Abril 28–Mayo 4: “Ang Akon Layi nga Magadumala sang Akon Simbahan”

Doktrina kag mga Kasugtanan 41–44

Kadasig nga nagdako ang Simbahan sang 1830 kag 1831, labi na gid sang pagdamo sang bag-o nga mga miyembro sa Kirtland, Ohio Ini nga pagtubo masadya kag nagapapagsik sa mga Santos, pero may upod man ini nga mga kabudlayan. Paano mo isahon ang kadasig magdako nga grupo sang mga tumuluo? Sa partikular, ano ang himuon mo kon dala nila ang doktrina kag pangginawi halin sa daan nila nga mga ginapatihan? Halimbawa, pag-abot ni Joseph Smith sa Kirtland sang temprano pa sang Pebrero 1831, nakita niya ang bag-o nga mga miyembro nga nagaistar sa komon nga propiyedad nga tunay nga nagatinguha nga sundon ang mga Kristiyano sa Bag-ong Katipan (tan-awa sa Mga Binuhatan 4:32–37). Naghimo ang Ginuo sang importante nga mga pagtadlong kag pagklaro diri kag sa iban pa nga mga topiko. Ginhimo Niya ini kalabanan paagi sa rebelasyon nga nasulat sa Doktrina kag mga Kasugtanan 42 nga Iya gintawag “ang akon layi nga magadumala sang akon simbahan” (bersikulo 59). Sa sining rebelasyon, aton matun-an ang mga kamatuoran nga pundasyon sa pagtukod sang Simbahan sang Ginuo sa ulihing mga adlaw. Kag mahibal-an naton nga kadamo pa sang dapat naton tun-an: “Kon magpangayo ka,” ginpromisa sang Ginuo, “makabaton ka sang rebelasyon dugang sa rebelasyon, ihibalo dugang sa ihibalo” (Doktrina kag mga Kasugtanan 42:61).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 41

“Sia nga nagabaton sang akon layi kag nagatuman sini, ang amo man akon disipulo.”

Sang temprano nga bahin sang 1831, nagsugod nga magtipon ang mga Santos sa Ohio. Handa na sila sa pagbaton sang layi nga ginpromisa sang Dios nga ipahayag didto (tan-awa sa Doktrina kag mga Kasugtanan 38:32). Pero antes sini, gintudlo Niya kon paano dapat maghanda ang Iya mga disipulo sa pagbaton sang Iya layi. Ano nga mga prinsipyo ang imo nakita sa Doktrina kag mga Kasugtanan 41:1–6 nga nakabulig kuntani sa mga Santos sa pagbaton sang layi sang Dios? Paano ayhan makabulig ining mga prinsipyo sa imo sa pagbaton sang instruksyon halin sa Iya?

Doktrina kag mga Kasugtanan 42

Ang Ginuo nagahatag sa akon sang mga kasuguan tungod palangga Niya ako.

Ginkabig sang mga Santos ang rebelasyon nga makita sa Doktrina kag mga Kasugtanan 42:1–72 nga isa sa pinakaimportante nga nabaton sang Propeta. Isa ini sa una nga mga rebelasyon nga ginpublikar. Sa madamo nga tuig, gintawag lang ini sang mga Santos nga “ang layi.” Bisan nga wala madala sa sining seksyon ang tanan nga kasuguan ukon layi sang Ginuo, maayo nga binagbinagon kon ngaa importante ining mga prinsipyo sa bag-o lang ginpanumbalik nga Simbahan. Ngaa nga importante ini sa aton sa karon?

Tungod ang seksyon 42 medyo malaba, pwede mo ini tun-an sing ginagmay, pareho sa masunod. Kilalaha ang mga prinsipyo nga ginatudlo sa kada isa, kag pamensara kon paano ining mga layi nangin tanda sang pagpalangga sang Ginuo sa Iya katawhan.

• Mga bersikulo 4–9, 11–17, 56–58

• Mga bersikulo 18–29

• Mga bersikulo 30–31

• Mga bersikulo 40–42

• Mga bersikulo 43–52

Ngaa nagahatag sa aton ang Dios sang mga layi kag mga kasuguan? Sa ano nga paagi ka ginbugayan sang paghibalo kag patuon sang mga kasuguan?

Doktrina kag mga Kasugtanan 42:30–42

“Dumduma ang imol.”

Bilang bahin sang layi nga ginpahayag sa seksyon 42, gintudloan sang Ginuo ang Iya mga Santos kon paano nila, pareho sa mga sumulunod ni Cristo sang una, mahimo ang “tanan nga mga butang kabilugan” (Mga Binuhatan 2:44; 4 Nefi 1:3), nga “wala sang imol sa tunga nila” (Moises 7:18). Ano ang imo matun-an sa Doktrina kag mga Kasugtanan 42:30–42 parte sa kon paano ginpangabuhi sang mga Santos ang layi sang pagkonsagrar? (Ang pagkonsagrar nagakahulugan nga painon mo ang isa ka butang para sa sagrado nga katuyuan.)

Bisan indi “tanan nga mga butang kabilugan” sa karon, sa mga templo nagahisugot ang mga Santos sa Ulihing mga Adlaw nga ipangabuhi ang layi sang pagkonsagrar. Paano mo ikonsagrar ang ginhatag sa imo sang Dios para bugayan ang mga tawo nga nagakinahanglan?

Tan-awa man sa Sharon Eubank, “Nagapangamuyo Ako nga Gamiton Niya Kita,” Liahona, Nob. 2021, 53–56.

Christ and the Rich Young Ruler [Si Cristo kag ang Manggaranon nga Lamharon nga Manugdumala], ni Heinrich Hofmann

Doktrina kag mga Kasugtanan 42:61, 65–68; 43:1–16

Ang Dios nagahatag sang rebelasyon para giyahan ang Iya Simbahan—kag giyahan ako.

Pamensara nga nagaistoryahanay kamo sang bag-o nga miyembro sang Simbahan nga nalipay sa ihibalo nga ang Simbahan ginagiyahan paagi sa rebelasyon. Paano mo gamiton ang Doktrina kag mga Kasugtanan 43:1–16 para buligan sia nga tun-an ang sulundan sang Ginuo sa paggiya sang Iya Simbahan paagi sa Iya propeta? Paano mo gamiton ang Doktrina kag mga Kasugtanan 42:61, 65–68 sa pagtudlo parte sa pagbaton sang personal nga rebelasyon?

Ano ang iban sang “mahidaeton nga mga butang” kag makalilipay nga mga butang nga imo nabaton halin sa Ginuo paagi sa Iya Espiritu?

Pamensara nga maghimo sang kaugalingon mo nga video, nga nagapaathag kon paano nagapakighambal sa imo ang Ginuo.

Maggamit sang mga leksyon gamit ang isa ka bagay. Ang paggamit sang mga bagay ukon visual aids makabulig sa mga tawo nga imo ginatudloan nga mas maintiendihan ang mga kamatuoran sang ebanghelyo kag madumduman ini sing mas malawig. Halimbawa, pwede ka maggamit sang puzzle, nga ginahuman sing tag-isaisa, para magtudlo parte sa pagbaton sang “rebelasyon dugang sa rebelasyon, ihibalo dugang sa ihibalo” (Doktrina kag mga Kasugtanan 42:61).

Mga Ideya para sa Pagtudlo sang mga Kabataan

Doktrina kag mga Kasugtanan 41:5

Ang disipulo isa ka tawo nga nagabaton sang layi sang Dios kag nagatuman sini.

• Para buligan ang imo kabataan nga mahibal-an kon ano ang buot silingon sang mangin disipulo ni Jesucristo, isulat ang Doktrina kag mga Kasugtanan 41:5 sa papel, nga ginablangkohan ang dapat butangan sang disipulo nga tinaga. Dayon pangitaon nila sa bersikulo 5 ang kulang nga tinaga. Suno sa sining bersikulo, ano ang buot silingon sang mangin disipulo ni Jesucristo? Paano naton ginatinguhaan nga mangin mas maayo nga mga disipulo ni Jesucristo?

Doktrina kag mga Kasugtanan 42:2

Malipayon ako kon ginatuman ko ang Ginuo.

• Basi masadyahan ang imo kabataan sang hampang nga kinahanglan nila mamati sang maayo kag sundon ang mga instruksyon. Pwede mo gamiton ini nga hampang para hambalan kon ano ang buot silingon sang “dungga kag pamatii kag tumana” ang Ginuo (Doktrina kag mga Kasugtanan 42:2). Ano nga mga instruksyon ang Iya ginhatag sa aton? Paano kita ginabugayan paagi sa pagtuman sang Iya mga layi kag mga kasuguan?

• Pwede ninyo obrahon ang pahina para sa kahiwatan sini nga semana upod sa imo kabataan. Pwede man kamo magkanta sang parte sa pagtuman sang mga layi sang Dios. Pamensara nga iistorya sa isa kag isa kon paano nagdala sa inyo sang kalipay ang pagtuman sang mga layi sang Dios.

  

Doktrina kag mga Kasugtanan 42:38

Nagaserbisyo ako kay Jesucristo kon nagaserbisyo ako sa iban.

• Pagkatapos basahon ang Doktrina kag mga Kasugtanan 42:38, buligi ang imo kabataan nga mamensar sang mga paagi nga makaserbisyo sila kay Jesus paagi sa pagserbisyo sa iban. Pwede man sila magtan-aw sang mga litrato sang Manluluwas nga nagabulig sa iban, nagapang-ayo sang nagamasakit, ukon nga mabuot sa mga kabataan (tan-awa sa Libro sang mga Larawan nga Pang-ebanghelyo, no. 42, 47).

  Pass It On

  Children around the world have taken President Thomas S. Monson's counsel to find a way to serve others.

  

• Pwede ka man magpakita sa imo kabataan sang Tithing and Other Offerings slip kag hambalan kon paano ini gamiton para maghatag sang kon ano ang may ara kita agud mabugayan ang iban.

Doktrina kag mga Kasugtanan 43:1–7

Ang propeta lamang ang makabaton sang rebelasyon para sa bilog nga Simbahan.

• Hagara ang imo kabataan nga panumdumon nga nagtindog ang isa ka tawo sa testimony meeting kag naghambal sa ward nga nakabaton sia sang rebelasyon para sa bilog nga Simbahan (halimbawa, rebelasyon nga indi na kita pwede magkaon sang carrots ukon dapat naton hugasan ang aton kamot sang gatas imbes nga tubig.) Nagasiling sia nga dapat mamati kita sa iya imbes nga sa propeta. Ano ang indi husto sa sina? Pwede ninyo dayon tun-an ang Doktrina kag mga Kasugtanan 43:1–7 sing dungan para mahibal-an kon paano nagahatag ang Ginuo sang mga kasuguan sa Iya Simbahan.

• Pwede ka man magpakita sang litrato sang buhi nga propeta kag hagaron ang imo kabataan nga mag-istorya sang gintudlo niya sang nagligad lang. Kon kinahanglan nila sang bulig, palantawa sila sang video clip ukon ginhambal sa isa ka mensahe sang nagligad lang nga pangkabilogan nga komperensya. Ngaa isa ka bugay nga may ara kita sang buhi nga propeta karon nga panahon?

Para sa dugang nga mga ideya, tan-awa sa isyu sang Abyan nga magasin sini nga bulan.

Joseph Smith Preaching [Si Joseph Smith nga Nagawali,, ni Sam Lawlor