“ວັນທີ 5–11 ເດືອນພຶດສະພາ: ‘ຄຳສັນຍາ … ຈະສຳເລັດຄົບຖ້ວນ’: ຄຳສອນ ແລະ ພັນທະສັນຍາ 45,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 45,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ວັນທີ 5–11 ເດືອນພຶດສະພາ: “ຄຳສັນຍາ … ຈະສຳເລັດຄົບຖ້ວນ”
ຄຳສອນ ແລະ ພັນທະສັນຍາ 45
ໄດ້ມີການຮັບການເປີດເຜີຍໃນ ພາກທີ 45 ອີງຕາມຫົວຂໍ້ພາກ, “ໄພ່ພົນຂອງພຣະເຈົ້າຊື່ນຊົມ.” ແລະ ມີຫລາຍເລື່ອງທີ່ຈະຊື່ນຊົມໃນການເປີດເຜີຍນີ້. ໃນນັ້ນ ພຣະຜູ້ຊ່ວຍໃຫ້ລອດໃຫ້ຄຳສັນຍາອັນອ່ອນໂຍນຂອງພຣະອົງ ວ່າຈະວິງວອນແທນເຮົານຳພຣະບິດາ (ເບິ່ງ ຂໍ້ທີ 3–5). ພຣະອົງບອກກ່ຽວກັບພັນທະສັນຍາອັນເປັນນິດທີ່ແຜ່ອອກໄປຕະຫລອດທົ່ວໂລກ, ເຊັ່ນ “ຜູ້ສົ່ງຂ່າວ … ເພື່ອຕຽມທາງໄວ້ກ່ອນ [ພຣະອົງ]” (ຂໍ້ທີ 9). ແລະ ພຣະອົງທຳນາຍເຖິງການສະເດັດມາຄັ້ງທີສອງອັນມີລັດສະໝີພາບຂອງພຣະອົງ. ພຣະຜູ້ຊ່ວຍໃຫ້ລອດກະທຳສິ່ງທັງໝົດນີ້ ຂະນະທີ່ຮັບຮູ້ເຊັ່ນກັນວ່າ ນີ້ແມ່ນຊ່ວງເວລາທີ່ໜ້າຢ້ານກົວ (ເບິ່ງ ຂໍ້ທີ 34), ສ່ວນໜຶ່ງເປັນເພາະໄພອັນຕະລາຍທີ່ຈະເກີດຂຶ້ນກ່ອນການສະເດັດມາຂອງພຣະອົງ. ແຕ່ໄພອັນຕະລາຍນັ້ນ, ຄວາມມືດນັ້ນ ບໍ່ແຮງພໍທີ່ຈະດັບແສງແຫ່ງຄວາມຫວັງໄດ້. “ເພາະຕາມຄວາມຈິງແລ້ວ ເຮົາກ່າວກັບພວກເຈົ້າ,” ພຣະຜູ້ເປັນເຈົ້າໄດ້ປະກາດ, “ວ່າເຮົາຄື … ຄວາມສະຫວ່າງຊຶ່ງສ່ອງແສງຢູ່ໃນຄວາມມືດ” (ຂໍ້ທີ 7). ສິ່ງນັ້ນຢ່າງດຽວ ແມ່ນເຫດຜົນໃນການຮັບການເປີດເຜີຍນີ້—ພ້ອມກັບຄຳແນະນຳ ແລະ ຄຳເຕືອນ ແລະ ຄວາມຈິງໃດກໍຕາມທີ່ພຣະອົງຕ້ອງການຢາກມອບໃຫ້—ດ້ວຍຄວາມຊື່ນຊົມ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 45:1–5
ພຣະເຢຊູຄຣິດເປັນຜູ້ວິງວອນແທນເຮົານຳພຣະບິດາ.
ເມື່ອເຮົາຮູ້ສຶກບໍ່ພຽບພ້ອມ ຫລື ບໍ່ມີຄ່າຄວນຕໍ່ພຣະພັກຂອງພຣະເຈົ້າ, ເຮົາສາມາດພົບຄວາມໝັ້ນໃຈຈາກພຣະຄຳຂອງພຣະຜູ້ຊ່ວຍໃຫ້ລອດໄດ້ໃນ ຄຳສອນ ແລະ ພັນທະສັນຍາ 45:1–5. ຂະນະທີ່ທ່ານຄົ້ນຫາຂໍ້ເຫລົ່ານີ້, ໃຫ້ພິຈາລະນາຄຳຖາມຕໍ່ໄປນີ້:
-
ຖ້ອຍຄຳ ຫລື ວະລີໃດໃນຂໍ້ເຫລົ່ານີ້ ຮູ້ສຶກມີຄວາມໝາຍຕໍ່ທ່ານເປັນພິເສດ?
-
ຜູ້ວິງວອນແທນ ແມ່ນຜູ້ທີ່ສະໜັບສະໜູນ ຫລື ແນະນຳຄົນຄົນໜຶ່ງ ຫລື ອຸດົມການໃດໜຶ່ງຢ່າງເປີດເຜີຍ. ອີງຕາມຂໍ້ເຫລົ່ານີ້, ພຣະເຢຊູຄຣິດກະທຳສິ່ງນີ້ເພື່ອທ່ານແນວໃດ? ແມ່ນຫຍັງທີ່ເຮັດໃຫ້ພຣະອົງມີຄຸນສົມບັດທີ່ຈະເຮັດສິ່ງນັ້ນ?
-
ແມ່ນຫຍັງທີ່ປະທັບໃຈທ່ານກ່ຽວກັບພຣະຄຳຂອງພຣະຜູ້ຊ່ວຍໃຫ້ລອດຕໍ່ພຣະບິດາ? (ຂໍ້ທີ 4–5).
ທ່ານຍັງສາມາດສຶກສາສິ່ງທີ່ແອວເດີ ແດວ ຈີ ເຣັນລັນ ໄດ້ສິດສອນນຳອີກກ່ຽວກັບພຣະເຢຊູຄຣິດ, ຜູ້ວິງວອນແທນເຮົາ, ໃນ “Choose You This Day” (Liahona, Nov. 2018, 104–5). ອີງຕາມແອວເດີ ເຣັນລັນ, ຈຸດປະສົງຂອງພຣະຜູ້ຊ່ວຍໃຫ້ລອດເປັນແນວໃດ ເມື່ອປຽບທຽບກັບຂອງລູຊິເຟີ?
ຂໍ້ຄວາມຕໍ່ໄປນີ້ ອາດຕື່ມຄວາມເຂົ້າໃຈຂອງທ່ານກ່ຽວກັບບົດບາດຂອງພຣະຜູ້ຊ່ວຍໃຫ້ລອດ ໃນຖານະຜູ້ວິງວອນແທນ. ຂະນະທີ່ທ່ານສຶກສາມັນ, ໃຫ້ພິຈາລະນາທີ່ຈະຂຽນວະລີ ຫລື ຄວາມຈິງທີ່ທ່ານສາມາດແບ່ງປັນກັບຄົນອື່ນ: 2 ນີໄຟ 2:8–9; ໂມໄຊຢາ 15:7–9; ໂມໂຣໄນ 7:27–28; ຄຳສອນ ແລະ ພັນທະສັນຍາ 29:5; 62:1. ເປັນຫຍັງວະລີເຫລົ່ານີ້ຈຶ່ງມີຄວາມໝາຍຕໍ່ທ່ານ?
ເບິ່ງ “ຂ້າເຝົ້າພິສະຫວົງ,” ເພງສວດ ແລະ ເພງຂອງເດັກນ້ອຍ, 24; Topics and Questions, “Atonement of Jesus Christ,” ຫ້ອງສະໝຸດພຣະກິດຕິຄຸນ; “The Mediator” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
The Mediator
A portrayal of the analogy Elder Boyd K. Packer used in his April 1977 general conference address. A young man who fails to pay a debt is saved from the grasp of justice through the mediation of a friend.
ຄຳສອນ ແລະ ພັນທະສັນຍາ 45:9–10
ພຣະກິດຕິຄຸນເປັນທຸງສັນຍານແກ່ປະຊາຊາດ.
ໃນສະໄໝບູຮານ, ທຸງສັນຍານ ແມ່ນປ້າຍທີ່ຖືເຂົ້າໄປໃນການສູ້ຮົບ ເພື່ອໃຊ້ລະດົມພົນ ແລະ ລວມກຳລັງທະຫານ. ທຸງສັນຍານຍັງເປັນຕົວຢ່າງ ຫລື ກົດເກນໜຶ່ງ ທີ່ສາມາດວັດແທກກັບສິ່ງອື່ນໆໄດ້. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 45:9–10, ໃຫ້ໄຕ່ຕອງວ່າ ພັນທະສັນຍາຂອງທ່ານທີ່ໄດ້ເຮັດໄວ້ກັບພຣະຜູ້ເປັນເຈົ້າ ໄດ້ເປັນທຸງສັນຍານສຳລັບທ່ານແນວໃດ.
ຄຳສອນ ແລະ ພັນທະສັນຍາ 45:11–75
ພຣະເຢຊູຄຣິດຈະສະເດັດກັບຄືນມາໃນລັດສະໝີພາບ.
ການສະເດັດມາຄັ້ງທີສອງຂອງພຣະຜູ້ເປັນເຈົ້າ ໄດ້ຖືກບັນຍາຍໄວ້ວ່າ ທັງ “ຍິ່ງໃຫຍ່” ແລະ “ໜ້າຢ້ານ” (ມາລາກີ 4:5). ໃນ ຄຳສອນ ແລະ ພັນທະສັນຍາ 45, ການບັນຍາຍທັງສອງເບິ່ງຄືວ່າເໝາະສົມດີ. ການເປີດເຜີຍນີ້ ລວມທັງຄຳເຕືອນທີ່ມີສະຕິ ແລະ ຄຳສັນຍາທີ່ມີຄວາມຫວັງກ່ຽວກັບການສະເດັດມາຂອງພຣະຜູ້ເປັນເຈົ້າ. ຂະນະທີ່ທ່ານສຶກສາ ຂໍ້ທີ 11–75, ໃຫ້ໄຕ່ຕອງວິທີທີ່ທ່ານສາມາດກຽມພ້ອມສຳລັບການສະເດັດມາຄັ້ງທີສອງດ້ວຍສັດທາໃນພຣະຄຣິດ ແທນທີ່ຈະເປັນຄວາມຢ້ານກົວ. ບັນທຶກສິ່ງທີ່ທ່ານພົບເຫັນໃນຕາຕະລາງຄືກັນກັບໂຕນີ້:
|
ຄຳທຳນາຍ ຫລື ຄຳສັນຍາ |
ສິ່ງທີ່ເຮົາສາມາດເຮັດໄດ້ |
|---|---|
ຄຳທຳນາຍ ຫລື ຄຳສັນຍາ ຄວາມສະຫວ່າງ (ພຣະກິດຕິຄຸນ) ຈະມາສູ່ຜູ້ທີ່ນັ່ງຢູ່ໃນຄວາມມືດ (ຂໍ້ທີ 28) | ສິ່ງທີ່ເຮົາສາມາດເຮັດໄດ້ ຮັບຄວາມສະຫວ່າງ—ແລະ ແບ່ງປັນມັນ (ຂໍ້ທີ 29) |
ຄຳທຳນາຍ ຫລື ຄຳສັນຍາ | ສິ່ງທີ່ເຮົາສາມາດເຮັດໄດ້ |
ຄຳທຳນາຍ ຫລື ຄຳສັນຍາ | ສິ່ງທີ່ເຮົາສາມາດເຮັດໄດ້ |
ຄຳທຳນາຍ ຫລື ຄຳສັນຍາ | ສິ່ງທີ່ເຮົາສາມາດເຮັດໄດ້ |
ໃນວິດີໂອ “Men’s Hearts Shall Fail Them” (ຫ້ອງສະໝຸດພຣະກິດຕິຄຸນ), ຄຳແນະນຳໃດທີ່ປະທານຣະໂຊ ເອັມ ແນວສັນ ໄດ້ມອບໃຫ້ ເພື່ອຊ່ວຍເຮົາປະເຊີນກັບສະຖານະການທີ່ໜ້າຢ້ານກົວດ້ວຍຄວາມສະຫງົບ?
Men's Hearts Shall Fail Them
Elder Russell M. Nelson shares a personal story to give encouragement for when we feel "weak in the heart."
ຄຳສອນ ແລະ ພັນທະສັນຍາ 45:31–32, 56–57
ເຮົາສາມາດ “ຢືນຢູ່ໃນສະຖານທີ່ສັກສິດ” ແລະ ບໍ່ຫວັ່ນໄຫວ.
ທ່ານຮຽນຮູ້ຫຍັງແດ່ໃນ ຄຳສອນ ແລະ ພັນທະສັນຍາ 45:31–32, 56–57 ກ່ຽວກັບການກຽມພ້ອມສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ? “ສະຖານທີ່ສັກສິດ” ຂອງທ່ານແມ່ນຢູ່ໃສ? ຄຳວ່າ “ບໍ່ຫວັ່ນໄຫວ” ໝາຍຄວາມວ່າແນວໃດ? ທ່ານຈະສາມາດເຮັດໃຫ້ບ່ອນທີ່ທ່ານຢູ່ສັກສິດຫລາຍກວ່າເກົ່າໄດ້ແນວໃດ?
ໃຫ້ສັງເກດວ່າ ພຣະຜູ້ເປັນເຈົ້າອ້າງອີງເຖິງຄຳອຸປະມາເລື່ອງຍິງສາວບໍລິສຸດສິບຄົນ, ໂດຍປຽບທຽບນໍ້າມັນໃນຄຳອຸປະມາໃສ່ກັບຄວາມຈິງ ແລະ ພຣະວິນຍານສັກສິດ. ໃຫ້ພິຈາລະນາທີ່ຈະອ່ານຄຳອຸປະມາໃນ ມັດທາຍ 25:1–13 ດ້ວຍສິ່ງນັ້ນໃນຈິດໃຈ. ທ່ານໄດ້ຮັບຄວາມຮູ້ແຈ້ງຫຍັງແດ່?
ເບິ່ງ David A. Bednar, “If Ye Had Known Me,” Liahona, Nov. 2016, 102–5 ນຳອີກ.
Parable of the Ten Virgins [ຄຳອຸປະມາເລື່ອງຍິງສາວບໍລິສຸດສິບຄົນ], ໂດຍ ແດນ ເບີ
ຄຳສອນ ແລະ ພັນທະສັນຍາ 45:11–15, 66–71
ຊີໂອນຄືສະຖານທີ່ທີ່ປອດໄພສຳລັບໄພ່ພົນຂອງພຣະເຈົ້າ.
ໄພ່ພົນໃນສະໄໝຂອງໂຈເຊັບ ສະມິດ ໄດ້ມີຄວາມກະຕືລືລົ້ນທີ່ຈະສ້າງຊີໂອນ, ເຢຣູຊາເລັມໃໝ່, (ເບິ່ງ ອີເທີ 13:2–9; ໂມເຊ 7:18, 62–64). ທ່ານຮຽນຮູ້ຫຍັງແດ່ກ່ຽວກັບຊີໂອນ—ທັງເມືອງບູຮານໃນສະໄໝຂອງເອນົກ ແລະ ເມືອງໃນຍຸກສຸດທ້າຍ—ຈາກ ຄຳສອນ ແລະ ພັນທະສັນຍາ 45:11–15, 66–71? ສະໄໝນີ້ ຄຳສັ່ງໃຫ້ສະຖາປະນາຊີໂອນໝາຍເຖິງ ການສະຖາປະນາອານາຈັກຂອງພຣະເຈົ້າຢູ່ບ່ອນໃດກໍຕາມທີ່ເຮົາອາໄສຢູ່. ທ່ານສາມາດເຮັດຫຍັງໄດ້ແດ່ ເພື່ອຊ່ວຍສ້າງຊີໂອນ ໃນບ່ອນໃດກໍຕາມທີ່ທ່ານອາໄສຢູ່?
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 45:3–5
ພຣະເຢຊູຄຣິດເປັນຜູ້ວິງວອນແທນເຮົານຳພຣະບິດາ.
-
ທ່ານອາດຢາກຊ່ວຍໃຫ້ລູກໆຂອງທ່ານເຂົ້າໃຈວ່າ ຜູ້ວິງວອນແທນແມ່ນຜູ້ທີ່ສະໜັບສະໜູນຄົນອື່ນ. ແລ້ວທ່ານສາມາດເວົ້າກ່ຽວກັບຕົວຢ່າງຂອງການເປັນຜູ້ວິງວອນແທນທີ່ພວກເຂົາອາດຄຸ້ນເຄີຍ (ເຊັ່ນ ການຢືນຢັດເພື່ອໝູ່ເພື່ອນ). ຂະນະທີ່ພວກທ່ານອ່ານ ຄຳສອນ ແລະ ພັນທະສັນຍາ 45:3–5 ນຳກັນ, ຊ່ວຍໃຫ້ລູກໆຂອງທ່ານຄົ້ນພົບວ່າ ຜູ້ວິງວອນແທນຂອງເຮົາແມ່ນໃຜ ແລະ ພຣະອົງຊ່ວຍເຮົາແນວໃດ.
ຄຳສອນ ແລະ ພັນທະສັນຍາ 45:32
ເຮົາສາມາດ “ຢືນຢູ່ໃນສະຖານທີ່ສັກສິດ.”
-
ມັນອາດເປັນເລື່ອງມ່ວນຊື່ນ ທີ່ຈະວາງຮູບພາບຂອງບ້ານ, ຕຶກໂບດ, ແລະ ພຣະວິຫານຫລັງໜຶ່ງ ຢູ່ອ້ອມຮອບຫ້ອງ. ແລ້ວທ່ານສາມາດໃຫ້ຮ່ອງຮອຍແກ່ລູກໆຂອງທ່ານ ຊຶ່ງບັນຍານເຖິງສະຖານທີ່ເຫລົ່ານີ້ ແລະ ເຊື້ອເຊີນພວກເຂົາໃຫ້ຢືນຢູ່ໃກ້ຮູບພາບທີ່ທ່ານກຳລັງບັນຍາຍເຖິງ. ຂໍໃຫ້ພວກເຂົາຢືນຢູ່ຊື່ໆ ຂະນະທີ່ທ່ານອ່ານແຖວທຳອິດຈາກ ຄຳສອນ ແລະ ພັນທະສັນຍາ 45:32. ສະຖານທີ່ສັກສິດໃດແດ່ທີ່ພຣະເຈົ້າປະທານໃຫ້ແກ່ເຮົາ? ຊ່ວຍໃຫ້ລູກໆຂອງທ່ານເຂົ້າໃຈວ່າການ “ຢືນຢູ່ໃນສະຖານທີ່ສັກສິດ, ແລະ … ບໍ່ຫວັ່ນໄຫວ” ໝາຍເຖິງການເລືອກສິ່ງທີ່ຖືກຕ້ອງຕະຫລອດເວລາ, ບໍ່ວ່າສິ່ງໃດຈະເກີດຂຶ້ນກໍຕາມ. ເຮົາຈະສາມາດເຮັດໃຫ້ບ້ານເຮືອນຂອງເຮົາເປັນສະຖານທີ່ສັກສິດຫລາຍກວ່າເກົ່າໄດ້ແນວໃດ?
ພຣະກິດຕິຄຸນຂອງພຣະເຢຊູຄຣິດເປັນທຸງສັນຍານແກ່ໂລກ.
-
ທ່ານອາດສາມາດອະທິບາຍແກ່ລູກໆຂອງທ່ານວ່າ ໃນສະໄໝບູຮານ, ທຸງສັນຍານ ແມ່ນປ້າຍທີ່ຖືເຂົ້າໄປໃນການສູ້ຮົບ. ມັນຊ່ວຍໃຫ້ທະຫານຮູ້ວ່າ ຄວນເຕົ້າໂຮມກັນຢູ່ໃສ ແລະ ຄວນເຮັດສິ່ງໃດ. ອ່ານ ຄຳສອນ ແລະ ພັນທະສັນຍາ 45:9 ນຳກັນ, ແລະ ສົນທະນາກ່ຽວກັບວິທີທີ່ພຣະກິດຕິຄຸນເປັນເໝືອນດັ່ງທຸງສັນຍານແນວໃດ. ລູກໆຂອງທ່ານອາດມ່ວນຊື່ນກັບການເຮັດທຸງສັນຍານ ຫລື ທຸງຂອງຕົນເອງ, ລວມທັງຮູບ ຫລື ຖ້ອຍຄຳທີ່ສະແດງເຖິງຄວາມຮູ້ສຶກຂອງພວກເຂົາກ່ຽວກັບພຣະຜູ້ຊ່ວຍໃຫ້ລອດ.
ພຣະກິດຕິຄຸນເປັນເໝືອນດັ່ງທຸງສັນຍານ, ຫລື ປ້າຍ ຫລື ທຸງ.
ຄຳສອນ ແລະ ພັນທະສັນຍາ 45:44–45
ພຣະເຢຊູຄຣິດຈະສະເດັດມາອີກຄັ້ງ.
-
ການທຳລາຍທີ່ຈະເກີດຂຶ້ນກ່ອນການສະເດັດມາຄັ້ງທີສອງ ອາດເຮັດໃຫ້ເດັກນ້ອຍຢ້ານ. ການຊີ້ພວກເຂົາໄປຫາພຣະເຢຊູຄຣິດ ສາມາດຊ່ວຍພວກເຂົາໃຫ້ຕັ້ງຕາຄອງຄອຍຖ້າດ້ວຍສັດທາ! ໃຫ້ພິຈາລະນາທີ່ຈະເຊື້ອເຊີນພວກເຂົາໃຫ້ຄິດກ່ຽວກັບວ່າ ພວກເຂົາຮູ້ສຶກແນວໃດເມື່ອຄົນຄົນໜຶ່ງທີ່ສຳຄັນຈະມາຢ້ຽມຢາມ, ເຊັ່ນ ປູ່ຍ່າຕາຍາຍ ຫລື ໝູ່ເພື່ອນ. ພວກເຂົາຈະກຽມພ້ອມສຳລັບການຢ້ຽມຢາມນັ້ນແນວໃດ? ແລ້ວທ່ານກໍສາມາດເອົາຮູບຂອງພຣະຜູ້ຊ່ວຍໃຫ້ລອດໃຫ້ພວກເຂົາເບິ່ງ ແລະ ອ່ານ ຄຳສອນ ແລະ ພັນທະສັນຍາ 45:44–45. ແບ່ງປັນນຳກັນກ່ຽວກັບວ່າ ທ່ານຮູ້ສຶກແນວໃດກ່ຽວກັບການສະເດັດມາຂອງພຣະຜູ້ຊ່ວຍໃຫ້ລອດ.
-
ເພື່ອຊ່ວຍໃຫ້ລູກໆຂອງທ່ານຮູ້ສຶກຕື່ນເຕັ້ນກັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ, ທ່ານສາມາດຂຽນຄຳສັນຍາທີ່ມີຄວາມຫວັງບາງຂໍ້ໃສ່ແຜ່ນເຈ້ຍ ຈາກ ພາກທີ 45 (ເບິ່ງ, ຍົກຕົວຢ່າງ, ຂໍ້ທີ 44–45, 51–52, 55, 58–59, 66–71). ເອົາເຈ້ຍໃຫ້ລູກໆຂອງທ່ານ ແລະ ຂໍໃຫ້ພວກເຂົາຍົກມືຂຶ້ນ ເມື່ອຄຳສັນຍາທັງຫລາຍທີ່ພວກເຂົາກຳລັງຖືຢູ່ນັ້ນໄດ້ຖືກກ່າວເຖິງ ຂະນະທີ່ທ່ານອ່ານຂໍ້ພຣະຄຳພີ. ໃຫ້ສົນທະນາວ່າ ຄຳສັນຍາເຫລົ່ານີ້ໝາຍຄວາມວ່າແນວໃດ. ທ່ານຍັງສາມາດຮ້ອງເພງນຳກັນກັບລູກໆຂອງທ່ານກ່ຽວກັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ, ເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27).
ຊ່ວຍໃຫ້ລູກໆຮູ້ຈັກພຣະວິນຍານ. ຂະນະທີ່ທ່ານສິດສອນລູກໆຂອງທ່ານ, ໃຫ້ບອກພວກເຂົາເຖິງຕອນທີ່ທ່ານຮູ້ສຶກເຖິງພຣະວິນຍານບໍລິສຸດ. ເວົ້າລົມກ່ຽວກັບວ່າ ທ່ານຮູ້ຈັກອິດທິພົນຂອງພຣະອົງໄດ້ແນວໃດ. ຍົກຕົວຢ່າງ, ທ່ານອາດຮູ້ສືກສະຫງົບ ຫລື ຊື່ນຊົມ ຂະນະທີ່ຮ້ອງເພງກ່ຽວກັບພຣະຜູ້ຊ່ວຍໃຫ້ລອດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
The Second Coming [ການສະເດັດມາຄັ້ງທີສອງ], ໂດຍ ແຮຣີ ແອນເດີສັນ