“Ko na Tu vei Au, Kau na tu vei Iko; O Koya mo Lako kina Vata kei Au”

Mai vei Elder David A. Bednar

Ena Kuoramu ni Apositolo Le Tinikarua

Nona yalayala na iVakabula me tu vata kei keda sa ka dina ka sa nodra na lewenilotu dauveiyalayalati ni Nona Lotu vakalesuimai.

Na parofita makawa o Inoki, a vakamacalataki ena Veiyalayalati Makawa, na Vunau kei na Veiyalayalati, kei na Mataniciva Talei,¹ a liutaka na kena tauyavutaki na siti o Saioni.

Na itukutuku vakaivolatabu ni nona kacivi o Inoki me veiqaravi e tukuna ni “sa rogoca e dua na domo mai lomalagi, sa kaya: Inoki, na luvequ, mo parofisai vei ira na tamata oqo, ka kaya vei ira—Dou veivutuni, … ni ra sa vakaukauwataka na yalodra ka sa sega ni rogo rawa na daligadra, se rai vakayawa na matadra.”²

“Ia ni sa rogoca na vosa oqo ko Inoki, sa cuva sobu ki na qele, ena mata ni Turaga, ka kaya: Oi kemuni na Turaga; a cava au sa kune loloma kina e matamuni, ia au sa tamata gone ga, ka ra sa cudruvi au kecega na tamata; niu sa dau vosa malua; na cava beka au nomuni tamata kina?”³

Yalovinaka mo ni kila ni gauna kece ni kacivi o Inoki me veiqaravi, sa matata tu vua na nona malumalumu ka vakaiyalayala. Kau nanuma ni oi keda kece ena dua na gauna ena veiqaravi ena Lotu eda a vakataki Inoki. Ia au vakabauta ni nona kaya na Turaga ena vakamamasu nei Inoki sa ivakasala ka baleti keda yadua nikua.

“A sa kaya na Turaga vei Inoki: Mo lako yani ka kitaka na ka au sa vakarota vei iko, ena sega ni dua na tamata e cokai iko. Mo dolava na gusumu, ka na qai vakasinaiti, ka au na tukuna vei iko na vosa mo cavuta. …

“Raica sa tiko vata kei iko na Yaloqu, ia au na vakadonuya na nomu vosa kecega; ia ena dro tani mai matamu na veiulunivanua, ka vagolea tani na drodro ni uciwai; ia, ko na tu vei au, kau na tu vei iko; o koya mo lako kina vata kei au.”⁴.

Sa qai yaco o Inoki me dua na parofita qaqa ka iyaragi ena liga ni Turaga me vakayacora e dua na cakacaka cecere, ia a sega ni tekivuna nona veiqaravi ena sala o ya! Ia, na nona igu ena veigauna a tubu cake ni sa vulica me tiko ka lako vata kei na Luve ni Kalou.

Au masu vagumatua me veivuke na Yalo Tabu me da raica vata na ivakasala vei Inoki mai vua na Turaga ka cava e kena ibalebale vei iko kei au ena siga oqo.

Mo Dou Tu Vata kei Au

Na Turaga o Jisu Karisito sa veisureti vei keda yadua meda sa tu vata kei Koya.⁵ Ia meda na vulica dina vakacava meda tu vata kei Koya?

Na vosa tu vata e tukuna tiko na tudei tikoga se qaqaco ka gumatua ka sega ni guce. E vakamacalataka o Elder Jeffrey R. Holland ni “tu vata” e cakacaka ka kena ibalebale “‘[mo] tiko ga—ia [mo] tiko vakadua.’ Oqori na veikacivi ni itukutuku ni kosipeli ki na … tamata kecega … e vuravura. Lako mai, ia lako mai mo mai tiko vakadua. Lako mai ena dina kei na gumatua. Lako mai vakadua, ena vukumu kei na vukudra na itabatamata kecega e dodonu mera muri iko.”⁶ Meda sa tiko vata kei Karisito ni da sa tudei ka kaukauwa ena noda dina tiko vua na Dauveivueti kei na Nona inaki vakalou, ena veigauna vinaka kei na ca.⁷

Eda sa tekivu tu vata kei na Turaga ni da cakacakataka na noda bula galala meda vakataqara na Nona ivua⁸ ena veiyalayalati kei na cakacaka vakalotu ni kosipeli vakalesuimai. Na noda veisemati ni veiyalayalati kei na Tamada Vakalomalagi kei na Luvena sa tucake tale mai na mate ka sa bula tiko sa ivurevure vakalou ni vakasama, inuinui, vakacegu, kei na reki gugumatua; sai koya talega na yavu vatu kaukauwa⁹meda sa tara kina na noda bula.

Eda sa tu Vua ni da saga tikoga meda vaqaqacotaka noda dui veiyalayalati ni vauci vua na Tamana kei na Luvena. Me vakataka, ni da masuta vakaidina na Tamada Tawamudu ena yaca ni Luvena Lomani ena titobu ka qaqaco na noda isema veiyalayalati kei Rau.

Eda sa tu Vua ni da sa kana magiti vakaidina ena vosa i Karisito. Na vunau ni iVakabula e kauti keda, na luveni veiyalayalati, meda voleka Vua¹⁰ ka na tukuna mai na veika kece e dodonu meda na cakava.¹¹

Eda sa tu Vua ni da vakavakarau vakaidina meda vakaitavi ena cakacaka vakalotu ni sakaramede, railesuva ka vakananuma na noda veiyalayalati kei na veivutuni vakaidina. Ni da vakayagataka ena kilikili na sakaramede sa ivakadinadina vua na Kalou ni sa yaloda meda taura na yaca i Jisu Karisito ka meda “dau nanumi koya tiko ga”¹² ni oti na gauna lekaleka e gadrevi meda vakaitavi ena cakacaka vakalotu ni sakaramede.

Eda sa qai tu Vua ni da qarava na Kalou ni da qaravi ira na Luvena ka qaravi ira na tacida kei na ganeda.¹³

A kaya na iVakabula, “Kevaka dou sa talairawarawa ki na noqu vunau, dou na tiko ga ena noqu loloma; me vaka au sa talairawarawa ki na vunau nei Tamaqu, ka tiko ga ena nona loloma.”¹⁴

Au sa vakamacalataka taumada e vica na sala me rawa ni tiko kei keda na iVakabula. Qo au sa sureti keda yadua na Nona tisaipeli meda taro, vakasaqara, tukituki, ka vulica vakai keda ena kaukauwa ni Yalo Tabu na sala mana eso meda cakava na Karisito me usutu ni noda bula ena noda cakacaka kece.

Kau na Tu vei Iko

Na yalayala ni iVakabula vei ira Nona imuri e wase rua: ke da tu vei Koya, ena tu vei keda o Koya Ia sa rawa dina beka vei Karisito me tu vei iko kei au—vakayadua ka vakatamata? Sa vakadeitaki na isau ni taro oqo me io!

Ena iVola i Momani, eda vulica kina na ivakavuvuli nei Alama ka soli ivakadinadina vei ira na dravudravua ni nodra rarawa sa vakavuna mera yalomalumalumu. Ena nona ivakasala, a vakatauvatana na vosa me sorenikau me na tei ka susugi cake, ka vakamacalataka “na vosa” ni sa nona bula, ilesilesi, ka solibula veisorovaki i Jisu Karisito.

A kaya o Alama, “Ka tekivu vakabauta na Luve ni Kalou ni na lako mai me sereki ira na nona tamata, ka ni na mai kune ka rarawa ka mate talega me sorovaka kina na nodra ivalavala ca; ka ni na tucake tale mai na mate ko koya, ka sa na yaco rawa kina na tucake tale mai na mate, ia era na qai tu e matana na tamata kecega, me lewai ira ko koya ena iotioti ni siga ni veilewai, me vaka na nodra ivalavala.”¹⁵

Ni soli na ivakamacala baleta “na vosa” mai vei Alama, yalovinaka raica na isema veiuqeti a qai vakatakila.

“Ia oqo … au sa gadreva sara mo ni tea na vosa e lomamuni, ia ni sa tekivu me tubu mai mo ni qai vakabulabulataka ena nomuni vakabauta. Ia raica, ena yaco me dua na vunikau, ka me tubu cake tiko e lomamuni ki na bula tawavakaiyalayala. Ia ena vakamamadataka na Kalou na nomuni icolacola ena vuku ni veivakamarautaki ni Luvena. Ia ko ni na rawata vakaidina na ka oqo, kevaka ko ni sa vakayacora vakakina.”¹⁶

Na sorenikau eda saga meda tea e lomada sai koya na vosa—sai koya na bula, ilesilesi, kei na vunau i Jisu Karisito. Ni sa vakabulabulataki na vosa ena vakabauta ena yaco me vunikau sa tubu cake tiko e lomada ki na bula tawamudu.¹⁷

Na cava na ivakatakarakara ni vunikau ena raivotu nei Liai? Na vunikau sa rawa me raici ni sa matataki Jisu Karisito.¹⁸

Kemuni na taciqu kei na ganequ lomani, sa tu beka na Vosa e lomada? Era sa volai beka na dina ni kosipeli ni iVakabula ena dela ni yaloda sa malumu?¹⁹ Eda sa yaco tiko beka vakamalua meda sa vakataki Koya cake? Sa tubu tiko beka na vunikau i Karisito e lomada? Eda sa saga tiko beka meda sa “[buli] vou”²⁰ ki Vua?²¹

E rairai na rawati ni cakamana oqo a uqeti Alama me taroga, “Ko ni sa sucu li vakayalo vua na Kalou? Ko ni sa ucui koya tiko li ena kemu irairai? Ko ni sa vakila li na veisau levu oqo e lomamuni?”²²

Meda sa dau nanuma tikoga na ivakasala ni Turaga vei Inoki, “Ko na tu vei au, kau na tu vei iko.” ²³ Kau sa vakadinadinataka na yalayala ni iVakabula me tu vata kei keda sa ka dina ka sa nodra na lewenilotu dauveiyalayalati ni Nona Lotu vakalesuimai.

Mo Lako kina Vata kei Au

Sa vakamasuti ira na dauvakabauta o Paula na iApositolo era sa ciqoma na Turaga: “dou ia tiko na ivalavala sa vinaka vua.”²⁴

Na lako vata kei na iVakabula e vakavurea kina e rua na ituvaki vakatisaipeli: (1) talairawarawa ki na ivakaro ni Kalou, ka (2) nanuma tiko ka doka na veiyalayalati tabu e semati keda vua na Tamana kei na Luvena.

E cauraka o Joni:

“Ia na ka oqo eda sa kila kina ni da sa kilai koya, kevaka eda sa muria na nona vunau.

“O koya sa kaya, Au sa kilai koya, ia ka sega ni muria na nona vunau, sa vosa lasu sa sega ni tu vei koya na dina.

“Ia ko koya yadua sa muria na nona vosa sa dina sa qai levu sara na nona loloma vua na Kalou: ena ka oqo eda sa kila ni dou sa tu vata kaya.

“O koya sa kaya e rau sa tu vata kaya e kilikili kaya me ia na ivalavala sa vaka na nona ivalavala.”²⁵

E kaci tu o Jisu vei keda yadua, “Mo lako mai, mo muri au”²⁶ ka “Mo lako kina vata kei au.”²⁷

Au vakadinadinataka ni da gu ki liu ena vakabauta ka lako ena yalo malumalumu ena yalo ni Turaga,²⁸ eda na vakalougatataki ena kaukauwa, veitaqomaki, kei na veidusimaki.

iVakadinadina kei na Yalayala

E tukuna o Alama e dua na kerekere ni loloma ni Turaga ki na tamata kecega:

“Raica sa kacivi ira na tamata kecega, a sa dodoka yani vei ira na ligana dauloloma ka kaya: Dou veivutuni ka’u na qai vakabulai kemudou.

“… Lako mai vei au ko na qai kania na vua ni vunikau ni bula; io, ko na kania wale na madrai ka gunuva wale talega na wai ni bula.”²⁹

Au sa vakamacalataka na kena matata na kerekere ni iVakabula. Sa gadreva me veivakalougatataki ena Nona loloma soliwale veivueti ki na tamata yadua e bula tiko, a bula e liu, ka na mai bula ena vuravura oqo.

Eso na lewe ni Lotu sa ciqoma me sa ka dina na vunau, ivakavuvuli, kei na ivakadinadina sa cauraki vakaveitaravi ena itutu oqo ena Vale ni Koniferedi kei na ivavakoso e vuravura taucoko—ia era sa saga tikoga mera vakabauta na dina tawamudu oqo sa baleta dina na nodra bula ki na kedra ituvaki. Era vakabauta vakaidina ka veiqaravi ena ilesilesi, ia na nodra isema ni veiyalayalati kei na Tamana kei na Luvena Dauveivueti era se bera ni ka bula veivakavoui ena nodra bula.

Au yalataka ni ena kaukauwa ni Yalo Tabu, sa rawa mo kila ka vakila na dina ni kosipeli au saga tiko meu vakamacalataka ni sa nomu—vakayadua ka me nomu sara ga.

Au vakadinadinataka ni o Jisu Karisito sa noda Dauveivueti tucake tale mai na mate ka Dauveivueti bula. Kevaka eda tu vei Koya, ena qai tu vata kei keda.³⁰ Ni da sa lako ka tu vata kei Koya, eda na kune kalougata meda vua vakalevu sara. Au vakadinadinataka oqo ena yaca tabu ni Turaga o Jisu Karisito, emeni.