Hunyo 23–29: “Nagabili … sang mga Manggad sang Bilog nga Kalibutan”

Doktrina kag mga Kasugtanan 67–70

Halin sang 1828 tubtob 1831, nakabaton si Propetang Joseph Smith sang madamo nga rebelasyon halin sa Ginuo, upod ang diosnon nga laygay para sa mga indibidwal, mga instruksyon sa pagdumala sang Simbahan, mga panan-awon parte sa ulihing mga adlaw, kag madamo nga makainspirar nga mga kamatuoran parte sa wala katapusan. Pero kadamo sang mga Santos nga wala makabasa sang mga ini. Ang mga rebelasyon wala pa mapublikar, kag ang pila ka kopya nga ara, sinulat sa kamot sa pinanid sang papel nga ginapalibot sa mga miyembro kag ginadala-dala sang mga misyonero.

Dayon, sang Nobyembre 1831, nagtawag si Joseph sang konseho sang mga lider sa Simbahan para hambalan ang pagpublikar sang mga rebelasyon. Pagkatapos nga pangayuon ang pagbuot sang Ginuo, naghimo ining mga lider sang plano sa pagpublikar sang Libro sang mga Kasugoan—ang ginsugdan sang Doktrina kag mga Kasugtanan sa karon. Wala madugayi ang tanan makabasa na mismo sang pulong sang Dios nga ginpahayag paagi sa buhi nga propeta, klaro nga ebidensya nga “ang mga yabi sang mga misteryo sang ginharian sang aton Manluluwas sa liwat gintugyan sa tawo.” Tungod sini kag sa madamo pa nga mga rason, ang mga Santos sadto kag karon nagakabig sining mga rebelasyon nga “nagabili … sang mga manggad sang bilog nga Kalibutan” (Doktrina kag mga Kasugtanan 70, tig-ulo sang seksyon).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 67:1–9; 68:3–6

Ang mga alagad sang Ginuo nagahambal sang Iya pagbuot kon ginatandog sang Balaan nga Espiritu.

Ang desisyon sa pagpublikar sang mga rebelasyon nga nabaton ni Joseph Smith daw mahapos lang, pero ang pila sa mga una nga mga lider sang Simbahan indi sigurado kon husto ina nga ideya. Ang isa ka palaligban amo ang indi pagkaperpekto sang pamaagi nga ginsulat ni Joseph Smith ang mga rebelasyon. Ang rebelasyon sa seksyon 67 nag-abot bilang sabat sinang kabalaka. Ano ang imo natun-an parte sa mga propeta kag rebelasyon sang Ginuo sa mga bersikulo 1–9? Ano pa gid nga mga panghunahuna ang imo maagom sa 68:3–6?

Paano mo nahibal-an sa imo kaugalingon nga ang mga rebelasyon nga ginahatag sang Dios sa Iya mga alagad matuod? Pwede mo man binagbinagon ang mga eksperiyensya sang nabatyagan mo ang Ginuo nga nagahambal sa imo paagi sa Iya mga alagad (tan-awa sa Doktrina kag mga Kasugtanan 68:4). San-o mo nabatyagan nga “[gintandog] sang Balaan nga Espiritu” (bersikulo 3) sa paghambal sang isa ka butang? Paano ang Ginuo “nagpabilin sa tupad mo”? (bersikulo 6).

Antes ginpublikar ang Libro sang mga Kasugoan, pila ka mga lider sang Simbahan ang nagpirma sang sinulat nga testimonya nga ang mga rebelasyon sa libro matuod. josephsmithpapers.org.

Doktrina kag mga Kasugtanan 67:10–14

“Magpadayon nga may pagpasensya.”

Paano kita ginapunggan sang kahisa, kahadlok, kag bugal nga mangin mas malapit sa Ginuo? Paano naton malampuwasan ang “kinaandan nga tawo” ukon “dutan-on nga kaisipan” para “makita [naton Sia] kag makahibalo nga buhi [Sia]”? (bersikulo 12; tan-awa man sa Mosias 3:19). Ano ang imo nakita sa sining mga bersikulo nga nagainspirar sa imo nga “magpadayon nga may pagpasensya tubtob nga mangin perpekto kamo”? (bersikulo 13).

Doktrina kag mga Kasugtanan 68:25–31

Makabulig ako nga isentro ang akon puluy-an kay Jesucristo.

Ang mga pulong sang Ginuo sa Doktrina kag mga Kasugtanan 68:25–31 nagatumod gid sa mga ginikanan, pero bisan ginikanan ka ukon indi, magamit mo ang Iya laygay para himuon ang imo bahin para sentruhon ang inyo puluy-an sa doktrina ni Jesucristo. Nalista sa idalom ang pila ka mga prinsipyo nga ginhambal sang Ginuo nga dapat itudlo sa balay. Pamensara kon paano mo himuon ang kada isa sini nga parte sang pundasyon sang nasentro-kay-Cristo nga puluy-an—ang puluy-an nga imo karon ginaestaran ukon ang imo puluy-an sa palaabuton. Makabulig ang mga balasahon kag mga pamangkot nga ari diri.

• Paghinulsol: Tun-i ang Alma 36:17–20, kag tan-awa kon paano ginbugayan si Alma sa kritikal nga panahon tungod gintudloan sia sang iya amay parte sa nagabayad-sala nga misyon sang Manluluwas. Paano mo mainspirar ang imo pamilya nga magdangop kay Jesucristo kag maghinulsol? (tan-awa man sa 2 Nefi 25:26).

• Pagtuo kay Cristo: Basaha ang lima ka suhestyon ni Pangulong Russell M. Nelson sa pagpatubo sang pagtuo sa “Christ Is Risen; Faith in Him Will Move Mountains” (Liahona, Mayo 2021, 103). Binagbinaga kon paano ining mga suhestyon makatuga sang kultura sang pagtuo sa imo pamilya.

• Bunyag: Rebyuha ang kasugtanan sa bunyag nga ginalarawan sa Mosias 18:8–10, 13. Paano makapabakod sa imo pamilya ang imo pagtinguha nga tumanon ining kasugtanan?

• Dulot sang Balaan nga Espiritu: Tun-i ang mga imbitasyon sa pahina 17–19 sang Para sa Kusog sang mga Lamharon: Giya sa Paghimo sang mga Pagpili. Ano ang ginainspirar sa imo nga himuon para imbitaron ang impluwensya sang Balaan nga Espiritu sa inyo puluy-an?

• Ano nga mga bugay ang ginpromisa sang Manluluwas sa 3 Nefi 18:15–21?

• Iban pa nga mga prinsipyo nga imo nakita sa Doktrina kag mga Kasugtanan 68:25–31:

Ano nga laygay ang imo ihatag sa tawo nga ang pamilya wala nagasuporta sa ila mga pagpaninguha nga magpatubo sang pagtuo kay Cristo?

Tan-awa man sa “Ang Panimalay: Isa ka Proklamasyon sa Kalibutan,” Librarya sang Ebanghelyo; Dieter F. Uchtdorf, “Si Jesucristo Amo ang Kusog sang mga Ginikanan,” Liahona, Mayo 2023, 55–59.

Doktrina kag mga Kasugtanan 69:1

Ang “matuod kag masaligan” nga mga abyan nagabulig sa akon nga sundon si Jesucristo.

Ngaa sa banta mo “kinaalam para [sa Ginuo]” nga may “matuod kag masaligan” nga mag-upod kay Oliver Cowdery sa iya tulumanon nga ginlaragway sa sining bersikulo? Paano magamit ining laygay sa imo?

Buligi ang mga nagatuon nga pabakuron ang kada isa. Ang kada indibidwal sa imo klase ukon pamilya isa ka maayo nga bulig sa testimonya, mga ideya, kag eksperiyensya sang pagpangabuhi sang ebanghelyo. Agdaha sila nga magpakigbahin kag pabakuron ang kada isa.

Doktrina kag mga Kasugtanan 70:1–4

May salabton ako sa mga rebelasyon nga ginhatag sang Ginuo.

Ginhatagan sang Ginuo ang pila ka mga elder sang responsibilidad para dumalahan ang pagpublikar sang mga rebelasyon. Bisan nga wala ka sinang partikular nga responsibilidad, ano ang imo pagkatulugyanan ukon responsibilidad “sa mga rebelasyon kag mga kasugoan”? (bersikulo 3).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 67

Ang Doktrina kag mga Kasugtanan nagatudlo sa akon parte kay Jesucristo.

• Sugiri ang imo kabataan kon paano gin-imprinta ang mga rebelasyon ni Joseph Smith sa isa ka libro. Buligi sila nga madumduman ang mga butang nga inyo natun-an parte kay Jesucristo sa Doktrina kag mga Kasugtanan sa sini nga tuig. Pwede man ninyo iistorya sa kada isa ang paborito ninyo nga mga bersikulo sa Doktrina kag mga Kasugtanan.

  Chapter 23: The Doctrine and Covenants: August–November 1831

• Pwede mo man ipakita sa imo kabataan ang Biblia, Libro ni Mormon, Doktrina kag mga Kasugtanan, kag ang Perlas nga Bilidhon kag hambalan upod sa ila kon ano ang ila kinalain kag kon paano sila nangin pareho (tan-awa sa mga paglaragway sining mga libro sa Giya sa Balaan nga mga Kasulatan). Paano naton mahibal-an nga matuod ang balaan nga mga kasulatan? Ano ang natun-an naton sa Doktrina kag mga Kasugtanan 67:4, 9 parte sa mga rebelasyon nga ginhatag sang Ginuo kay Joseph Smith?

Doktrina kag mga Kasugtanan 68:25–31

Pwede ako mabunyagan kon walo ka tuig na ang akon edad.

• Sa Doktrina kag mga Kasugtanan 68:27, ginklaro sang Ginuo kon pila dapat ang edad sang tawo para mabunyagan. Buligi ang imo kabataan nga diskubrehon kon ano ang Iya ginhambal. Ngaa nga gusto ni Jesus nga magpabunyag kita? Makabulig ang kanta parte sa bunyag. Gamit ang mga litrato ukon mga bersikulo 25–31 (ukon ang duha gid), buligi ang imo kabataan nga diskubrehon ang mga butang nga gusto sang Ginuo nga matun-an sang kabataan.

• Basaha upod sa imo kabataan ang tulumanon nga ginhatag sang Ginuo kay Oliver Cowdery sa tig-ulo sang seksyon sang Doktrina kag mga Kasugtanan 69. Ano ang laygay nga ginhatag sang Ginuo sa bersikulo 1? Ngaa importante nga mag-upod sa mga tawo nga “matuod kag masaligan”? Basi pwede nga mag-istorya ang imo kabataan parte sa kilala nila nga “matuod kag masaligan.” Ululupod nga magkanta sang kanta nga nagapaisog sa mga kabataan nga mangin matuod kag masaligan pareho sa Manluluwas. Paano naton masiguro nga matuod kag masaligan kita sa Ginuo? Paano Niya kita magamit para bugayan ang iban kon matuod kita kag masaligan?

Para sa dugang nga mga ideya, tan-awa sa isyu sang Abyan nga magasin sini nga bulan.

Ang Libro sang mga Kasugoan, ang ginsugdan sang Doktrina kag mga Kasugtanan, gin-imprinta sa imprintahan nga pareho sini.