Detalye halin sa Christ and the Rich Young Ruler [Si Cristo kag ang Manggaranon nga Lamharon nga Manugdumala], ni Heinrich Hofmann

Hulyo 21–27: Kon sa Diin “Madamo ang Ginhatag, Madamo ang Ginapangayo”

Doktrina kag mga Kasugtanan 81–83

Sang Marso 1832, gintawag sang Ginuo si Jesse Gause nga mangin manuglaygay ni Joseph Smith sa Pangulohan sang Mataas nga Pagkapari (nga karon ginatawag na nga Unang Pangulohan). Ang Doktrina kag mga Kasugtanan 81 rebelasyon kay Brother Gause parte sa bag-o niya nga calling. Pero kay wala magserbisyo si Jesse Gause sing matutom, gintawag si Frederick G. Williams para buslan sia. Gin-islan sang ngalan ni Brother Williams ang ngalan ni Brother Gause sa rebelasyon.

Daw gamay lang ini nga detalye, pero nagakahulugan ini sang importante nga kamatuoran: kalabanan sa mga rebelasyon sa Doktrina kag mga Kasugtanan nagatumod sa partikular nga mga tawo, pero pwede gid kita magpangita sang mga paagi nga magamit ini sa aton kaugalingon (tan-awa sa 1 Nefi 19:23). Kon basahon naton ang laygay sang Ginuo kay Frederick G. Williams nga “pabaskoga ang mga tuhod nga maluya,” pwede naton hunahunaon ang mga tawo nga pwede naton pabaskugon (Doktrina kag mga Kasugtanan 81:5). Kon mabasa naton ang imbitasyon sang Ginuo sa mga miyembro sang United Firm nga “magpromisa kamo paagi sining kasugtanan,” pwede naton hunahunaon ang aton kaugalingon nga mga kasugtanan. Kag pwede naton basahon ang Iya promisa, “Ako … mapilitan nga magtuman sang mga promisa kon ginahimo ninyo ang akon ginasiling,” nga daw Sia mismo ang nagahambal sa aton (Doktrina kag mga Kasugtanan 82:10, 15). Pwede naton ini himuon tungod kay, sa ginhambal sang Ginuo, “Kon ano ang ginahambal ko sa isa ginahambal ko sa tanan” (bersikulo 5).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 81:4–5; 82:18–19

“Magahimo ka sing labing dako nga kaayohan sa imo mga isigkatawo.”

Sa pila ka dinalan sa Doktrina kag mga Kasugtanan 81–83, ginaimbitar kita sang Ginuo nga buligan ang mga tawo nga nagakinahanglan sa aton palibot. Pamensara nga markahan ang mga dinalan kon makita mo ang mga ini. Isa sa pinakaathag nga halimbawa ara sa Doktrina kag mga Kasugtanan 81:4–5. Ari ang pila ka pamangkot para buligan ka nga binagbinagon ining mga bersikulo:

• Ano ang pila sa mga paagi nga mangin “maluya” ang isa ka tawo? Ano ang buot silingon sang “magabulig” sa ila? San-o nakabulig sa akon ang Cristohanon nga serbisyo sang iban sang daw maluya ako?

• Ano ayhan ang rason nga “magpalamuypoy” ang mga kamot sang tawo? Paano ko “ibayaw” inang mga kamot?

• Ano ayhan ang buot silingon sang “mga tuhod nga maluya”? Paano ini mangin mabakod?

Paano ginahimo sang Manluluwas ining mga butang sa imo?

Basi ang pagtuon sining bersikulo makapadumdom sa imo sang tawo nga pwede mo “buligan,” “bayawon,” ukon “pabaskugon.” Ano ang imo himuon para magminister sa sina nga tawo?

Ano pa ang imo natun-an parte sa pagserbisyo sa iban sa Doktrina kag mga Kasugtanan 82:18–19?

Teachings of Thomas S. Monson: Rescuing Those in Need

Bishop Thomas Monson and his ward welcome a poor German family into their community, providing them with housing, warmth, and food for Christmas.

Tan-awa man sa Jacob 2:17–19; Mosias 18:8–9.

Works of God

Two families share how they have seen the works of God made manifest in their lives as ward members reach out in love and understanding.

Carl Heinrich Bloch (1834–1890), Christ Healing the Sick at Bethesda [Si Cristo nga Nagaayo sang Masakiton sa Betesta], 1883, oil sa canvas, 256 x 319 ka sentimetro. Brigham Young University Museum of Art, ginbakal gamit ang pondo nga ginhatag ni Jack R. kag Mary Lois Wheatley, 2001.

Doktrina kag mga Kasugtanan 82:3

Ang Manluluwas madamo sang ginhatag sa akon kag nagapangayo sang dako sa akon.

Ang pagbasa sining bersikulo mahimo nga magtulod sa imo nga rebyuhon kon ano ang ginhatag sang Dios sa imo—ang pareho pisikal kag espiritwal nga mga bugay. Tandai ini samtang ginabasa mo ang bilog nga seksyon 82. Ano sa pamatyag mo ang ginapangayo sang Dios sa imo?

Doktrina kag mga Kasugtanan 82:8–10

Ang mga kasuguan ebidensya sang pagpalangga sang Dios sa aton.

Kon ikaw ukon ang isa mo ka kilala nakapanghunahuna kon ngaa nagahatag ang Ginuo sang damo-damo nga mga kasuguan, basi makabulig ang Doktrina kag mga Kasugtanan 82:8–10. Ano nga mga panghunahuna sa sining mga bersikulo ang makabulig sa imo sa pagpaathag sa isa ka tawo kon ngaa ginapili mo nga sundon ang mga kasuguan sang Ginuo? Ano ang pwede mo ikumparar sa mga kasuguan nga basi makabulig? Makakita ka sang dugang nga mga ideya sa Doktrina kag mga Kasugtanan 1:37–38; 130:20–21. Ano nga mga eksperiyensya ang nagtudlo sa imo nga kabigon ang mga kasuguan bilang mga bugay?

Blessed and Happy Are Those Who Keep the Commandments of God

Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1

Panumduma ang mga kasuguan nga ginhatag sang Dios sa imo. Ano ang ginatudlo sa imo sining mga kasuguan parte sa Iya kag sa Iya pagbuot? (tan-awa sa bersikulo 8). Paano naapektuhan ang imo kabuhi sang pagtuman sining mga kasuguan?

Ano ang imo natun-an parte sa Ginuo sa bersikulo 10? Ano sa banta mo ang buot silingon sang “mapilitan”? (tan-awa man sa bersikulo 15).

Paano gintuman sang Ginuo ang Iya mga promisa sa imo kabuhi? Ano ang isiling mo sa tawo nga wala sang motibasyon nga tumanon ang mga kasuguan tungod wala nila mabaton ang mga bugay nga ila ginapaabot?

Doktrina kag mga Kasugtanan 82:10

Ginabugayan kita sang Ginuo sa matahum Niya nga pamaagi.

Si Sister Virginia H. Pearce, miyembro sadto sang Young Women General Presidency, nag-istorya parte sa isa ka babayi nga grabe ang kabalaka sa iya kabataan nga nagahimo sang indi matarong nga mga pagpili. Halos nagasala-sala, ginhimo niya ang tanan nga iya mapensaran para pangayuon ang mga bugay sang Ginuo para sa ila. Dugang pa sa hugot nga pangamuyo, naghimo sia sang mataas nga lalab-uton nga mas magkadto pa gid pirme sa templo kag sigurado sia nga tamdon sang Ginuo ining dako nga sakripisyo paagi sa pagbag-o sang mga tagipusuon sang iya kabataan. Ginbalita sang babayi:

“Pagkatapos sang pulo ka tuig nga balikbalik sa templo kag sige-sige nga pangamuyo, ginakasubo ko nga wala gid magliwat ang mga pagpili sang akon kabataan. …

“Pero nagliwat ako. Lain na ako nga babayi. … Mas humok na ang akon balatyagon. Mas puno ako sang kaluoy. Mas madamo pa ako sang mahimo kag wala na ako sing kahadlok, kabalaka, pagkakonsensya, pagpamasol, ukon kakibang. Ginbuy-an ko na ang paglagas sang tiyempo kag nagahulat na ako sa Ginuo. Kag naeksperiyensyahan ko ang pirme nga pagpakita sang gahum sang Ginuo. Nagapadala Sia sang hamili nga mga kaluoy, magagmay nga mga mensahe nga nagapakita sang iya pagpalangga sa akon kag sa akon kabataan. Nagliwat ang akon mga ginapaabot. Imbes nga magpaabot nga magliwat ang akon kabataan, ginapaabot ko na ining pirme nga hamili nga kaluoy kag puno ako sang pagpasalamat diri. …

“Nagliwat ang akon mga pangamuyo. Mas ginapahayag ko na ang pagpalangga kag mas mapinasalamaton ako. … Ang Ginuo nagahikot sa matahum nga mga paagi, kag matuod gid nga napuno ako sang kalinong nga indi malab-ot sang tanan nga paghangop” (sa “Prayer: A Small and Simple Thing,” At the Pulpit [2017], 288–89).

Doktrina kag mga Kasugtanan 83

“Dapat suportahan ang mga balo kag mga ilo.”

Sang Abril 1832, suno sa instruksyon sang Ginuo, nagbiyahe si Joseph Smith sing halos 800 ka milya para bisitahan ang mga Santos nga nagtipon sa Missouri (tan-awa sa Doktrina kag mga Kasugtanan 78:9). Sang ato sia didto, nagbisita sia sa komunidad nga sa diin pila ka mga balo ang nagapadako sang ila kabataan nga sila lang. Lakip sa ila sanday Phebe Peck kag Anna Rogers, nga kilala sang Propeta sing personal. Sa Missouri sang tinuig sang 1830, ang mga layi sang estado naghatag sa mga balo sang limitado nga kinamatarong sa propiyedad sang ila nagtaliwan nga mga bana. Ano ang imo natun-an sa seksyon 83 sa kon ano ang balatyagon sang Ginuo parte sa mga balo kag mga ilo? May kilala ka bala sa amo sini nga sitwasyon nga makabenepisyo sa imo pagpalangga kag pag-ulikid? Ano ang mga paagi nga pwede ka maghatag sang ara sa imo sa mga balo, ilo, solo nga mga nanay, kag iban pa nga nagakinahanglan?

Tan-awa man sa Isaias 1:17; Santiago 1:27.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 81:3

Pwede ako magpangamuyo sa Dios “sing mabaskog kag sa [akon] tagipusuon.”

• Samtang ginabasa mo ang Doktrina kag mga Kasugtanan 81:3 upod sa imo kabataan, buligi sila sa pagpanumdom sang lainlain nga “kadam-an” kag “nagaisahanon” nga mga lugar nga pwede sila magpangamuyo. Pwede man kamo magpamati ukon magkanta sang himno parte sa pangamuyo. Iistorya sa isa kag isa ang bagay halin sa himno nga nagatudlo sang importante nga kamatuoran parte sa pangamuyo. Pwede man ninyo hambalan ang pag-istorya sa Amay nga Langitnon sing matinahuron.

• Para paisugon ang imo kabataan nga magpangamuyo sa ila mga tagipusuon, pwede mo sila hatagan sang papel nga korte tagipusuon kag hagara sila nga idrowing ukon isulat ang gusto nila ipangamuyo sa Amay nga Langitnon. Magpamatuod nga nahibal-an sang Amay nga Langitnon kon ano ang aton ginapamensar kag nabatyagan kag mabatian Niya ang aton mga pangamuyo bisan indi naton ini pag-ihambal sing todo. Pwede mo iistorya sa ila ang eksperiyensya mo sang nagpangamuyo ka sa imo tagipusuon kag nabatian ka sang Amay nga Langitnon.

Doktrina kag mga Kasugtanan 81:5

Gusto sang Ginuo nga magbulig ako sa mga tawo nga nagakinahanglan.

• Upod sa imo kabataan, magdrowing sang mga kamot kag tuhod, kag ipapangita ining mga parte sang lawas sa Doktrina kag mga Kasugtanan 81:5. Ano ang ginapangayo sang Ginuo nga aton himuon sa sining bersikulo? Pwede ninyo iistorya sa isa kag isa ang mga paagi nga ginpabakod kamo sang mga tawo sa tion nga nakabatyag kamo nga “maluya” ukon “maluya ang tuhod.” ChurchofJesusChrist.org Pwede man kamo magkanta sing kanta parte sa pagserbisyo. Pamensara nga buligan ang imo kabataan nga magplano sa pagbulig sang bisan isa ka tawo nga nagakinahanglan sini nga semana.

  Pass It On

  Children around the world have taken President Thomas S. Monson's counsel to find a way to serve others.

• Pwede ka man maggamit sang mga litrato ukon video para mag-istorya sang simple nga mga istorya parte kay Jesucristo nga nagaserbisyo sa iban (tan-awa sa mga litrato sa sining outline; Libro sang mga Larawan nga Pang-ebanghelyo, mga no. 41, 42, 46, 47, 55. Paano naton sundon ang ehemplo sang Manluluwas sang pagbulig sa iban?

  

Pwede kita magdab-ot sa mga tawo nga nagakinahanglan pareho sa ginhimo sang Manluluwas.

Buligi ang imo kabataan nga makabaton sang ila kaugalingon nga inspirasyon. Ang pagtudlo masobra pa sangsa paghambal lang sang kamatuoran—nagakahulugan ini sang pagbulig sa iban nga tawo nga magtuon nga sila lang. Imbes nga silingan lang ang imo kabataan kon paano sila makaserbisyo sa iban, halimbawa, paisoga sila nga magpangayo sang giya sang Ginuo para mahibal-an kon sin-o ang ila buligan.

Doktrina kag mga Kasugtanan 82:10

Nagapromisa ang Amay nga Langitnon sang mga bugay samtang nagatinguha ako nga tumanon Sia.

• Pwede ninyo pangitaon sang imo kabataan sa Doktrina kag mga Kasugtanan 82:8–10 ang mga sabat sa pamangkot nga “Ngaa ginahatagan kita sang mga kasuguan sang Amay nga Langitnon?” Pwede mo buligan ang imo kabataan nga magpanumdom sang mga halimbawa sang Iya mga kasuguan (tan-awa halimbawa, sa Exodo 20:4–17; Mateo 22:37–39; Doktrina kag mga Kasugtanan 89:5–17). Basi makabulig kon mangita ukon magdrowing kamo sang imo kabataan sang mga litrato nga nagalarawan sang pila sini sa ila. Paano ginapakita sang mga kasuguan sang Amay nga Langitnon ang Iya pagpalangga sa aton?

• Siguro ang simple nga hampang makabulig sa imo kabataan nga tulukon ang mga kasuguan sang Dios bilang mga bugay, indi mga pabug-at. Ang isa ka tawo pwede nga maghatag sang instruksyon para buligan ang isa pa ka tawo, nga may tabon ang mata, para maghimo sang butang pareho sang sandwich ukon magdrowing sang litrato. Magpamensar sang bagay nga masadya kag bag-o! Dayon hambali kon paano nangin pareho ang mga kasuguan sang Dios sa mga instruksyon sa hampang.

Para sa dugang nga mga ideya, tan-awa sa isyu sang Abyan nga magasin sini nga bulan.

Ilustrasyon ni Jesus nga nagaayo sang tawo, ni Dan Burr