« Mau reo o te fa’aho’i-fa’ahou-ra’a mai : Te ’utuāfare o Iosepha Semita », Mai, pe’e mai—nō te ’utuāfare ’e te fare purera’a : Te Ha’api’ira’a Tumu ’e te mau Fafaura’a 2025 (2025)
« Te ’utuāfare o Iosepha Semita », Mai, pe’e mai—nō te ’utuāfare ’e te fare purera’a : 2025
Mau reo o te fa’aho’i-fa’ahou-ra’a mai
Te ’utuāfare o Iosepha Semita
’Ua putapū hōhonu roa tātou pā’āto’a e tō tātou orara’a ’utuāfare, ’e ’aita ïa Iosepha Semita i ta’a ’ē roa atu. ’Ua ueue te mau ti’aturira’a ’e te mau peu pae fa’aro’o o tōna nā metua i te mau huero o te fa’aro’o, ’o tei fa’atupu mai i te fa’aho’i-fa’ahou-ra’a mai. Tē ha’apāpū nei te buka ’ā’amu a Iosepha i teie parau fa’atura : « ’Aita e nāva’i te mau ta’o ’e te mau parau nō te fa’a’ite i te māuruuru rahi i te Atua i te hōro’ara’a mai iā’u i nā metua maita’i roa ».
Tē fa’a’ite nei te mau fa’ahitira’a i muri nei a tōna metua vahine ’o Lucy Mack Smith ; tōna taea’e ’o William Smith ; ’e te peropheta iho, tei hōro’a mai ia tātou i te fa’aurura’a pae fa’aro’o i roto i te ’utuāfare Smith.
Joseph Smith Family [Te ’utuāfare o Iosepha Semita], nā Dan Baxter
Lucy Mack Smith
« [I te ārea matahiti 1802], ’ua ma’ihia vau […] ’Ua parau vau iā’u iho, ’aita vau i ineine nō te pohe, nō te mea ’aita vau i ’ite i te mau haere’a o te Mesia, ’e e au ra iā’u ē tē vai nei te hō’ē ’āputo pōiri ’e te mo’emo’e i rotopū iā’u ’e te Mesia ’o tā’u e ’ore e tāmata e tīroa atu […]
« ’Ua fāriu atu vau i ni’a i te Fatu ’e ’ua tāparu ’e ’ua ti’aoro vau i te Fatu e fa’aherehere i tō’u ora, ’ia nehenehe iā’u e ’atu’atu i tā’u mau tamari’i ’e ’ia tāmarū i te ’ā’au o tā’u tāne ; nō reira ’ua tārava noa vau i te tā’āto’ara’a o te pō […] ’Ua fafau vau i te Atua [ē], mai te mea e vaiiho mai ’oia iā’u ’ia ora, e tūtava vau i te tītau mai i te reira ha’apa’ora’a fa’aro’o ’o te fa’ati’a iā’u ’ia tāvini maita’i i te reira, tei roto ānei i te Bibilia ’aore rā nā te mau vāhi ato’a e ’itehia mai ai te reira, noa atu ā e roa’a mai te reira nā te ra’i mai nā roto i te pure ’e te fa’aro’o. I te hope’a, ’ua parau mai te hō’ē reo iā’u ra ’e tē nā ’ō mai ra iā’u : E ’imi, e ’itea ïa ia ’oe ; e pātōtō atu, e ’īritihia mai te ’ōpani ia ’oe. ’A vaiiho ’ia tāmāhanahanahia tō ’oe ’ā’au. ’A ti’aturi ai ’oe i te Atua ; e ti’aturi ato’a ’oe iā’u’ […]
« Mai te reira mai ā taime, ’ua noa’a tāmau mai tō’u pūai. E paraparau iti noa vau nō ni’a i te ha’apa’ora’a fa’aro’o, noa atu tē māna’ona’o rahi nei au i te reira, ’e ’ua ti’aturi au e rave ma tō’u itoito ato’a mai tā’u e nehenehe nō te ’imi mai i te hō’ē ta’ata paieti tei ’ite i te mau haere’a o te Atua, nō te ha’api’i iā’u i te mau mea o te ra’i ».
William Smith
« Tō’u metua vahine, e vahine paieti roa ’oia ’e te ’ana’anatae mau i te au maita’i o tāna mau tamari’i, i’ō nei ’e i muri a’e teie orara’a, ’ua fa’a’ohipa ’oia i te mau rāve’a ato’a ’o tā tōna here metua e nehenehe e tītau, nō te tūtava ia mātou i roto i te ’imira’a i te fa’aorara’a i tō mātou vairua, ’aore rā (mai tei parauhia i terā ra tau) ‘i roto i te ha’apa’ora’a fa’aro’o.’ ’Ua tūra’i māite ’oia ia mātou ’ia haere i te mau purera’a, ’e fātata roa te ’utuāfare tā’āto’a tei ’ana’anatae i terā ’ohipa, ’e te rirora’a ’ei feiā ’imi i te parau mau ».
« ’Ua rave tāmau noa mātou i te mau pure ’utuāfare, ’ia ha’amana’o ana’e au. Tē ha’amana’o maita’i nei au, ’ua mātau tō’u metua tāne i te tu’u i tōna tīti’a mata i roto i te pūtē o tōna pereue […] ’e ’ia ’ite ana’e mātou, te mau tamāroa iāna i te fāfāra’a i tōna tīti’a mata, ’ua ’ite roa mātou ē e tāpa’o te reira nō te fa’aineine nō te pure, ’e mai te peu noa atu ’aita mātou e ha’apa’o atu, e nā ’ō mai tō mātou māmā, ‘e William’, ’aore rā te tahi tamari’i ’aita e ha’apa’o ra, ‘’a fa’aineine nō te pure’. I muri mai te pure, e hīmene tā mātou nō te hīmene. »
’Ua ha’api’i Joseph metua ’e ’o Lucy Smith i tō rāua ’utuāfare ’ia ’imi maita’i i te mau pāpa’ira’a mo’a.
Iosepha Semita
« Tē parau nei au i teienei ē, ’aita [tō’u metua tāne] i rave a’enei i te hō’ē ’ohipa ’ino, ’o te nehenehe e fa’arirohia ’ei ta’ata rima here iti, i roto i tōna orara’a, ’ia ha’amana’o vau. ’Ua here roa vau i tō’u metua tāne ’e tōna putu ’ite ; ’e tē ha’amana’ora’a i tāna mau ’ohipa fa’ahiahia, e ha’ateimaha i ni’a i tō’u ferurira’a ; ’e e rave rahi tāna mau parau marū ’e ’ei metua nō’u, tei pāpa’ihia i ni’a i te papa o tō’u nei ’ā’au. E mea mo’a nō’u, teie mau mana’o ’o tā’u e poihere nei nō te ’ā’amu o tōna orara’a, ’o tē ’ohu nei i roto i tō’u ferurira’a ’e ’o tei tanuhia i reira, nā tā’u iho hi’ora’a mai tō’u fānaura’ahia mai ā […] Tō’u metua vahine ’o te hō’ē ato’a ïa o te mau vahine fa’ahiahia rahi mau ’e te maita’i roa a’e i roto i te mau vahine ato’a ».