Refuge [Palasilungan], ni Shaelynn Abel

Hulyo 7–13: “Dako ang Mangin Ila Padya kag Wala’y Katapusan ang Mangin Ila Himaya”

Doktrina kag mga Kasugtanan 76

“Ano ang matabo sa akon pagkatapos ko nga mapatay?” Halos tanan nagapamangkot sining pamangkot sa isa ukon iban nga paagi. Sa mga siglo, madamo nga Kristiyano nga mga tradisyon, nga nagasandig sa mga pinanudlo sa Biblia, ang nagtudlo parte sa langit kag impiyerno, sang paraiso para sa matarong kag pag-antos para sa malain. Pero pwede gid bala nga istrikto nga tungaon ang bilog nga tawhanon nga pamilya? Sang Pebrero 1832, si Joseph Smith kag Sidney Rigdon nagpalibog kon may dapat pa bala mahibal-an parte sa sining topiko (tan-awa sa Doktrina kag mga Kasugtanan 76, tig-ulo sang seksyon).

May ara pa gid man. Samtang ginabinagbinag ni Joseph kag Sidney ining mga butang, “gintandog [sang Ginuo] ang mga mata sang [ila] mga paghangop kag nabuksan ang mga ini” (bersikulo 19). Nakabaton sila sang rebelasyon nga tama ka makakilibot, tama kasangkad, tama ka sanag nga gintawag lamang ini sang mga Santos nga “ang Panan-awon.” Ginbuksan sini ang mga bintana sang langit kag ginhatagan ang mga anak sang Dios sang tama kasangkad nga panan-awan sang wala katapusan. Ginpahayag sang panan-awon nga ang langit mas matahum kag mas malapad kag mas nagalakip sangsa ginahunahuna sang kalabanan sang una. Ang Dios mas maluluy-on kag matarong sangsa aton sarang mahangpan. Kag ang mga anak sang Dios may wala katapusan nga kapalaran nga mas mahimayaon sangsa sarang naton mahunahuna.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 76

Ang kaluwasan nagaabot paagi kay Jesucristo, ang Anak sang Dios.

Ang seksyon 76 nagapahayag sang importante nga mga kamatuoran parte sa aton wala katapusan nga kadangatan, pero mangin kulang kon ihambal nga ining rebelasyon parte sa tatlo ka ginharian sang himaya ukon bisan gani parte sa plano sang kaluwasan. Ang mas insakto, ang seksyon 76 parte kay Jesucristo, nga nagapatigayon sang plano sang Dios para sa aton kaluwasan kag wala katapusan nga himaya. Samtang nagabasa ka, pwede mo pangitaon ang mga tinaga ukon mga dinalan nga nagalarawan sang relasyon ni Jesucristo kag sang mga tawo nga magapanubli sang lainlain nga mga ginharian sang himaya. Siguro ang tsart pareho sa masunod makabulig sa imo nga isulat ang imo makita.

Ginharian sang himaya	Relasyon kay Jesucristo	Wala katapusan nga mga bugay
Ginharian sang himaya Selestiyal (mga bersikulo 50–70, 92–96)	Relasyon kay Jesucristo Nagbaton sang testimonya parte kay Jesus Naghimo kag nagtuman sang mga kasugtanan upod sa Iya	Wala katapusan nga mga bugay Natinloan gikan sa sala Naglampuwas paagi sa pagtuo
Ginharian sang himaya Terestriyal (mga bersikulo 71–79, 97)	Relasyon kay Jesucristo	Wala katapusan nga mga bugay
Ginharian sang himaya Telestiyal (mga bersikulo 81–90, 98–106, 109–12)	Relasyon kay Jesucristo	Wala katapusan nga mga bugay

Ano ang ginapabatyag sa imo nga imo himuon para pabakuron ang imo relasyon sa Manluluwas?

Sang mabasa ni Wilford Woodruff ining panan-awon, nagsiling sia, “Nakabatyag ako sang mas dako nga pagpalangga sa Ginuo sangsa nahimo ko na sa bilog ko nga kabuhi” (tan-awa sa “Mga Tingug sang Pagpanumbalik: Mga Testimonya parte sa ‘Panan-awon’”). Ano ang imo natun-an parte kay Jesucristo sa mga bersikulo 1–5, 20–24, 39–43, 107–8 nga nagatulod sa imo nga mas palanggaon Sia?

Tan-awa man sa 1 Pedro 3:18–19; 4:6; Dallin H. Oaks, “Ano ang Nahimo sang Aton Manluluwas para sa Aton?,” Liahona, Mayo 2021, 75–77.

Magtutok sa Amay nga Langitnon, kay Jesucristo, kag sa Ila doktrina. Sa tanan nga matun-an naton sa balaan nga mga kasulatan, ang pinakaimportante nga mga kamatuoran nagabulig sa aton nga magpatubo sang pagtuo sa Amay nga Langitnon kag kay Jesucristo, maghinulsol, maghimo kag magtuman sang mga kasugtanan upod sa ila, kag batunon ang Balaan nga Espiritu. Bisan pa nga daw makawiwili nga ikumparar ukon tun-an ang mga pamatasan ukon pangginawi sang mga tawo nga magabaton sang lainlain nga mga ginharian sang himaya, mas importante ang magtutok sa Amay nga Langitnon kag sa Manluluwas. Ang tanan nga Ila ginahimo para ihanda kita sa sina nga himaya magaliso sa aton pakadto sa Ila.

Sa sining kuwarto, nakita ni Joseph Smith ang palanan-awon nga nasulat sa Doktrina kag mga Kasugtanan 76.

Doktrina kag mga Kasugtanan 76:5–10, 114–18

Pwede ko maintiendihan ang pagbuot sang Dios “paagi sa gahum sang Balaan nga Espiritu”.

Indi tanan nga miyembro sang Simbahan ang nagbaton dayon sang rebelasyon sa seksyon 76, tungod ginatudlo sini nga halos ang tanan maluwas kag makabaton sang isa ka halintang sang himaya. Halimbawa, ginsiling ni Brigham Young: “Ang akon mga tradisyon amo nga, sang mag-abot primero sa akon ang Panan-awon, direkta nga balabag kag kontra ini sa una ko nga natun-an. Siling ko, Hulat lang gid anay. Wala ko ini ginsikway; pero indi ko ini maintiendihan.” Ginpaathag niya nga kinahanglan niya nga “magbinagbinag kag magpangamuyo, nga magbasa kag magpamensar, hasta nga nahibal-an ko kag lubos nga naintiendihan sa akon kaugalingon” (sa “The Vision,” sa Revelations in Context, 150). Ano ang imo natun-an sa iya eksperiyensya nga makabulig sa imo kon magpahayag ang Dios sang mga butang nga lain sangsa imo naintiendihan sa karon? Ano ang imo natun-an parte sa Dios sa Doktrina kag mga Kasugtanan 76:5–10, 114–18? Ano ang ginatudlo sining mga bersikulo parte sa kon paano mo maintiendihan “ang maayo nga tinutuyo sang pagbuot [sang Dios]”? (bersikulo 7).

Doktrina kag mga Kasugtanan 76:39–44, 50–70

Ang pangkahitaasan amo ang pinakamataas nga lebel sang kaluwasan.

Ang Doktrina kag mga Kasugtanan 76:39–44 nagalarawan sang kaluwasan sa kabilogan. Ang mga bersikulo 50–70 nagalarawan sang pangkahitaasan, isa ka partikular nga klase sang kaluwasan. Paano mo ipaathag ang kinalain sang kaluwasan kag pangkahitaasan? Ano ang papel sang Manluluwas sa sining duha? Ano ang imo nakita sa sining mga bersikulo nga nagainspirar sa imo nga maghandum sang pangkahitaasan?

Tan-awa man sa Juan 3:16–17; Doktrina kag mga Kasugtanan 132:20–25.

Doktrina kag mga Kasugtanan 76:50–70, 92–95

Gusto sang akon Amay nga Langitnon nga mabaton ko ang kabuhi nga wala katapusan sa selestiyal nga ginharian.

Nakapamangkot ka na bala—ukon nabalaka—kon bala pwede ka mangin tawo nga makabaton sang selestiyal nga himaya, nga ginlaragway sa Doktrina kag mga Kasugtanan 76:50–70, 92–95? Bisan importante nga mahibal-an kon ano ang ginapaabot sang Dios sa aton, pamensara man nga pangitaon sa sining mga bersikulo ang ginhimo sang Dios para sa aton—kag ginahimo sa karon—para buligan kita nga mangin mas pareho sa Iya. Ngaa sa banta mo importante para sa Iya ang imo mga pagpaninguha?

Paano nakaapekto ining panan-awon sang selestiyal nga himaya sa pamaagi nga gusto mo ipangabuhi ang imo adlaw-adlaw nga kabuhi?

Tan-awa man sa Moises 1:39; J. Devn Cornish, “Husto Bala ka Maayo Ako? Maluwas Bala Ako?,” Liahona, Nob. 2016, 32–34.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 76:24

Tanan kita mga anak sang Dios.

• Para buligan ang imo kabataan nga maintiendihan ang ila diosnon nga potensyal, pwede mo sila pakitaan sang mga litrato sang mga kabataan kag sang ila mga ginikanan. Pwede ninyo dayon basahon ang Doktrina kag mga Kasugtanan 76:24 kag iistorya sa isa kag isa kon ngaa malipayon ka nga mahibal-an nga tanan kita “mga anak nga lalaki kag babayi sang Dios.”

• Pwede man ninyo kantahon sing ululupod ang “I Am a Child of God” (Children’s Songbook, 2–3) kag hagaron ang imo kabataan nga itudlo ang ila kaugalingon kon magkanta sila sang “Ako.” Dayon kantaha liwat ang kanta kag buslan ang “Ako” sang “ikaw” samtang ginatudlo ang iban.

Doktrina kag mga Kasugtanan 76:5, 41–42, 69

Si Jesucristo amo ang akon Manluluwas.

• Pamensara nga idrama-drama upod sa imo kabataan ang sitwasyon nga may namangkot, “Ano ang ginhimo ni Jesucristo para sa akon?” Pwede ninyo pangitaon sang imo kabataan ang posible nga mga sabat sa mga bersikulo 5, 41–42, ukon 69 sa seksyon 76. Paano naton ipakita ang aton pagpasalamat sa ginhimo sang Manluluwas para sa aton?

Detalye halin sa Suffer the Children [Tugoti ang mga Kabataan], ni J. Kirk Richards

Doktrina kag mga Kasugtanan 76:62

Gusto sang Amay nga Langitnon nga magbalik ako sa pagkabuhi upod sa Iya sa katubtuban.

• Pwede ninyo basahon ukon tan-awon ang isa ka parte ukon tanan sang “Chapter 26: The Three Kingdoms of Heaven” kag iistorya sa isa kag isa ang nanamian ninyo sa panan-awon ni Joseph Smith. Tugoti ang imo kabataan nga iistorya ang ila mga panghunahuna kag mga balatyagon kon daw ano ayhan ang magpangabuhi upod sa Amay nga Langitnon sa selestiyal nga ginharian.

  Chapter 26: The Three Kingdoms of Heaven: 16•February 1832

• Pwede mo man basahon ang Doktrina kag mga Kasugtanan 76:62 kag hagaron ang imo kabataan nga idrowing ang ila mga kaugalingon upod ang Amay nga Langitnon kag si Jesucristo sa selestiyal nga ginharian (tan-awa sa pahina sang kahiwatan sini nga semana).

Doktrina kag mga Kasugtanan 76:12, 15–19, 114–16

Ang pagtuon sang balaan nga kasulatan makabulig sa akon nga “mahangpan ang mga butang sang Dios.”

• Pwede mo hagaron ang imo kabataan nga basahon ang mga bersikulo 15–19 para mahibal-an kon ano ang ginahimo ni Joseph Smith kag Sidney Rigdon sang makita nila ang panan-awon sa Doktrina kag mga Kasugtanan 76. Sugiri ang imo kabataan sang tiyempo nga nakabaton ka sang inspirasyon samtang nagabasa sang balaan nga mga kasulatan, kag pamangkuta ang imo kabataan kon may pareho man sila sini nga eksperiyensya.

Para sa dugang nga mga ideya, tan-awa sa isyu sang Abyan nga magasin sini nga bulan.

Glory in Degrees [Himaya sa lainlain nga Lebel], ni Annie Henrie Nader