei Jenny na veibolei ena nodrau bula e rau yalotarotarotaka kevaka ena rawa ni vukei rau na nodrau veiyalayalati. Rau vakabauti na veisorovaki i Jisu Karisito ka na vukei rau na nodrau veiyalayalati.
Dua na ka noqu marau nodrau taura na ivolatara ni valetabu o Meb kei Jenny ka lesu vata ki na vale ni Turaga. E muri qai voleka ni mate o Meb. Dua na veivakalougatataki ni vakalesui mai ni nodrau veiyalayalati o Meb kei Jenny kei na Turaga vakatalega kina vei rau ka vakila na veiqaravi loloma ni lewevuqa e wavoliti rau.
Ena veivanua au gole kina, au vakavinavinaka niu vuli mai vei ira na dau veiqaravi ka kauwai tiko me vakataka na iVakabula.
Ena vanua o Peru, keirau kei Sister Gong a sotavi Salvador kei ira na tacina.1 Eratou luveni yali o Salvador kei ira na tacina. A nona siganisucu o Salvador. Era vakauqeti au na iliuliu ni Lotu kei ira na lewenilotu era veiqaravi yalodina ki vua na vuvale oqo. “Na lotu savasava ka sega ni cala” sa okoya oqo—“na sikovi ni yada kei na luveniyali,”3 “vukei ira sa malumalumu, laveta cake na liga sa wadamele, ka vakaukauwataka na duru sa malumalumu.”4
Mai Hong Kong, na peresitedi ni kuoramu ni talatala qase e wasea tiko ni 100 na pasede na veitarogitaki ni veiqaravi e dau cakava na nodra kuoramu. Tukuna o koya, “Keimami masulaka na kena tuvai na itokani ni veiqaravi me rawa ni ra vakaitavi kece ena nodra raici ka kauwaitaki yadua.” “Keimami taroga yadua na itokani me baleti ira era veiqaravi kina. E sega ni ka ni toqai; keimami veiqaravi tiko vei ira na dauniveiqaravi mera kauwai tiko vei ira na tamata.”
E Kinshasa, Democratic Republic of the Congo, o Peresitedi Bokolo e wasea na nodratou sema mai ki na Lotu e Varanise na nona vuvale. Dua na siga, a wilika tiko na nona veivakalougatataki vakapeteriaki, vakayarayarataki Brother Bokolo na Yalotabu me lesu ki na nona vuvale ena DR Congo. E kila o Brother Bokolo ni na sotava e vuqa na ibolebole ke lesu tale. Kei na nona lotu, na Lotu i Jisu Karisito ni Yalododonu Edaidai e lotu i Jisu Karisito, e sebera ni se tauyavu e Kinshasa.
Ia, ena vakabauta, me vakataka e vuqa tale, e vakamuria na vuvale na Bokolo na Yalo ni Turaga. Mai Kinshasa, eratou veiqaravi ka masulaki ira e wavoliti ratou, lakocuruma ena qaqa na ibolebole, ciqoma na veivakalougatataki vaka yalo ka vaka yago. Nikua, eratou sa marautaka ni sa dua na vale ni Turaga ena nodra vanua.4
E dua na curuvou a mai veiqaravi kina e dua ena nona ivakaraitaki. Nona se cauravou, e kaya ni dau levu na gauna me wavoki tu e baravi. Dua na siga, a tukuna, “Au raica e dua na yalewa totoka ka vakaisulu ni sili rakorako tu.” Nona kurabui, a laki taroga na cava e dara tu kina edua na isulu ni sili rakorako e dua na yalewa totoka. E lewena o koya na Lotu i Jisu Karisito ni Yalododonu Edaidai ka taroga ena matadredre, “O via mai lotu na Sigatabu?” Sauma o koya, Io.
Ena vica na yabaki sa oti, ni keirau lako vata tiko ena dua na ilesilesi, a wasea o Elder L. Tom Perry na nona dau sikova vakawasoma kei nona itokani daukaulotu e dua na marama tu taudua ena dua na tikotiko raravisa e Boston. Nodrau yaco yani o Elder Perry kei nona itokani, dau kerea yani na marama oqo, “Vakasisia mai na nomudrau ivolatara ni valetabu e ruku ni katuba.” Ni sa raica oti na ivolatara ni valetabu sa na qai dolava mai na katuba e vicavata tu na kena loka.5 Au sega ni tukuna me ra vaka ivolatara o ira na itokani dauniveiqaravi. Ia, au taleitaka na vakanananu ni o ira na doka tiko na nodra veiyalayalati ni veiqaravi, e tadolavi na veivale vakakina na yalo.
Wasea talega o Elder Perry na ivakasala. E kaya o koya “Solia vua e dua na itokani duaniveiqaravi e dua na iwiliwili ni tavi, masulaki na idigidigi, kumuni vakaitikotiko ka veiganiti na balavu ni vanua e na taura.” E dau veivakasalataki o koya, “Tekivu vei ira era gadreva duadua vakelevu na veisiko. Taracake mai vei ira era na ciqomi iko ka sauma mai vakavinaka na nomu veisiko.” E tinia o koya, “ Tomana tiko ena yalodina ena kauta mai na cakamana.”
Na veiqaravi cecere ka vakatabui6 e lako mai ni da kerea ena masu na “loloma dina va Karisito”7 ka vakamuria na Yalotabu. E lako talega mai nira dabe vata na mataveiliutaki ni kuoramu ni talatala qase kei na Soqosoqo ni Veivukei ena nona veidusimaki na bisopi, ka raica vata na sasagataki ni veiqaravi, oka kina na lesi ni itokani vakaveiqaravi. Kerea mo ni solia na madigi vei ira na cauravou kei na goneyalewa me ra veitomani ka mera vuli mai na veika era raica vei ira na dau ni veiqaravi turaga kei na marama. Kerekere mo ni vakatara me ra vakauqeti na itabagone tubu tiko mai vei ira na dauniveiqaravi turaga kei na marama.
Eso na vanua Lotu, e dua na veisivi e tiko ena vanua ni veiqaravi. E vuqa era tukuna ni ra cakava tiko na veiqaravi ka sega ni ra tukuna ni ra sikovi. E sega ni gadrevi me da leqataka na lisi me toqai. Vuqa na gauna e gadrevi me da sega walega ni da vakabula ena yalodina ena olo, se na kena dau vakamatauna na “Oni gadreva e dua na veivuke?” ena ikelekele ni motoka. E vuqa na vanua, e rawa me da sasaga yani ena noda veikilai taki keda ena ituvaki era tiko kina, ka taraicake na veiwekani ni da veisikovi vakawasoma ina nodra veivale. Na veisureti vakauqeti e rawa me veisautaka na bula. Na veisureti e vukea na noda maroroya na veiyalayalati tabu, eda toso voleka vua na Turaga kei keda.
E dau tukuni o ira era kila na ibalebale dina ni veiqaravi ena levu cake sara na veika era na cakava, ia o ira era sega ni kila e dau lailai na veika era cakava. Me da cakacaka vakalevu, me vakataka na iVakabula. Me vaka e cavuti ena vola ni sere, e “tavi dina ni loloma”8
Na matabose ni tabanalevu, kuoramu ni italatala qase kei na iSoqosoqo ni Veivukei, yalovinaka vakarorogo vua na iVakatawa Vinaka ka vukei Koya “vakasaqara na ka sa yali, kauta tale mai na ka sa vakasavi tani, vauca na ka sa ramusu, vaqaqacotaka na veika sa tauvimate.”9 Eda rawa talega ni “vakani ira na agilosi ka lecava ga”10 ni da cakava me tiko na nodra tikina kece ena Nona bure ni vulagi.11
Na veiqaravi e vakauqeti e vakalougatataka na matavuvale kei na tamata yadua; e vakaqaqacotaka na tabanalevu kei na tabana. Vakasamataka na nomu tabanalevu se tabana me vakataka e dua na vanua veisemati raraba vakayalo. Mai na italanoa ena Vola i Momani me baleta na vuni olive, na itaukei ni were ni vaini kei na nona tamata me kauta mai na vuata talei ka vakaqaqacotaka na vunikau yadua ena kena tauri vata na kaukauwa kei na malumalumu ni vunikau taucoko.12 Na iTaukei ni were ni vaini kei na nona tamata e vuki taroga tikoga, “Cava tale meu na cakava?”13 Na cakacakavata e vakalougatataka na yalo kei na vuvale, tabanalevu kei na tabana, ena loma ni veivakauqeti kei na tomana tikoga na veiqaravi.14
Na veiqaravi—na veivakatawani—e vakatara na were ni vaini me “dua na yago”15—me veikau tabu. Na vunikau yadua ena noda veikau sa ivunikau bula ni matavuvale. Wakana kei na tabana e veicurumaki. Na veiqaravi e vakalougatataka na veitabatamata. Na gadrevi na veiqaravi, na bisopi vuku kei na peresitedi ni kuoramu ni talatala qase kei na Soqosoqo ni Veivukei ena taroga, “Ocei o rau na itokani dauveiqaravi?” Matabose ni tabanalevu kei na veivakatarogi ni veiqaravi e sega walega ni taroga na dredre se leqa ia e raica talega ka marautaka na loloma ni Turaga e drodrova tu na noda bula ni da veqaravi me vakataki Koya.
Sa ivakaraitaki cecere dina na noda iVakabula.16 Baleta ni sa daucaka vinaka ko Koya, ena dau lako tikoga ka cakavinaka tikoga.17 E vakalougatataka na dua kei na 99. Sai Koya na ivakaraitaki dina ni veiqaravi. Eda vakataki Jisu Karisito vakalevu cake ni da vakayacora “vei… dua sa lailai vei ira” ni a cakava vei au,18 ni da lomani ira na wekada me vakataki keda,19 ni da “veilomani me vaka na noqu lomani iko,”20 kei “o koya sa Turaga sa vakataki koya e dau veiqaravi.”21
O Jisu Karisito e dau veiqaravi. Era veiqaravi na agilosi.22 Na tisaipeli i Jisu Karisito e “dauveiqaravi vakai ira,”23 “dou reki vata kei ira era sa reki, ka tagi vata kei ira era sa tagi,”24 “qaravi ira kina ka vakani ira ena veika ni buladodonu,”25 “nanuma… na dravudravua kei na vakaleqai, na tauvimate kei ira sa kune rarawa,”26 me kilai na Yacana e vuravura.27 Ni da veiqaravi vakataki Koya, eda vakadinadinataka na Nona cakamana kei na veivakalougatataki.28 Eda na ciqoma vakalevu cake “na veiqaravi vakasakiti.”29
E rawa me oca mai na yago. Ia ena Nona cakacaka eda “sega ni guce ena caka vinaka.”30 Eda sasagataka na noda vinaka duadua, kakua ni cici vakatotolo cake mai na kaukauwa sa tu vua,31 ia mo nuitaka, me vaka e vakavulica na Apisotolo o Paula, ni ko koya sa solia ena marau sa vinakata na Kalou.”32 Ia na Kalou e “dausolia na sila vua na dauveikaburaki kei na madrai me kakana, ena solia mada na sila vei kemudou me levu.”33 Dua tale na kena vosavosa, Na Kalou e “vakavutuniyautaki ena ka kecega.”34 Okoya e “sa kakaburaki vakalevu ena tamusuka talega vakalevu.”35
Na vanua cava ga eda tu kina ena Gauna ni Siganimate, me da dodoliga yani ka kauwai me vakataka na iVakabula, vakabibi vei ira e soli vei keda na madigi me da lomana ka lesi me da veiqaravi kina. Ni da cakava vaka kina, me da toro volekati Jisu Karisito kei keda vakayadua me da vakataki Koya vakalevu ka meda dauvakamuri Jisu Karisito ka yaco meda tamata e vinakata o Koya meda vakataka. Ena Yacana tabu, o Jisu Karisito, emeni.