Sacred Grove [Te uru rā’au mo’a], nā Greg Olsen

13–19 nō Tēnuare : « ’Ua ’ite atu vau i te hō’ē pou māramarama »

Iosepha Semita—’Ā’amu 1:1–26

E nehenehe e parau ē, te Ha’api’ira’aTumu ’e te mau Fafaura’a ’o te hō’ē ïa buka nō te mau pāhonora’a i te mau pure : E rave rahi heheura’a mo’a i roto i teie buka tei tae mai ’ei pāhonora’a i te mau uira’a. Te uira’a ’o tei fa’atupu i te mau mea ato’a—terā tei fa’atupu i te ni’ini’ira’a o te heheura’a i te mau mahana hope’a nei—tei uihia e te hō’ē tamaiti e 14 tōna matahiti. E « mau arora’a parau ra ’e te māniania nō te fa’a’itera’a i te mana’o » (Iosepha Semita—’Ā’amu 1:10) tei fa’a’āhuehue [confus] ia Iosepha Semita nō ni’a i te ha’apa’ora’a fa’aro’o ’e tōna aura’a e te Atua. Penei a’e e nehenehe ’oe e fa’atū’ati i te reira. E ’ite mai tātou e rave rahi mana’o ha’ape’ape’a ’e te mau reo fa’a’amu’amu i tō tātou nei ’anotau. ’Ia hina’aro ana’e tātou e fa’ata’ata’a i teienei mau poro’i ’e ’ia ’ite mai i te parau mau, e nehenehe tātou e rave i te mea tā Iosepha i rave. E nehenehe tātou e ui i te mau uira’a, e ’imi maita’i i te mau pāpa’ira’a mo’a, e feruri ’e i te hope’a e ui atu i te Atua. ’Ei pāhonora’a i te pure a Iosepha, ’ua pou mai te hō’ē pou māramarama nā te ra’i mai. ’Ua fā mai te Atua te Metua ’e ’o Iesu Mesia ’e ’ua pāhono mai i tāna mau uira’a. Tē parau nei te ’itera’a pāpū o Iosepha Semita nō ni’a i teie ’ohipa temeio i tupu ē, « ’ia ’ere te ta’ata i te ’ite, e nehenehe iāna ’ia ani i te Atua, ’e e fāri’i ’oia, ma te pāto’i-’ore-hia mai » (Iosepha Semita—’Ā’amu 1:26). E nehenehe tātou pā’āto’a e fāri’i, ’aita ana’e hō’ē ’ōrama mure ’ore, te hō’ē ra ’ōrama māramarama maita’i, e tūramahia e te māramarama o te ra’i.

Mana’o nō te ’apo i te ha’api’ira’a i te ’utuāfare ’e i te fare purera’a

Iosepha Semita—’Ā’amu 1:5–26

’O Iosepha Semita te peropheta nō te fa’aho’i-fa’ahou-ra’a mai.

Te fā o te ’ā’amu o Iosepha Semita ’o te tu’ura’a ia tātou « i te mau mea tei tupu », nō te mea ’ua fa’ahuru-’ē-pinepine-hia te parau mau nō ni’a ia Iosepha (Iosepha Semita—’Ā’amu 1:1). ’A tai’o ai ’oe te Iosepha Semita—’Ā’amu 1:1–26, e aha te mea e ha’apūai i tō ’oe ’itera’a pāpū nō ni’a i tōna pi’ira’a hanahana ?

Hi’o ato’a Te feiā mo’a, 1:3–19.

Iosepha Semita—’Ā’amu 1:5-25

Nāhea vau e fa’ari’i ai i te mau pāhonora’a i tā’u mau pure ?

’Ua « ’ere [ānei] ’oe i te pa’ari » ’aore rā ’ua putapū a’ena ānei ’oe i te ’āehuehu nō te hō’ē fa’aotira’a ’o tā ’oe e ti’a e rave ? (Iosepha Semita—’Ā’amu 1:13). E nehenehe te ’ohipa i tupu ia Iosepha Semita i te matahiti 1820, e riro ’ei hi’ora’a maita’i nō tā ’oe iho heheura’a. ’Ei hi’ora’a, ’a mā’imi ai ’oe te Iosepha Semita—’Ā’amu 1:5–25, ’a ’imi i te mau ’ohipa i tupu ’o tā ’oe e nehenehe e fa’atū’ati. E aha te mea tā ’oe i ’apo mai ?

• Nāhea Iosepha i te fa’aineinera’a iāna nō te hō’ē ’ohipa mo’a i tupu o te pure ? (hi’o mau ’īrava 8, 11, 14–15).

• Te ti’ara’a o te ’imi-maita’i-ra’a i te mau pāpa’ira’a mo’a i roto i te mā’imira’a i te heheura’a ? (hi’o mau ’īrava 11–12).

• E aha te mea e rave ’ia fa’aruru ana’e ’oe i te pāto’ira’a ? (hi’o mau ’īrava 15–16, 21–26).

• Te fāri’ira’a ’e te ’ohipara’a mai te au i te mau pāhonora’a tā ’oe i fāri’i (hi’o mau ’īrava 18–25).

Tītau i te mana’o E tītau te mā’imira’a i te mau pāpa’ira’a mo’a i te mau fa’auru’a’ī [impressions] nō ’ō mai i te Vārua Maita’i. E nehenehe te fa’a’itera’a i teie mau fa’auru’a’ī e tītau i te Vārua Maita’i ’ia fa’a’ite pāpū atu ia vetahi ’ē, ’oia ato’a i te ta’ata iho e fa’a’ite nei.

E aha te tahi atu ā mau mana’o ’o tā ’oe e nehenehe e roa’a mai nā roto mai i te parau pāpa’i a te peresideni Henry B. Eyring « Te ’Ōrama Mātāmua : Hō’ē hōho’a nō te heheura’a a te ta’ata iho » ? (Liahona, Fepuare 2020, 12–17).

E nehenehe ato’a ’oe e mā’imi i te tahi atu mau hi’ora’a i roto i te mau pāpa’ira’a mo’a, nō te mau ta’ata e paraparau nei i te Atua. E nehenehe te mau hōho’a i roto te Buka hōho’a nō te ’evanelia ’aore rā te tahi atu mau buka o te Mai, pe’e mai, e hōro’a mai ia ’oe te tahi mau mana’o. ’A tāmata i te pāhono i te mau uira’a i tāpurahia nā mua atu, nō te hi’ora’a tāta’itahi tā ’oe e ’ite mai. E aha te mau ’ohipa i tupu tā ’oe i ora mai, ma te fāri’ira’a i te mau pāhonora’a nō te pure ? E aha tā ’oe e nehenehe e rave nō te tauturu ia vetahi ’ē ’ia ora ato’a i te mau ’itera’a maita’i ?

Hi’o ato’a Russell M. Nelson, « ’A fa’aro’o iāna », Liahona, Mē 2020, 88–92.

Iosepha Semita—’Ā’amu 1:15–20

’Ua ’ite mata Iosepha Semita i te Atua te Metua ’e i tāna Tamaiti, ’o Iesu Mesia.

’Ua ti’aturi Iosepha Semita ē, e pāhono mai te Atua i tāna pure, ’aita rā ’oia i mana’o ē, e taui roa taua pāhonora’a ra i tōna orara’a—’e te ao nei. ’A tai’o ai ’oe nō te ’ohipa i tupu nō Iosepha, ’a feruri mea nāhea te mau hope’ara’a o te ’Ōrama Mātāmua i te tauira’a i tō ’oe orara’a.

’Ei hi’ora’a, ’ua heheu mai te ’Ōrama Mātāmua e rave rahi parau mau nō ni’a i te Atua te Metua ’e tāna Tamaiti, ’o Iesu Mesia, tei ta’a ’ē i te mea tei ti’aturihia e te rahira’a o te mau ta’ata i te tau ’o Iosepha. ’A tai’o ai ’oe te Iosepha Semita—’Ā’amu 1:15–20, ’a feruri i te pāpa’i ma te rāve’a ta’a ’ē nō te fa’a’ī i te hō’ē fa’ahitira’a parau mai teie te huru : « Nō te mea ’ua tupu te ’Ōrama Mātāmua, ’ua ’ite au ē… »

E aha te mau nino’a mana’o [sentiments] tā ’oe e putapū nei, ’a feruri ai ’oe i te ’ohipa i tupu nō Iosepha ’e te mau mea ato’a tei tupu mai nō te reira ?

Hi’o ato’a « Ask of God: Joseph Smith’s First Vision [’Ani i te Atua : Te ’ōrama mātāmua o Iosepha Semita » (video), Vaira’a buka ’evanelia ; « Te pure mātāmua a Iosepha Semita » Te mau Hīmene, N 15.

E ani i te Atua : te ’ōrama mātāmua a Iosepha Semita

E hōho’a poto nō te fare manaha nō te ’ā’amu o te ’Ēkālesia e fa’a’ite nei i te ’ōrama mātāmua a Iosepha Semita, ma te tahi ha’amāramaramara’a mai roto mai i te mau fa’ati’ara’a tāta’itahi a Iosepha Semita.

Fa’ata’ara’a maita’i nō roto mai If Any of You Lack Wisdom [Tē ere ra ānei te hō’ē o ’outou i te pa’ari], nā Walter Rane

Iosepha Semita—’Ā’amu 1:15–20

Nō te aha ’ua rau te mau fa’ati’ara’a o te ’Ōrama Mātāmua ?

I te roara’a o tōna orara’a, ’ua pāpa’i Iosepha Semita i te ’ohipa i tupu nōna i roto i te uru rā’au mo’a e maha a’e taime, pinepine ma te fa’a’ohipara’a i te hō’ē ta’ata pāpa’i. Hau atu, e rave rahi pāpa’a parau tei pāpa’ihia e te tahi mau ta’ata, tei fa’aro’o ia Iosepha i te fa’ati’ara’a i tāna ’ōrama. Noa atu ā te mau ta’a-’ē-ra’a o teie mau pāpa’a parau nō ni’a i te tahi mau fa’ata’ara’a maita’i, ’ia au i te ta’ata pāpa’i, te huira’atira ’e te heitupura’a, ’ua tū’ati ïa te reira i te ’ā’amu. ’E e tu’u mai te pāpa’a parau tāta’itahi i te mau fa’ata’ara’a maita’i ’o te tauturu a’e ia tātou ’ia māramarama i te ’ohipa i tupu ia Iosepha Semita, mai nā ’evanelia e maha tāta’itahi tei tauturu maita’i ia tātou ’ia māramarama i te tāvinira’a a te Fa’aora.

Hi’o ato’a Topics and Questions [Mau tumu parau ’e mau uira’a], « First Vision Accounts [Pāpa’a parau o te ’Ōrama Mātāmua] », Vaira’a buka ’evanelia.

Iosepha Semita—’Ā’amu 1:21–26

E nehenehe au e vai ha’apa’o noa i te mea tā’u i ’ite, noa atu e tau’a-’ore-hia mai au e vetahi ’ē.

I muri a’e i tāna ’ōrama mātāmua fa’ahiahia roa, ’ua hina’aro noa Iosepha Semita e fa’a’ite atu i te ’ohipa i tupu nōna ia vetahi ’ē. Te pāto’ira’a ’o tāna i fa’aruru atu, ’ua fa’amaere ïa iāna. ’A tai’o ai ’oe i tāna pāpa’a parau, e aha te mea tei tūra’i ia ’oe ’ia vai ha’apa’o noa i tō ’oe ’itera’a pāpū ? E aha te tahi atu mau hi’ora’a—nō roto mai i te mau pāpa’ira’a mo’a, i te hō’ē tupuna ’aore rā i te mau ta’ata tā ’oe i mātau—tei hōro’a mai ia ’oe te itoito ’ia vai ha’apa’o noa i te mau ’ohipa pae vārua tei tupu nō ’oe ?

Hi’o ato’a Gary E. Stevenson, « Fa’a’amura’a ’e fa’a’itera’a i tō ’outou ’itera’a pāpū », Liahona, Novema 2022, 111–14.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te mau tamari’i

Iosepha Semita—’Ā’amu 1:3–14

’Ua fa’a’ineinehia Iosepha Semita ’ia riro ’ei peropheta nā te Atua.

• Ma te ha’api’i-hau-ra’a mai nō ni’a i te ’āpīra’a o Iosepha Semita, e nehenehe tā ’outou mau tamari’i e fa’a’au ia rātou iho i ni’a iāna, ma te ha’api’ira’a mai nā roto mai i tōna mau ’itera’a. E nehenehe paha ïa rātou e tāpe’a i te hōho’a o Iosepha Semita ’e ’ia fa’a’ite mai i te mea tā rātou i ’ite nō ni’a iāna. Mai te mea e hina’arohia, e nehenehe ’outou e tu’u atu i te tahi mau ’ohipa i tupu nō ni’a iāna, nā roto mai i te Iosepha Semite—’Ā’amu 1:3–14 (hi’o ato’a « Pene 1 : Iosepha Semita ’e tōna ’utuāfare », i roto Te mau ’ā’amu nō roto mai i Te Ha’api’ira’a Tumu ’e te mau Fafaura’a, 6–8, i roto te Vaira’a buka ’evanelia). E aha tā Iosepha i ora mai tei tauturu iāna ’ia fa’aineine nō te riro mai ’ei peropheta ? I te aha te Atua e fa’aineine ai ia tātou ?

  Chapter 1: Joseph Smith and His Family: 1805–1820

Fa’ata’ara’a maita’i nō roto mai Joseph Smith’s First Vision [Te ’Ōrama Mātāmua a Iosepha Semita], nā Greg Olsen

Iosepha Semita—’Ā’amu 1:10–13

E nehenehe te Atua e pāhono mai i tā’u mau uira’a nā roto i te mau pāpa’ira’a mo’a.

• ’A feruri i te fa’a’ite atu i tā ’outou mau tamari’i i te mau buka rau, ’oia ato’a te mau pāpa’ira’a mo’a. E tauturu ia rātou ’ia feruri i te mau uira’a ’o tā teie mau buka e nehenehe e pāhono mai. I muri iho, e nehenehe ’outou e tai’o ’āmui te Iosepha Semita—’Ā’amu 1:10–11, nō te ’ite mai i te mau uira’a ’o tā Iosepha Semita i ui iāna iho ’e e aha te mau pāhonora’a tei ’itehia mai iāna i roto i te mau pāpa’ira’a mo’a.

• E nehenehe paha ïa tā ’outou mau tamari’i e ’imi mai i te mau ta’o i roto te ’īrava 12, ’o tē fa’ata’a nei, mea nāhea te tai’ora’a te Iakobo 1:5 i te ha’aputapūra’a ia Iosepha. E nehenehe ’outou i muri iho, e fa’a’ite mai i te tahi ’e te tahi te mau ’itera’a, nō te ha’aputapūra’a te hō’ē tuha’a o te pāpa’ira’a mo’a ia ’outou. E nehenehe ato’a ’outou e hīmene ’āmui i te hō’ē hīmene nō ni’a i te tai’ora’a i te mau pāpa’ira’a mo’a, mai te « Search, Ponder, and Pray [’Imi, feruri, ’e pure] » (Children’s Songbook [Te mau hīmene nā te mau tamari’i], N 109). E aha tā te hīmene e ha’api’i nei nō ni’a i te tumu tātou e tai’o ai i te mau pāpa’ira’a mo’a ?

Iosepha Semita—’Ā’amu 1:10–17

Tē fa’aro’o nei ’e tē pāhono nei te Metua i te ao ra i tā’u mau pure.

• Nō te ha’amata i te hō’ē ’āparaura’a nō ni’a e nāhea tātou ’ia tau’aparau ’e te Metua i te ao ra, penei a’e e nehenehe ’outou ’e tā ’outou mau tamari’i, e ui i te tahi ’e te tahi i te mau uira’a ma te fa’a’ohipa i te mau rāve’a o te tūreiara’a rau, mai te hō’ē parau poro’i, te hō’ē niuniu, ’aore rā te hō’ē parau pāpa’i-rima-hia. Nāhea tātou i te ui i te mau uira’a i te Metua i te ao ra ? Nāhea tātou i te fa’a’ite iāna ē, tē here nei ’e tē fa’atura nei tātou iāna i roto i tā tātou mau pure ? E tai’o ’āmui te Iosepha Semita—’Ā’amu 1:16–19, ’e e tau’a parau mea nāhea te Metua i te ao ra i te pāhonora’a i te pure a Iosepha Semita. E nehenehe ïa ’outou ’e tā ’outou mau tamari’i e fa’a’ite mai i te mau ’itera’a, ’a ani ai ’outou i te Atua i te tauturu ’e ’a fāri’i ai ’outou i te hō’ē pāhonora’a.

Iosepha Semita—’Ā’amu 1:17–19

’Ua ’ite Iosepha Semita i te Metua i te ao ra ’e i tāna Tamaiti ’o Iesu Mesia.

• E au paha te mau tamari’i ’āpī ’ia ti’a ma te rima toro ma te fa’ahōho’ara’a i te tumu rā’au i roto i te uru rā’au mo’a, ’a fa’ati’a ai ’outou ia rātou i te ’Ōrama Mātāmua. E ani i te mau tamari’i ’ia fa’ahauti ia rātou mai te huru ra te tūra’ihia ra rātou e te māta’i, ’a paraparau ai ’outou nō ni’a ia Iosepha e pure ra. I muri iho, e ani ia rātou ’ia ti’a noa ma te ha’uti ’ore ’e te muhu ’a parau ai ’outou ia rātou ē, ’ua fā mai te Metua i te ao ra ’e ’o Iesu ia Iosepha.

• E nehenehe te mau tamari’i pa’ari a’e e fa’a’ohipa i te hō’ē ’aore rā e rave rahi hōho’a i roto i teie arata’i, nō te fa’a’ite mai ia ’outou i te mea tā rātou i ’ite nō ni’a i te ’Ōrama Mātāmua. ’A fa’aitoito ia rātou ’ia hi’o te Iosepha Semita—’Ā’amu 1:14–17 ’e ’ia fa’a’ite mai i tō rātou mau mana’o ’e tō rātou mau nīoa mana’o nō ni’a i te ’ohipa tei tupu ia Iosepha (hi’o ato’a « Pene 2 : Te ’Ōrama Mātāmua a Iosepha Semita », i roto Te mau ’ā’amu nō roto mai Te Ha’api’ira’a Tumu ’e te mau Fafaura’a, 9–12, i roto te Vaira’a buka ’evanelia).

  Chapter 2: Joseph Smith’s First Vision: 1820

Nō te tahi atu mau mana’o, ’a hi’o i te ve’a Hoa nō teie ’āva’e.

Truth Restored [Te parau mau i fa’aho’ihia mai], nā Leon Parson