First Furrow [Una nga Idas], ni James Taylor Harwood

Mayo 26–Hunyo 1: “Tampad, Matarong, kag Mainandamon nga Tulugyanan”

Doktrina kag mga Kasugtanan 51–57

Para sa mga miyembro sang Simbahan sang tinuig sang 1830, ang pagtipon sang mga Santos kag ang pagtukod sang siyudad nga Sion espirituhanon kag temporal nga mga buluhaton, nga may madamo nga praktikal nga mga butang nga kinahanglan atendiron: May tawo nga kinahanglan magbakal kag magpanagtag sang duta kon diin mag-estar ang mga Santos. May tawo nga kinahanglan mag-imprinta sang mga libro kag sang iban pa nga mga balasahon. Kag may tawo nga kinahanglan nga magbukas sang tindahan para magbaligya sang mga kinahanglanon sang katawhan sa Sion. Sa mga rebelasyon nga nasulat sa Doktrina kag mga Kasugtanan 51–57, ginpili kag gin-instruksyonan sang Ginuo ang mga tawo nga magkapot sining mga buluhaton.

Pero bisan nga ang mga abilidad sa sining mga butang kinahanglanon sa Sion, ining mga rebelasyon nagatudlo man nga gusto sang Ginuo nga ang Iya mga Santos mangin kaangay-angay sa espirituhanon agud tawgon nga katawhan sang Sion—Iya katawhan. Ginatawag niya ang kada isa sa aton nga mangin “tampad, matarong, kag mainandamon nga tulugyanan,” may mahinulsulon nga espiritu, “matutum” sa mga palangakuan nga ginhatag sa aton (tan-awa sa Doktrina kag mga Kasugtanan 51:19; 52:15; 54:2 Kon mahimo naton ina—wala sapayan sang aton temporal nga mga abilidad—magamit kita sang Ginuo sa pagtukod sang Sion.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 51

Gusto sang Ginuo nga mangin tampad, matarong, kag mainandamon ako nga tulugyanan.

Kon miyembro ka sang Simbahan sang 1831, mahimo nga gin-imbitar ka nga ipangabuhi ang layi sang pagkonsagrar paagi sa pagpirma para itugyan ang imo propiyedad sa Simbahan paagi sa bishop. Dayon iya ibalik sa imo, sa kalabanan sang mga kaso, ang imo gindonar, kon kaisa nga may sobra pa. Pero wala mo lang ini ginapanag-iyahan—ikaw ang tinugyanan.

Sa karon lain na ang mga proseso, pero ang mga prinsipyo importante gihapon sa buluhaton sang Ginuo. Samtang ginabasa mo ang seksyon 51, hunahunaa kon ano ang ginsalig sang Dios sa imo. Ano ang kahulugan sang mga tinaga nga “tulugyanan” (bersikulo 19) kag “ginkonsagrar” (bersikulo 5) parte sa mga ginapaabot sang Dios sa imo?

Ginpaathag ni Pangulong Spencer W. Kimball: “Sa Simbahan ang pagkatulugyanan isa ka sagrado nga espirituhanon ukon temporal nga pagsalig kon diin may salabton ka. Tungod ang tanan nga butang iya sang Ginuo, mga tulugyanan kita sang aton mga lawas, mga kaisipan, mga pamilya, kag mga pagkabutang. (Tan-awa sa Doktrina kag mga Kasugtanan 104:11–15.) Ang tampad nga tulugyanan isa ka tawo nga nagadumala sing matarong, nagaatipan sang iya pamilya, kag nagaulikid sa imol kag pigado” (“Welfare Services: The Gospel in Action,” Ensign, Nob. 1977, 78).

The Law of Consecration

Historians Kate Holbrook and Steven C. Harper discuss what the Law of Consecration is, the three core doctrines pertaining to it, and how we can live it today.

Doktrina kag mga Kasugtanan 52:9–11, 22–27

Pwede ko imbitaron ang iban nga magpalapit kay Cristo bisan diin ako magkadto.

Sang ginpadala sang Ginuo ang pila ka lider sang Simbahan sa Missouri, ginhambalan Niya sila nga gamiton ang oras samtang nagabiyahe kag “[magwali] sang pulong sa dalanon” (mga bersikulo 25–27). Paano mo ipakigbahin ang ebanghelyo “sa dalanon,” ukon sa normal nga mga hitabo sang imo kabuhi?

Doktrina kag mga Kasugtanan 52:14–19

Ginabuligan ako sang Ginuo nga makalikaw sa pagpatalang.

Tungod kadamo sang mga tawo nga nagasiling nga nakaangkon sang espirituhanon nga mga pagpahayag, nabalaka ang nauna nga mga Santos nga maintuan sila. Ano nga paandam ang ginhatag sa ila sang Ginuo sa Doktrina kag mga Kasugtanan 52:14? Ano ang Iya solusyon? (tan-awa sa mga bersikulo 14– 19).

Ang sulundan isa ka butang nga nagasulit sa regular kag mapaktan nga paagi. Mga halimbawa sini ang pag-isip sang pares nga mga numero ukon ang pagsilak kag pagtunod sang adlaw kada adlaw. Ano pa nga mga halimbawa ang imo madumduman? Samtang ginabasa mo ang Doktrina kag mga Kasugtanan 52:14–19, pangitaa ang sulundan sang Ginuo para makalikaw sa pagpatalang. Ngaa sa banta mo dala sa sulundan sang Ginuo ining mga kalidad, kag ang pagtuman? Paano mo ipangabuhi ining sulundan para makalikaw nga maintuan?

Ipahangop ang mabudlay nga mga tinaga. Sa Librarya sang Ebanghelyo nga app, pwede mo tum-ukon sing malawig ang isa ka tinaga kag dayon pilion ang “Kahulugan.” Dayon magabukas ang kahulugan sina nga tinaga. Tilawi ini kon may masugata ka nga mga tinaga nga indi pamilyar—ukon mga tinaga nga daw pamilyar nga mas gusto mo pa maintiendihan.

Ano ang mga halimbawa sang mga pagpatalang sa aton panahon? Paano naton mahibal-an nga ginainto kita?

Halimbawa, pwede mo binagbinagon ang imo mga pagpili parte sa ginalantaw mo nga mga sine, musika, kag social media base sa mga sulundan sa “Maglakat sa Kasanag sang Dios” sa Para sa Kusog sang mga Lamharon: Giya sa Paghimo sang mga Pagpili, 16–21.

Doktrina kag mga Kasugtanan 54

Makadangop ako sa Ginuo kon nasakit ako sang mga pagpili sang iban.

Nakatilaw ka na bala nga madismaya sang ang tawo nga imo ginasaligan wala magtuman sang ila mga pangako? Natabo ini sa mga Santos sang Colesville, New York, nga nagpaabot nga mag-estar sa duta ni Leman Copley sa Ohio. Para tun-an ining eksperiyensya, pamensara nga rebyuhon ang tig-ulo sang seksyon 54. Kon may abyan ka nga upod sa mga Santos sa Colesville, ano nga laygay nga makita mo sa seksyon 54 ang imo ipakigbahin sa ila?

uma ni Leman Copley

Doktrina kag mga Kasugtanan 56:14–20

Bulahan ang mga putli sing tagipusuon.

Sa sining mga bersikulo, naghambal ang Ginuo sa pareho manggaranon kag imol; mangin manami nga ikumparar ang Iya laygay sa sining duha ka mga grupo. Ano sa sining mga bersikulo ang daw magamit gid sa imo sa personal?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 51:9

Sarang ko mangin tampad.

• Para buligan ang imo kabataan nga matun-an kon ano ang buot silingon sang mangin tampad, pwede ninyo basahon sing ululupod ang Doktrina kag mga Kasugtanan 51:9 kag iistorya ang mga sugilanon parte sa mga kabataan nga nag-atubang sang mga desisyon nga mangin tampad. Pwede ka maggamit sang mga litrato, mga puppet nga himo sa medyas, ukon papel nga munyika para mas mangin masadya ang mga sugilanon. Paano kita ginabugayan sang Ginuo kon nagatinguha kita nga mangin tampad?

• Pamensara nga maghampang upod sa imo kabataan. Pagkatapos, hambali kon ano ayhan ang nangin resulta sang hampang kon may nangdaya. Ngaa importante nga mangin “masaligan sa mga buhat” sa isa kag isa?

Doktrina kag mga Kasugtanan 52:10; 53:3; 55:1

Ginabaton ko ang dulot sang Balaan nga Espiritu paagi sa pagtakdong sang mga kamot.

• Ang pagbaton sang Balaan nga Espiritu paagi sa pagtakdong sang mga kamot ginmitlang sing pila ka beses sa Doktrina kag mga Kasugtanan 51–57. Basi maayo ini nga oportunidad para tudloan ang imo kabataan parte sining ordinansa. Halimbawa, pwede sila magtan-aw sang litrato sang bata nga ginakumpirma kag ilaragway kon ano ang nagakatabo sa litrato. Papalakpaka sila kon mabatian nila ang “nagatakdong sang mga kamot” ukon “pagtakdong sang mga kamot” samtang ginabasa mo ang Doktrina kag mga Kasugtanan 52:10; 53:3; 55:1.

• Magkanta parte sa Balaan nga Espiritu. Buligi ang imo kabataan nga pangitaon ang mga tinaga kag mga dinalan sa kanta nga nagatudlo parte sa dulot sang Balaan nga Espiritu.

  

Doktrina kag mga Kasugtanan 52:14–19

May sulundan ang Dios para buligan ako nga indi maintuan.

• Para itudlo ang parte sa sulundan sang Ginuo agud indi maintuan, pwede ka magsugod paagi sa pagbulig sa mga kabataan nga makita ang mga halimbawa sang sulundan—sa palibot, sa habol ukon bayo nga damo kolor, ukon sa adlaw-adlaw nga pangabuhi. Buligi sila nga pangitaon ang sulundan nga ginhatag sang Ginuo sa Doktrina kag mga Kasugtanan 52:14–15. Siguroha nga naintiendihan nila ang indi pamilyar nga mga tinaga sa sining mga bersikulo. Paano naton gamiton ining sulundan para makilala ang kamatuoran?

Doktrina kag mga Kasugtanan 54:4–6

Dapat tumanon ko pirme ang akon mga kasugtanan.

• Sa imo kaugalingon nga pulong, iistorya sa imo kabataan kon ano ang natabo sa mga Santos nga nagsaylo para kuntani mag-estar sa duta ni Leman Copley (tan-awa sa tig-ulo sang seksyon 54). Pwede mag-akto ang imo kabataan nga kuno abi mga miyembro sang Simbahan nga nag-abot sa Ohio. Ano ayhan ang ila mabatyagan pagkatapos nga ginsupak ni Leman ang iya kasugtanan. Ano ang ginatudlo sini sa aton parte sa pagtuman sang aton mga kasugtanan ukon promisa? Basaha sing ululupod ang Doktrina kag mga Kasugtanan 54:6 para diskubrehon ang mga bugay sang mga tawo nga nagatuman sang ila mga kasugtanan.

Doktrina kag mga Kasugtanan 55:1–4

Magamit ko ang mga bugay nga ginhatag sa akon sang Ginuo para bugayan ang iban.

• Para sugdan ang seksyon 55, pwede mo ipaathag nga si William W. Phelps manug-imprinta sang peryodiko nga nakatuon sang ebanghelyo kag nagsulod sa Simbahan. Basaha ang Doktrina kag mga Kasugtanan 55:1–4 upod sang imo kabataan, kag buligi sila nga diskubrehon kon ano ang gusto ipahimo sang Dios kay William. Paano Niya gamiton ang mga talento ni William? Pwede magpadayon ining diskusyon sa kon paano ayhan kita hagaron sang Dios nga gamiton ang aton mga talento para bugayan ang Iya mga anak.

Para sa dugang nga mga ideya, tan-awa sa isyu sang Abyan nga magasin sini nga bulan.

Bishop Partridge Receives Consecration [Si Bishop Partridge Nagabaton sang Ginakonsagrar], ni Albin Veselka