“Eb’ li xyaab’ kuxej re li k’ojob’ank wi’chik: Xjaltesinkil ru lix Hu laj Mormon,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)
“Xjaltesinkil ru lix Hu laj Mormon,” Kim, Taaqehin—Choq’ re li ochoch ut li iglees: 2025
Eb’ li xyaab’ kuxej re li k’ojob’ank wi’chik
Xjaltesinkil ru lix Hu laj Mormon
Sa’ abril re 1829, a’ li po ke’k’ule’ wi’ li tasal 6–9 re li Tzol’leb’ ut Sumwank, li k’anjel yoo chixb’aanunkil laj Jose Smith a’an lix jaltesinkil ru lix Hu laj Mormon. Ink’a’ mas naqanaw chirix chan ru naq ki’ux xjaltesinkil ru li hu, a’b’an naqanaw naq laj Jose Smith a’an aj ilol na’leb’, tenq’anb’il xb’aaneb’ li k’anjeleb’aal kawresinb’ileb’ xb’aan li Dios: wiib’ li pek chanchan saq ruhil lem, li Urim ut Tumin nayeeman reheb’, ut jun chik li pek li nawb’il ru jo’ jun li ilob’aal pek.
Moqon naq kipatz’man re naq taa’aatinaq chirix chan ru naq kijaltesiik ru li tz’iib’anb’il esil a’in, laj Jose kixye “naq ink’a’ na’ajman naq yeeb’ilaq re li ruchich’och’ chixjunil li ki’uxman.” Chi kok’ aj xsa’ yal kixye naq kijaltesiik ru “xb’aan lix maatan, ut lix wankil li Dios.”
Eb’ li aatin a’in, k’eeb’ileb’ xb’aaneb’ li ke’ilok re chan ru kijaltesiik ru li hu, neke’xch’olob’ xyaalal li raatin laj Jose.
Nayeeman naq li kaax a’in, re laj Hyrum Smith, ki’oksiman re xmuqb’aleb’ li perel ch’iich’ oor chiru jun hoonal.
Li xEmma Smith
“Naq lin b’eelom yoo chaq chixjaltesinkil ru lix Hu laj Mormon, laa’in kintz’iiba jun raqal re, naq a’an kixyaab’asi li junjunq ch’ol aatin, li junjunq li raqal chi aatinul, ut naq kiril jun k’ab’a’ej ink’a’ naxnaw xyaab’asinkil, malaj jun aatin najt roq’, a’an kixyaab’asi lix junjunq leetril, ut naq yookin chixtz’iib’ankil, wi ink’a’ us kintz’iib’a, a’an kinixxaqab’ ut kixtuqub’ li aatin us ta ink’a’ naru chirilb’al li yookin chixtz’iib’ankil sa’ li hoonal a’an. Chi moko kixnaw chan ru xyaab’asinkil li aatin Sara ut kixye lix leetril, ut laa’in kinyaab’asi choq’ re.”
“Chi kok’ aj xsa’ ke’k’ehe’ li perel ch’iich’ oor sa’ xb’een li meex chi ink’a’ kixyal xmuqb’aleb’, lanlookeb’ sa’ jun ch’ina t’ikr, li kink’e re laj Jose re xlanb’aleb’. Jun sut kinch’e’eb’ li perel ch’iich’, naq k’eek’ookeb’ sa’ xb’een li meex, re xnawb’al chan ru xteram ut xnimal. Chanchaneb’ perel pimeb’ ru, ut kitzintzok jo’ ch’iich’ naq eek’asinb’il xb’aan li wuq’, jo’ wan naq nakab’aanu rik’ineb’ xperel jun tasal hu. …
“Laa’in ninpaab’ naq lix Hu laj Mormon sa’ choxa kichal chaq—ink’a’ nawiib’an inch’ool chirix a’an. Ch’olch’o chiwu naq maajun winq kiru raj chixyaab’asinkil li tz’iib’anb’il chiru li hu chi ink’a’ musiq’anb’il; xb’aan naq, naq laa’in yookin chi tz’iib’ak choq’ re, laj Jose kiyaab’asin we chiru k’iila hoor; ut naq koosutq’iik chirix naq koowa’ak, malaj jalan chik li k’a’aq re ru, a’an ki’ok wi’chik tz’aqal b’ar wi’ kixaqli, us ta ink’a’ kiril li kintz’iib’a chi moko kirab’i raatinul chi ilb’il ru choq’ re. Rajlal kixb’aanu a’in. Ch’a’aj raj chiru jun winq nim xtzolb’al xb’aanunkil a’in; ut, choq’ re jun winq moko nim ta xna’leb’ ut ink’a’ tzolb’il jo’ a’an, maamin taaruuq taa’uxmanq.”
Laj Oliver Cowdery
“Laa’in kintz’iib’ank re chixjunil lix Hu laj Mormon (ka’ajwi’ junjunq perel ink’a’) naq yoo chi elk sa’ xtz’uumal re li profeet, naq a’an yoo chixjaltesinkil ru rik’in lix maatan ut lix wankil li Dios, chi tenq’anb’il xb’aan li Urim ut Tumim, malaj, jo’ yeeb’ileb’ re xb’aan li hu, loq’laj k’utleb’aal aatin. Kiwil rik’in tz’aqal xsa’ wu, kinch’e’ rik’in tz’aqal wuq’, eb’ li perel ch’iich’ li kijaltesiik wi’ chaq ru. Kiwileb’ ajwi’ li k’utleb’aal aatin.”