6–12 nō Tēnuare : « ’A fa’aro’o mai na ’o ’outou e te mau ta’ata »

Te Ha’api’ira’a Tumu ’e te mau Fafaura’a 1

I te ’āva’e Novema 1831, e hō’ē noa matahiti ’e te ’āfa te ’Ēkālesia a Iesu Mesia i te fa’aho’i-fa’ahou-ra’a-hia mai. Noa atu ā te tupura’a rahi, ’o te hō’ē noa ā pupu mātau-iti-hia o te feiā fa’aro’o e ora ra i roto i te mau ’oire na’ina’i mau, tei arata’ihia e te hō’ē peropheta e piti ’ahuru ti’ahapa matahiti. Tē fa’ariro nei rā te Atua i teie feiā fa’aro’o ’ei mau tāvini nāna ’e e mau ve’a nāna, ’e ’ua hina’aro ’oia ’ia piahia te mau heheura’a ’o tāna i hōro’a ia rātou, nā te ao nei.

Te Ha’api’ira’a Tumu ’e te mau Fafaura’a, tufa’a 1 ’o te ’ōmuara’a parau ïa a te Fatu, ’aore rā te ha’amatara’a, o teie mau heheura’a. Tē fa’a’ite pāpū nei te reira ē, noa atu te iti o te mau melo o te ’Ēkālesia, e ’ere roa te poro’i tā te Atua e hina’aro e fa’a’ite i tōna feiā mo’a i te mea na’ina’i. E « reo fa’aara » teie i « te mau nūna’a ato’a o te ao nei », ’o tē ha’api’i nei ia rātou ’ia tātarahapa ’e ’ia ha’amau i te « fafaura’a mure ’ore » a te Atua (mau ’īrava 4, 8, 22). Te mau tāvini e ’āfa’i nei i teie parau poro’i e « feiā paruparu ’e te ha’eha’a » ïa. Terā rā, ’o te mau tāvini ha’eha’a mau ïa tā te Atua e pi’i nei—i muta’a rā ’e i teienei—nō te fa’ahaere mai i tāna ’Ēkālesia nā « roto mai i te vāhi mo’emo’e ’e te vāhi pō’iri » (mau ’īrava 23, 30).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 1

« ’A fa’aro’o mai na ’o ’outou e te mau ta’ata ».

E fa’aō mai te ’ōmuara’a parau i te hō’ē buka. E fa’ata’a mai te reira i te mau tumu parau ’e te mau fā o te buka, ’e e tauturu i te ta’ata tai’o ’ia fa’aineine nō te tai’o. ’A tai’o ai ’oe te tufa’a 1—te « ’ōmuara’a parau » a te Fatu i Te Ha’api’ira’a Tumu ’e te mau Fafaura’a (’īrava 6)—’a pā’imi i te mau tumu parau ’e te mau fā tā te Fatu i hōro’a mai nō tāna mau heheura’a. E aha tā ’oe i ’apo mai ’o tē tauturu ia ’oe i roto i tā ’oe ’imi-maita’i-ra’a i te Ha’api’ira’a Tumu ’e te mau Fafaura’a i teie matahiti ? ’Ei hi’ora’a, e nehenehe ’oe e feruri e aha te aura’a o te parau « fa’aro’o i te reo o te Fatu » i roto i teie mau heheura’a (’īrava 14) ’aore rā « ’a ’imi māite i i teie mau fa’auera’a » (’īrava 37).

Hi’o ato’a te parau ’ōmuara’a nō Te Ha’api’ira’a Tumu ’e te mau Fafaura’a.

Te Ha’api’ira’a Tumu ’e te mau Fafaura’a 1:4–6, 23–24, 37–39

Tē paraparau nei te Fatu nā roto mai i tāna mau tāvini, ’oia ho’i te mau peropheta o te mau mahana hope’a nei.

E ha’amata ’e e fa’ahope te tufa’a 1 ma te fa’a’itera’a a te Fatu ē, tē paraparau nei ’oia nā roto i tāna mau tāvini i mā’itihia (hi’o mau ’īrava 4–6, 23–24, 38). ’A pāpa’i i te mau mea tā oe i ’apo mai nā roto mai i teie heheura’a nō ni’a :

• Te Fatu ’e tōna reo.

• Nō te aha e hina’arohia te mau peropheta i tō tātou nei ’anotau.

E aha te mea e tūra’i ia ’oe ’ia rave i muri a’e i te mea tā ’oe i ’ite mai ?

E aha te taime ’a fa’aro’o ai ’oe te reo o te Fatu nā roto mai i te reo o tāna mau tāvini ? (hi’o ’īrava 38).

E nehenehe ato’a ’oe e feruri, i te hō’ē hoa tei ’ore i ’ite i te mau peropheta ora, e tai’o ra i te tufa’a 1 ’e ’o ’oe. E aha ïa te mau uira’a a tō ’oe hoa ? I teihea mau ’īrava tā ’oe e hina’aro e ’āparau ’e tō ’oe hoa nō te tauturu iāna, ’ia hāro’aro’a i te mea tā ’oe e putapū nei nō ni’a tē vai nei te mau peropheta i tō tātou nei ’anotau ?

E ’ana’anatae paha ’oe ’ia ’ite ē, i te rurura’a te hō’ē ’āpo’ora’a a te mau peresibutero i te matahiti 1831, nō te ’āparaura’a nō ni’a i te piara’a i te mau heheura’a a Iosepha Semita, ’ua pāto’i te tahi mau ta’ata i te mana’o. ’Ua ha’amā rātou i te paruparu o Iosepha i roto i te pāpa’ira’a, ’e ’ua ha’ape’ape’a ē, e riro te piara’a i te mau heheura’a i te ha’afifi atu ā i te feiā mo’a (hi’o Te feiā mo’a, 1:140–43). ’Āhiri e melo ’oe nō teie ’āpo’ora’a, e nāhea ’oe i te pāhono i teie mau ha’ape’ape’ara’a ? E aha te mau mana’o tā ’oe i ’ite mai i roto te tufa’a 1 ’o tē nehenehe e tauturu ? (hi’o, ’ei hi’ora’a, mau ’īrava 6, 24, 38).

’A feruri i te tu’u mai i roto, te hō’ē hīmene mai te hīmene « Mai fa’aro’o i te reo o te peropheta » (Te mau Hīmene, N 11) i roto i tā ’oe ’imi-maita’i-ra’a ’e te ha’amorira’a. ’A mā’imi mai i te mau pereota i roto i te hīmene ’o tē ha’api’i nei i te hō’ē ā mau parau tumu mai te mau ’īrava i roto te tuha’a 1.

’A hi’o ato’a Topics and Question [Mau tumu parau ’e mau uira’a], « Prophets [Peropheta] », Vaira’a buka ’evanelia.

Tē paraparau nei te Fatu ia tātou nā roto mai i tāna mau tāvini, te mau peropheta.

Te Ha’api’ira’a Tumu ’e te mau Fafaura’a 1:12–30, 34–36

E tauturu te fa’aho’i-fa’ahou-ra’a mai iā’u ’ia fa’aruru i te mau tāmatara’a o te mau mahana hope’a nei.

I roto Te Ha’api’ira’a Tumu ’e te mau Fafaura’a tuha’a 1, tē fa’ata’a nei te Fatu nō te aha ’oia i fa’aho’i fa’ahou mai ai i tāna ’evanelia. ’A hi’o e hia mau tumu tā ’oe e nehenehe e tāpura, ’a tai’o ai ’oe te mau ’īrava 12–23. I roto i tō ’oe ’itera’a, nāhea te mau ’ōpuara’a a te Fatu nō te fa’aho’i-fa’ahou-ra’a mai i te tupura’a ?

’Ua ’ite te Fatu ē, e fa’aruru tō tātou nei ’anotau i te mau ’ati rahi (hi’o ’īrava 17). E aha te mea tā ’oe i ’ite mai i roto te mau ’īrava 17–30, 34–36 ’o tē tauturu ia oe ’ia putapū i te hau ’e te ti’aturira’a noa atu ā teie mau ’ati ?

Hi’o ato’a Russell M. Nelson, « ’A fāri’i i te ananahi ma te fa’aro’o », Liahona, Nov. 2020, 73–76.

Te Ha’api’ira’a Tumu ʼe te mau Fafaura’a 1:19–28

E fa’a’ohipa te Fatu i « te feiā paruparu ’e te ha’eha’a » nō te fa’atupu i tāna ’ohipa.

’A tai’o ai ’oe Te Ha’api’ira’a ’e te mau Fafaura’a 1:19–28, e nehenehe ’oe e feruri e aha te aura’a ’ia riro ’ei hō’ē tāvini nā te Fatu. E aha te mau huru ta’a ’ē tā te Fatu e hina’aro ’ia roa’a i tāna mau tāvini ? E aha tā te Fatu e fa’atupu nei nā roto mai i tāna mau tāvini ? Nāhea te mau tohura’a e vai nei i roto i teie mau ’īrava e tupu ai nā te ao nei ’e i roto i tō ’oe orara’a ?

’A ’imi ia Iesu Mesia. Te fā o te mau pāpa’ira’a mo’a ’o te fa’a’ite-pāpū-ra’a ïa i te Fa’aora ’e i tāna ’evanelia. ’A tai’o ai ’oe Te Ha’api’ira’a Tumu ’e te mau Fafaura’a 1, ’a feruri i te tāpa’o ’aore rā i te pāpa’i i te mau ’īrava ’o tē ha’api’i nei ia ’oe i te tahi mea nō ni’a ia Iesu Mesia.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te mau tamari’i

Te Ha’api’ira’a Tumu ’e te mau Fafaura’a 1:4, 37–39.

Nā roto i tāna mau peropheta, e fa’aara mai te Fatu iā’u i te ’ati pae vārua.

• Nō te ha’amata i te hō’ē ’āparaura’a nō ni’a i te mau fa’aarara’a a te Fatu, e nehenehe ’outou e paraparau nō ni’a i te mau fa’aarara’a tā tātou e fa’ari’i nei nā roto mai i te tahi atu mau ta’ata, nō ni’a i te mau fifi tā tātou e ’ore e ’ite nei. E nehenehe e fa’aō mai te tahi mau hi’ora’a, hō’ē tahua he’ehe’e, hō’ē vero e tae mai ra ’aore rā hō’ē pere’o’o e ha’afātata mai ra. Penei a’e e nehenehe ’outou ’e tā ’outou mau tamari’i e hi’o haere i te mau hi’ora’a nō te mau tāpa’o, ’e ’ia fa’aau i teie mau fa’aarara’a i te mau fa’aarara’a ’o tā te Fatu e hōro’a mai nei ia tātou. ’Ia au i Te Ha’api’ira’a Tumu ’e te mau Fafaura’a 1:4, 37–39, mea nāhea te Fatu i te fa’aara mai ia tātou ? I te aha ’oia i te fa’aarara’a mai ia tātou, ’aita i maoro a’enei ? E nehenehe paha ’outou e māta’ita’i ’aore rā e tai’o i te mau tuha’a o te mau a’ora’a o te ’āmuira’a rahi i tupu iho nei ’e ’ia ’imi mai i te mau hi’ora’a nō te « reo fa’aara » a te Atua.

• ’A hīmene ’āmui i te hō’ē hīmene nō ni’a i te mau peropheta, mai te ’īrava hope’a o te hīmene « Follow the Prophet [Pe’e i te peropheta] » (Children’s Songbook [Te mau hīmene nā te mau tamari’i], 111). ’A fa’a’ite i tō ’outou ’itera’a pāpū ē, tē fa’ahiti nei te peropheta i te parau a te Atua.

Te Ha’api’ira’a Tumu ’e te mau Fafaura’a 1:17

E tauturu te fa’aho’i-fa’ahou-ra’a mai iā’u ’ia fa’aruru i te mau tāmatara’a o te mau mahana hope’a nei.

• Nō te fa’aitoito i te ’āparaura’a nō ni’a Te Ha’api’ira’a Tumu ’e te mau Fafaura’a 1:17, e nehenehe ’outou ’e tā ’outou mau tamari’i e feruri ē, tē fa’aineine nei ’outou nō te hō’ē tere. E aha tā ’outou e ’āfa’i atu ? Mai te mea ’ua ’ite a’ena ’outou e uahia ’aore rā e puta te huira o tō ’outou pere’o’o ’aore rā o te pere’o’o utara’a ta’ata, nāhea te reira i te fa’atupu i te huru nō tā ’outou fa’aineinera’a i tō ’outou tere ? E tai’o ’āmui te ’īrava 17, ’e e paraparau i te mea tā te Fatu i ’ite ē, e tupu mai i ni’a ia tātou. Nāhea ’oia i te fa’aineinera’a nō te reira ? (Mai te mea e tītauhia, ’a fa’ata’a atu ē, te « ’ati rahi » ’o te hō’ē ïa ’ohipa ’ino rahi ’aore rā, ri’ari’a mau). Nāhea te mau fa’auera’a a te Atua i te tauturu ia tātou ’ia fa’aruru i te mau tāmatara’a o tō tātou nei ’anotau ?

Te Ha’api’ira’a Tumu ’e te mau Fafaura’a 1:17, 29

’Ua pi’i te Fatu ia Iosepha Semita ’ia riro ’ei peropheta.

• Nō te ha’api’i mai nō ni’a i te ti’ara’a o Iosepha Semita i roto i te fa’aho’i-fa’ahou-ra’a mai i te ’evanelia a te Fa’aora, e nehenehe ’outou ’e tā ’outou mau tamari’i e hi’o i te hōho’a o te Fa’aora ’e te hōho’a o Iosepha Semita (hi’o te mau hōho’a i roto i teie arata’i ha’api’ira’a) ’e e paraparau e aha tā te Fa’aora i hōro’a mai ia tātou nā roto mai ia Iosepha Semita. E nehenehe tā ’outou mau tamari’i e ’imi mai i te mau hi’ora’a i roto Te Ha’api’ira’a Tumu ’e te mau Fafaura’a 1:17, 29. ’A parau i tā ’outou mau tamari’i mea nāhea ’outou i te ’itera’a ē, « ’ua ti’aoro atu [te Atua] i tō’u tāvini ia Iosepha Semita, tamaiti, ’e ’ua parau atu ra iāna nā roto mai i te ra’i » (’īrava 17).

© 1998 David Lindsley

Te Ha’api’ira’a Tumu ’e te mau Fafaura’a 1:30

Te ’Ēkālesia a Iesu Mesia i te Feiā Mo’a i te mau Mahana Hope’a nei ’o « te ’ēkālesia mau ’e te mea ora » a te Fatu.

• E aha te aura’a ’ia parau ē, te ’Ēkālesia « mau ’e te mea ora » ? Nō te tītau i tā ’outou mau tamari’i ’ia feruri i teie uira’a, e nehenehe paha ’outou e fa’a’ite ia rātou i te mau ’ohipa ora ’e te mea ora ’ore—mai te hō’ē rā’au ora ’e te hō’ē rā’au pohe. Nāhea tātou e ’ite ai e mea ora te hō’ē ’ohipa ? E nehenehe ’outou e tai’o i muri iho Te Ha’api’ira’a Tumu ’e te mau Fafaura’a 1:30 ’e ’ia paraparau e aha te aura’a nō te ’Ēkālesia ’ia riro ’ei mea « mau ’e te mea ora ».

Nō te tahi atu mau mana’o, ’a hi’o te ve’a Hoa nō teie ’āva’e.

Beside Still Waters [I pīha’i iho i te mau pape marū], nā Simon Dewey