I Will Remember the Covenant [Dumdumon ko ang Kasugtanan], ni Enrique Manuel Garcia

Hunyo 30–Hulyo 6: “Wala sang Armas nga Ginhimo batok sa Inyo ang Magmadinalag-on”

Doktrina kag mga Kasugtanan 71–75

Halin sang bata pa sia, nagpangatubang na si Joseph Smith sang mga kritiko—bisan mga kaaway—samtang iya ginatinguhaan nga himuon ang buluhaton sang Dios. Pero sigurado nga nangin mabudlay kaayo sang manugtapos ang 1831 sang nagsugod si Ezra Booth sa pagpakanubo sang Simbahan, tungod sa sini nga hugada ang kritiko isa ka tumuluo sang una. Nakita ni Ezra si Joseph nga gingamit ang gahum sang Dios para paayuhon ang isa ka babayi. Ginhagad sia nga updan si Joseph sa una nga pag-usisa sa duta sang Sion sa Missouri. Pero sugod sadto nawad-an na sia sing pagtuo kag, para gub-on ang Propeta, nagpagwa sang serye sang mga sulat sa isa ka peryodiko sa Ohio. Kag ang iya mga pagpaninguha daw nagabunga, tungod “ang di-maayo nga mga balatyagon … nagluntad batok sa Simbahan” sa sina nga lugar (Doktrina kag mga Kasugtanan 71, tig-ulo sang seksyon). Ano ang dapat himuon sang mga tumuluo sa amo sina nga sitwasyon? Bisan nga indi lang isa ang husto nga sabat sa tagsa ka sitwasyon, dawsa masami—pati na sa sining kaso sang 1831—dala sa sabat sang Ginuo nga pangapinan ang kamatuoran kag tadlungon ang sala nga impormasyon paagi sa “pagbantala [sang] ebanghelyo” (bersikulo 1). Huo, ang buluhaton sang Ginuo may mga kritiko gid pirme, pero sa ulihi, “wala sang armas nga ginhimo batok [diri] ang magmadinalag-on” (bersikulo 9).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 71

Ang Espiritu magagiya sa akon samtang ginabantala ko ang ebanghelyo sang Manluluwas.

Kabudlay gid kon magsugod na ang mga tawo sa paghikay ukon pagpasipala sang imo pagtuo sa Manluluwas, sa Iya ebanghelyo, ukon sa Iya Simbahan. Kon nagakatabo ini, ano ang ginahimo mo? Daw pareho man sina ang natabo sa Ohio sang 1831 (tan-awa sa tig-ulo sang seksyon sang Doktrina kag mga Kasugtanan 71). Ano ang ginhambal sang Ginuo kay Joseph Smith kag Sidney Rigdon nga ila himuon sa Doktrina kag mga Kasugtanan 71? Basi pwede mo ilista ang mga instruksyon nga ginhatag sang Ginuo sa ila kag ang mga bugay nga Iya ginpromisa.

Dugang pa sa pagtuon sang seksyon 71, pwede mo man tun-an kon paano ginsabat sang Manluluwas ang Iya mga kritiko sang nagaalagad pa Sia sa duta. Ari ang mga halimbawa: Mateo 22:15–22; 26:59–64; Juan 10:37–38. Ano ang imo matun-an sa Iya? Ano ang dugang nga mga ideya ang imo nakuha sa Mateo 18:15; Mga Taga-Efeso 4:31–32; 2 Timoteo 3:12; Santiago 1:19?

Paano ayhan magamit ang Iya laygay sa mga kahimtangan nga imo ginaatubang sa karon? Pwede mo man pamensaron ang mga pamaagi nga matadlung sing matawhay ang sala nga mga pagpati sa imo kaugalingon nga pulong. Halimbawa, pwede mo sugdan paagi sa pagpahayag sang respeto sa panan-awan sang iban nga tawo, kag dayon pwede mo iistorya sa mapainubuson kag matinahuron nga paagi ang imo mga ginapatihan parte kay Jesucristo kag sa sa Iya mga pinanudlo. Para handaan ini nga mga okasyon, basi pwede mo praktisan ini nga pamaagi upod sa mga abyan ukon mga miyembro sang pamilya.

Tan-awa man sa “Pagpalangga sa Iban kag Pagpangabuhi nga Upód ang Mga Kinatuhay,” Liahona, Nob. 2014, 25–28.

Doktrina kag mga Kasugtanan 72

Ginabugayan ako sang Ginuo paagi sa pag-alagad sang mga lider pareho sang mga bishop.

Sang gintawag si Newel K. Whitney nga mag-alagad bilang bishop, ang iya mga tulumanon lain gawa sangsa mga bishop sa karon. Halimbawa, gindumalahan ni Bishop Whitney ang pagkonsagrar sang propiyedad kag ang pahanugot nga mag-estar sa duta sang Sion sa Missouri. Pero samtang ginabasa mo ang parte sa iya calling sa Doktrina kag mga Kasugtanan 72, mahimo nga matalupangdan mo ang pila ka koneksyon sa mga ginahimo sang mga bishop sa karon—bisan man lang sa katuyoan, kon indi gid man ang detalye, sang ila mga tulumanon.

Halimbawa, sa ano nga mga paagi ka “nagahatag sang pagsaysay” sa imo bishop? (bersikulo 5). Sa aton panahon, “ang balay-talagoan sang Ginuo” mahimo maglakip sang mga donasyon, serbisyo, kag mga talento sang mga miyembro sa ward (tan-awa sa mga bersikulo 10, 12). Paano ka mag-amot sa sinang balay-talagoan?

Paano kamo ginbugayan sang imo pamilya paagi sa pagserbisyo sang bishop?

Tan-awa man sa Quentin L. Cook, “Mga Bishop—Mga Manugpahalab sang Panong sang Ginuo,” Liahona, Mayo 2021, 56–60.

Doktrina kag mga Kasugtanan 73

Madamo ako sang mga oportunidad para ipakigbahin ang ebanghelyo sang Manluluwas.

Sang magbalik si Joseph Smith kag Sidney Rigdon halin sa ila misyon (tan-awa sa Doktrina kag mga Kasugtanan 71), ginsilingan sila sang Ginuo nga padayunon ang paglubad nila sang Biblia (tan-awa sa Guide to the Scriptures, “Joseph Smith Translation,” Librarya sang Ebanghelyo). Pero indi buot silingon nga gusto Niya nga untatan na nila ang pagpakigbahin sang ebanghelyo. Tungod bahin ina sang kabuhi sang isa ka disipulo.

Samtang ginabasa mo ang Doktrina kag mga Kasugtanan 73, pamensara kon paano mo himuon ang pagpakigbahin sang ebanghelyo nga sige-sige, “mahimo” (bersikulo 4)—ukon posible—nga parte sang imo kabuhi upod sa imo iban pa nga mga responsibilidad.

Ang pagpakigbahin sang ebanghelyo ni Jesucristo pwede mangin normal kag natural.

Doktrina kag mga Kasugtanan 75:1–16

“Magpangabudlay sa inyo ikasarang … [sa pagbantala sang] kamatuoran.”

Ang rebelasyon sa seksyon 75 ginpatungod sa mga tawo nga “naghatag sang [ila] mga ngalan agud maglakat sa pagbantala sang ebanghelyo [sang Manluluwas]” (bersikulo 2). Isa ka paagi para tun-an ining rebelasyon amo ang paghimo sang duha ka listahan: (1) kon paano ipakigbahin ang ebanghelyo sing epektibo kag (2) kon paano kita ginabugayan kag ginasuportahan sang Ginuo samtang ginahimo naton ini.

Ano sa banta mo ang buot silingon sang “magpahinay-hinay” ukon “mangin matamad” sa pagpakigbahin sang ebanghelyo? Ano ang hitsura sang “magpangabudlay sa inyo ikasarang”? (bersikulo 3).

Tan-awa man sa “Indi sa Kataas sang Bukid [I’ll Go Where You Want Me to Go],” Mga Himno kag mga Ambahanon sang Kabataan, no. 46.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 71

Mapangapinan ko ang kamatuoran paagi sa paghambal sang akon testimonya.

• Pwede mo gamiton ang tig-ulo sang seksyon sang Doktrina kag mga Kasugtanan 71 para itudlo sa imo kabataan ang mga sirkumstansya nga ginhalinan sang seksyon 71. Dayon buligi sila nga diskubrehon sa bersikulo 1 kon ano ang gusto sang Ginuo nga himuon ni Joseph kag Sidney parte sa “indi maayo nga mga balatyagon” kontra sa Simbahan. Suno sa Iya paano Niya sila buligan? Paano kita mangin pareho kay Joseph kag Sidney?

  Chapter 25: Joseph Smith and Sidney Rigdon Go on a Mission: December 1831–January 1832

• Pwede man kamo magkanta sang kanta nga nagainspirar sang inyo kabataan nga mangin tampad sa Manluluwas. Buligi ang imo kabataan nga praktisan kon paano iistorya ang ila mga nahibal-an parte kay Jesucristo.

Doktrina kag mga Kasugtanan 72:2

Ang Ginuo nagtawag sang bishop para buligan ako.

• Ang pagbasa sang Doktrina kag mga Kasugtanan 72:2 sing ululupod makabukas sang oportunidad para hambalan kon ngaa ginahatagan kita sang Ginuo sang mga bishop. Pwede kamo magpangita sang imo kabataan sang mga litrato ukon mga bagay nga nagasimbolo sang mga responsibilidad sang bishop. Ang litrato kag pahina sang kahiwatan sa katapusan sining outline makahatag sa imo sang mga ideya. Dayon pwede ninyo hambalan sing ululupod ang mga bishop nga kilala ninyo kag kon paano ginbugayan sang Ginuo ang inyo pamilya paagi sa ila pagserbisyo.

  Chapter 17: The First Bishops of the Church: February and December 1831

Magtudlo pirme parte kay Jesucristo. “Bisan ano ang imo ginatudlo, tandai nga nagatudlo ka parte kay Jesucristo kag kon paano mangin pareho sa Iya” (Pagtudlo sa Paagi sang Manluluwas, 6). Halimbawa, kon magtudlo ka sa imo kabataan parte sa mga bishop, ipaathag nga mga representante sila ni Jesucristo, nga gintawag Niya para himuon ang Iya buluhaton (tan-awa sa 1 Pedro 2:25).

Ginapangayo sang Ginuo sa mga bishop nga atipanon ang mga tawo nga nagakinahanglan.

Doktrina kag mga Kasugtanan 75:3

Sarang ko ihatag ang tanan ko nga masarangan para sa Ginuo.

• Para hambalan ang kinalain sang “mangin matamad” kag “magpangabudlay sa [ila] ikasarang,” basi pwede ka magpili sang serbisyo ukon buluhaton sa balay kag hagaron ang imo kabataan nga ipakita kon paano ini himuon nga tinamaran kag dayon himuon ini sa tanan nila nga masarangan. Samtang ginabasa ninyo ang “indi mangin matamad” sa Doktrina kag mga Kasugtanan 75:3, pwede nga ipakita sang imo kabataan kon paano nila himuon ang mga ulobrahon sa balay nga tinamaran. Dayon kon basahon ninyo ang “kundi magpangabudlay sa inyo ikasarang,” pwede nila ipakita kon paano sila magpangabudlay sing todo. Ngaa importante nga himuon naton ang tanan naton nga ikasarang kon magserbisyo sa Ginuo?

Para sa dugang nga mga ideya, tan-awa sa isyu sang Abyan nga magasin sini nga bulan.

Recognizing the Tender Mercies in Your Life [Pagkilala sang Hamili nga mga Kaluoy sa Imo Kabuhi], ni Keith Larson