Going Home [Nagapapuli], ni Yongsung Kim

Hulyo 14–20: “Giyahan Ko Kamo”

Doktrina kag mga Kasugtanan 77–80

Wala pa magduha ka tuig pagkatapos nga ginpanumbalik ang Simbahan ni Jesucristo, masobra na 2,000 ang mga miyembro sini kag madasig nga nagadako. Sang Marso 1832, nakigkita si Joseph Smith sa iban pa nga mga lideres sang Simbahan “para hambalan ang mga buluhaton sa Simbahan”: ang kakinahanglan sa pag-imprinta sang mga rebelasyon, pagbakal sang duta nga tilipunan, kag ang pag-atipan sang mga imol (tan-awa sa Doktrina kag mga Kasugtanan 78, tig-ulo sang seksyon). Para masabat ining mga panginahanglan, nagtawag ang Ginuo sang pila lang ka mga lider sa Simbahan para matukod ang United Firm, ang grupo nga magbinuligay para “isulong ang kawsa” sang Ginuo (bersikulo 4) sa sining mga lugar. Pero bisan sa sining administratibo nga mga hilikuton, gintutokan sang Ginuo ang mga butang sa wala katapusan. Sa katapusan, ang katuyuan sang imprintahan ukon balay-talagoan—pareho sang tanan sa ginharian sang Dios—amo nga ihanda ang Iya mga anak sa pagbaton sang “isa ka lugar sa selestiyal nga kalibutan” kag sang “mga manggad sang wala’y katapusan” (mga bersikulo 7, 18). Kag kon ang inang mga bugay mabudlay hangpon sa karon, sa tunga sang kasakuon sang adlaw-adlaw nga kabuhi, ginapasalig Niya kita, “Magkalipay kamo, kay giyahan ko kamo” (bersikulo 18).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 77

Nagahatag ang Dios sang ihibalo sa mga tawo nga nagahandum sini.

Samtang ginahimo ni Joseph Smith kag Sidney Rigdon ang inspirado nga paglubad sang Biblia, may mga pamangkot sila sa libro sang Bugna, pareho sang kadam-an. Kag nakahibalo gid si Joseph, nga kon kulang sia sang kaalam, pwede sia mamangkot sa Dios. Ang ihibalo nga nabaton niya ara sa Doktrina kag mga Kasugtanan 77. Samtang imo ginabasa ini nga seksyon, pamensara nga isulat ang imo mga panghunahuna parte sa nagakabagay nga mga kapitulo sa libro nga Bugna. Ano ang imo natun-an sa imo pagtuon parte sa pagbaton sang rebelasyon?

Translation of the Bible [Paglubad sang Biblia], ni Liz Lemon Swindle

Doktrina kag mga Kasugtanan 78

Ano ang United Firm?

Ang United Firm gintukod para dumalahan ang publikasyon kag mga negosyo sang Simbahan sa Ohio kag Missouri. Nalakip diri sila ni Joseph Smith, Newel K. Whitney, kag ang iban pa nga lideres sang Simbahan nga nagtipon sang ila mga pondo para masabat ang temporal nga mga panginahanglan sang nagadako nga Simbahan. Ang masubo, nalubong sa utang ang United Firm kag gindula sang 1834 sang indi na gid matatapan ang mga utang.

Doktrina kag mga Kasugtanan 78:1–7

Makabulig ako nga “isulong ang kawsa” ni Cristo kag sang Iya Simbahan.

Siling sang Ginuo kay Joseph Smith kag sa iban pa nga lideres sang Simbahan nga ang pagdumala sang balay-talagoan kag imprintahan makabulig nga “isulong ang kawsa, nga inyo ginatinguhaan” (Doktrina kag mga Kasugtanan 78:4). Ano sa mahambal mo ang “kawsa” sang Simbahan sang Manluluwas? Binagbinaga ini samtang imo ginabasa ang Doktrina kag mga Kasugtanan 78:1–7. Ano ang pila ka pamaagi nga makabulig ka sa pagsulong sina nga kawsa—upod sa imo pamilya?

Tan-awa man sa Mga Pinili nga Bahin halin sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 1.2.

Doktrina kag mga Kasugtanan 78:17–18

Giyahan ako sang Ginuo.

Ngaa sa banta mo nga ginatawag kon kaisa sang Ginuo ang Iya mga sumulunod nga “magagmay nga kabataan”? (Doktrina kag mga Kasugtanan 78:17). Nakabatyag ka bala nga daw pareho sang bata diutay, siguro tungod sang isa ka butang nga “indi [mo] pa mahangpan” ukon “indi mabatas”? (mga bersikulo 17–18). Ano ang imo nakita sa sining mga bersikulo nga makabulig sa imo nga “magkasadya” (bersikulo 18) sa amo sini nga mga tinion? Pamensara nga magpangita sang litrato mo sang bata ka pa, kag binagbinaga kon paano ka nagtubo sa espirituhanon halin sadto. Ukon magpanumdom sang butang nga mabudlay para sa imo sang hubin ka pa pero mahapos na para sa imo karon. Sa ano nga mga paagi ka gusto sang Amay nga Langitnon nga mangin bata sa gihapon? (tan-awa sa Mosias 3:19). Paano ka Niya “[gina]giyahan”?

Doktrina kag mga Kasugtanan 78:19

Sarang ko mabaton ang tanan nga butang nga may pagpasalamat.

Para handaan ang pagtuon sang Doktrina kag mga Kasugtanan 78:19, pwede mo ilista ang maayo nga mga butang nga natabo sa imo sini nga adlaw. Dayon ilista ang mga butang nga pamatyag mo daw indi mga bugay sa imo. Binagbinaga ining mga listahan samtang ginabasa mo ang Doktrina kag mga Kasugtanan 78:19. Ano ang kinalain sa imo kabuhi kon ginabaton mo ang “tanan nga butang” nga may pagpasalamat—bisan ang mga butang nga daw indi mga bugay?

Para tun-an kon paano makaimpluwensya sa imo kabuhi ang pagpasalamat sa Dios, basaha ining balaan nga mga kasulatan kag ilista ang mga kamatuoran nga imo makita: Salmo 107:8–9; Lucas 17:11–19; Mga Taga-Filipos 4:6–7; Mosias 2:19–24; Alma 34:38; 37:37; Doktrina kag mga Kasugtanan 46:32; 59:7, 15–21.

Pamensara nga basahon ang mensahe ni Pangulong Dieter F. Uchtdorf “Grateful in Any Circumstances” (Liahona, Mayo 2014, 70–77) para sa laygay kon paano mangin mapinasalamaton. Paano ang pagpasalamat nagaapekto sa imo relasyon kay Jesucristo?

President Russell M. Nelson on the Healing Power of Gratitude​

In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.

Magbasa kag iistorya. Kon naasayn ka nga magtudlo, magpangita sang pamaagi para buligan ang mga tawo nga basahon ang balaan nga mga kasulatan ukon mga pulong sang mga propeta—nga sila lang ukon sa gagmay nga mga grupo—kag iistorya ang ila natun-an. Halimbawa, sa sining kahiwatan pwede mo hatagan ang kada indibidwal ukon grupo sang seksyon sang mensahe ni Pangulong Uchtdorf kag pangabaya sila nga iistorya ang dinalan ukon pahayag nga pamatyag nila nagasumada sang iya gintudlo.

Doktrina kag mga Kasugtanan 79–80

Ang tawag nga magserbisyo sa Dios mas makahulugan sangsa kon diin ako nagaserbisyo.

Parte sa Doktrina kag mga Kasugtanan 80, gintudlo ni Elder David A. Bednar, “Ayhan isa sa mga leksyon nga ginatudlo sang Manluluwas sa aton sa sining rebelasyon amo nga ang tulumanon nga magtrabaho sa partikular nga lugar kinahanglanon kag importante pero ikaduha lamang sa tawag nga magtrabaho” (“Called to the Work,” Liahona, Mayo 2017, 68). Ano nga mga eksperiyensya ang nagbulig sa imo nga matun-an nga ang mga pulong ni Elder Bednar matuod? Ano nga dugang nga mga leksyon ang imo nakita sa Doktrina kag mga Kasugtanan 79–80 nga makabulig sa tawo nga bag-o lamang nakabaton sang calling?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 77:2

Gintuga sang Dios ang tagsa ka tinuga sa duta.

• Samtang ululupod ninyo nga ginabasa sang imo kabataan ang Doktrina kag mga Kasugtanan 77: 2, pwede kamo magtan-aw sang mga litrato sang mga sapat, pati na sang mga insekto kag mga pispis. Pwede nga itudlo sang imo kabataan ang mga litrato kon mabasahan mo ang mga tinaga nga “mga kasapatan,” “nagakamang nga mga sapat,” kag “kapispisan sang kahanginan.” Iistorya sa isa kag isa kon paano nakabulig sa inyo ang mga gintuga sang Dios nga mabatyagan ang Iya pagpalangga.

Gintuga sang Dios ang tanan nga tinuga sa duta.

Doktrina kag mga Kasugtanan 78:4

Makabulig ako nga “isulong ang kawsa” ni Jesucristo.

• Para buligan ang imo kabataan nga panumdumon ang ila papel sa buluhaton sang Ginuo, pamensara nga basahon upod sa ila ang Doktrina kag mga Kasugtanan 78:4 para hibaluon ang “kawsa” nga aton “gintinguhaan” (ginbaton ukon ginpili nga suportahan) sang ginbunyagan kita. Buligi sila nga pangitaon sa mga dinalan sang balaan nga mga kasulatan pareho sini ang posible nga mga sabat: Mosias 18:8–10; Doktrina kag mga Kasugtanan 20:37; Moises 1:39. Basi masadyahan ang imo mga kabataan sa pag-role play kon paano sila makabulig sa buluhaton sang Ginuo. Halimbawa, daw ano ang “magpas-an sang mga palas-anon sang isa kag isa” ukon “pagdala sa [aton] kaugalingon sang ngalan ni Jesucristo”? Paano sini “[gina]sulong ang kawsa” ni Cristo?

Doktrina kag mga Kasugtanan 78:6

Pwede ko ipakigbahin sa iban ang kon ano nga ara sa akon.

• Para itudlo kon ano ang buot silingon sang “palareho sa mga butang nga dutan-on” (bersikulo 6), pwede mo hatagan ang imo kabataan sang mga litrato sang mga tawo nga nagakinahanglan (ginagutom, pilason, ukon ginatugnawan) kag mga bagay nga makabulig (pareho sang pagkaon, bendahe, ukon habol). Dayon ipapares sa imo kabataan ang mga litrato sa mga bagay. Ano ang pwede naton ihatag para mabuligan ang mga tawo nga nagakinahanglan?

• Dayon pwede ang imo kabataan magdrama-drama nga kuno abi ginabuligan nila ang isa ka tawo nga magpatindog sang balay, nagahatag sang pagkaon, ukon nagaserbisyo sa iban nga pamaagi.

  Chapter 28: The Prophet Joseph Goes to Missouri Again: March–May 1832

Doktrina kag mga Kasugtanan 78:18

Giyahan ako ni Jesucristo.

• Siguro masadya para sa imo kabataan nga hambalan kon ano ang buot silingon sang mangin lider kag dayon magpamuno sa isa ka buluhaton. Pagkatapos nga basahon sing ululupod ang Doktrina kag mga Kasugtanan 78:18, pwede ninyo hambalan ang mga panahon nga kinahanglan naton si Jesus para maggiya sa aton.

Doktrina kag mga Kasugtanan 78:19

Sarang ko mabaton ang “tanan nga butang nga may pagpasalamat.”

• Basaha upod sa imo kabataan ang Doktrina kag mga Kasugtanan 78:19 para diskubrehon kon ano ang ginapromisa sang Ginuo sa mga tawo nga mapinasalamaton. Buligi ang imo kabataan nga maintiendihan kon ano ang buot silingon sang “isa ka gatos ka pilo”, siguro paagi sa pagpakita sa ila sang gamay nga bagay kag dayon 100 kabilog sang sina man nga bagay. Basi pwede nila idrowing ang mga butang nga ila nabaton halin sa Dios nga “may pagpasalamat.”

Para sa dugang nga mga ideya, tan-awa sa isyu sang Abyan nga magasin sini nga bulan.

God’s Garden [Ang Hardin sang Dios], ni Sam Lawlor