Mayo 19–25: “Inang Halin sa Dios Kasanag”

Doktrina kag mga Kasugtanan 49–50

Ang Manluluwas amo ang aton “maayong manugpahalab” (Doktrina kag mga Kasugtanan 50:44). Nahibal-an Niya nga kon kaisa nagatalang ang mga karnero kag ang kamingawan madamo sang peligro. Gani mapinalanggaon Niya kita nga ginagiyahan balik sa kahilwayan sang Iya doktrina. Ginapalayo Niya kita sa mga peligro pareho sang “malain nga mga espiritu, nga nagalibot sa duta, nga ginapatalang ang kalibutan” (Doktrina kag mga Kasugtanan 50:2). Ang pagsunod sa Iya masami nga nagakahulugan sang pagbuya sa indi husto nga mga ideya ukon tradisyon. Amo ini ang natabo kay Leman Copley kag sa iban pa sa Ohio. Ginbaton nila ang ginpanumbalik nga ebanghelyo pero nagsige lang gihapon sa mga pagpati nga indi gid husto. Sa Doktrina kag mga Kasugtanan 49, ginhambal sang Ginuo ang mga kamatuoran nga nagtadlong sang daan nga mga ginapatihan ni Leman parte sa mga topiko pareho sang kasal kag sa Ikaduhang Pagkari sang Manluluwas. Kag sang ang mga hinaylo sa Ohio “nagbaton … sang mga espiritu nga indi [nila] mahangpan,” gintudloan sila sang Ginuo kon paano kilalahon ang matuod-tuod nga pagpahayag sang Espiritu (Doktrina kag mga Kasugtanan 50:15). Ang Maayong Manugpahalab pasensyoso sa aton, nga Iya “magagmay nga kabataan” nga “kinahanglan magtubo sa grasya kag sa ihibalo sang kamatuoran” (Doktrina kag mga Kasugtanan 50:40).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 49; 50:24

Gusto ni Jesucristo nga ipangabuhi ko ang mga kamatuoran sang Iya ebanghelyo.

Antes magsulod sa Simbahan, si Leman Copley nangin bahin sang relihiyoso nga grupo nga ginkilala nga United Society of Believers in Christ’s Second Appearing [Nagaisa nga Katilingban sang mga Tumuluo sa Ika-duha nga Pagpakita ni Cristo], nga ginkilala man nga Shakers. Pagkatapos sang pahambalanay upod kay Leman, nagpangayo sang pagklaro si Joseph Smith halin sa Ginuo parte sa pila ka mga pinanudlo sang Shakers. Nagsabat ang Ginuo paagi sa rebelasyon sa seksyon 49. Pila sa mga ginapatihan sang mga Shaker namitlang sa tig-ulo sang seksyon.

Ano ang gintudlo sang Ginuo sa seksyon 49 para tadlungon ang mga ginapatihan sang mga Shakers? Ano ang nakita mo nga ebidensya sa sining rebelasyon parte sa Iya pagpalangga kag pag-ulikid sa katawhan nga wala sang kabug-osan sang Iya kamatuoran? Paano mo sila lab-uton nga may pagpalangga kag pag-ulikid?

Ano ang nanamian mo sa obserbasyon sang Ginuo sa bersikulo 2? Pwede mo ini ikumparar sa matabo kon isa lang ka parte sang sine ang imo tan-awon, isa ka parte sang puzzle ang makita, ukon pamatian lang ang isa ka bahin sang argumento. Paano ining paandam sang Ginuo mapaanggid sa Doktrina kag mga Kasugtanan 50:24? Pamensara kon ano ang imo ginahimo para makabaton sang dugang nga kasanag halin sa Ginuo.

Doktrina kag mga Kasugtanan 49:15–17

Ang pag-asawahay sa tunga sang lalaki kag babayi importante sa plano sang Dios.

Sa pagtinguha nga gub-on ang plano sang Amay nga Langitnon, ginahandum ni Satanas nga maglibog ang hunahuna sang mga tawo parte sa pag-asawahay. Sa pihak nga bahin, ang Ginuo, padayon nga nagapahayag sang kamatuoran parte sa pag-asawahay paagi sa Iya mga propeta. Makita mo ang iban sining kamatuoran sa Doktrina kag mga Kasugtanan 49:15–17; Genesis 2:20–24; 1 Mga Taga-Corinto 11:11; kag sa “Ang Panimalay: Isa ka Proklamasyon sa Kalibutan.” Ilista ang mga kamatuoran nga imo nakita. Ngaa tama kaimportante sang pag-asawahay sa plano sang Dios?

Gintudlo ni Elder Ulisses Soares nga “ang ginpanumbalik nga ebanghelyo ni Jesucristo nagapahayag sang prinsipyo sang pagka-lubos nga magkatuwang sang babayi kag lalaki, pareho sa sini nga kabuhi kag sa walay katubtuban” (“Magkatuwang upod sa Ginuo,” Liahona, Nob. 2022, 42). Pwede mo tun-an ang iya mensahe, nga ginapangita ang mga prinsipyo nga “nagapabakod sang pagka-magkatuwang sang lalaki kag babayi.” Paano mo magamit ining mga prinsipyo sa imo kabuhi? Kon may mamangkot sa imo halin sa lain nga pagtuluohan kon ngaa importante ang pag-asawahay, ano ang imo isabat? Ngaa nagapasalamat ka para sa sini nga ihibalo?

Renaissance of Marriage

Hear what President Eyring says we all must do to have a renaissance of happy marriages and productive families.

Mangin sensitibo sa mga sirkumstansya sang kada indibidwal. Bisan nga ang malipayon nga pag-asawahay kag kabuhi sa pamilya amo ang handum sang ebanghelyo ni Jesucristo, indi tanan sa aton may ari sining bugay samtang ari sa duta. Sa paghambalanay parte sining topiko, magmangin sensitibo sa lainlain nga sirkumstansya sang indibidwal kag pamilya, labi na sa mga tawo nga “padayon nga [nagahulat] sa Ginuo” para matuman ang wala katapusan nga mga promisa (tan-awa sa Doktrina kag mga Kasugtanan 98:1–3).

Doktrina kag mga Kasugtanan 50

Ang mga pinanudlo sang Ginuo makaamlig sa akon batok sa mga pagpang-into ni Satanas.

Ang mga bag-ong miyembro sang Simbahan sa Ohio nalangkag sa pagbaton sang espirituhanon nga mga pagpahayag nga ginpromisa sa balaan nga mga kasulatan. Pero, si Satanas, nalangkag man sa pag-into sa ila. Kon pangabayon ka nga buligan ining mga miyembro nga maintiendihan kon paano makilala ang matuod nga pagpahayag sang Balaan nga Espiritu, ano nga mga prinsipyo sa Doktrina kag mga Kasugtanan 50 ang imo ihambal? (tan-awa labi na ang sa mga bersikulo 22–25, 29–34, 40–46). Paano ka ginbuligan sang Manluluwas nga makilala ang kinalain sang kamatuoran kag indi husto?

Tan-awa man sa 1 Mga Taga-Corinto 14:1–28; 2 Timoteo 3:13–17.

Doktrina kag mga Kasugtanan 50:13–24

Ang mga manunudlo kag mga nagatuon pareho nga ginapalig-on sang Espiritu.

Ang buhi nga ebanghelyo ni Jesucristo nagahatag sang madamo nga oportunidad para mangin manunudlo kag manugtuon, sa balay kag sa Simbahan. Isa ka paagi para tun-an mo ang Doktrina kag mga Kasugtanan 50:13–24 amo ang pagdrowing sang manunudlo kag manugtuon. Sa tupad nila, maglista sang mga tinaga kag mga dinalan sa sining mga bersikulo nga nagatudlo sa imo parte sa pagtuon kag pagtudlo sang ebanghelyo. Sang san-o ka nakaangkon sang mga eksperiyensya nga nagatudlo sa imo sang importansya sang Espiritu sa pagtudlo kag pagtuon? Pamensara kon ano ang imo himuon para pauswagon ang imo mga pagpaninguha bilang manugtuon kag manunudlo sang ebanghelyo.

Doktrina kag mga Kasugtanan 50:23–25

“Inang halin sa Dios kasanag.”

Samtang ginabinagbinag mo ang mga pulong sang Manluluwas sa Doktrina kag mga Kasugtanan 50:23–25, hunahunaa kon paano ka nagabaton sang kasanag sang Dios sa imo kabuhi kag kon paano mo “ginatabog ang kadulom”. Halimbawa, paano ginagiyahan sining mga bersikulo ang imo mga pagpili kon paano gamiton ang imo oras? ano nga lingawlingaw ukon media ang tan-awon? ano nga paghinambalanay ang entrahan? Sa ano pa nga mga desisyon makabulig ining mga bersikulo sa imo?

Tan-awa man sa “Maglakat sa Kasanag sang Dios,” Para sa Kusog sang mga Lamharon: Giya sa Paghimo sang mga Pagpili, 16–21.

Mga Ideya para sa Pagtudlo sang mga Kabataan

Doktrina kag mga Kasugtanan 49:12–14

Sarang ko nga sundon si Jesucristo.

• Para itudlo sa imo kabataan ang mga prinsipyo sa sining mga bersikulo, pwede ka magpreparar sang apat ka marka sang tiil kag apat ka litrato nga nagarepresentar sang pagtuo kay Jesucristo, paghinulsol, bunyag, kag pagbaton sang Balaan nga Espiritu (tan-awa sa mga litrato sa pahina sang kahiwatan sini nga semana). Pwede nga ibutang sang imo kabataan ang mga marka sang tiil sa salog kag itupad ang mga litrato diri. Dayon pwede sila magbulos-bulos sa paglakat sa marka sang mga tiil samtang ginabasa mo ang Doktrina kag mga Kasugtanan 45:12–14. Buligi sila nga maintiendihan nga kon himuon naton ang mga butang sa sining mga litrato, ginasunod naton si Jesucristo.

• Pwede mo man hagaron ang imo kabataan nga ikumparar ang Doktrina kag mga Kasugtanan 49:12–14 sa Mga Binuhatan 2:38 kag sa ikaapat nga artikulo sang pagtuo. Ano ang nakita nila nga pareho? Ngaa importante ining mga kamatuoran?

Doktrina kag mga Kasugtanan 49:15–17

Ang pag-asawahay sa tunga sang lalaki kag babayi importante sa plano sang Dios.

• Para ipakilala ining mga bersikulo, pwede mo ipaathag nga ang mga Shakers relihiyoso nga grupo nga nagapati nga ang mga tawo indi dapat magpakasal (tan-awa ang tig-ulo sang seksyon sang Doktrina kag mga Kasugtanan 49). Hagara ang imo kabataan nga pangitaon ang mga butang nga gintudlo sang Ginuo parte sa pag-asawahay sa Doktrina kag mga Kasugtanan 49:15–17. Ano ang buot silingon sang “ang pag-asawahay ginmando sang Dios”? Basi pwede ninyo basahon sing ululupod ang una nga tatlo ka parapo sang “Ang Panimalay: Isa ka Proklamasyon sa Kalibutan.” Dayon hambali kon ngaa ang pag-asawahay kag pamilya importante sa Amay nga Langitnon.

Doktrina kag mga Kasugtanan 50:23–25

“Inang halin sa Dios kasanag.”

• Para sugdan ang Doktrina kag mga Kasugtanan 50: 23–25, hambali upod sa imo kabataan ang kinalain sang sanag kag dulom. Ngaa kinahanglan naton sang kasanag? Pwede ninyo basahon sing ululupod ang una nga parapo sang “Maglakat sa Kasanag sang Dios,” sa Para sa Kusog sang mga Lamharon: Giya sa Paghimo sang mga Pagpili (pahina 17) kag amo man ang Doktrina kag mga Kasugtanan 50:23–25. Hambali ang mga paagi nga makabaton kita sang kasanag sang Dios kag mga paagi nga matabog naton ang kadulom. Dayon pwede kamo magkanta sing ululupod sang kanta parte sa espirituhanon nga kasanag.

Doktrina kag mga Kasugtanan 50:40–46

Si Jesucristo amo ang akon Maayong Manugpahalab.

• Pagkatapos nga basahon ang Doktrina kag mga Kasugtanan 50:40–46 sing ululupod, pwede mo ipakita ang litrato sang Manluluwas sa katapusan sining outline kag magpamangkot pareho sini: Ano ang nabatyagan sang manugpahalab sa Iya mga karnero? Paano nangin daw pareho sang manugpahalab ang Manluluwas sa aton?

Para sa dugang nga mga ideya, tan-awa sa isyu sang Abyan nga magasin sini nga bulan.

Gentle Shepherd [Mahinalungon nga Manugpahalab], ni Yongsung Kim