30 ni Tiseba–5 ni Janueri: “Sa Toso Ki Liu na Veivakalesui Mai Yalataki”

Na Vakalesui Mai ni Taucoko ni Kosipeli i Jisu Karisito

O dau vakananuma vakacava na ika 200 ni yabaki ni dua na ka a yaco ka veisautaka na vuravura? Oqori na taro eratou a vakasamataka vakatitobu na Mataveiliutaki Taumada kei na Kuoramu ni iApositolo Le Tinikarua ni roro mai na Epereli ni 2020, ka makataka na 200 na yabaki mai na iMatai ni Raivotu nei Josefa Simici. “Keitou vakasamataka se gadrevi me caka e dua na ivakatakarakara,” a nanuma lesu o Peresitedi Russell M. Nelson. “Ia ni keitou vakasamataka na matalia ni itukutuku vakairogorogo kei na revurevu ni Matai ni Raivotu e vuravura raraba, keitou a uqeti me caka e dua na ivakananumi ka sega ena vatu ia ena vosa … , e sega ni ceuti ena ‘dela ni vatu’ ia e ceuti ena ‘lewe ni utoda’.[2 Koronica 3:3]” (“Mo Rogoci Koya,” Liaona, Me 2020, 90).

Na ivakananumi vakavosa eratou a bulia e kena ulutaga na “Na Vakalesui Mai ni Taucoko ni Kosipeli i Jisu Karisito: A iVakaro ni Ruanadrau na Yabaki ki Vuravura.” Oqo e dua na ivakananumi e sega walega ni baleta na iMatai ni Raivotu ia ki na veika kece e sa cakava o Jisu Karisito—ka se cakava tiko—me tekivu mai na gauna o ya. A tekivu na Vakalesui mai ni Nona kosipeli ena gauna a gole kina edua na tamata vua na Kalou ka rogoci Koya. E tomani tiko vaka oqori: dua na yalo, dua na veika sotavi tabu ena dua na gauna—oka kina na nomu.

Vakasama eso ni Vuli e Vale kei na Lotu

“Na Kalou e lomani ira na luvena ena veivanua taucoko e vuravura.”

Ena nomu nanuma, na cava na vuna e tekivutaki kina nai vakaro me baleta na Veivakalesui mai ena dua na itukutuku me baleta na loloma ni Kalou? Ni o vulica na ivakaro, vakaraica na ivakaraitaki ni loloma ni Kalou vei “ira na Luvena ena veivanua kecega e vuravura.” E sa vukei iko vakacava na Vakalesui Mai ni kosipeli mo vakila na Nona loloma?

Raica talega na Gerrit W. Gong, “Na Veimatanitu Veimataqali, kei na Duivosavosa,” Liaona, Nove. 2020, 38–41.

A tekivu na Veivakalesui mai ena saumi ni dua na taro.

E rawa ni tukuni ni a tekivutaka na iVakabula na Vakalesui mai ni Nona kosipeli ena nona sauma e dua na taro. Na itukutuku cava o vakila e tiko ena ivakaro ni Veivakalesui Mai vua edua na tamata ka tiko na nona taro me baleta na Kalou, na kosipeli, se “na vakabulai ni yalona [se tagane se yalewa]”? Sa rawa talega mo vulica na Josefa Simici—Ai Tukutuku 1:5–20 mo raica na veika o rawa ni vulica maivei Josefa Simici me baleta na kunei ni isau ni taro baleta na kosipeli.

Raica talega na Topics and Questions [Ulutaga kei na Taro], “Seeking Answers [Vakasaqarai ni Isaunitaro],” Gospel Library.

Tiki ni droini mai na The Desires of My Heart [Na Gagadre ni Yaloqu], mai vei Walter Rane

Sa vakalesuya tale mai o Jisu Karisito na Nona Lotu.

Na cava o kila me baleta na “Lotu ni Veiyalayalati Vou i Karisito,” ka vakalesuya mai na iVakabula maivei Josefa Simici? Navuca mo vulica na ivolanikalou eso oqo ka vola eso na ivakatakilakila ni Nona Lotu:

• Maciu 16:15–19

• Marika 16:15–18

• Luke 6:12–13

• Cakacaka 4:34–35

• 1 Korinica 15:29

• Efeso 4:11–15

Ka qai rawa ni o vakasotara vata na ivolanikalou e cake vata kei ira e ra, ka vakamacalataki kina na sala e vakalesuya mai kina o Jisu Karisito na veivakatakilakila oqori ni Nona Lotu maivei Josefa Simici:

• Vunau kei na Veiyalayalati 18:37–38; 107:23–24

• Vunau kei na Veiyalayalati 51:3; 70:14

• Vunau kei na Veiyalayalati 84:64–72

• Vunau kei na Veiyalayalati 110:11–16

• Vunau kei na Veiyalayalati 124:31, 36

• Yavu ni Vakabauta 1:6

Na cava na vuna o vakavinavinakataka kina na Vakalesui Mai ni kosipeli i Jisu Karisito?

Erau a saga ena dua na gauna o Elder Jeffrey R. Holland kei watina me rau raitayaloyalotaka se na vakaevei beka na veika erau vakila ke rau a se bula ni bera na vakalesui mai ni Lotu. “Na cava keirau a diva me tiko vei keirau?” erau a tarogi rau. Wilika na veika erau a sotava e “Na Rarama Uasivi ni Nuinui” (Liaona, Me 2020, 81–82). Sa veivuke vakacava na Veivakalesuimai me rawati na nomu vakanuinui vakayalo?

Raica talega na Topics and Questions, “Apostasy and the Restoration of the Gospel,” Gospel Library.

“Sa toso ki liu na Veivakalesui Mai yalataki.”

O sa bau vakasamataki iko mada mo tiki ni Vakalesuimai ni kosipeli? Vakasamataka mada na vosa oqo mai vei Peresitedi Dieter F. Uchtdorf: “Ena so na gauna eda dau vakasamataka na Veivakalesui Mai ni kosipeli me dua na ka e sa vakayacori oti, eda sa vakanadakuya. … Ia na ka dina, ni Veivakalesui Mai e dua na cakacaka ena toso tikoga; eda sa bula sara tikoga kina oqo” (“O Moce Tiko Beka ena gauna ni Veivakalesui Mai?,” Liaona, Me 2014, 59).

Ni ko vakavakarau mo vulica na sala a vakalesui mai kina na kosipeli ena yabaki 1800 vakacaca, sa rawa mo tekivu vakananuma vakatitobu na sala a vakalesui mai kina ena nomu bula. Wilika na ivakaro ni Veivakalesui Mai nio nanuma tiko na veitaro vakaoqo: Au sa mai kila vakacava ni dina oqo? Meu na vakaitavi vakacava ena Veivakalesui Mai nikua?

“Sa tadola na lomalagi.”

Na cava na kena ibalebale vei iko na malanivosa “sa tadola na lomalagi? Na ivakadinadina cava o raica—ena ivakaro ni Veivakalesui Mai, ena Lotu nikua, ena ivolanikalou, kei na nomu bula—ni sa tadola vakaidina na lomalagi?

Sa rawa talega mo okata na “Mataka Sa Qai Kida Mai” (Serenilotu, naba 1) me tiki ni nomu vuli. Na cava o kunea ena serenilotu oqo e vakuria na nomu kila vinaka na malanivosa “sa tadola ko lomalagi”?

Raica talega na Quentin L. Cook, “Na Veivakalougatataki ni iVakatakila Tomani Tiko vei ira na Parofita kei na iVakatakila Yadua me Dusimaka Noda Bula,” Liaona, Me 2020, 96–100.

Vuli vata. A sureti keda o Peresitedi Nelson meda “vulica [na ivakaro ni Veivakalesui Mai] vakaikeda vata kei ira na [noda] matavuvale kei na itokani” (“Mo Rogoci Koya,” 92). Vakasamataka na sala o rawa ni okata kina eso tale ena nomu vuli.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

“Ena yalo vakarokoroko keitou cauraka yani”

• Ni o wilika na veitiki ni ivakaro ni Veivakalesui Mai vata kei ira na luvemu (se sarava na vidio nei Peresitedi Nelson ni wilika tiko), vukei ira me ra raica na iyatuvosa e tekivu ena malanivosa me vaka na “keitou kacivaka,” “keitou tukuna,” se “keitou vakadinadinataka.” Na dina cava soti era tukuna tiko na noda parofita kei na iapositolo? Ena rawa beka vei iko kei ira na luvemu mo dou wasea na nomudou ivakadinadina me baleta eso na dina vata oqo.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

“O Josefa Simici …a tu na nona vakatataro.”

• Ena taleitaki beka vei ira na luvemu mera vakadikeva eso na taro ka tiko vei Josefa Simici ka vakavuna na kena Vakalesui Mai na kosipeli ni iVakabula. Vukei ira mera raica eso na ivakaraitaki ena Josefa Simici—Ai Tukutuku 1:10, 29, 68. Eda sa vakalougatataki vakacava nikua baleta ni sauma mai na Kalou na taro nei Josefa Simici?

• E rawa talega ni o solia vei ira na luvemu e dua na gauna me ra veivosakitaka na taro eso e tu vei ira. Na cava eda vulica mai vei Josefa Simici me baleta na sala me kunei kina na isaunitaro? (raica na Josefa Simici—Ai Tukutuku 1:8–17; raica talega na tikina e 3 kei na 4 ni “Jisu ena Joritani,” iVolanisere ni Gonelalai, 142).

“Era a lako mai na italai vakalomalagi me ra vakasalataki Josefa.”

• O cei o ira na “italai vakalomalagi [era] a lako mai me vakavulici Josefa”? Era na marautaka beka na luvemu me ra vakaraica na kedra iyaloyalo ena iVola ni iYaloyalo Vakosipeli (raica talega na naba 91, 93, 94, 95). Era a veivuke vakacava na italai yadua oqo me “tauyavutaka tale na Lotu i Jisu Karisito”? Na ivolanikalou e vakaturi tiko ena tabana ni itaviqaravi ni macawa oqo e rawa ni vukei ira na luvemu me ra sauma na taro oqo.

Sa vakalesuyamai o Jisu Karisito na Nona Lotu.

• O na vukei ira vakacava na luvemu me ra kila na kena ibalebale me vakalesui mai na Lotu ni iVakabula? Ena rawa beka ni ra tara e dua na vale cecere rawarawa ena buloko se bilo ka “vakalesuya mai,” se tara tale. Se, kevaka era a bau sosomitaka na luvemu e dua na ka baleta ni a yali se vakacacani, sa rawa mo vakatauvatana na ka o ya vua na iVakabula ni vakalesuya mai na Nona Lotu. Vukei ira me ra kunea eso na veika vakatabakidua e tukuni tiko ena ivakaro ni Veivakalesui Mai ni sa vakalesuya mai na iVakabula.

“Sa tadola na lomalagi.”

• Me matanataki na ibalebale ni malanivosa “sa tadola na lomalagi”, sa rawa mo wasea e dua na itukutuku vei ira na luvemu, taumada mai na daku ni dua na katuba e sogo tu, ka oti mai na dua na katuba e dola tu. Mera veivukevuke ka wasea talega edua na itukutuku. Na itukutuku cava e tiko vei Jisu Karisito me noda? Na veika sotavi cava soti sa vukei keda meda kila ni sa tadola tu vei keda ko lomalagi?

Me baleta na vakasama tale eso, raica na ilavelave ni mekasini na iTokani ni vula oqo.