Daviess County, Missouri

Hunyo 16–22: “Ginapangayo sang Ginuo ang Tagipusuon kag Handa nga Panghunahuna”

Doktrina kag mga Kasugtanan 64–66

Sa nagatagiti nga init sang Agosto 1831, pila ka elder ang nagapanglakaton pabalik sa Kirtland halin sa duta sang Sion sa Missouri. Ang mga nagbiyahe ginagin-utan kag kapoy, kag ang pagkairitable madasig nga nangin pag-ilinaway. Dawsa ang pagtukod sang Sion, ang siyudad sang gugma, pag-isa, kag paghidaet, magakinahanglan sing malawig nga panahon.

Maayo lang, ang pagtukod sang Sion—sa Missouri sang 1831 ukon sa aton mga tagipusuon, mga pamilya, kag mga ward sa karon—wala nagapangayo nga mangin perpekto kita. Kundi, “sa inyo ginamando nga [magpatawad],” siling sang Ginuo (Doktrina kag mga Kasugtanan 64:10). Ginapangayo Niya “ang tagipusuon kag handa nga panghunahuna” (bersikulo 34). Kag nagapangayo Sia sing pasensya kag katutom, kay ang Sion ginatukod sa pundasyon sang “magagmay nga mga butang,” kag ginatapos sang mga wala naga-“[luya] sa paghimo sang maayo” (bersikulo 33).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 64:1–11

“Patawaron ninyo ang isa kag isa.”

Pamensara ang masunod samtang ginatun-an mo ang Doktrina kag mga Kasugtanan 64:1–11:

• Panumduma ang panahon nga ginpatawad ka sang Ginuo. Ano ang imo nabatyagan?

• May kinahanglan ka bala nga patawaron? Ngaa mabudlay ang magpatawad sang iban? Ano ang nagabulig sa imo nga malampuwasan ini nga mga kabudlayan?

• Ano nga mga kamatuoran parte sa pagpatawad sa Doktrina kag mga Kasugtanan 64:1–11 ang daw importante sa imo? Ngaa sa banta mo nga ginasugo kita sang Ginuo nga “patawaron ang tanan”? (bersikulo 10).

Kon ginabudlayan ka sa pagpatawad, pamensara nga tun-an ang mensahe ni Kristin M. Yee nga “Purongpurong sa Baylo sang mga Abo: Ang Nagapang-ayo nga Dalan sang Kapatawaran” (Liahona, Nob. 2022, 36–38). Ano ang imo natun-an kon paano makabulig sa imo si Cristo nga magpatawad?

Ang mga kaangtanan sa pamilya makahatag sang madamo nga mga oportunidad sa pagpatawad. Hunahunaa ang mga miyembro sang imo pamilya. Sin-o ang kinahanglan mo nga patawaron? Paano kita “ginapaantos” (bersikulo 8) kon indi naton pagpatawaron ang isa kag isa? Paano makaapekto sa imo mga relasyon sa pamilya ang pagpatawad?

Forgiveness: My Burden Was Made Light

After a man loses his wife and several children in a car accident, he finds healing and is able to forgive the offending driver through the power of Jesus Christ.

“Dapat patawaron ninyo ang isa kag isa” (Doktrina kag mga Kasugtanan 64:9).

Doktrina kag mga Kasugtanan 64:31–34

Ginapangayo sang Ginuo ang akon “tagipusuon kag handa nga panghunahuna.”

Nakabatyag ka na bala nga “nagaluya” sa tanan nga “paghimo sang maayo” nga gusto mo malab-ot? Pangitaa ang mensahe sang Ginuo para sa imo sa Doktrina kag mga Kasugtanan 64:31–34. Ano ang gusto ipahimo sa imo sang Ginuo para ipahanabo ang Iya “dako nga buluhaton”?

Magpamensar sang object lesson nga magapaathag sang bersikulo 33—inang dako nga butang nga himo sa magagmay nga butang, pareho sang mosaic ukon bilding nga himo sa tisa (bricks). Ano nga “magagmay nga mga butang” ang pwede mo himuon adlaw-adlaw para “[magpasad] sang pundasyon” sang dako nga buluhaton sang Dios? Ano ang mga halimbawa sang “dako nga buluhaton” nga ginhatag sa imo sang Ginuo?

Doktrina kag mga Kasugtanan 64:31–34

“Ang tagipusuon kag handa nga panghunahuna”

Si Elder Donald L. Hallstrom nagpanugyan sining posible nga kahulugan sang dinalan nga “tagipusuon kag handa nga panghunahuna”:

“Ang tagipusuon nagasimbolo sang pagpalangga kag dedikasyon. Nagasakripisyo kita kag nagapas-an sang mga kabudlayan para sa aton mga ginapalangga nga indi naton pag-agwantahon sa iban nga rason. Kon wala sang pagpalangga, nagapigaw ang aton dedikasyon. …

“Ang pag-angkon sang ‘handa nga panghunahuna’ nagakahulugan nga ginahatag naton ang aton masarangan kag pinakamataas nga pamensaron kag ginapangayo ang kaalam sang Dios. Ginapakita sini nga ang aton pinakatutom nga bilog-kinabuhi nga pagtuon dapat parte sa mga butang nga wala katapusan ang kinaiya. Buot silingon nga kinahanglan may indi maseparar nga relasyon sa pagpamati sang pulong sang Dios kag pagtuman sini” (“The Heart and a Willing Mind,” Ensign, Hunyo 2011, 31–32).

Doktrina kag mga Kasugtanan 64:41–43

Ang Sion mangin “bandera sa katawhan.”

Ang bandera “isa ka hayahay (flag) ukon sulundan kon diin nagatipon ang mga tawo sa pag-isa sang katuyuan ukon pagpakilala (Guide to the Scriptures, “Ensign,” Librarya sang Ebanghelyo). Paano ang Sion—ukon ang Simbahan sang Ginuo—nangin pareho sang bandera sa imo? Pamensara ining iban pa nga mga halimbawa sang mga butang nga ginaalsa, pareho sang bandera, para bugayan ang katawhan: Numeros 21:6–9; Mateo 5:14–16; Alma 46:11–20. Magpangita sang iban pa nga pamaagi nga ginalaragway sang Ginuo ang Sion sa Doktrina kag mga Kasugtanan 64:41–43.

Doktrina kag mga Kasugtanan 65

Ang ginharian sang Dios sa duta nagahanda sang kalibutan para sa pagbalik sang Manluluwas.

Ang Doktrina kag mga Kasugtanan 65 nagahatag sang makainspirar nga paglarawan sang misyon sang Simbahan sang Ginuo sa ulihing mga adlaw. Pamensara nga basahon ining seksyon, nga ginapangita ang mga sabat sa mga pamangkot nga pareho sini: Ano ang gusto sang Ginuo nga matigayon sang Iya ginharian sa duta? Ano ang gusto Niya nga himuon ko para magbulig?

Prepare Today for the Second Coming

(Joseph Smith—Matthew 1:46–54; Matthew 24:42–51) An excerpt from “Preparation for the Second Coming,” Ensign or Liahona, May 2004, 8–9.

Doktrina kag mga Kasugtanan 66

Nahibal-an sang Ginuo ang mga panghunahuna sang akon tagipusuon.

Wala madugay pagkatapos nga magsulod sa Simbahan, ginpangabay ni William E. McLellin si Joseph Smith nga ipahayag ang pagbuot sang Dios para sa iya. Wala makahibalo si Joseph, pero si William may lima ka personal nga mga pamangkot nga iya ginalauman sabton sang Ginuo paagi sa Iya Propeta. Wala kita kahibalo kon ano ang mga pamangkot ni William, pero ang rebelasyon para sa iya, nga amo karon ang Doktrina kag mga Kasugtanan 66, nagsabat sang tagsa ka pamangkot “sa lubos kag bug-os nga pagkakontento” ni William (“William McLellin’s Five Questions,” sa Revelations in Context, 138).

Samtang ginabasa mo ang seksyon 66, pamensara kon ano ang nahibal-an sang Ginuo parte kay William McLellin kag sa mga kabalaka kag tinutuyo sang iya tagipusuon. Paano ginpakita sang Ginuo sa imo nga kilala ka Niya? Kon may bendisyon ka sang patriarka, pamensara nga basahon ini. Samtang ginahimo mo ini, ano ang ginabulig paintiendi sa imo sang Balaan nga Espiritu parte sa pagbuot sang Dios sa imo?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 64:7–10

Gusto ni Jesucristo nga patawaron ko ang tanan.

Tanda: Sa pagtudlo mo sa imo kabataan parte sa sugo sang Ginuo nga “patawaron ang tanan,” klaroha nga ang pagpatawad wala nagakahulugan nga tugotan naton ang mga tawo nga sakiton kita. Paisoga sila nga isugid sa masaligan nga hamtong kon may magsakit sa ila ukon magtandog sa ila sing indi nagakabagay.

• Pagkatapos nga basahon ang Doktrina kag mga Kasugtanan 64:10 upod sa imo kabataan, hambali upod sa ila kon ano ang buot silingon sang magpatawad. Pwede ka maghatag sang simple nga mga halimbawa. Basi pwede nila i-role play ining mga halimbawa para magpraktis sa pagpatawad.

• Pwede mo pangabayon ang imo kabataan nga planuhan kon paano nila itudlo sa iban—pareho sang manghod—ang pagpatawad sa iban. Buligi sila nga magpangita sang mga dinalan sa Doktrina kag mga Kasugtanan 64:7–10 nga pwede nila gamiton samtang nagatudlo sila.

• Magkanta sang kanta parte sa pagpatawad. Ano ang ginatudlo sa aton sining kanta parte sa pagpatawad sa iban?

Doktrina kag mga Kasugtanan 64:33

Ang “dako nga buluhaton” sang Dios gintukod sa “magagmay nga mga butang.”

• Pwede ka magpakita sa imo kabataan sang mga bagay nga may magagmay mga mga parte, pareho sang puzzle ukon rug. Dayon pwede ninyo basahon sing dungan ang Doktrina kag mga Kasugtanan 64:33. Ano ang “dako nga buluhaton” sang Dios? Ano ang “magagmay nga mga butang” nga pwede naton himuon para makabulig?

Doktrina kag mga Kasugtanan 64:34

Sarang ko sundon si Jesus sa akon tagipusuon kag hunahuna.

• Samtang ginabasa mo sa imo kabataan ang Doktrina kag mga Kasugtanan 64:34, pwede mo itudlo ang imo dughan kag ulo kon mabasahan mo ang “tagipusuon” kag “hunahuna,” kag hagaron ang mga kabataan nga himuon man ini upod sa imo. Paano naton ihatag ang aton mga tagipusuon (mga handum) kag mga hunahuna (pamensaron) sa Manluluwas?

Ipaathag ang ehemplo ni Jesucristo Pamensara kon paano mo ipaathag ang ehemplo sang Manluluwas samtang nagatuon ukon nagatudlo ka. Halimbawa, samtang nagatudlo parte sa Doktrina kag mga Kasugtanan 64:34, pwede ninyo hambalan sang imo kabataan kon paano ginhatag sang Manluluwas ang Iya tagipusuon (mga handum) kag hunahuna (pamensaron) sa Iya Amay sa Langit. (Tan-awa sa Pagtudlo sa Paagi sang Manluluwas, 6.)

Doktrina kag mga Kasugtanan 66

Kilala kag palangga ako sang Ginuo.

• Buligi ang imo kabataan nga maintiendihan ang lima ka mga pamangkot ni William E. McLellin sa Ginuo. Nabaton ni Joseph Smith ang mga sabat sa sining mga pamangkot bisan nga wala sia makahibalo kon ano ang mga pamangkot ni William. Sugiri ang imo kabataan parte sa tion nga ginpakita sang Ginuo sa imo kon ano ang Iya gusto ipahimo sa imo, kag iistorya ang mga bugay nga nag-abot kay ginsunod mo ang Iya sugo. Pwede ninyo dayon basahon ang Doktrina kag mga Kasugtanan 66:4 sing dungan kag hagara ang imo kabataan nga magpangita sang mga oportunidad nga maintiendihan kon ano ang gusto ipahimo sa ila sang Ginuo.

  

  Detalye halin sa The Second Coming [Ang Ika-Duhang Pagkari], ni Kevin Keele

Doktrina kag mga Kasugtanan 65

Makabulig ako sa paghanda sang kalibutan sa pagbaton kay Jesucristo.

• Samtang ginatan-aw sang imo kabataan ang litrato sang Ika-duhang Pagkari sang Manluluwas, ipalaragway sa ila kon ano ang ila nakita ukon ano ang ila nahibal-an parte sining hitabo. Pwede mo man hatagan ang imo kabataan sang mga tinaga ukon dinalan parte sa Ika-duha nga Pagkari nga pangitaon sa Doktrina kag mga Kasugtanan 65. Ano ang ginatudlo sa aton sining mga tinaga kag dinalan? Paano naton handaan ang pagbalik sang Manluluwas?

Para sa dugang nga mga ideya, tan-awa sa isyu sang Abyan nga magasin sini nga bulan.

Forgiven [Ginpatawad], ni Greg K. Olsen.