“Li Xbʼeen Kʼutbʼesink re laj Jose Smith,” Eb’ li Seraq’ sa’ li Tzol’leb’ ut Sumwank (2024)

“Li Xbʼeen Kʼutbʼesink re laj Jose Smith,” Eb’ li Seraq’ sa’ li Tzol’leb’ ut Sumwank

1817–1820

Li Xbʼeen Kʼutbʼesink re laj Jose Smith

Xsumenkil jun tuulanil tij

Laj Jose Smith narab’iheb’ li kristiaan li neke’aatinak chirix li jalan jalanq chi paab’aal.

Sa’ li na’ajej wankeb’ wi’ lix junkab’al laj Jose Smith, wankeb’ naab’al li iglees li neke’k’utuk chirix li Jesukristo. Jalan jalanq li neke’xk’ut chirix a’an. Laj Jose ink’a’ naxnaw ani li ch’olch’o naxye. Kixnaw naq naraj ru li Kolonel, a’b’an ink’a’ naxnaw b’ar wan li iglees tento taa’ok wi’.

Jose Smith—Resilal 1:5–6; Santos, 1:9

Laj Jose Smith nak’anjelak sa’ lix ch’och’.

Laj Jose kik’oxlak chirix a’an chiru naab’al li hoonal. Kiraj naq taakuye’q lix maak. Kiwulak sa’ naab’aal li iglees, a’b’an toj nareek’a naq sachso xna’leb’.

Jose Smith—Resilal 1:8–10; Santos, 1:9–12

Laj Jose Smith naril li Santil Hu rik’in xsaqen jun li kandeel.

Sa’ jun kutan, laj Jose kiril Santiago 1:5 sa’ li Santil Hu. B’ar wi’ naxye naq wi naqaj qana’leb’, naru naqapatz’ re li Dios. Laj Jose kixnaw sa’ li raam naq a’an li k’a’ru tento tixb’aanu.

Jose Smith—Resilal 1:11–13

Laj Jose Smith nab’eek sa’ li k’iche’ li wan nach’ rik’in li rochoch re taatijoq.

Sa’ jun xchaq’al ru kutan eq’la sa’ xtiklajik rub’elaj li saq’ehil sa’ 1820, laj Jose kixsik’ ru xik sa’ li k’iche’ nach’ rik’in li rochoch. Kiraj wank sa’ jun na’ajej b’ar wi’ taawanq xjunes re tijok chiru li qaChoxahil Yuwa’.

Jose Smith—Resilal 1:14–15

Laj Jose kixwiq’ib’ rib’ ut kixtikib’ tijok. Naq kixb’aanu a’an, kireek’a jun yib’ aj wankilal li nachapok re. Kireek’a naq kiq’ojyino’ ru lix sutam. Chanchan naq wan ani yoo chi ramok re naq ink’a’ taa’aatinaq rik’in li Dios. Laj Jose rik’in xmetz’ew kixyal xq’e chixpatz’b’al re li Dios naq tixkol a’an.

Jose Smith—Resilal 1:15–16.

Li qaChoxahil Yuwaʼ ut li Jesukristo keʼxkʼut ribʼ chiru laj Jose Smith. Naxwiq’ib’ rib’ chiruheb’ a’an.

Sa’ junpaat, laj Jose kiril jun xchaq’al ru saqen li jwal lemtz’ li nakub’e chaq sa’ choxa. Ki’el li q’ojyin ut kireek’a tuqtuukilal. Sa’ li saqen, laj Jose kiril li qaChoxahil Yuwa’ ut li Jesukristo chi xaqxookeb’ chi kutankil. Li qaChoxahil Yuwa’ kixye xk’ab’a’ laj Jose. Chirix a’an kixk’ut chi ruq’ li Jesus ut kixye, “A’an a’in li Walal Raaro Inb’aan. Chawab’i a’an!”

Jose Smith—Resilal 1:16–17

Li Jesus naxye re laj Jose Smith naq kuyb’ileb’ lix maak.

Li Qaawa’ kixye re laj Jose naq kuyb’ileb’ lix maak. Laj Jose kixpatz’ re li Jesus b’arwan reheb’ li jar ch’uut chi paab’aal tixjunaji wi’ rib’. Li Jesus kixye naq maajun reheb’ a’an tixjunaji wi’ rib’.

Jose Smith—Resilal 1:18–19; Santos, 1:16

Laj Jose Smith, chi wiq’wo sa’ li k’iche’, narab’i li Kolonel.

Li Jesus kixye naq li aajelil ruhil yaal sa’ lix evangelio ke’sach. Kixye naq tixtaqlaheb’ chaq li anjel re naq te’xk’uteb’ li yaal a’an chiru laj Jose ut tixwotz a’an sa’ li ruchich’och’.

Santos, 1:16–17

Laj Jose Smith na’el chaq sa’ li k’iche’ re xik sa’ li rochoch.

Naq kiraqe’ li k’utb’esink, laj Jose kinujak rik’in rahok ut sahilal. Moko sachso ta chik xna’leb’. A’an kixnaw naq narahe’ xb’aan li Dios. Us ta junjunqeb’ li kristiaan xik’ ke’ril xb’aan naq kixye naq kiril li qaChoxahil Yuwa’ ut li Jesukristo, laj Jose naxnaw naq yaal.

Jose Smith—Resilal 1:20–26; Santos, 1:16