3–9 febrero: “A’in li musiq’ej re k’utb’esink”

Tzol’leb’ ut Sumwank 6–9

Rub’elaj li hab’alq’e sa’ 1828, jun saaj aj k’utunel aj Oliver Cowdery xk’ab’a’ kixk’ulub’a jun k’anjel re k’utuk aran Manchester, Nueva York, ut kikana sa’ rochoch lix junkab’al xLucy ut laj Jose Smith yuwa’b’ej. Laj Oliver kirab’i resil laj Jose, li ralaleb’, ut lix chaq’al ru xnumsihom, ut laj Oliver, li naxye naq a’an aj sik’ol re li yaal, kiraj xnawb’al xkomon xna’leb’. Eb’ laj Smith ke’xye resil li ula’aniik xb’aaneb’ li anjel, jun najter tz’iib’anb’il esil, ut li maatan re jaltesink ru aatin rik’in lix wankilal li Dios. Kisach xch’ool laj Oliver. Ma yaal chixjunil a’an? Li xLucy ut laj Jose, yuwa’b’ej, ke’xk’e jun na’leb’ re li naru nak’anjelak re yalaq ani nasik’ok re li yaal: tijon ut patz’ re li Qaawa’.

Laj Oliver kixb’aanu a’an, ut li Qaawa’ kisumen, rik’in “tuqtuukilal [sa’] xk’a’uxl” (Tzol’leb’ ut Sumwank 6:23). Laj Oliver kixk’e reetal naq li k’utb’esinb’il na’leb’ moko ka’aj ta wi’ reheb’ li profeet jo’ laj Jose Smith. A’an b’an re li ani na’ajok ut nasik’ok re chi yalb’il xq’e. Laj Oliver toj wan k’a’ru li tento tixtzol, a’b’an ak tz’aqal li naxnaw re naq taaxik chi uub’ej. Kixnaw naq li Qaawa’ yoo chixb’aanunkil jun xnimal ru k’anjel rik’in laj Jose Smith, ut laj Oliver kiraj tz’aqonk.

Chi’ilmanq ajwi’ Santos, 1:58–64; “Días en Harmony” (video), Biblioteca del Evangelio.

Days of Harmony

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 6; 8–9

Li qaChoxahil Yuwa’ nikinraatina rik’in li Santil Musiq’ej.

Rub’elaj li saq’ehil sa’ 1829, laj Oliver Cowdery kixyeechi’i rib’ choq’ aj tz’iib’anel chiru laj Jose Smith naq yoo chixjaltesinkil ru lix Hu laj Mormon. Jwal ki’eek’asiik xch’ool xb’aan a’in, ut kixpatz’ ma naru ajwi’ naxk’ul li k’utb’esinb’il na’leb’ ut li maatan re jaltesink ru aatin. A’b’anan, li xb’een sut naq kixyal, moko us ta ki’el.

Wi ch’a’aj chawu laa’at xk’ulb’al ut xtawb’al ru li k’utb’esinb’il na’leb’, maare naru nakataw ru li k’a’ru kixnumsi laj Oliver ut taataw ajwi’ aana’leb’ rik’in a’an. Naq taawil Tzol’leb’ ut Sumwank 6, 8, ut 9, k’e reetal li na’leb’ kixk’ut li Qaawa’ chiru laj Oliver chirix li k’utb’esinb’il na’leb’ naru naqak’ul chiqajunjunqal. Jo’ jun eetalil:

• K’a’ru naxye Tzol’leb’ ut Sumwank 6:5–7; 8:1; 9:7–8 chirix li naxpatz’ aawe li Qaawa’ rub’elaj naq tixk’utb’esi li rajom xch’ool?

• K’a’ru nakatzol sa’ Tzol’leb’ ut Sumwank 6:14–17, 22–24; 8:2–3; 9:7–9 chirix chan ru naq taaruuq taachalq li k’utb’esinb’il na’leb’? Chan ru naru nakak’e reetal?

• K’a’ chik ru nakatzol chirix li k’utb’esinb’il na’leb’ sa’eb’ li tasal a’in?

Lix numsihom laj Oliver naru nakatxk’e “chixk’oxlankileb’” li hoonal b’ar wi’ xaweek’a naq li Qaawa’ yoo chawaatinankil (Tzol’leb’ ut Sumwank 6:22). Ma aatz’iib’ahom laa k’a’uxl ut laa week’ahom chirixeb’ li numsihom a’an? Wi jo’kan, naru nakawil li k’a’ru xatz’iib’a. Wi ink’a’, chap b’ayaq aahoonal chixtz’iib’ankil li k’a’ru najultiko’ aawe. Naru nakak’oxla chan ru naru nakataw aakawilal rik’ineb’ li numsihom a’an. Re xtawb’al xkomon chik aana’leb’, chi’ilmanq li raatin li Elder Neil L. Andersen, “Eb’ li musiq’ejil hoonal jultikanb’il qab’aan” (Jolomil ch’utub’aj-ib’ re octubre 2020).

Naab’aleb’ reheb’ laj jolominel sa’ li Iglees neke’xwotz lix numsihomeb’ rik’in li k’utb’esinb’il na’leb’ sa’eb’ li video sa’ “Escuchalo.” Chirix rilb’al jun malaj junjunq reheb’ li video a’in, maare tatmusiq’aaq chixtz’iib’ankil laa numsihom ut xwotzb’al chan ru naq li Qaawa’ nakatraatina.

Chi’ilmanq ajwi’ Temas y preguntas, “Revelación personal,” Biblioteca del Evangelio; “El don de Oliver Cowdery,” sa’ Revelaciones en contexto, 17–21.

Tzol’leb’ ut Sumwank 6:18–21, 29–37

Chex-iloq wan wi’ li Kristo sa’ li junjunq k’oxlahom.

Li Qaawa’ naxnaw naq laj Jose Smith tixnumsi “jo’k’ihal li ch’a’ajkilal” chiruheb’ li chihab’ te’chalq (Tzol’leb’ ut Sumwank 6:18). Naxnaw ajwi’ k’a’ chi yale’k taachalq moqon sa’ li qayu’am. K’a’ru nakataw sa’ li na’leb’ kixk’e a’an re laj Jose ut laj Oliver sa’ Tzol’leb’ ut Sumwank 6:18–21, 29–37 li nakatxtenq’a chixkab’ankil aawib’ sa’ ruq’ a’an?

K’a’ru naraj naxye “ilok wan wi’ li Kristo sa’ li junjunq k’oxlahom”? (raqal 36). Chan ru naru nab’aanuman a’in chi kok’ aj xsa’ chik—chiruheb’ li hoonal ut “jo’k’ihal li ch’a’ajkilal”? K’oxlan chirix li na’leb’ kixk’e li Awa’b’ej Russell M. Nelson: “Q’axal ch’a’aj sa’ k’a’uxlej xyalb’al qaq’e chi ilok rik’in li Kolonel sa’ chixjunileb’ li qak’a’uxl. A’b’an naq taqab’aanu, taa’eeleliq li qaxiw ut li nawiib’an wi’ qach’ool” (“Roksinkil lix wankil li Jesukristo sa’ li qayu’am,” Jolomil chʼutubʼaj-ibʼ re mayo 2017).

Chi’ilmanq ajwi’ Neil L. Andersen, “Lin k’a’uxl kixchap rib’ rik’in li na’leb’ a’in chirix li Jesukristo,” Jolomil ch’utub’aj-ib’ re abril 2023.

Jalam-uuch re K’e reetal li wuq’, xb’aan laj Jeffrey Ward

Tzol’leb’ ut Sumwank 6:29–37

“Meexuwa xb’aanunkil li chaab’il.”

K’a’ut naq wan hoonal naq “naqaxuwa … xb’aanunkil li chaab’il”? (raqal 33). K’a’ru nakataw sa’ Tzol’leb’ ut Sumwank 6:29–37 li naxk’e xkawil aach’ool re xb’aanunkil li us? Naru nakab’icha malaj nakawab’i jun li b’ich li tixwaklesi aach’ool chixkawob’resinkil aach’ool chirix li Kristo, jo’ “Saʼ xkʼanjel li Dios chiqayal tzʼaqal qaqʼe” (Eb’ li B’ich, 155).

Tzol’leb’ ut Sumwank 6–7; 9:3, 7–14

“Jo’ chanru ajwi’ nakawaj wik’in, jo’kan taa’uxq aawe.”

K’e reetal jarub’ sut wankeb’ li aatin jo’ “ajok” malaj “ajom” sa’eb’ li tasal 6 ut 7. K’a’ru nakatzol sa’eb’ li tasal a’in chirix lix aajelil ru laa wajom sa’ rilob’aal li Dios? Paatz’ aawib’ li kixpatz’ li Qaawa’ sa’ Tzol’leb’ ut Sumwank 7:1: “K’a’ru nakawaj?”

Jun reheb’ li rajom xch’ool laj Oliver Cowdery tiik ru—re jaltesink ru aatin jo’ naxb’aanu laj Jose Smith—ink’a’ kitz’aqlok ru. Naq nakawil Tzol’leb’ ut Sumwank 9:3, 7–14, k’a’ru li musiq’anb’il na’leb’ nakak’ul li maare tatxtenq’a naq ink’a’ neke’tz’aqlok ru laa wajom tiikeb’ ru?

Chi’ilmanq ajwi’ Tzol’leb’ ut Sumwank 11:8; Dallin H. Oaks, “El deseo,” Liahona, mayo 2011, 42–45.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 6:5, 15–16, 22–23; 8:2; 9:7–9

Li qaChoxahil Yuwa’ nikinraatina rik’in li Santil Musiq’ej.

• Li yaal kixtzol laj Oliver Cowdery chirix li k’utb’esinb’il na’leb’ naru naxtenq’aheb’ laa kok’al chixchaab’ilob’resinkil lix seeb’aleb’ chixk’eeb’al reetal li Santil Musiq’ej. Naru nakawoksi “Ch’ol 5: Laj Jose Smith ut laj Oliver Cowdery” (sa’ Eb’ li Esilal sa’ li Tzol’leb’ ut Sumwank, 22–25, malaj li video sa’ li Biblioteca del Evangelio) re raatinankileb’ chirix laj Oliver ut li k’a’ru kixtzol. Wotzomaq cherib’il eerib’ k’a’ru nawulak cheru sa’ li seraq’. Naq taab’aanu a’an, ch’olob’ k’a’ru kixk’ut li Qaawa’ chiru laj Oliver chirix chan ru rab’inkil xyaab’ xkux li Dios ut ileb’ li raqal aajeleb’ ru, jo’ Tzol’leb’ ut Sumwank 6:23 malaj 9:7–9.

  The Lord Sends Oliver Cowdery: Learning about how God speaks to us

  

  Laj Oliver Cowdery kitzolok chirix li k’utb’esinb’il na’leb’ naq yoo chixtenq’ankil laj Jose Smith chixjaltesinkil ru lix Hu laj Mormon.

• Naru ajwi’ nakapatz’ reheb’ laa kok’al chixch’e’b’aleb’ lix jolom ut lix maqab’eb’ naq taawileb’ li aatin “k’a’uxl” ut “ch’ool” sa’ Tzol’leb’ ut Sumwank 8:2. Ye reheb’ laa kok’al, jo’ aawilom laa’at, chan ru na’aatinak li Musiq’ej sa’ laa k’a’uxl ut sa’ laa ch’ool. Tenq’aheb’ chixtawb’al xsumenkil li patz’om “Chan ru nokoraatina li Santil Musiq’ej?” sa’eb’ li raqal a’in: Tzol’leb’ ut Sumwank 6:15–16, 22–23; 8:2; 9:7–9.

Oksiheb’ li seraq’. Eb’ li seraq’ neke’xtenq’aheb’ li kok’al chixtawb’aleb’ ru li na’leb’ re li evangelio xb’aan naq neke’xk’ut chan ru naq eb’ li kristiaan neke’xyu’ami li na’leb’ a’an. Naq yooqat chi k’utuk, sik’ chan ru taawoksiheb’ li seraq’—li wankeb’ sa’eb’ li loq’laj hu, sa’ li resilal li Iglees, malaj re laa yu’am laa’at—li neke’xk’utb’esi li na’leb’ neke’tawman sa’eb’ li loq’laj hu.

Tzol’leb’ ut Sumwank 6:34

Sa’ xk’ab’a’ li Jesukristo, ink’a’ “tinxuwaq.”

• Li Qaawa’ kixye re laj Jose ut laj Oliver, “Mexxuwak, ex ch’ina teep inkarneer” (Tzol’leb’ ut Sumwank 6:34). Naru nakapatz’ reheb’ laa kok’al naq te’xka’suti li ch’ol aatin a’an k’iila sut. Naru ajwi’ neke’saho’ xch’ool chixk’oxlankil naq a’aneb’ jun ch’uut chi karneer li te’xuwaq. K’a’ raj ru li naru neke’xxuwa li karneer? Chirix a’an, laa’at ut eb’ laa kok’al naru nekeril jun xjalam-uuch li Kolonel jo’ jun aj ilol karneer (wan jun sa’ xraqik li perel a’in) ut teeye chan ru naq a’an jo’ aj ilol xul, nokoril jo’ lix karneer.

• Naru nekerab’i malaj nekeb’icha jun li b’ich chirix xtawb’al xkawil qach’ool rik’in li Kristo, jo’ “Sik’ xb’aanunkil li tiikilal” (B’ichleb’aal choq’ reheb’ li Kok’al, 80) malaj “Sa’ xk’anjel li Dios chiqayal tz’aqal qaq’e; (Eb’ li B’ich, 155). K’a’ru naxk’ut li b’ich chirix chan ru naq li Kolonel nokoxtenq’a chixtz’eqtaanankil li qaxiw?

Tzol’leb’ ut Sumwank 6:36

Naru nin’ilok wan wi’ li Jesukristo sa’ chixjunil lin k’oxlahom.

• Chirix rilb’al Tzol’leb’ ut Sumwank 6:36, laa’at ut eb’ laa kok’al naru neke’xyiib’ jalam-uuch li te’tenq’anq reheb’ chixjultikankil “ilok wan wi’ li [Jesukristo] sa’ li junjunq k’oxlahom.” Chewotz lee jalam-uucheb’ cherib’il eerib’ ut tenq’aheb’ laa kok’al chixk’oxlankil b’ar naru neke’xk’e li jalam-uuch re naq te’ril chi kok’ aj xsa’.

Re xtawb’al xkomon chik li na’leb’, chi’ilmanq li hu Amigos re li po a’in.

Li Qaawa’ a’an aj Ilol we, xb’aan laj Yongsung Kim