“Laj Martin Harris naxtenq’a laj Jose,” Eb’ li Seraq’ sa’ li Tzol’leb’ ut Sumwank (2024)

“Laj Martin Harris naxtenq’a laj Jose,” Eb’ li Seraq’ sa’ li Tzol’leb’ ut Sumwank

1828–1829

Laj Martin Harris naxtenq’a laj Jose

Xtzolb’al xkanab’ankil qib’ sa’ ruq’ li Qaawa’

Laj Martin Harris ut li rixaqil neke’xk’e xsahil xch’ool laj Jose ut li xEmma Smith.

Sa’ jun kutan, naq laj Jose ut xEma wankeb’ aran Pensilvania, jun ramiiweb’ aj Martin Harris xk’ab’a’ kiwulak chirula’aninkileb’. Laj Martin a’an aj eechal re jun li nimla ch’och’ aran Nueva York. A’an kixnaw li k’anjel yoo chixb’aanunkil laj Jose rik’in li perel ch’iich’ oor. Ak kixtenq’a chaq laj Jose ut anajwan kiraj xnawb’al chan chik ru naru naxtenq’a a’an.

Santos, 1:49

Xjalam-uuch laj Martin Harris. Xaqxo sa’ xna’aj li k’ub’leb’aal sa’ rochoch laj Jose ut li xEmma Smith.

Laj Jose ut li xEmma wankeb’ xb’antioxihom. Naab’aleb’ li kristiaan ke’xk’oxla naq laj Jose yoo chi tik’ti’ik. Us naq wan chaq jun xchaab’il amiiw jo’ laj Martin li naxpaab’ naq tz’aqal wankeb’ li perel ch’iich’ oor.

Santos, 1:49

Laj Jose ut li xEmma Smith sa’ li rochocheb’ rochb’eeneb’ laj Martin Harris. Laj Jose ut laj Martin neke’xchap sa’ ruq’eb’ junjunq perel reheb’ li tz’iib’ahom.

Naq laj Jose yoo chixjaltesinkil ru li perel ch’iich’, laj Martin naxtz’iib’a li k’a’ru naxye. Laj Martin sa xch’ool chixtenq’ankil li Qaawa’ sa’ li nimla k’anjel a’in.

Santos, 1:50

Laj Martin ut xLucy Harris neke’wech’in chiruheb’ lix b’eleb’aal kelonb’il xb’aan kawaay.

Li xLucy, li rixaqil laj Martin, moko sa ta xch’ool. A’an ink’a’ naxpaab’ naq wan ta li perel ch’iich’ oor rik’in laj Jose. A’an naxk’oxla naq laj Jose yoo chixb’alaq’inkil laj Martin. A’an kiraj naq taasutq’iiq laj Martin aran Nueva York ut tixkanab’ xtenq’ankil laj Jose.

Santos, 1:49–50

Laj Jose Smith naxchap sa’ ruq’ jun perel li tz’iib’ahom. Laj Martin Harris naxpatz’ re laj Jose naq tixto’oni li tz’iib’ahom re, re naq tixk’ut chiru li rixaqil.

A’b’an laj Martin moko kixkanab’ ta k’anjelak rik’in laj Jose. Kixk’oxla naq wi li xLucy taaril li k’a’ru yookeb’ wi’ chi k’anjelak, tixpaab’ ajwi’ a’an. Kixpatz’ re laj Jose ma naru tixk’ameb’ aran Nueva York li perel ke’xjaltesi ru re naq tixk’ut chiru li rixaqil. Laj Jose kixye naq taatijoq ut tixpatz’ re li Dios.

Santos, 1:50–51

Laj Jose Smith natijok re xpatz’b’al re li Dios ma naru naq laj Martin Harris tixto’oni li tz’iib’ahom.

Li Dios kixye re laj Jose naq ink’a’ tixkanab’ laj Martin chixk’amb’aleb’ li perel. Laj Martin kixpatz’ re laj Jose naq taatijoq wi’chik. Laj Jose kitijok ut a’an ajwi’ li sumehom kixk’ul. A’b’an laj Martin tz’aqal kiraj xk’utb’aleb’ li perel chiru li rixaqil, ut laj Jose kiraj xtenq’ankil li ramiiw. Laj Jose kitijok rox sut. Sa’ li hoonal chik a’in, li Dios kixye re laj Jose naq a’an naru naxsik’ ru k’a’ru tixb’aanu.

Santos, 1:51

Laj Martin Harris naxchapeb’ sa’ ruq’ li tz’iib’ahom. Laj Jose Smith chi ixb’ej, yoo xk’a’uxl.

Laj Jose kixye re laj Martin naq naru tixk’ameb’ li hu aran Nueva York, a’b’an ka’ajwi’ naru naxk’ut chiruheb’ junjunq li komon sa’ lix junkab’al. Ut tento tixk’am chaq li hu chiru wiib’ xamaan. Laj Martin kixk’ulub’a ru a’an ut kixk’ameb’ li perel hu.

Santos, 1:51

Laj Jose Smith wiq’wo chixk’atq lix muqleb’aal lix k’uula’al kikam.

Naq laj Martin maak’a’ aran, kiyo’la jun xk’uula’al laj Jose ut li xEmma. A’b’an li k’uula’al kikam ut kiyajer li xEmma. Li xEmma ut laj Jose q’axal ke’raho’ xch’ool.

Santos, 1:51–52

Laj Jose yoo xk’a’uxl chirix li xEmma. Yoo ajwi’ xk’a’uxl chirix laj Martin. Ke’nume’ wiib’ xamaan ut laj Martin toj maji’ nasutq’i chaq. Yoo ajwi’ xk’a’uxl li xEmma.

Santos, 1:52

Laj Martin Harrix chunchu chire li meex, yoo chi aatinak rik’in laj Jose Smith ut eb’ lix na’ xyuwa’.

Li xEmma kixye re laj Jose naq taaxik raj aran Nueva York chixsik’b’al laj Martin. Laj Jose koxixtaw laj Martin sa’ rochoch lix na’ xyuwa’. Naq laj Jose kixpatz’eb’ li perel hu re laj Martin, laj Martin kiraho’ xch’ool. Kixye naq ke’sach li perel hu. Kixsik’ yalaq b’ar a’b’an ink’a’ kiru chixtawb’aleb’.

Santos, 1:52–53

Laj Jose kiraho’ xch’ool ut ki’ok xxiw. Kixnaw naq ink’a’ us li kixb’aan naq kixkanab’ laj Martin chixk’amb’aleb’ li perel. Kisutq’i sa’ kab’l ut kixseraq’i re li xEmma li kik’ulman. Li anjel Moroni kik’ulun ut kixk’am li perel ch’iich oor. Kixye naq wi laj Jose naxtuulanob’resi xch’ool ut naxjal xk’a’uxl, taaruuq wi’chik chixk’ulb’al li perel ch’iich ut chixjaltesinkil wi’chik ru.

Tzol’leb’ ut Sumwank 3:5–11; 10:1–3; Santos, 1:53–54

Laj Jose Smith wiq’wo chixk’atq lix ch’aat, yoo chixpatz’b’al xkuyb’al xmaak chiru li Dios.

Chiru k’iila xamaan, laj Jose kik’oxlak chirix li k’a’ru ink’a’ us kixb’aanu. Kitijok ut kixpatz’ xkuyb’al xmaak. Li Dios kixkuy xmaak. Kixye re laj Jose naq eb’ li perel ke’elq’aak xb’aaneb’ kristiaan li yookeb’ chixyalb’al xq’e chixramb’al lix k’anjel li Dios. A’b’an maa’ani naru chi ramok re lix k’anjel li Dios. Kiwan jun xk’uub’anb’il na’leb’ li Dios re xk’eeb’al lix k’anjel chi xik chi uub’ej.

Tzol’leb’ ut Sumwank 3:1–10; Santos, 1:54–55

Laj Jose ut li xEmma Smith neke’aatinak rik’in laj Martin Harris. Laj Jose naxk’e li ruq’ re laj Martin Harris.

Laj Moroni kixsutq’isi li perel ch’iich’ re laj Jose. Li Dios kixye re laj Jose ut re laj Martin naq wi tuulaneb’ xch’ool ut neke’xkanab’ rib’ sa’ ruq’ a’an, toj naru te’tenq’anq sa’ lix k’anjel a’an chi k’iila paay ru. Naru te’tenq’anq chixk’amb’al lix Hu laj Mormon chiru li ruchich’och’. Li hu a’in tixtenq’aheb’ raj li kristiaan yalaq ta b’ar chixjalb’al xk’a’uxleb’ ut chixpaab’ankil li Jesukristo.

Tzol’leb’ ut Sumwank 3:16–20; 5:21–35; Santos, 1:56–57