Detalye halin sa Campfire on the Missouri [Dabok sa Kampo sa Missouri], ni Bryan Mark Taylor

Hunyo 9–15: “Kaupod Ako Pirme sang mga Tampad”

Doktrina kag mga Kasugtanan 60–63

Sang primero nga bahin sang Agosto 1831, si Joseph Smith kag ang iban nga mga elder sang Simbahan nagahanda para magballik sa Kirtland pagkatapos sang malip-ot nga pagbisita sa “duta sang Sion” (Doktrina kag mga Kasugtanan 59:3). Gusto sang Ginuo nga iwali nila ang ebanghelyo samtang sila nagabiyahe (tan-awa sa Doktrina kag mga Kasugtanan 52:10), kag ginhimo ini sing matutom sang iban sa ila. Pero ang iban nagapang-alang-alang. “Ginatago nila ang talento nga ginhatag ko sa ila,” siling sang Ginuo, “bangod sang kahadlok sa tawo” (Doktrina kag mga Kasugtanan 60:2). Madamo sa aton ang nakahibalo kon ano ang nabatyagan sining mga elder. Bisan pa nga palangga naton ang ebanghelyo, ang kahadlok kag pagduhaduha pwede nga magpugong sa aton sa pagpakigbahin sini sa iban. Pero maluluy-on ang Ginuo. Sia “nakahibalo sang kaluyahon sang tawo kag kon paano [kita] buligan” (Doktrina kag mga Kasugtanan 62:1). Nagalapta sa sining mga rebelasyon sa nauna nga mga misyonero ang mga pasalig nga makabulig sa aton nga malampuwasan ang aton mga kahadlok kag kapaltahan: “Sarang ko kamo pakabalaanon.” “Ang tanan nga unod yara sa akon kamot.” “Kaupod ako pirme sang mga tampad.” Kag “Sia nga tampad kag nagapadayon mangin madinalag-on sa kalibutan.” (Doktrina kag mga Kasugtanan 60:7; 61:6; 62:9; 63:47.)

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 60; 62

Sarang ko ipakigbahin ang akon pagpalangga kag testimonya kay Jesucristo.

Paano makumparar ang imo testimonya sang ebanghelyo sa “talento,” ukon manggad halin sa Dios? Sa ano nga mga paagi kon kaisa aton “ginatago ang [aton] talento”? (Doktrina kag mga Kasugtanan 60:2; tan-awa man sa Mateo 25:14–30).

Ano nga nagapaisog nga mga mensahe halin sa Ginuo ang imo makita sa mga seksyon 60 kag 62? Paano ginapabakod sining mga mensahe ang imo kompiyansa sa pagpaambit sang ebanghelyo?

Pwede ako mangin bukas parte sa pagpakigbahin sang akon pagtuo kay Cristo.

Doktrina kag mga Kasugtanan 60:2–4; 61:1–2, 20, 36–38; 62:1, 6

Ang balaan nga mga kasulatan nagatudlo parte kay Jesucristo.

Pareho sa Iya ginhambal sa Iya mga misyonero, ginpahayag sang Ginuo ang importante nga mga kamatuoran parte sa Iya. Pangitaa ining mga kamatuoran sa Doktrina kag mga Kasugtanan 60:2–4; 61:1–2, 20, 36–38; 62:1, 6. Ano nga mga panaysayon sa balaan nga kasulatan ang nagalarawan sang nakita mo nga mga papel kag kinaiya sang Manluluwas? (tan-awa halimbawa, sa Juan 8:1–11; Eter 2:14–15).

Doktrina kag mga Kasugtanan 62

Ang akon mga desisyon dapat magbalanse sang “kaalam kag mga direksyon sang Espiritu.”

Ang Ginuo nagahatag sang direksyon parte sa wala katapusan nga mga kamatuoran kag mga prinsipyo, pero kasami ginabilin Niya sa aton ang pagdesisyon sa partikular nga mga detalye kon paano aktohan ining mga prinsipyo. Paano ginapakita ining prinsipyo sa Doktrina kag mga Kasugtanan 62? (tan-awa man sa Doktrina kag mga Kasugtanan 60:5; 61:22). Paano mo nakita ining prinsipyo sa imo kabuhi? Ngaa makapaayo sa aton nga maghimo sang pila ka desisyon nga wala nagapaabot sa Dios nga hambalon kita kon ano mismo ang himuon?

Tan-awa man sa Eter 2:18–25; Doktrina kag mga Kasugtanan 58:27–28.

Doktrina kag mga Kasugtanan 63:7–12

Ang mga tanda nagaabot paagi sa pagtuo kag sa pagbuot sang Dios.

Sa katapusan sining outline, may ilustrasyon sang milagro nga indi gid malimtan ni Ezra Booth: Ang braso ni Elsa Johnson milagroso nga nag-ayo. Sang makita ina, desidido si Ezra nga magpabunyag. Pero, pila lang ka bulan, nawad-an si Ezra sang pagtuo kag nangin kritiko sang Propeta. Paano ini natabo, pagkatapos niya nga makasaksi sang milagro?

Binagbinaga ini samtang imo ginabasa ang Doktrina kag mga Kasugtanan 63:7–12. Ano nga mga kamatuoran ang imo natun-an parte sa mga tanda kag pagtuo?

Tan-awa man sa Mateo 16:1–4; Juan 12:37; Mormon 9:10–21; Eter 12:12, 18.

Doktrina kag mga Kasugtanan 63:16

Sarang ako mangin putli sa akon panghunahuna kag mga aksyon.

Sa Doktrina kag mga Kasugtanan 63:16, ginpabakod sang Manluluwas ang Iya gintudlo sa Bag-ong Katipan—nga ang layi sang kaputli dapat maggahum indi lang sang aton mga aksyon kundi pati man sa aton panghunahuna (tan-awa sa Mateo 5:27–28). Samtang imo ginabasa ang Doktrina kag mga Kasugtanan 63:16, isulat ang mga mga paandam sang Manluluwas parte sa mahigko nga mga hunahuna. Pwede mo man binagbinagon ang kabaliskaran sang tagsa ka paandam. Halimbawa, ano ang mga tinaga ukon dinalan nga baliskad sang kahadlok? Ano pa nga mga bugay ang nagaabot tungod sa matinlo nga mga panghunahuna kag mga aksyon?

Kadamo sang nagapamensar nga ang mga talaksan sang Ginuo parte sa katinlo sang panghunahuna kag aksyon sinadto pa ukon indi gani mapiguson. Ano ayhan ang kinalain kon ang tanan nga anak sang Dios nagatinguha nga ipangabuhi ining layi? Pwede mo pangitaon ang mga sabat sining pamangkot sa “Ang imo lawas sagrado” (Para sa Kusog sang mga Lamharon: Giya sa Paghimo sang mga Pagpili, 23–26). Ano nga mga mensahe sang paglaum ang imo nakita?

Bisan pa nga nakahibalo kita sang mga bugay sang katinlo sa aton mga hunahuna kag aksyon, wala ini nagakahulugan nga mahapos ini. Pwede mo hatagan sang tiyempo nga binagbinagon kon ano ang nagapabudlay sa imo nga sundon ang sulundan sang kaputli sang Manluluwas—kag kon ano ang nagapahapos sini. Ano nga mga tip ang pwede mo ipakigbahin sa iban parte sa kon ano ang himuon kon ginatentar ka sang indi nagakaangay nga mga panghunahuna?

Suportahi ang kada isa. Isa sa dako nga mga bugay sang pagtipon sa mga miting sang Simbahan kag mga klase amo ang oportunidad nga makabaton sang suporta halin sa pareho nga mga Santos sa aton pagpaninguha nga sundon ang Manluluwas. Madamo sa aton ang nagaatubang sang magkaanggid nga mga kabudlayan, kag ang aton palareho nga mga eksperiyensya sarang nga mangin dako nga kusog. Indi mahadlok nga akuon nga may mga kabudlayan ka. Iistorya sa isa kag isa kon ano ang nagabulig sa imo nga ipangabuhi ang mga layi sang Dios kag malampuwasan ang tentasyon.

Tan-awa man sa Doktrina kag mga Kasugtanan 121:45.AddressingPornography.ChurchofJesusChrist.org

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Doktrina kag mga Kasugtanan 63:58–64

Ang sagrado nga mga butang dapat nga tratuhon nga may pagtahod.

Ang mga prinsipyo sa Doktrina kag mga Kasugtanan 63:58–64 masobra pa sa pagsambit sang ngalan sang Ginuo sa wala kapuslanan. Ano pa nga sagrado nga mga butang ang “halin sa ibabaw” ukon halin sa Dios? Ano ang buot silingon sa imo sang ihambal ining mga butang nga “may paghalong”?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 60:4; 61:1–2, 36; 62:1

Ang balaan nga mga kasulatan nagatudlo parte kay Jesucristo.

• Siguro pwede mo man isulat ang mga pahayag parte sa Manluluwas nga makita sa Doktrina kag mga Kasugtanan 60–62 sa magagmay nga papel. Dayon pwede nga pareson sang imo kabataan ining mga pahayag sa mga litrato ni Jesus halin sa Iya dutan-on nga pag-alagad (tan-awa sa Libro sang mga Larawan nga Pang-Ebanghelyo, no. 34–61) nga nagapakita sining mga kinaiya. Paano Niya ginapakilala sa aton ang Iya Kaugalingon sa karon nga panahon?

  

Detalye halin sa For This Purpose [Sa Sining Tuyo], ni Yongsung Kim

Doktrina kag mga Kasugtanan 60:7; 61:1–2; 62:1

Patawaron ako sang Ginuo kon maghinulsol ako.

• Samtang ginabasa mo ang Doktrina kag mga Kasugtanan 60:7; 61:2 upod sa imo kabataan, buligi sila nga pangitaon ang mga tinaga nga magkapareho sa sining mga bersikulo. Padumduma sila nga ining mga rebelasyon ginhatag kay Joseph Smith kag sa iban pa nga mga lider sang Simbahan. Ano ang gusto sang Ginuo nga mahibal-an nila? Pwede man ninyo hambalan kon ano ang nagakabatyagan sang Manluluwas sa aton kon maghimo kita sang mga sala kag kon ano ang buot silingon sang maghinulsol. Suno sa Doktrina kag mga Kasugtanan 62:1, paano makabulig si Jesus kon ginatentar kita?

Doktrina kag mga Kasugtanan 62:3, 9

Gusto ni Jesucristo nga ipakigbahin ko ang Iya ebanghelyo.

• Pwede mo pamangkuton ang imo kabataan kon ano ang ihambal nila kon may mamangkot sa ila kon ano ang ila nanamian parte kay Jesucristo kag sa Iya Simbahan. Ang ululupod nga pagkanta sang kanta parte sa pagpakigbahin sang ebanghelyo makahatag sa ila sang mga ideya. Pwede ninyo dayon basahon ang Doktrina kag mga Kasugtanan 62:3 kag pangabaya ang imo kabataan nga pamatian kon ano ang matabo kon ipakigbahin naton ang aton mga testimonya. Paano makabulig ang promisa sa bersikulo 9 kon ginakulbaan kita?

Doktrina kag mga Kasugtanan 63:64

Sarang ko mangin matinahuron.

• Para sugdan ang Doktrina kag mga Kasugtanan 63:64, pwede kamo magkanta sang imo kabataan sang kanta parte sa pagtahod. Dayon pwede ninyo hambalan ang lainlain nga paagi sang pagpakita sang pagtahod sa Amay nga Langitnon kag kay Jesucristo.

• Pwede mo buligan ang imo kabataan nga maintiendihan kon ano ang pagtahod paagi sa pag-istorya sa ila parte sa isa ka butang nga espesyal para sa ila, pareho sang paborito nga hampanganan, libro, ukon habol. Pamangkuta sila kon paano nila ginahalungan kag ginaprotektahan ang mga butang nga espesyal sa ila. Dayon pwede ninyo basahon sing dungan ang Doktrina kag mga Kasugtanan 63:64. Ano nga mga butang ang espesyal—ukon sagrado—sa Amay nga Langitnon? (tan-awa halimbawa, sa bersikulo 61 kag sa pahina sang kahiwatan sini nga semana). Paano dapat naton tratuhon ining mga butang—sa aton hambal kag sa aton mga aksyon?

Para sa dugang nga mga ideya, tan-awa sa isyu sang Abyan nga magasin sini nga bulan.

Healing of Elsa Johnson’s Shoulder [Pag-ayo sang Abaga ni Elsa Johnson], ni Sam Lawlor