The Camp Meeting [Ang Miting sang Guban], ni Worthington Whittredge

Mayo 12–18:“Tinguhai Ninyo sing Matutum ang Pinakamaayo nga mga Bugay”

Doktrina kag mga Kasugtanan 46–48

Sang si Parley P. Pratt, Oliver Cowdery, Ziba Peterson, kag Peter Whitmer Jr. naghalin sa Kirtland kag nagpadayon sa pagwali sang ebanghelyo, ginbayaan nila ang masobra 100 ka bag-o nga mga miyembro sang Simbahan nga dako ang kaukod pero diutay lang ang eksperiyensya ukon paggiya. Wala sila sadto sang gabay nga mga libro, wala sang mga miting sa paghanas sang mga lider, wala sing brodkast sang pangkabilogan nga komperensya—ang matuod, kulang gani katama ang ila mga kopya sang Libro ni Mormon para ipanagtag. Madamo sining bag-o nga mga tumuluo ang naganyat sa ginpanumbalik nga ebanghelyo tungod sang promisa sang dalagko nga mga pagpahayag sang Espiritu, labi na ang mga ginlaragway sa Bag-ong Katipan (tan-awa halimbawa, sa 1 Mga Taga-Corinto 12:1–11). Pero kadamo sang nabudlayan sa pagkilala sang matuod nga mga pagpahayag sang Espiritu. Sang makita ang kagumon, nagpangamuyo si Joseph Smith para sa bulig. Ang sabat sang Ginuo malahalon sa karon, kon diin masami nga ginapanginwala sang mga tawo ukon ginabale-wala ang mga butang sang Espiritu. Nagpamatuod sia nga ang espirituhanon nga mga pagpahayag matuod. Ginklaro man niya kon ano ang mga ini: mga regalo halin sa mapinalanggaon nga Amay nga Langitnon, “nga ginhatag para sa kaayohan sinang nagahigugma sa [Iya] kag nagatuman sang tanan [Niya] nga kasugoan, kag sa iya nga nagatinguha sa paghimo sini” (Doktrina kag mga Kasugtanan 46:9).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 46:1–7

Ginabaton sang Manluluwas ang tanan nga gusto magsimba sa Iya Simbahan.

Nabatyagan mo bala nga ang imo mga abyan kag ang mga tawo sa imo komunidad ginaabiabi sa inyo mga pagsimba sa ward? Ano ang imo ginahimo para himuon ang inyo nga miting sa Simbahan nga mga lugar nga gusto balikan sang mga tawo? Binagbinaga kon paano mo ipangabuhi ang laygay sang Ginuo sa Doktrina kag mga Kasugtanan 46:1–7 (tanawa man sa 2 Nefi 26:24–28; 3 Nefi 18:22–23).

Pwede mo man panumdumon ang panahon sang—nagsimba ka—ukon nakigkita sa isa ka grupo—sa una nga bes. Ano ang ginhimo sang mga tawo para mabatyagan mo nga ginaabiabi ka?

Tan-awa man sa Moroni 6:5–9.

Welcome | Comeuntochrist.org

Welcome to a community where everyone is trying to live as Jesus taught. Come and see what we believe at comeuntochrist.org

Doktrina kag mga Kasugtanan 46:7–33

Ang Amay nga Langitnon nagahatag sa akon sang espirituhanon nga mga regalo para bugayan ang iban.

Ang nauna nga mga Santos nagapati sa espirituhanon nga mga bugay pero kinahanglan sang iban sang giya para makilala ini kag maintiendihan ang katuyuan sini. Samtang ginatun-an mo ang parte sa mga bugay sang Espiritu sa Doktrina kag mga Kasugtanan 46:7–33, binagbinaga ang katuyuan “[nga] ini ginahatag” (bersikulo 8). Ano ang imo matun-an parte sa Dios—nga naghatag sining mga regalo?

May madumduman ka bala nga mga halimbawa sang nakita mo ang mga tawo nga nagagamit sini ukon sang iban pa nga espirituhanon nga mga dulot? Paano ang mga ini nangin “kaayohan … sang mga anak sang Dios”? (bersikulo 26). Pwede mo man tan-awon kon makilala mo ang mga halimbawa sang lainlain nga espirituhanon nga mga dulot sa balaan nga mga kasulatan pareho sini: 1 Mga Hari 3:5–15; Daniel 2:26–30; Mga Binuhatan 3:1–8; Helaman 5:17–19; Mormon 1:1–5; Eter 3:1–15; Doktrina kag mga Kasugtanan 6:10–12; Moises 7:13.

Ang imo pagtuon parte sa espirituhanon nga mga dulot mahimo nga maggiya sa imo nga binagbinagon kon ano nga mga dulot ang ginhatag sang Dios sa imo. Paano mo gamiton ining mga regalo para bugayan ang Iya mga anak? Kon may imo ka nga patriarchal blessing, mahimo nga nagasambit man ini sang pila sa ginhatag sa imo nga mga bugay.

Ano nga mga “ehersisyo” ang makabulig sa imo nga patubuon ang imo espirituhanon nga mga regalo?

Doktrina kag mga Kasugtanan 47

Gusto sang Ginuo nga magtipig sang kasaysayan ang Iya Simbahan.

Ang calling ni John Whitmer nga magtipig sang kasaysayan sang Simbahan nagpadayon sang madugay na nga tradisyon sang mga manugtipig sang kasulatan sa katawhan sang Dios. Ngaa sa banta mo nga ang pagtipig sang kasaysayan tama kaimportante sa Ginuo? Binagbinaga ini samtang ginabasa mo ang seksyon 47 amo man ang pareho nga mga istruksyon sa 2 Nefi 29:11–12; Moises 6:5; Abraham 1:28, 31. Ano sa pamatyag mo ang gusto sang Ginuo nga imo isulat parte sa imo kabuhi?

Sa FamilySearch, pwede mo isulat ang mga handurawan kag mga eksperiyensya sa imo kabuhi—kag sa mga kabuhi sang imo mga katigulangan (tan-awa sa FamilySearch.org).

John Whitmer

Doktrina kag mga Kasugtanan 47

Ang Balaan nga Espiritu makagiya sa akon samtang ginatuman ko ang akon calling.

Siguro maintiendihan mo ang nabatyagan ni John Whitmer sang gusto niya makabaton sang pasalig nga ang iya calling halin sa Dios. Ano ang ginhambal sang Ginuo sa Doktrina kag mga Kasugtanan 47 kay John Whitmer—kag sa imo—para maghatag sang kompiyansa sa pagtuman sang mga calling nga Iya ginahatag?

Ang papel sang manunudlo. Ang pagtudlo sobra pa sangsa paghatag lamang sang impormasyon. Upod diri ang paghimo sang sitwasyon kon diin ang mga miyembro sang klase makatuon kag makadiskubre sang mga kamatuoran nga sila lang kag iistorya ang ila natun-an sa kada isa (tan-awa sa Pagtudlo sa Paagi sang Manluluwas, 26).

Mga Ideya para sa Pagtudlo sang mga Kabataan

Doktrina kag mga Kasugtanan 46:2–6

Mabuligan ko ang iban nga makabatyag nga ginabaton sila sa simbahan.

• Pagkatapos nga basahon ang Doktrina kag mga Kasugtanan 46:5 upod sa imo kabataan, hambali kon ano ang gusto sang Manluluwas nga mabatyagan sang mga tawo kon magsulod sila sa Iya Simbahan. Hagara ang imo kabataan nga hunahunaon nga may nakita sila nga tawo sa simbahan sa una nga beses. Buligi sila nga praktison ang mga paagi nga ipabatyag sa sining tawo nga ginaabiabi sia.

Doktrina kag mga Kasugtanan 46:7–26

Ang Amay nga Langitnon nagahatag sa akon sang espirituhanon nga mga regalo para bugayan ang iban.

• Para buligan ang imo kabataan nga magtuon parte sa espirituhanon nga mga dulot nga ginalaragway sa Doktrina kag mga Kasugtanan 46:13–26, pamensara ining ideya. Pwede mo isulat ang mga dulot sa papel kag taguon ini sa palibot sang kuwarto. Samtang ginapangita sang imo kabataan ang tagsa ka papel, buligi sila nga pangitaon kon diin ina nga dulot ginmitlang sa seksyon 46.

  Chapter 20: Gifts of the Spirit: 8•March 1831

• Sugiri ang imo kabataan parte sa mga dulot nga pamatyag mo ginhatag sang Amay nga Langitnon sa ila, kag tugoti sila nga hambalan ang mga dulot nga natalupangdan nila sa isa kag isa. Suno sa Doktrina kag mga Kasugtanan 46:8–9, 26, ngaa ginahatagan kita sang Amay nga Langitnon sang espirituhanon nga mga dulot? Paano naton gamiton ang aton mga dulot para buligan ang iban?

Doktrina kag mga Kasugtanan 47:1, 3

Pwede ko isulat ang akon kasaysayan.

• Tugoti ang imo kabataan nga diskubrehon kon ano ang gusto ipahimo sang Ginuo kay John Whitmer sa Doktrina kag mga Kasugtanan 47:1, 3. Pwede man ninyo iistorya sa kada isa ang paborito ninyo nga mga sugilanon halin sa balaan nga mga kasulatan. Ipaathag nga nabal-an naton ining mga istorya tungod may nagsulat sini.

• Pamensara kon paano mo i-inspirar ang imo kabataan nga isulat ang ila personal nga mga kasaysayan. Pwede mo iistorya ang pila mo ka ginsulat sa imo journal ukon isa ka istorya parte sa inyo katigulangan (tan-awa sa FamilySearch.org ukon sa Memories nga app). Pwede ka maghatag sang mga bulig sa pagsulat sa journal, pareho sang “Ano ang natabo sining semana nga gusto mo mahibal-an sang imo mga apo?” ukon “Paano mo nakita ang impluwensya sang Ginuo sa imo kabuhi sini nga semana?” Pwede nga magdrowing ang magagmay nga kabataan sang mga litrato sang ila mga eksperiyensya, ukon irekord mo sila nga nagasugid sang ila mga istorya. Ano nga mga bugay ang nagaabot tungod sa pagtipig sang “dalayon nga kasaysayan”? (Doktrina kag mga Kasugtanan 47:1).

Doktrina kag mga Kasugtanan 48:2–3

Pwede ko buligan ang iban paagi sa pagpakigbahin sang ginhatag sa akon.

• Samtang ginabasa mo ang Doktrina kag mga Kasugtanan 48:2–3 upod sa imo kabataan, basi kinahanglan mo ipaathag nga ang mga tawo nagainabot sa Ohio halin sa Este, kag wala sila sang maestaran. Ano ang ginpahimo sang Ginuo sa mga Santos para makabulig? Buligi ang imo kabataan nga magpanumdom sang mga butang nga ginhatag sang Dios sa ila nga pwede nila ipakigbahin sa iban.

Para sa dugang nga mga ideya, tan-awa sa isyu sang Abyan nga magasin sini nga bulan.

Ang tanan nga gusto magsimba sa Manluluwas ginaabiabi sa mga pagtililipon sang Iya mga Santos.