1823

Li anjel Moroni narula’ani laj Jose Smith

Tzolok chirix jun hu loq’

Ak xnume’ oxib’ chihab’ chalen li Xb’een K’utb’esink re laj Jose Smith. Laj Jose ra nareek’a xb’aan li sachk kixk’ul chalen chaq li hoonal a’an. Naxpatz’ rib’ k’a’ ta wi’ ru naxk’oxla li Dios chirix a’an.

Jose Smith—Resilal 1:28–29; Santos, 1:20

Sa’ jun q’ojyin, chirix naq chixjunileb’ ak xe’war, laj Jose kitijok. Li Dios ak kixsumeheb’ chaq lix tij rub’elaj a’an, ut laj Jose kixnaw naq tixsume wi’chik.

Jose Smith—Resilal 1:29; Santos, 1:21–22

Naq laj Jose yoo chi tijok, li saqen kixnujob’resi lix warib’aal. Laj Jose kiril jun li anjel xaqxo chi kutankil chixk’atq lix ch’aat. Li anjel kixye naq a’an laj Moroni xk’ab’a’. Kitaqlaak xb’aan li Dios. Kixye naq li Dios kixkuy xmaak laj Jose ut naq wan jun k’anjel choq’ re a’an. Eb’ li kristiaan sa’ chixjunil li ruchich’och’ te’xnaw ru laj Jose ut li k’anjel xk’e li Dios re a’an.

Jose Smith—Resilal 1:30–33

Laj Moroni kixye naq wan jun siir li perel ch’iich’ oor. Muqmu sa’ jun li tzuul nach’ rik’in li rochoch laj Jose. Li hu naxye resileb’ li kristiaan ke’wan najter sa’ li ch’och’ America. Ke’xnaw resil li Jesukristo ut lix evangelio. Laj Moroni kixye naq li Dios tixtenq’a laj Jose chixjaltesinkil ru li hu re naq eb’ li kristiaan te’ruuq chirilb’al.

Jose Smith—Resilal 1:34, 46

Laj Moroni oxib’ sut kirula’ani chiru li q’ojyin a’an ut wulajaq ajwi’. Laj Jose kixseraq’i re lix yuwa’ li k’a’ru kiril. Lix yuwa’ laj Jose kisaho’ xch’ool. “A’an jun xk’utb’esinb’il na’leb’ li Dios,” chan re laj Jose.

Jose Smith—Resilal 1:35–50; Santos, 1:22–25

Laj Jose kiwulak sa’ li tzuul ut kixtaw li perel ch’iich’ oor rub’el jun li nimla pek. Naq yoo chixchapb’al a’an, kixk’oxla jo’nimal ta raj wi’ xtz’aq. Laj Moroni kik’ulun ut kixye re laj Jose naq moko kawresinb’il ta re naq tixk’am raj li perel ch’iich’. Kixye re laj Jose naq taasutq’iiq sa’ li na’ajej a’an rajlal chihab’ toj reetal naq kawresinb’ilaq.

Jose Smith—Resilal 1:51–54; Santos, 1:25–27