Mayo 5–11: “Ang mga Promisa … Matuman”

Doktrina kag mga Kasugtanan 45

Ang rebelasyon sa seksyon 45 nabaton, suno sa tig-ulo sang seksyon, “sa kalipay sang mga Santos.” Kag kadamo sang dapat ikalipay sa sining rebelasyon. Diri ginhatag sang Manluluwas ang Iya hamili nga promisa nga magpanabang para sa aton sa atubang sang Amay (tan-awa sa mga bersikulo 3–5). Ginahambal Niya ang parte sa Iya wala katubtuban nga kasugtanan nga nagalapta sa bilog nga kalibutan, nga daw pareho sang “mensahero … nga magahanda sang [Iya] alagyan” (bersikulo 9). Kag nagapropesiya Sia sang mahimayaon Niya nga Ikaduha nga Pagkari. Ginahimo ini tanan sang Manluluwas samtang ginaako nga panahon ini sang pagkabalaka (tan-awa sa bersikulo 34), sa isa ka bahin tungod sa mga peligro nga matabo antes sang Iya pag-abot. Pero ina nga peligro, ina nga kadulom indi makusog kaayo para patyon ang kasanag sang paglaum. “Kay sa pagkamatuod ginasiling ko sa inyo,” siling sang Ginuo, “nga ako ang … kasanag nga nagasilak sa kadulom” (bersikulo 7). Rason na ina para batunon ining rebelasyon—upod ang bisan ano nga laygay kag paandam kag kamatuoran nga gusto Niya ihatag—nga may kalipay.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 45:1–5

Si Jesucristo ang aton Mananabang sa Amay.

Kon pamatyag naton kulang ukon indi kita angayan sa atubang sang Dios, makakita kita sang pagpasalig halin sa mga tinaga sang Manluluwas sa Doktrina kag mga Kasugtanan 45:1–5. Samtang ginausisa mo ining mga bersikulo, pamensara ang mga pamangkot nga pareho sini:

• Ano nga mga tinaga ukon dinalan sa sining mga bersikulo ang daw para gid sa imo?

• Ang mananabang isa ka tawo nga hayag nga nagasuporta ukon nagarekomendar sang isa ka tawo ukon kawsa. Suno sa sining mga bersikulo, paano ini ginahimo ni Jesucristo para sa imo? Ano ang nagakwalipikar sa Iya para himuon ini?

• Anong nanamian mo sa mga pulong sang Manluluwas sa Amay? (mga bersikulo 4–5).

Ang masunod nga mga dinalan mahimo nga makadugang sa imo pag-intiendi sang papel sang Manluluwas bilang Mananabang. Samtang ginatun-an mo ini, pamensara nga isulat ang mga dinalan ukon mga kamatuoran nga pwede mo ipakigbahin sa iban: 2 Nefi 2:8–9; Mosias 15:7–9; Moroni 7:27–28; Doktrina kag mga Kasugtanan 29:5; 62:1. Ngaa makahulugan ining mga dinalan sa imo?

The Mediator

A portrayal of the analogy Elder Boyd K. Packer used in his April 1977 general conference address. A young man who fails to pay a debt is saved from the grasp of justice through the mediation of a friend.

Doktrina kag mga Kasugtanan 45:9–10

Ang ebanghelyo amo ang pagsulundan sang mga nasyon.

Sang una, ang pagsulundan amo ang bandera nga ginadala sa giyera para magtipon kag mag-isa ang mga soldado. Ang pagsulundan isa man ka halimbawa ukon patakaran kon sa diin ginatakos ang iban pa nga mga butang. Samtang imo ginabasa ang Doktrina kag mga Kasugtanan 45:9–10, binagbinaga kon paano nangin pagsulundan sa imo ang imo mga kasugtanan sa Ginuo.

Doktrina kag mga Kasugtanan 45:11–75

Si Jesucristo magabalik nga mahimayaon.

Ang Ikaduha nga Pagkari sang Ginuo ginlaragway nga “dako” kag “makakulugmat” (Malaquias 4:5). Sa Doktrina kag mga Kasugtanan 45, daw bagay gid ining duha ka paglaragway. Ining rebelasyon may upod nga seryoso nga mga paandam kag puno sang paglaum nga mga promisa parte sa pag-abot sang Ginuo. Samtang ginatun-an mo ang mga bersikulo 11–75, binagbinaga kon paano mo handaan ang Ikaduha nga Pagkari nga may pagtuo kay Cristo imbes nga kakulba. Isulat ang imo makita sa isa ka tsart pareho sini:

Propesiya ukon promisa	Ano ang pwede ko himuon
Propesiya ukon promisa Ang kasanag (ang ebanghelyo) magaabot sa ila nga nagapungko sa kadulom (bersikulo 28)	Ano ang pwede ko himuon Batunon ang kasanag—kag ipakigbahin ini (bersikulo 29)
Propesiya ukon promisa	Ano ang pwede ko himuon
Propesiya ukon promisa	Ano ang pwede ko himuon
Propesiya ukon promisa	Ano ang pwede ko himuon

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Doktrina kag mga Kasugtanan 45:31–32, 56–57

Pwede ako “[magtindog] sa balaan nga mga lugar” kag indi mag-isdog.

Ano ang imo matun-an sa Doktrina kag mga Kasugtanan 45:31–32, 56–57 parte sa paghanda para sa pag-abot sang Ginuo? Ano ang imo “balaan nga mga lugar”? Ano ang buot silingon sang “indi maisdog”? Paano mo himuon ang imo lugar nga mas balaan?

Tandai nga gintumod sang Ginuo ang paanggid parte sa pulo ka dalaga, nga ginakumparar ang lana sa paanggid sa kamatuoran kag sa Espiritu nga Balaan. Pamensara nga basahon ang paanggid sa Mateo 25:1–13 nga ginapamensar ina. Ano pa nga paghangop ang imo nabaton?

Parable of the Ten Virgins [Ang Paanggid Parte sa Napulo ka Dalaga], ni Dan Burr

Doktrina kag mga Kasugtanan 45:11–15, 66–71

Ang Sion isa ka lugar nga hilway sa katalagman para sa mga Santos sang Dios.

Ang mga Santos sang tiyempo ni Joseph Smith nalangkag sa pagtukod sang Sion, ang Bag-ong Jerusalem (tan-awa sa Eter 13:2–9; Moises 7:18, 62–64). Ano ang imo natun-an parte sa Sion—ang daan nga siyudad sang panahon ni Enoc kag ang siyudad sa ulihing adlaw—sa Doktrina kag mga Kasugtanan 45:11–15, 66–71? Sa karon nga panahon ang sugo nga tukuron ang Sion nagatumod sa pagpatindog sang ginharian sang Dios bisan diin kita nagaestar. Ano ang pwede mo himuon para makabulig sa pagtukod sang Sion kon sa diin ka nagaestar?

Mga Ideya para sa Pagtudlo sang mga Kabataan

Doktrina kag mga Kasugtanan 45:3–5

Si Jesucristo ang akon Mananabang sa Amay.

• Basi gusto mo buligan ang imo kabataan nga maintiendihan nga ang mananabang isa ka tawo nga nagasuporta sa isa pa ka tawo. Dayon pwede ninyo hambalan ang mga halimbawa sang pagka-mananabang nga basi pamilyar sa ila (pareho sang pag-apin sang ila abyan). Samtang ginabasa ninyo ang Doktrina kag mga Kasugtanan 45:3–5 sing ululupod, buligi ang imo kabataan nga diskubrehon kon sin-o ang inyo Mananabang kag kon paano Niya kita ginabuligan.

Doktrina kag mga Kasugtanan 45:32

Pwede ako “magtindog sa balaan nga mga lugar.”

• Basi mangin masadya ang pagbutang sang mga litrato sang balay, bilding sang Simbahan, kag sang templo sa sulod sang kuwarto. Dayon pwede mo hatagan ang imo kabataan sang mga palatandaan parte sining mga lugar kag hagaron sila nga magtindog lapit sa litrato nga imo ginalaragway. Pangabaya sila nga magtindog sing tadlong samtang ginabasa mo ang una nga linya sang Doktrina kag mga Kasugtanan 45:32. Ano ang balaan nga mga lugar nga ginhatag sang Dios sa aton? Buligi ang imo kabataan nga maintiendihan nga ang “pagtindog sa balaan nga mga lugar, kag … indi maisdog” nagakahulugan nga pilion ang husto sa tanan nga oras, bisan ano pa ang nagakatabo. Paano naton himuon ang aton balay nga mas balaan nga lugar?

Doktrina kag mga Kasugtanan 45:9

Ang ebanghelyo ni Jesucristo amo ang pagsulundan sa kalibutan.

• Pwede mo ipaathag sa imo kabataan nga sang una, ang pagsulundan amo ang hayahay ukon bandera nga ginadala sa giyera. Nagabulig ini sa mga soldado nga mabal-an kon diin magtipon kag kon ano ang himuon. Basaha sing ululupod ang Doktrina kag mga Kasugtanan 45:9, kag hambali kon paano ang ebanghelyo nangin pagsulundan. Basi masadyahan ang imo kabataan nga maghimo sang ila kaugalingon nga pagsulundan ukon bandera, nga may mga imahe ukon tinaga nga nagapahayag sang ila nabatyagan parte sa Manluluwas.

Ang ebanghelyo daw pareho sang pagsulundan, ukon hayahay ukon bandera.

Doktrina kag mga Kasugtanan 45:44–45

Magabalik liwat si Jesucristo.

• Ang kalaglagan nga matabo antes sang Ika-duha nga Pagkari ni Jesucristo mahimo nga kahaladlukan para sa kabataan. Ang paggiya sa ila padulong kay Jesucristo makabulig sa ila nga magpaabot sini nga may pagtuo! Pamensara nga hagaron sila nga panumdumon kon ano ang ila mabatyagan kon may espesyal nga tawo nga magabisita sa ila, pareho sang lolo ukon lola ukon abyan. Paano nila handaan ang ila pagbisita? Dayon pwede ka magpakita sang litrato sang Manluluwas kag basahon ang Doktrina kag mga Kasugtanan 45:44–45. Iistorya sa kada isa ang inyo nabatyagan parte sa pag-abot sang Manluluwas.

• Para buligan ang imo kabataan nga masadyahan parte sa Ika-duha nga Pagkari sang Manluluwas, pwede mo isulat sa papel ang puno sang paglaum nga mga promisa sa seksyon 45 (tan-awa halimbawa, sa mga bersikulo 44–45, 51–52, 55, 58–59, 66–71). Hatagi ang imo kabataan sang mga papel kag ipaalsa ang ila mga kamot kon malawagan ang mga promisa nga ila ginakaptan samtang ginabasa mo ang mga bersikulo. Hambali kon ano ang buot silingon sini nga mga promisa. Pwede ka man magkanta upod sa imo kabataan sang kanta parte sa Ika-duha nga Pagkari sang Manluluwas.

Buligi ang mga kabataan nga makilala ang Espiritu. Samtang ginatudloan mo ang imo kabataan, sugiri sila kon mabatyagan mo ang Balaan nga Espiritu. Hambali kon paano mo mahibal-an ang Iya impluwensya. Halimbawa, pwede ka makabatyag sang kalinong ukon kalipay samtang nagakanta sang kanta parte sa Manluluwas.

Para sa dugang nga mga ideya, tan-awa sa isyu sang Abyan nga magasin sini nga bulan.

The Second Coming [Ang Ika-Duhang Pagkari], ni Harry Anderson