Lix junkab’al laj Jose Smith

Jun junkab’al wan xpaab’aal

Laj Jose Smith ut lix junkab’al neke’trab’ajik sa’ junajil sa’ li rawimqeb’.

Laj Jose Smith kiyo’la sa’ li 23 re diciembre re 1805 sa’ xtz’e rokeb’aal li saq’e aran Estados Unidos. Lix yuwa’ laj Jose a’an ajwi’ aj Jose xk’ab’a’. Li xLucy xk’ab’a’ lix na’. Naab’aleb’ li ras, riitz’in, ut ranab’. Lix junkab’al laj Jose neke’k’anjelak sa’ li pim. Neke’xpaab’ li Dios ut neke’xra rib’ chirib’ileb’ rib’.

Jose Smith—Resilal 1:3–4

Laj Jose naq ch’ina al chaq. Lix tz’e a’ lanb’il ru. Lix na’ yoo xk’a’uxl chirix a’an.

Naq ch’ina al chaq laj Jose, kiwan jun xyajel li kixk’e xch’a’ajkilal li ra’. Ra kixk’ul a’an. Lix junkab’al laj Jose kixyal xtenq’ankil re naq taa’usaaq, a’b’an toj ra chi us li ra’. Eb’ laj b’anonel ke’xyal xq’e chixk’irtesinkil, a’b’an moko ke’ru ta.

Santos, 1:7

Laj Jose chiru lix ch’aat. Li ras naxwiq’ib’ rib’ chixk’atq li ch’aat. Lix na’ na’aatinak rik’in laj b’anonel chi ixb’ej.

Eb’ laj b’anonel ke’xye naq tento naq te’xset li ra’ laj Jose re xkolb’al lix yu’am. A’b’an lix na’ ink’a’ kiraj a’an. Kixpatz’ ma maak’a’ k’a’ru chik naru neke’xb’aanu re xtenq’ankil laj Jose. Eb’ laj b’anonel ke’xk’uub’ naq te’xset xcha’al lix b’aqel li ra’. Laj Jose kixnaw naq rahaq a’an, a’b’an naxpaab’ naq taatenq’aaq xb’aan li Dios.

Santos, 1:7

Laj b’anonel naxyeechi’i alcohol re laj Jose re naq tixkuy xmay xsetb’al lix b’aqel. Laj Jose ink’a’ kiraj. Lix yuwa’ naxchap a’an.

Eb’ laj b’anonel ke’raj xk’eeb’al li alcohol chiruk’ laj Jose re xwartesinkil li rahilal. A’b’an laj Jose ink’a’ kiraj. Ka’ajwi’ kiraj naq taachape’q xb’aan lix yuwa’.

Santos, 1:7

Lix na’ laj Jose Smith na’el sa’ li warib’aal naq laj b’anonel naxkawresi rib’ re xb’aanunkil li cho’ok.

Laj Jose kixpatz’ re lix na’ naq taa’elq. Ink’a’ kiraj naq taa’ile’q xb’aan lix na’ rik’in xnimal li rahilal naq eb’ laj b’anonel neke’xset xb’aqel li ra’.

Jun aj b’anonel naxcho’ li ra laj Jose Smith. Lix yuwa’ naxchap a’an re xtenq’ankil.

Lix yuwa’ laj Jose kixchap a’an naq eb’ laj b’anonel ke’xset xcha’al lix b’aqel li ra’ li wan xyajel. K’a’jo’ xrahil a’an, a’b’an li Dios kixtenq’a laj Jose chi wank chi kaw. Chirix junjunq chihab’, li ra’ laj Jose ki’ok chi k’iraak, a’b’an toj maji’ naru chi b’eek chi us.

Santos, 1:6–7

Laj Jose Smith ut lix junkab’al aran Nueva York. Neke’k’anjelak sa’ risinkil xya’al li che’.

Naq nim chik laj Jose, lix junkab’al kiq’axon toj sa’ li estado Nueva York. Neb’a’ lix junkab’al laj Jose. Kaw neke’k’anjelak re xtawb’al xtzakemq lix junkab’aleb’. Chaab’il xch’ool laj Jose. Sa xch’ool ut sa naril li se’ek ut li b’atz’unk.

Santos, 1:5–9

Lix junkab’al laj Jose Smith chunchuukeb’ sa’ xyaalal chire jun li meex re wa’ak.

Lix junkab’al laj Jose naxra li Jesukristo. Neke’tijok ut neke’ril li Santil Hu sa’ komonil. A’b’an lix na’ xyuwa’ laj Jose moko ch’olch’o ta chiruheb’ b’ar raj wan li Iglees te’wanq wi’. Sa’ jun q’ojyin, li xLucy, xna’ laj Jose, kitijok ut kixye re li Dios naq naraj raj xtawb’al lix Iglees li Jesukristo li tz’aqal yaal. Li Dios kixsume lix tij ut kixye re naq tixb’aanu a’an.

Santos, 1:10–11