Kunea na Nomu Vakacegu
Au sa masu mo ni kunea na vakacegu, vukei ira e vuqa mera kunea, ka solia yani.
Kemuni na taciqu kei na ganequ lomani, eda sa kalougata ena veivakavulici veivakauqeti kei na totoka ni sereivakatagi e tara na yaloda ena idola ni soqoni ni koniferedi raraba oqo. Keitou vakavinavinakataka na nomuni vakaitavi kei na nomuni vakabauta.
Nikua au na vosa tiko ena ka au sa vulica baleta na cakamana ni kena kunei na noda dui vakacegu, se cava ga e yacovi keda. E kila na iVakabula ni ira kece na luve ni Tamada Vakalomalagi era gadreva na vakacegu, ka kaya ni rawa ni solia vei keda. O ni nanuma tiko na vosa nei Jisu Karisito e volai tiko ena ivola i Joni “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”1
Na ibalebale ni Nona vakacegu kei na sala e solia kina sa vakatakilai ena kedra ituvaki era sa rogoca ni a cavuta o Koya na vosa o ya. Rogoca na itukutuku nei Joni ni kena cecere na cakacaka i Karisito. Na kaukauwa rerevaki ni butobuto sa uabaleti Koya ka na yaco talega vei ira na Nona tisaipeli.
Oqo na vosa ni iVakabula:
“Kevaka dou sa lomani au, dou talairawarawa ki na noqu ivunau.
“Ia kau na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka sega ni mudu;
“A Yalo Tabu sa vu ni ka dina; ko koya era sa sega ni vakabauta rawa na kai vuravura, ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya ka na curumi kemudou.
“Au na sega ni laivi kemudou mo dou luveniyali: au na lako mai vei kemudou.
“Malua mada vakalailai, era na qai sega ni raici au tale na kai vuravura; ia dou sa raici au: niu sa bula, dou na bula talega.
“Ena siga koya dou na kila niu sa dua vata kei Tamaqu, ka dou sa dua vata kei au, kau sa dua vata kei kemudou.
“Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua.
“Sa kaya vua ko Jutasa, e duatani ko Isikarioti, Kemuni na Turaga, ko ni sa vakatakilai kemuni vei keitou ena vuku ni cava, ka segai vei ira na kai vuravura?
“Sa vosa ko Jisu ka kaya vua, Kevaka sa lomani au e dua, ena talairawarawa ki na noqu vosa: ena qai lomani koya ko Tamaqu, ia keirau na lako mai kivei koya, ka tiko ga vua.
“O koya sa sega ni lomani au sa sega ni talairawarawa ki na noqu vosa, ia na vosa dou sa rogoca sa sega ni noqu walega, sa nei Tamaqu sa talai au mai.
“Au sa vosataka na veika oqo vei kemudou, niu sa tiko vata kei kemudou.
“Ia na Dauveivakacegui, na Yalo Tabu, ko koya ena tala mai ko Tamaqu e na yacaqu ena vakavulici kemudou ena ka kecega kau a vosataka vei kemudou.
“Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”2
Au sa vulica rawa e lima na dina mai na ivakavuvuli ni iVakabula.
iMatai, na isolisoli ni vakacegu ena soli ni sa tiko noda vakabauta meda muria na Nona ivakaro. Vei ira era sa veiyalayalati ka leweni Lotu ni Turaga, na talairawarawa eda sa yalataka meda na cakava.
iKarua, na Yalo Tabu ena lako mai ka tiko kei keda. E kaya na Turaga nida yalodina tikoga, na Yalo Tabu ena tiko kei keda. Oqori na yalayala ena masu ni sakaramede ni Yalo ena noda itokani ka eda na vakila, e yaloda kei na noda vakasama, na Nona vakacegu.
iKatolu, na yalayala ni iVakabula ni da maroroya na noda veiyalayalati, eda na vakila na loloma ni Tamada kei na Luvena kivei rau vakakina vei keda. Eda na vakila na Nodrau veivolekati ena noda bula oqo, ni na yaco vei keda na kalougata meda na tiko tawamudu kei Rau
iKava, na maroroi ni ivakaro ni Turaga e sega ni gadrevi ga na talairawarawa. Meda sa na lomana na Kalou ena lomada, kaukauwa, vakasama, kei na yaloda taucoko.3
O ira sa sega ni lomani Koya era sa sega ni maroroya na Nona ivakaro. Koya gona, sa sega vei ira na isolisoli ni vakacegu ena bula oqo kei na vuravura e tarava.
Na iklima, sa matata sara ni sa lomani keda na Turaga me mai sauma na ivoli ni noda ivalavala ca me rawa kina—ena noda vakabauti Koya kei na noda veivutuni, ena veivakayarayarataki ni Nona Veisorovaki—ni sa noda na isolisoli ni vakacegu sa “uasivia na ka kecega sa kilai rawa,”4 ena bula oqo vata kei Koya me tawamudu.
Eso vei kemuni, ka vuqa talega, o ni sega ni vakila na vakacegu e yalataka na Turaga. O a rairai masu mo kune vakacegu kei na vakacegu vakayalo. Ia o rairai vakila ni galu o lomalagi ena nomu vakatakekere ni vakacegu.
E tiko na meca ni yalomu e sega ni vinakati iko, kei ira o lomana mera kune vakacegu. Ena sega ni marautaka. Ena cakava me tarovi iko mo vinakata na vakacegu ni iVakabula kei na gagadre nei Tamada Vakalomalagi me noda.
Na sasaga nei Setani me bucina na veicati kei na veileti me voliti keda sa tubu tiko. Eda raica na kena sa yaco tiko ena veimatanitu kei na siti, ena itikotiko raraba, ena itukutuku vakalivaliva, kei vuravura raraba.
Ia e tiko na vu ni nuidei: o ya na Rarama i Karisito sa vakatikori ki na gone yadua sa sucu vou. Ena isolisoli vakalomalagi sa dua kina na dodonu, e dua na gagadre mo loloma ka mo lomani. E tiko e dua na yalo e loma ni lewa donu kei na dina ena luve ni Kalou yadua ni tadu mai ki vuravura.
Na noda nuidei mera kune vakacegu yadua na gone oqori e tiko vei ira era sa qaravi ira tiko. Kevaka era sa cakacakataka ka veiqaravi mera ciqoma na isolisoli ni vakacegu ni iVakabula, ena yaco, ena ivakaraitaki kei na sasaga yadua, vaqaqacotaka na vakabauta nei gone me rawata na isolisoli vakalou ni vakacegu.
Oqori na yalayala ni ivolanikalou: “Vakatavulica na gone ena sala e dodonu me lako kina: ia ni sa qase mai, ena sega ni lako tani mai kina.”5 Ena gadrevi vei nodra dauniveiqaravi ka dauniveisusu vua na gone me kilikili kaya ki na isolisoli ni vakacegu.
Eka ni rarawa, nida sa vakila kece na nodra mosi na gone e susugi ira na itubutubu veivakauqeti, so na gauna e dua ga na itubutubu, kei ira na gone era digitaka e muri, ni oti na bula taucoko ena vakabauta kei na vakacegu, mera taura na salatu ni rarawa.
Dina ga ni yaco na rarawa oqori, au nuidei ki na dua tale na isolisoli ni Turaga. Sai koya oya: e susuga cake e vuqa na dautataro vei ira na Nona tisaipeli nuitaki. Era sa vakila na vakacegu kei na loloma ni Kalou. Sa tiko na Yalo Tabu e yalodra, ka rawa me dusimaki ira na Turaga mera vukei ira na sipi sa lako sese.
Au sa raica ena noqu bula taucoko kei vuravura raraba. O sa raica talega o iko. So na gauna, ni ko sa muataki ki na veivueti, e rairai a vakacala-ka.
Au a taroga e dua ena dua na ilakolako, “O rawa ni tukuna vakalailai vei au baleta na nomu vuvale?” Na veivosaki o ya a vakavuna meu kerea meu raica na iyaloyalo nei luvena yalewa qase, ka kaya o koya ni sotava tiko na dredre. E dregati au tu na vinaka ena matana na goneyalewa ka tabaki tu ena itaba. Au a vakauqeti meu kerea ke rawa meu taura na nona imeli. Sa tu ena dua na gauna veilecayaki vua o luvena yalewa oqo, kau veinanuyaka tu kevaka e tu nai tukutuku ni Kalou baleti koya. Io e dina. O ya oqo: “E lomani iko na Turaga. Sa matau Vua. E vinakata na Turaga mo lesu mai. Na nomu kalougata yalataki se tu ga oqo.”
Ira na lewe ni Lotu raraba era sa vakila na isolisoli ni Turaga ni nodra vakacegu. Sa vakayaloqaqataki ira mera vukea na tamata ena madigi mera lako mai Vua ka rawata na vakacegu vata o ya me nodra. Era na digitaka mera vaqara na veivakauqeti mera kila na sala mera solia na isolisoli o ya vei ira tale eso.
Na itabatamata e tarava ena yaco mera dauveisusu ni itabatamata e muri tiko mai. Na veisolisoli oqo ena yaco kina e dua na cakamana. Ena tete ka tubu ni toso na gauna, kei na matanitu ni Turaga e vuravura, ena vakavakarau tu me kidavaki Koya ena kailavaki ni osana. Ena yaco na tiko vakacegu e vuravura.
Au sa vakadinadinataka vakaidina ni bula tiko na iVakabula ka sa liutaka tiko na Lotu oqo. Au sa vakila na Nona loloma ena noqu bula kei na Nona loloma kei na kauwai vei ira kece na luvena na Tamada Vakalomalagi. Na veisureti ni iVakabula meda lako mai Vua sa isolisoli ni vakacegu.
Sa parofita bula ni Kalou o Peresitedi Russell M. Nelson e vuravura taucoko. A kaya o koya, “Au sa vakadeitaka vei kemuni se cava sara na ituvaki kei vuravura kei na veika o sotava, sa rawa mo sotava na siga ni mataka ena nuidei kei na reki.”6
Au vakaraitaka niu lomani kemuni. Na nomuni vakabauta cecere kei na loloma sa yacovi ira na tamata ka rawa vua na Turaga me veisautaka na yalo ka rawati na gagadre me solia vei ira eso na isolisoli ni vakacegu sa uasivia na kecega sa kilai rawa.
Au sa masu mo ni kunea na vakacegu, vukei ira e vuqa mera kunea, ka solia yani. Ena yaco me totoka na udolu na yabaki ni vakacegu ni sa lesu mai na Turaga. Au vakadinadinataka oqo ena reki, ena yaca i Jisu Karisito, emeni.