Laj Jose ut li xEmma

K’anjelak sa’ junajil re xk’amb’al lix Hu laj Mormon sa’ chixjunil li ruchich’och’

Li xEmma Hale chunchu chixk’atq jun nima’ nach’ rik’in li rochoch.

Li xEmma Hale kik’i sa’ jun nimla junkab’al aran Pennsilvania, nach’ rik’in Nueva York, b’ar wi’ kiwan laj Jose Smith. Li xEmma ut lix junkab’al neke’xpaab’ li Dios. Li xEmma nawulak chiru li ilok ru hu, b’ichank, b’eek sa’ xb’een kawaay, ut xik sa’ kayuuk sa’ li nima’ nach’ rik’in li rochoch.

Santos, 1:31–32

Laj Jose Smith ut lix yuwa’ neke’b’eek wan wi’ li rochoch li xEmma Hale. Li xEmma ki’ilok chiru li ventaan ut kiril laj Jose.

Naq li xEmma wan chaq 21 chihab’ re, laj Jose Smith ut lix yuwa’ ke’wulak chi trab’ajik rik’ineb’ li rech kab’al xEmma. Lix yuwa’ li xEmma kixb’oqeb’ chi kanaak sa’ li rochoch.

Jose Smith—Resilal 1:56–57; Santos, 1:31–32

Laj Jose ut li xEmma neke’aatinak chirix rochoch li xEmma. Lix na’ xyuwa’ li xEmma wankeb’ sa’ li okeb’aal.

Laj Jose ut li xEmma ke’xnaw ru chirib’ileb’ rib’. Ke’wulak chiru wank sa’ junajil. A’b’an eb’ lix na’ xyuwa’ xEmma ink’a’ neke’xk’ul ru laj Jose. Ink’a’ neke’xpaab’ naq kiril jun li anjel.

Santos, 1:32–33

Li xEmma ut laj Jose Smith wankeb’ sa’ jun b’eleb’aal kelonb’il xb’aan kawaay.

Maare jun chihab’ chik chirix, laj Jose kixpatz’ re li xEmma naq taasumlaaq rik’in. Li xEmma ut laj Jose neke’xra rib’. Ke’sumla ut ke’nume’ chi wank sa’ rochoch lix na’ xyuwa’ laj Jose aran Nueva York.

Jose Smith—Resilal 1:57–58; Santos, 1:34–35

Li xEmma ut laj Jose Smith sa’ jun b’eleb’aal kelonb’il xb’aan kawaay sa’ li k’iche’.

Ak kinume’ kaahib’ chihab’ naq laj Moroni kiraatina laj Jose chirix li perel ch’iich’ oor. Naq kiwulak li hoonal, li xEmma ut laj Jose koxe’okaq sa’ li tzuul b’ar wi’ muqmuukeb’ li perel ch’iich’.

Jose Smith—Resilal 1:59; Santos, 1:36–37

Laj Moroni naxq’axtesi li perel ch’iich’ oor re laj Jose Smith.

Li anjel Moroni kixtaw laj Jose sa’ li tzuul ut kixq’axtesi li perel ch’iich’ re. Kixye re laj Jose naq wi tixyal xq’e chixkolb’al rix li perel ch’iich’, kolb’ilaq ajwi’ rix a’an.

Jose Smith—Resilal 1:59; Santos, 1:37–38

Laj Jose Smith naxk’am li perel ch’iich’ oor. Jun li winq naxtaaqe a’an ut naxyal xmaq’b’al li perel ch’iich’.

Li kristiaan ke’rab’i resil naq rik’in laj Jose wankeb’ li perel ch’iich’ oor ut wankeb’ li ke’yalok relq’ankil. Laj Jose tento naq kixsik’ b’ar tixmuq. Naq laj Jose naxk’ameb’ li perel ch’iich sa’ jun muqleb’aal sa’ li k’iche’, kitawasiik xb’aaneb’ jun siir li winq. Kinumta sa’ xb’eeneb’ ut ki’aalinak toj sa’ li rochoch lix na’ xyuwa’.

Jose Smith—Resilal 1:60; Santos, 1:38, 40–41

Laj Jose Smith naxk’am li perel ch’iich oor sa’ li rochoch ut naxkanab’eb’ lix junkab’al chixch’e’b’al.

Naq laj Jose kixk’am li perel ch’iich’ sa’ li rochoch, li ranab’ kixtenq’a a’an chixk’eeb’al chiru li meex. Laj Moroni kixye re laj Jose naq maa’ani aj chi-u tixk’ut li perel ch’iich’, a’b’an lix junkab’al naru neke’xch’e’ naq wanqeb’ chi lanlo.

Santos, 1:41

Li xEmma ut laj Jose neke’xjal li rochoch.

Li Dios kiraj naq laj Jose tixjaltesi ru li perel ch’iich’ oor re naq eb’ li kristiaan te’ruuq chirilb’al. A’b’an eb’ li kristiaan aran Nueva York yookeb’ chixyalb’al relq’ankil li perel ch’iich’. Laj Jose tento naq kixmuq li perel ch’iich’ re xkolb’al rix. Jo’kan naq laj Jose ut li xEmma ke’nume’ chi wank sa’ jun ochoch nach’ rik’ineb’ lix na’ xyuwa’ li xEmma. Ke’xyo’oni xjaltesinkil ru li perel ch’iich’ sa’ tuqtuukilal.

Jose Smith—Resilal 1:61–62; Santos, 1:43, 45–46

Laj Jose Smith naxtz’ub’ xpeekem li xEmma. A’an naxtenq’a chixjaltesinkil ru li perel ch’iich’ oor.

Laj Jose kixtikib’ xjaltesinkil ru li perel ch’iich’. Kiroksi li k’anjeleb’aal kixkawresi li Dios re xtenq’ankil. Naq laj Jose yoo chi jaltesink, li xEmma naxtz’iib’a li k’a’ru naxye a’an. Ke’k’anjelak sa’ wiib’al chiru k’iila hoor. Kisach xch’ool li xEmma. Kixnaw naq lix b’eelom najaltesin rik’in xwankil li Dios.

Jose Smith—Resilal 1:35; Santos, 1:49