Independence, Missouri, 1831, ni Al Rounds

Hunyo 2–8: “Mapisan sa Pagpakigbahin sa Maayo nga Kawsa”

Doktrina kag mga Kasugtanan 58–59

Sang una nga nakita sang mga elder sa Simbahan ang lugar sang siyudad sang Sion—ang Independence, Missouri—indi ini ang ila ginapaabot. May pila nga nagdumdom nga makakita sila sang mauswagon, masako nga komunidad nga may mabaskog nga grupo sang mga Santos. Sa baylo, nakita nila ang malaka sing pamalay nga lugar, nga wala sang kasadya sang sibilisasyon nga ila naandan kag ginapuy-an sang barubal nga mga pumuluyo imbes nga mga Santos. Ang gwa nga wala sila ginapangabay sang Ginuo nga magkadto lang sa Sion—gusto Niya nga tukuron nila ini.

Kon ang aton mga ginapaabot indi pareho sa realidad, mahimo naton panumdumon ang ginsiling sang Ginuo sa mga Santos sang 1831: “Sa sini nga tion, indi ninyo makita sa inyo tawhanon nga mga mata ang plano sang Dios … kag ang himaya nga magasunod pagkatapos sing madamo nga pag-antos” (Doktrina kag mga Kasugtanan 58:3). Huo, ang kabuhi puno sing pag-antos, bisan pa sang kalainan, pero sarang kita “magpahanabo sing madamo nga pagkamatarong; kay ang gahum yara sa [aton]” (mga bersikulo 27–28).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 58:1–5; 59:23

“Pagkatapos sing madamo nga pag-antos magaabot ang mga bugay.”

Ang mga Santos naghandum nga sa tion sang ila mga kabuhi, magauswag ang Jackson County bilang isa ka lugar kon sa diin magatipon ang tanan nga mga Santos. Pero, ang ila pagtiner sa Jackson County puno sang pag-antos. Pila lang ka tuig, napilitan sila nga maghalin kag “maghulat sang malip-ot pa nga tion para sa pagtubos sang Sion” (Doktrina kag mga Kasugtanan 105:9).

Ano ang imo natun-an parte sa mga pag-antos ukon mga kabudlayan sa mga pulong sang Ginuo sa Doktrina kag mga Kasugtanan 58:1–5? Ngaa sa banta mo nga ang iban nga mga bugay nagaabot lamang pagkatapos sang mga pagtilaw? Ano nga mga bugay ang imo nabaton pagkatapos sang pagtilaw?

Ano ang imo natun-an sa Doktrina kag mga Kasugtanan 59:23 nga nagahatag sa imo sang paglaum?

Doktrina kag mga Kasugtanan 58:26–29

Sarang ako “magpahanabo sing madamo nga pagkamatarong” sa akon “kaugalingon nga pagbuot.”

Bilang bahin sang imo pagtuon sining mga bersikulo, pwede mo ilista ang mga butang nga “mapisan [ka] sa pagpakigbahin.” Tanan bala nga mga ini “maayo nga [mga] kawsa”? Binagbinaga kon ano ang pwede mo himuon para “magpahanabo sing madamo nga pagkamatarong”—pamensara nga magbutang sang mga lalab-uton para himuon ini.

Ngaa sa banta mo nga gusto sang Ginuo nga maghimo ka sang “madamo nga butang paagi sa [imo] kaugalingon nga pagbuot”? Ano ang mangin resulta kon “ginapilit [ka] sa tanan nga butang”? Ano ang ginadugang sang 2 Nefi 2:27 sa imo paghangop sining prinsipyo?

Doktrina kag mga Kasugtanan 58:42–43

Patawaron ako sang Ginuo kon maghinulsol ako.

Ang promisa sang Ginuo sa Doktrina kag mga Kasugtanan 58:42 nga magpatawad sang lubos sa mga nagahinulsol makainspirar, bisan pa nga nagatuga ini sang mga pamangkot: Ano ang buot silingon sang maghinulsol? Paano ko mahibal-an nga naghinulsol ako? Maayo lang, padayon nga ginsiling sang Ginuo, “Paagi sini mahibaloan ninyo…” (bersikulo 43).

Ari ang dugang nga mga pamangkot kon kaisa sang mga tawo parte sa paghinulsol. Ano ang ginatudlo sang Espiritu sa imo samtang ginatun-an mo ang ginapanugyan nga mga balasahon nga ginlista sa idalom?

Paano makabulig sa akon ang pagkumpisar sang akon mga sala? Tan-awa sa Salmo 32:1–5; Mga Hulubaton 28:13; Mosias 27:34–37; Alma 39:12–13.

Ginatinguhaan ko nga sikwayon ang akon mga sala, pero pirme ako gihapon nagakasala. Balido bala gihapon ang akon paghinulsol? Tan-awa sa Bradley R. Wilcox, “Ang Pagkatakos Indi Pagkawalay Kasaypanan,” Liahona, Nob. 2021, 61–67.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Paano ko masigurado nga ginpatawad na ako sang Manluluwas?

Makakita ka sang dugang nga mga ideya sa “Mga Pamangkot kag mga Sabat” parte sa paghinulsol sa Para sa Kusog sang mga Lamharon: Giya sa Paghimo sang mga Pagpili (mga pahina 8– 9).

Doktrina kag mga Kasugtanan 59

Sin-o si Polly Knight?

Si Polly Knight kag ang iya bana, si Joseph Knight Sr., upod sa una nga nagpati sa pagkapropeta ni Joseph Smith. Naghatag sang kinahanglanon nga suporta sanday Polly kag Joseph sa Propeta sa buluhaton sang paglubad sang Libro ni Mormon. Ginbayaan sang pamilya Knight ang Colesville, New York, para magtipon upod sa mga Santos sa Ohio kag sang ulihi ginsugo nga magsaylo sa Jackson County, Missouri. Sang nagabiyahe sila, amat-amat nga nagluya ang lawas ni Polly, pero determinado sia nga makita ang Sion antes sia mapatay. Pila pa lang sia ka adlaw sa Missouri sang sia napatay. Ang Doktrina kag mga Kasugtanan 59 nabaton sa adlaw nga napatay sia, kag ang bersikulo 1 kag 2 daw nagatumod gid sa iya.

Doktrina kag mga Kasugtanan 59:4–19

Ang mga kasuguan mga bugay.

Ano sa banta mo ang buot silingon sang “pagakoronahan … sang mga kasugoan”? (bersikulo 4). Pamensara kon paano ka ginabugayan sang Ginuo samtang ginatinguhaan mo nga tumanon ang tagsa niya ka mga kasuguan sa mga bersikulo 5–19.

Isulat ang imo natun-an. Sa madamo nga kaso, ang espirituhanon nga ihibalo nga imo ginabaton samtang ginatun-an mo ang balaan nga kasulatan makapabakod sang pagtuo sang imo pamilya, mga abyan, kag mga miyembro sa ward. Iistorya sa ila ang imo mga eksperiyensya, mga nabatyagan, kag testimonya parte kay Jesucristo.

Doktrina kag mga Kasugtanan 59:9–19

Ang Adlaw nga Inugsimba adlaw sang Ginuo.

Pagkatapos promisahan nga bendisyunan ang mga Santos sa Sion “sing madamo nga kasugoan,” naghatag ang Ginuo sang espesyal nga pagtalupangod sa isa ka kasugoan: ang sugo nga tahuron ang Iya “balaan nga adlaw” (Doktrina kag mga Kasugtanan 59:4, 9). Samtang imo ginatun-an ang Doktrina kag mga Kasugtanan 59:9–19, binagbinaga kon ngaa nangin importante kuntani kaayo sa sining mga Santos nga tahuron ang Adlaw nga Inugpahuway samtang ginahandum nila nga tukuron ang Sion. Ngaa importante ini sa imo?

Pwede mo man binagbinagon kon bala ginagamit mo ang Adlaw nga Inugpahuway suno sa tuyo sang Ginuo. Paano ang pagtipig nga balaan sang Adlaw nga Inugpahuway nagabulig sa imo nga magpabilin nga “wala’y mantsa sa kalibutan”? (bersikulo 9). Ano ang pwede mo himuon para maghatag sang imo “pagdayaw sa Labing Mataas”? (bersikulo 10).

Siguro matalupangdan mo nga naggamit ang Ginuo sang mga tinaga nga “kalipay,” “pagkasadya,” “masadya,” kag “malipayon” para magtudlo parte sa Adlaw nga Inugpahuway. Ano ang nagapasadya sang Adlaw nga Inugpahuway sa imo? Paano mo ipaathag sa iban kon ngaa ginapili mo nga tahuron ang adlaw sang Ginuo?

Tan-awa man sa Genesis 2:2–3; Isaias 58:13–14.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan

Mga Ideya para sa Pagtudlo sang mga Kabataan

Doktrina kag mga Kasugtanan 58:26–28

Ginhatagan ako sang Amay nga Langitnon sang gahum sa pagpili.

• Ang pagbasa sang Doktrina kag mga Kasugtanan 58:26–28 sing ululupod makahatag sa imo kag sa imo kabataan sang oportunidad para hambalan ang gahum nga ginhatag sa aton sang Amay nga Langitnon sa pagpili nga himuon ang maayo. Pwede ninyo istoryahan ang lainlain nga mga pagpili nga imo ginhimo kag kon ano ang natabo bilang resulta. Basi gusto sang imo kabataan nga idrowing ang ila eksperiyensya.

• Pwede mo isulat ang pagpili sa isa ka parte sang papel kag konsikwensya sa pihak kag gamita ining papel para ipakita nga ang aton mga pagpili kag ang ila mga konsikwensya indi pwede separahon. Basi pwede nga ilista sang imo kabataan ang pila ka mga pagpili kag hambalan ang mga konsikwensya sini. Dayon pwede ninyo basahon sing dungan ang Doktrina kag mga Kasugtanan 58:27–28 kag hambalan ang mga pagpili nga “magpahanabo sing madamo nga pagkamatarong” ukon maayo nga mga konsikwensya. Paano kita “ginapadyaan” ukon ginabugayan sang Amay nga Langitnon kon ginatinguhaan naton nga himuon ang maayo? (bersikulo 28).

Doktrina kag mga Kasugtanan 59:7, 18–21

“Pasalamati ang Ginuo nga imo Dios sa tanan nga butang.”

• Pamensara nga basahon ining mga bersikulo samtang nagalakat ukon magtan-aw kamo sang imo kabataan sang mga litrato, nga ginapat-inan ang mga butang nga “[nagapalipay] sa mata kag … [nagapasadya] sang tagipusuon” (bersikulo 18). Ukon pwede mo hagaron ang imo kabataan nga idrowing ang mga butang nga ginapasalamatan nila kag paistoryaha sila sa imo sang ila mga gindrowing. Paano bala naton mapakita ang aton kapasalamatan sa sining mga butang?

Naghimo ang Ginuo sang madamo nga matahum nga mga butang nga makapalipay sa aton.

Doktrina kag mga Kasugtanan 59:9–12

Ang Adlaw nga Inugsimba adlaw sang Ginuo.

• Ano ang pwede naton himuon kon Domingo para simbahon ang Ginuo kag mangin malipayon? Buligi ang imo kabataan nga magpangita sang mga ideya sa Doktrina kag mga Kasugtanan 59:9–12 kag sa pahina sang kahiwatan sining semana. Basi pwede man sila magpangita sang mga litrato ukon mga bagay nga nagasimbolo sang mga butang nga ginahimo naton sa Adlaw nga Inugpahuway (pareho sang mga litrato sang sakramento sa sining outline). Paano kita ginabuligan sining mga butang nga makabatyag nga mas malapit sa Amay nga Langitnon kag kay Jesucristo?

Para sa dugang nga mga ideya, tan-awa sa isyu sang Abyan nga magasin sini nga bulan.

Ilustrasyon ni Marti Major