“Li Qaawa’ naxtaqla laj Oliver Cowdery,” Eb’ li Seraq’ sa’ li Tzol’leb’ ut Sumwank (2024)

“Li Qaawa’ naxtaqla laj Oliver Cowdery,” Eb’ li Seraq’ sa’ li Tzol’leb’ ut Sumwank

1828–1829

Li Qaawa’ naxtaqla laj Oliver Cowdery

Xtzolb’al chan ru nokoraatina li Dios

Laj Jose ut xEmma Smith neke’k’anjelak chire li rochoch.

Laj Jose ut xEmma toj ke’xjaltesi ru lix Hu laj Mormon. Kaw li k’anjel, ut tento ajwi’ ke’k’anjelak sa’ li rawimqeb’. Laj Jose kitijok re naq li qaChoxahil Yuwa’ tixtaqla chaq anihaq chixtenq’ankil sa’ xjaltesinkil ru lix Hu laj Mormon.

Santos, 1:56, 58

Laj Oliver Cowdery naxtoch’ lix kampaanil jun li eskweel.

Chi najt chaq, aran Nueva York, laj Oliver Cowdery, jun li saaj aj k’utunel sa’ eskweel, kiwan sa’ rochocheb’ lix na’ xyuwa’ laj Jose Smith. Laj Oliver kixtzoleb’ li ras ut eb’ li ranab’ laj Jose.

Santos, 1:58–59

Laj Oliver Cowdery chunchu chixk’atq jun li tz’ab’b’il xam ut na’aatinak rik’ineb’ lix na’ xyuwa’ laj Jose Smith.

Laj Oliver kirab’i resil laj Jose ut li perel ch’iich’ oor. Kiwakli xk’a’uxl chirix a’an. Ki’aatinak rik’ineb’ lix na’ xyuwa’ laj Jose. Ke’xye re laj Oliver naq laj Jose yoo chixb’aanunkil lix k’anjel li Dios.

Santos, 1:59

Laj Oliver Cowdery wiq’wo chixk’atq lix ch’aat ut yoo chi tijok re xtawb’al xkomon xna’leb’ chirix laj Jose Smith.

Anajwan laj Oliver kiwakli wi’chik chi us xk’a’uxl. Eb’ lix na’ xyuwa’ laj Jose ke’xye re laj Oliver naq tento taatijoq ut tixsik’ xnawb’al xjunes rib’ ma’ a’an xk’anjel li Dios. Jo’kan naq, sa’ jun q’ojyin, laj Oliver kitijok chi anchal xch’ool. Li Dios kixk’e tuqtuukilal sa’ xk’a’uxl. Laj Oliver kixnaw naq laj Jose Smith a’an jun xmoos li Dios. Kireek’a naq tento tixtenq’a laj Jose.

Santos, 1:60

Laj Oliver Cowdery ut laj Jose Smith chunchuukeb’ chixk’at jun tz’ab’b’il xam. Li xEmma naxchap sa’ ruq’ junjunq li hu kitz’iib’aman.

Naq kiraqe’ li tzolok chiru li chihab’, laj Oliver kixnaw ru laj Jose ut xEmma. Laj Jose ut laj Oliver ke’kana chi aj-o toj najt q’ojyin chi aatinak chirixeb’ li perpookil ch’iich’ oor ut chirix lix k’anjel li Dios.

Santos, 1:60

Laj Oliver Cowdery natz’iib’ak chiru jun perel re li hu kitz’iib’aman chaq.

Laj Oliver kixye naq a’an taatz’iib’aq naq laj Jose naxjaltesi ru. Jwal nawulak chiru li k’a’ru yoo chixtzolb’al chirix li Jesus. Kiwan ajwi’ xpatz’om ut naraj naq taakawuuq lix paab’aal.

Santos, 1:61

Laj Oliver Cowdery ut laj Jose Smith chunchuukeb’ chixk’atq jun ventaan.

Rik’in li profeet aj Jose, li Qaawa’ kixk’e jun esil re laj Oliver. Kixye re laj Oliver naq tixjultika li q’ojyin naq kitijok. Li Dios kixk’e xtuqtuukilal. Ka’ajwi’ li Dios kinawok re lix tij a’an. Lix paab’aal laj Oliver kikawu chi us. Kikana chixtenq’ankil laj Jose, ut li Qaawa’ kixk’ut naab’al li na’leb’ chiru chirix chan ru nokoraatina li Dios.

Tzol’leb’ ut Sumwank 6:14–24; 8:1–3; 9:7–9; Santos, 1:62–64