Reetalil li hu tz’iib’anb’il chi uq’ej re lix Hu laj Mormon

10–16 febrero: “Re taaruuq tat-elq jo’ aj q’axonel-u”

Tzol’leb’ ut Sumwank 10–11

Naq yoo chi uxmank lix jaltesinkil ru lix Hu laj Mormon, kichal jun patz’om: K’a’ raj ru tento te’xb’aanu laj Jose Smith ut laj Oliver Cowdery chirixeb’ li perel jaltesinb’ileb’ ru li ke’sachman? Maare us raj xjaltesinkil wi’chik ru li raqal a’an, a’b’an li Qaawa’ kiril jun na’leb’ li ink’a’ ke’ru chirilb’al a’an: eb’ li xik’ neke’ilok yookeb’ xk’oxlankil xjalb’aleb’ li aatin sa’eb’ li perel a’an re raj naq taawanq xkab’ rix ch’oolej chirix lix choxahil k’anjel laj Jose. Li Dios kiwan jun xna’leb’ re numtaak sa’ xb’een li ch’a’ajkilal a’an re naq taaxik chi uub’ej li k’anjel. K’iila chihab’ chaq rub’elaj, li Dios kixmusiq’a laj Nefi chixtz’iib’ankil jun tasal chik li hu li na’aatinak ajwi’ chirix li hoonal a’an “choq’ re jun lix chaab’il ajom a’an” (1 Nefi 9:5).

“Nim wi’chik xchaab’ilal in na’leb’,” chan li Qaawa’ re laj Jose, “chiru lix seeb’al xb’alaq’ laj tza” (Tzol’leb’ ut Sumwank 10:43). A’an jun esil natuqub’an ch’oolej sa’ li qakutankil, naq li xik’ na’ilok yoo chixnimob’resinkil lix yalb’al xq’e chixt’anb’al li qapaab’aal. Jo’ laj Jose, naru naq laa’o “tiikaqo chi paab’ank ut tookanaaq” sa’ li k’anjel b’oqb’ilo wi’ xb’aan li Dios (raqal 3). Toja’ naq taqataw naq a’an ak kixkawresi jun b’e re naq “li rokebʼaal xbʼalbʼa inkʼaʼ taanumtaaq” saʼ qab’een (raqal 69).

Chi’ilmanq Santos, 1:54–64.

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 10:1–33

Li Dios “ink’a’ tixkanab’ naq laj Satanas tixtaw lix maa’usil k’oxlahom sa’ li na’leb’ a’in.”

Laj Satanas taawulaq raj chiru naq ink’a’ taajultiko’q qe naq yo’yo a’an—malaj ut naq ink’a’ taqak’e reetal lix yalb’al xq’e chiqeek’asinkil (chi’ilmanq 2 Nefi 28:22–23). A’b’an li raatin li Qaawa’ sa’ Tzol’leb’ ut Sumwank 10 naxch’olob’ naq laj Satanas tz’aqal wan—ut naxka’pak’ali lix k’anjel li Qaawa’. Sa’eb’ li raqal 1–33, k’e reetal k’a’ru naxnaw li Dios chirix lix yalb’al xq’e laj Satanas (che’ilmanq ajwi’ li raqal 62–63). Naru ajwi’ nakapatz’ re li Qaawa’ naq tatxtenq’a chirilb’al chan ru naq laj Satanas maare yoo chawaalenkil. Naq taawil li tasal 10, k’oxla chan ru naq li Kolonel naru nakatxtenq’a chixq’axb’al ru lix yalb’al xq’e laj Satanas.

Tzol’leb’ ut Sumwank 10:34–52

“Nim wi’chik xchaab’ilal xna’leb’ [li Qaawa’] chiru lix seeb’al xb’alaq’ laj tza.”

Laj Nefi ink’a’ kixnaw k’a’ut naq kimusiq’aak chixk’uub’ankileb’ li wiib’ ch’uut chi hu re resilal lix tenamit. Ut laj Mormon ink’a’ kixnaw k’a’ut naq kimusiq’aak chixk’eeb’al li xkab’ ch’uut rik’in li perel ch’iich’ oor. A’b’an eb’ li profeet a’an ke’xkanab’ rib’ sa’ ruq’ jun li Dios li wan “jun lix chaab’il ajom” (1 Nefi 9:5; Raatin laj Mormon 1:7). Anajwan naqanaw chik b’ayaq k’a’ru li rajom a’an: a’an reeqaj li 116 chi perel re lix Hu laj Mormon ke’sachman. K’a’ru nakaweek’a naq li Dios naraj naq taatzol chirix chixjunil a’in? K’oxlan chirix li patz’om a’in naq yooqat chirilb’al Tzol’leb’ ut Sumwank 10:34–52. Naru ajwi’ nakatz’iib’aheb’ li yaal nakatzol chirix li Qaawa’ sa’eb’ li raqal a’an. Chan ru naq eb’ li yaal a’in naxjal laa sumwanjik rik’in a’an? K’a’ru nawulak chawu chirix lix chaab’il na’leb’ ut lix kawresinkil rib’ li Qaawa’ chirix li 116 chi perel?

Naru ajwi’ nakatmusiq’aak chixsik’b’al reetalil lix chaab’il na’leb’ ut lix kawresinkil rib’ sa’ laa yu’am. Ileb’ li seraq’ kixwotz li Elder Ronald A. Rasband sa’ “Chi k’oxlanb’il xb’aan li Dios”—maare te’xk’am chaq eetalil sa’ laa k’a’uxl (Jolomil ch’utub’aj-ib’ re octubre 2017). Naru nakatz’iib’aheb’ a’an naq te’chalq sa’ laa k’a’uxl. Chan ru naq li Qaawa’ nak’anjelak sa’ laa yu’am? Qayehaq, k’a’ru li “yal nak’ulman xjunes rib’” xkawresi? K’a’ru xk’e choq’ xk’ub’elal laa wosob’tesinkil? Jo’q’e hoonal xatxk’am chirilb’al junaq kristiaan li wan rajom ru?

Chi’ilmanq ajwi’ Romanos 8:28; Tzol’leb’ ut Sumwank 90:24; Temas y preguntas, “Plan de Salvación,” Biblioteca del Evangelio.

Jalam-uuch re Laj Mormon naxk’oseb’ ru li perel ch’iich’ oor, xb’aan laj Tom Lovell

Tzolʼlebʼ ut Sumwank 11

“Kanab’ aawib’ chiru [lix musiq’ li Qaawa’].”

Laj Hyrum, li ras laj Jose, sa xch’ool chixnawb’al k’a’ru naraj li Qaawa’ choq’ re a’an, jo’kan naq kixpatz’ re laj Jose naq tixsik’ junaq k’utb’esinb’il na’leb’ choq’ re a’an. Li profeet sa raj xch’ool chixb’aanunkil a’an, a’b’an jun reheb’ li na’leb’ wankeb’ sa’ li k’utb’esinb’il na’leb’ a’an (Tzol’leb’ ut Sumwank 11) a’an naq laj Hyrum naru ajwi’ naxsik’ k’utb’esinb’il na’leb’ choq’ re. Li Qaawa’ kixye naq li raatin wan choq’ re “chixjunileb’ li chaab’il li rajomeb’, ut ke’xch’ik lix setleb’ ch’iich’ chi q’olok” (raqal 27). Naq taawil li tasal 11, k’a’ru nakaweek’a naq li Qaawa’ yoo chixk’utb’al chawu chirix li k’utb’esinb’il na’leb’ naru naqak’ul sa’ junjunqal? K’a’ru rilom a’in rik’in li kixk’ut chiru laj Oliver Cowdery sa’eb’ li tasal 6–9? K’a’ chik ru li esil wan rik’in choq’ aawe?

Chi’ilmanq ajwi’ “Chiqab’i li Musiq’ej,” Eb’ li B’ich, 84.

Patz’ reheb’ li komon naq te’patz’oq. Li patz’om neke’k’amok sa’ li k’utb’esinb’il na’leb’. Wi yookat chixtzolb’al laa junkab’al malaj sa’ jun tzoleb’aal sa’ li Iglees, waklesi xch’ooleb’ chi patz’ok ut tenq’aheb’ chixtawb’al xsumenkileb’ lix patz’om sa’ li loq’laj hu. Qayehaq, wi wankeb’ xpatz’om chirix li k’utb’esinb’il na’leb’ naru naqak’ul sa’ junjunqal, sik’omaq sa’ komonil xsumenkil a’an sa’ Tzol’leb’ ut Sumwank 11:12–14.

Tzolʼlebʼ ut Sumwank 11:15–26

Naq ninsik’ “xtawb’al li raatin” li Dios, tink’ul lix Musiq’ ut lix wankil.

Us ta maji’ jaltesinb’il ru lix Hu laj Mormon, laj Hyrum Smith kiraj tenq’ank sa’ li k’anjel re k’ojob’ank wi’chik. Naq yooqat chirilb’al ru lix sumehom li Qaawa’ chirix li rajom, k’oxla k’a’ru naraj naxye “xtawb’al li raatin” li Dios (raqal 21). Chan ru naq xtawb’al li raatin li Dios nakatxtenq’a chi k’anjelak chiru a’an rik’in wankilal?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 10:5

Naq nintijok junelik, nink’ul inkawilal rik’in li Dios.

• Re aatinak chirix li raqal a’in rik’ineb’ laa kok’al, naru nakatpatz’ok chiruheb’ chirix li k’a’aq re ru “junelik” neke’xb’aanu. K’a’ru naxye li Qaawa’ sa’ Tzol’leb’ ut Sumwank 10:5 naq taqab’aanu junelik? K’a’ut naq naraj naq taqab’aanu a’an?

• Chan ru naru nakatenq’aheb’ laa kok’al chixjultikankil li tijok junelik? Maare naru nekemoleb’ junjunq kok’ jayil pek ut teetz’iib’a “Tzol’leb’ ut Sumwank 10:5” malaj “Tijok Junelik” chiru. Naru neke’xk’e junjunq li pek sa’ junjunq li na’ajej b’ar wi’ neke’raj xjultikankil tijok, maare nach’ rik’in lix ch’aateb’, chixk’atq lix huheb’ re li eskweel, malaj b’ar wi’ neke’wa’ak. Jo’ naxye Tzol’leb’ ut Sumwank 10:5, chan ru nokorosob’tesi li Dios naq nokotijok? Laa kok’al naru neke’xtaw xkomon xsumenkil a’an sa’ jun li b’ich jo’ “Natijok jun chʼina al” (B’ichleb’aal choq’ reheb’ li Kok’al, 6).

Tzolʼlebʼ ut Sumwank 11:12–13

Li Santil Musiq’ej nikinixk’am chixb’aanunkil li us.

• Li kok’al naru neke’xtzol xk’eeb’al reetal jo’q’e neke’aatinaak xb’aan li Musiq’ej. Re xtenq’ankileb’, naru nakamuq junaq li bombiiy malaj jun li pook ut xjalam-uuch jun xnaq’ uhej sa’ xch’ool sa’ junaq na’ajej; chirix a’an taapatz’ reheb’ laa kok’al naq te’xtaweb’ a’an. Il Tzol’leb’ ut Sumwank 11:13, ut tenq’aheb’ laa kok’al chixk’eeb’aleb’ reetal li aatin wankeb’ rilom rik’ineb’ li k’a’aq re ru xe’xtaw. K’a’ru neke’xk’ut chiqu li aatin a’an chirix chan ru naq li Musiq’ej nokoxtenq’a?

• Xwotzb’al laa musiq’ejil numsihom laa’at naru naxtenq’aheb’ laa kok’al chixk’eeb’al reetal lix toch’om li Musiq’ej sa’ lix yu’ameb’. Naq yooqat chixwotzb’al a’an, patz’ ajwi’ reheb’ naq te’xwotz li reheb’ a’an. Naru nekeril Tzol’leb’ ut Sumwank 11:12–13 sa’ komonil, re xnawb’al chan ru naru naqak’e reetal jo’q’e naxk’am qab’e li Santil Musiq’ej. Ch’olob’ xyaalal naq li qaChoxahil Yuwa’ naraj qab’eresinkil rik’in li Santil Musiq’ej.

Tzolʼlebʼ ut Sumwank 11:21, 26

Tento tinnaw ru li evangelio re xtenq’ankileb’ li was wiitz’in chixtawb’al li yaal.

• Jo’ laj Hyrum Smith, laa kok’al maare te’wanq xhoonal chixwotzb’al li evangelio rik’ineb’ li ras riitz’in. Naru nekeril Tzol’leb’ ut Sumwank 11:21, 26 ut taapatz’ reheb’ laa kok’al naq te’xsik’ k’a’ru kixye li Qaawa’ re laj Hyrum Smith naq tento tixb’aanu re xk’utb’al li evangelio. K’a’ru naraj naxye “xk’ulb’al” li raatin li Dios? Chan ru taqab’aanu a’an? Chan ru “naqak’uula” li raatin li Dios sa’ qach’ool? Laa kok’al maare te’raj xb’aanunkil jun b’atz’unk b’ar wi’ te’xwotz junaq na’leb’ chirix li Jesukristo malaj chirix lix Hu laj Mormon rik’in jalan chik kristiaan.

Re xtawb’al xkomon chik li na’leb’, chi’ilmanq li hu Amigos re li po a’in.

Laj Jose ut laj Hyrum Smith, xb’aan laj Ken Corbett