“ວັນທີ 19–25 ເດືອນພຶດສະພາ: ‘ສິ່ງທີ່ມາຈາກພຣະເຈົ້າເປັນຄວາມສະຫວ່າງ’: ຄຳສອນ ແລະ ພັນທະສັນຍາ 49–50,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 49–50,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ວັນທີ 19–25 ເດືອນພຶດສະພາ: “ສິ່ງທີ່ມາຈາກພຣະເຈົ້າເປັນຄວາມສະຫວ່າງ”
ຄຳສອນ ແລະ ພັນທະສັນຍາ 49–50
ພຣະຜູ້ຊ່ວຍໃຫ້ລອດຄື “ຜູ້ລ້ຽງທີ່ດີ” ຂອງເຮົາ (ຄຳສອນ ແລະ ພັນທະສັນຍາ 50:44). ພຣະອົງຮູ້ວ່າ ບາງເທື່ອແກະຈະເລາະໄປມາ ແລະ ຖິ່ນແຫ້ງແລ້ງກັນດານກໍມີໄພອັນຕະລາຍຫລາຍຢ່າງ. ສະນັ້ນ, ພຣະອົງຈຶ່ງນຳພາເຮົາໄປສູ່ຄວາມປອດໄພແຫ່ງຄຳສອນຂອງພຣະອົງດ້ວຍຄວາມຮັກ. ພຣະອົງນຳພາເຮົາໃຫ້ໄກຈາກສິ່ງອັນຕະລາຍຕ່າງໆເຊັ່ນ “ວິນຍານເທັດ, ທີ່ໄດ້ອອກໄປໃນແຜ່ນດິນໂລກ, ຫລອກລວງໂລກ” (ຄຳສອນ ແລະ ພັນທະສັນຍາ 50:2). ການຕິດຕາມພຣະອົງໄປ ມັກຈະໝາຍເຖິງການປ່ອຍວາງແນວຄິດ ຫລື ປະເພນີທີ່ບໍ່ຖືກຕ້ອງ. ສິ່ງນີ້ເປັນຄວາມຈິງສຳລັບ ລີມັນ ຄອບລີ ແລະ ຄົນອື່ນໆໃນລັດໂອໄຮໂອ. ພວກເຂົາໄດ້ຮັບເອົາພຣະກິດຕິຄຸນທີ່ຖືກຟື້ນຟູ ແຕ່ຍັງຍຶດຖືຄວາມເຊື່ອບາງຢ່າງ ທີ່ບໍ່ຖືກຕ້ອງຢູ່ຄືເກົ່າ. ໃນ ຄຳສອນ ແລະ ພັນທະສັນຍາ 49, ພຣະຜູ້ເປັນເຈົ້າໄດ້ປະກາດຄວາມຈິງທີ່ແກ້ໄຂຄວາມເຊື່ອເກົ່າຂອງລີມັນ ກ່ຽວກັບຫົວຂໍ້ເຊັ່ນ ການແຕ່ງງານ ແລະ ການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ. ແລະ ເມື່ອຜູ້ປ່ຽນໃຈເຫລື້ອມໃສຢູ່ລັດໂອໄຮໂອ “ໄດ້ຮັບ … ວິນຍານຕ່າງໆ ຊຶ່ງ [ພວກເຂົາ] ບໍ່ສາມາດເຂົ້າໃຈ,” ພຣະຜູ້ເປັນເຈົ້າໄດ້ສິດສອນພວກເຂົາເຖິງວິທີຫລິງເຫັນການສະແດງໃຫ້ປະຈັກທີ່ແທ້ຈິງຂອງພຣະວິນຍານ (ຄຳສອນ ແລະ ພັນທະສັນຍາ 50:15). ພຣະຜູ້ລ້ຽງແກະທີ່ດີມີຄວາມອົດທົນກັບພວກເຮົາ; “ເດັກນ້ອຍໆ” ຜູ້ທີ່ “ຕ້ອງເຕີບໂຕຂຶ້ນໃນພຣະຄຸນ ແລະ ໃນຄວາມຮູ້ເລື່ອງຄວາມຈິງ” ຂອງພຣະອົງ (ຄຳສອນ ແລະ ພັນທະສັນຍາ 50:40).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 49; 50:24
ພຣະເຢຊູຄຣິດຕ້ອງການໃຫ້ເຮົານ້ອມຮັບເອົາຄວາມຈິງຂອງພຣະກິດຕິຄຸນຂອງພຣະອົງ.
ກ່ອນເຂົ້າຮ່ວມສາດສະໜາຈັກ, ລີມັນ ຄອບລີ ໄດ້ເປັນສະມາຊິກຂອງກຸ່ມສາດສະໜາກຸ່ມໜຶ່ງ ທີ່ຮູ້ຈັກກັນໃນຊື່ United Society of Believers in Christ’s Second Appearing, ຫລື ເປັນທີ່ຮູ້ຈັກເຊັ່ນກັນວ່າ ພວກເຊເກີ. ຫລັງຈາກທີ່ສົນທະນາກັບລີມັນ, ໂຈເຊັບ ສະມິດ ໄດ້ສະແຫວງຫາການການຊີ້ແຈງຈາກພຣະຜູ້ເປັນເຈົ້າກ່ຽວກັບຄຳສອນບາງຢ່າງຂອງພວກເຊເກີ. ພຣະຜູ້ເປັນເຈົ້າໄດ້ຕອບດ້ວຍການເປີດເຜີຍໃນ ພາກທີ 49. ຄວາມເຊື່ອບາງຢ່າງພວກເຊເກີ ໄດ້ຖືກລະບຸໄວ້ຢູ່ໃນຫົວຂໍ້ພາກ.
ພຣະຜູ້ເປັນເຈົ້າໄດ້ສິດສອນຫຍັງໃນ ພາກທີ 49 ເພື່ອແກ້ໄຂຄວາມເຊື່ອຕ່າງໆຂອງພວກເຊເກີ? ມີຫລັກຖານຫຍັງແດ່ທີ່ທ່ານເຫັນໃນການເປີດເຜີຍນີ້ ເຖິງຄວາມຮັກ ແລະ ຄວາມຫ່ວງໃຍຕໍ່ຜູ້ຄົນທີ່ບໍ່ມີຄວາມສົມບູນຂອງຄວາມຈິງຂອງພຣະອົງ? ທ່ານຈະສາມາດເອື້ອມອອກໄປຫາພວກເຂົາດ້ວຍຄວາມຮັກ ແລະ ຄວາມຫ່ວງໃຍໄດ້ແນວໃດ?
ແມ່ນຫຍັງທີ່ປະທັບໃຈທ່ານກ່ຽວກັບການສັງເກດຂອງພຣະຜູ້ເປັນເຈົ້າໃນ ຂໍ້ທີ 2? ທ່ານອາດປຽບທຽບສິ່ງນີ້ກັບສິ່ງທີ່ເກີດຂຶ້ນ ຖ້າຫາກທ່ານເບິ່ງພຽງແຕ່ສ່ວນໜຶ່ງຂອງໜັງເລື່ອງໜຶ່ງ, ເຫັນຊິ້ນສ່ວນໜຶ່ງຂອງຈິກຊໍ, ຫລື ໄດ້ຍິນການໂຕ້ຖຽງກັນຈາກຝ່າຍດຽວ. ຄຳເຕືອນຂອງພຣະຜູ້ເປັນເຈົ້າກ່ຽວຂ້ອງກັບ ຄຳສອນ ແລະ ພັນທະສັນຍາ 50:24 ແນວໃດ? ໃຫ້ພິຈາລະນາສິ່ງທີ່ທ່ານກຳລັງເຮັດ ເພື່ອທີ່ຈະຮັບຄວາມສະຫວ່າງຈາກພຣະຜູ້ເປັນເຈົ້າຫລາຍຂຶ້ນກວ່າເກົ່າ.
ເບິ່ງ “Leman Copley and the Shakers,” ໃນ Revelations in Context, 117–21 ນຳອີກ.
ຄຳສອນ ແລະ ພັນທະສັນຍາ 49:15–17
ການແຕ່ງງານລະຫວ່າງຊາຍ ແລະ ຍິງ ເປັນສິ່ງທີ່ສຳຄັນຫລາຍຕໍ່ແຜນຂອງພຣະເຈົ້າ.
ໃນຄວາມພະຍາຍາມທີ່ຈະລອບທຳລາຍແຜນຂອງພຣະບິດາເທິງສະຫວັນ, ຊາຕານສະແຫວງຫາທີ່ຈະສ້າງຄວາມສັບສົນກ່ຽວກັບການແຕ່ງງານ. ພຣະຜູ້ເປັນເຈົ້າ, ໃນທາງກົງກັນຂ້າມ, ສືບຕໍ່ທີ່ຈະເປີດເຜີຍຄວາມຈິງກ່ຽວກັບການແຕ່ງງານຜ່ານທາງສາດສະດາຂອງພຣະອົງ. ທ່ານສາມາດພົບບາງຂໍ້ກ່ຽວກັບຄວາມຈິງນີ້ໃນ ຄຳສອນ ແລະ ພັນທະສັນຍາ 49:15–17; ປະຖົມມະການ 2:20–24; 1 ໂກຣິນໂທ 11:11; ແລະ “ຄອບຄົວ: ການປະກາດຕໍ່ໂລກ.” ຂຽນລາຍການກ່ຽວກັບຄວາມຈິງທີ່ທ່ານພົບເຫັນ. ເປັນຫຍັງການແຕ່ງງານຈຶ່ງສຳຄັນຫລາຍຕໍ່ແຜນຂອງພຣະເຈົ້າ?
ແອວເດີ ຢູລິດຊິສ໌ ໂຊອາເຣສ໌ ໄດ້ສິດສອນວ່າ “ພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດປະກາດຫລັກທຳຂອງການເປັນຫຸ້ນສ່ວນໃນທຸກຢ່າງລະຫວ່າງຍິງ ແລະ ຊາຍ, ທັງໃນຊີວິດມະຕະ ແລະ ໃນນິລັນດອນ (“In Partnership with the Lord,” Liahona, Nov. 2022, 42). ທ່ານອາດສຶກສາຂ່າວສານຂອງເພິ່ນ, ໂດຍຊອກຫາຫລັກທຳ “ທີ່ເສີມສ້າງຄວາມເປັນຫຸ້ນສ່ວນລະຫວ່າງ ຊາຍ ແລະ ຍິງ.” ທ່ານຈະສາມາດນຳໃຊ້ຫລັກທຳເຫລົ່ານີ້ກັບຊີວິດຂອງທ່ານໄດ້ແນວໃດ? ຖ້າຫາກບາງຄົນຈາກສາດສະໜາອື່ນຖາມທ່ານວ່າ ເປັນຫຍັງການແຕ່ງງານຈຶ່ງສຳຄັນ, ທ່ານຈະຕອບວ່າແນວໃດ? ເປັນຫຍັງທ່ານຈຶ່ງກະຕັນຍູສຳລັບຄວາມເຂົ້າໃຈນີ້?
ເບິ່ງ Topics and Questions, “Marriage,” “Family,” ຫ້ອງສະໝຸດພຣະກິດຕິຄຸນ; David A. Bednar, “Marriage Is Essential to His Eternal Plan,” Ensign, June 2006, 83–84; “Renaissance of Marriage” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
Renaissance of Marriage
Hear what President Eyring says we all must do to have a renaissance of happy marriages and productive families.
ມີຄວາມອ່ອນໄຫວຕໍ່ສະພາບການສ່ວນບຸກຄົນ. ຂະນະທີ່ການແຕ່ງງານ ແລະ ຊີວິດຄອບຄົວທີ່ມີຄວາມສຸກເປັນອຸດົມຄະຕິໃນພຣະກິດຕິຄຸນຂອງພຣະເຢຊູຄຣິດ, ບໍ່ແມ່ນເຮົາທຸກຄົນທີ່ມີໂອກາດຊື່ນຊົມໄປກັບພອນເຫລົ່ານີ້ ຂະນະທີ່ຢູ່ໃນຄວາມເປັນມະຕະ. ລະຫວ່າງທີ່ສົນທະນາກ່ຽວກັບຫົວຂໍ້ນີ້, ໃຫ້ອ່ອນໄຫວຕໍ່ສະພາບການສ່ວນບຸກຄົນ ແລະ ຄອບຄົວທີ່ຫລາກຫລາຍ, ໂດຍສະເພາະແມ່ນຕໍ່ຜູ້ຄົນທີ່ “ລໍຖ້າພຣະຜູ້ເປັນເຈົ້າຢ່າງອົດທົນ” ເພື່ອວ່າຄຳສັນຍານິລັນດອນຈະສຳເລັດຄົບຖ້ວນ (ເບິ່ງ ຄຳສອນ ແລະ ພັນທະສັນຍາ 98:1–3).
ຄຳສອນຂອງພຣະຜູ້ເປັນເຈົ້າ ສາມາດປົກປ້ອງເຮົາຈາກການຫລອກລວງຂອງຊາຕານ.
ສະມາຊິກໃໝ່ຂອງສາດສະໜາຈັກຢູ່ໃນລັດໂອໄຮໂອ ມີຄວາມກະຕືລືລົ້ນທີ່ຈະຮັບເອົາການສະແດງໃຫ້ປະຈັກທາງວິນຍານທີ່ໄດ້ສັນຍາໄວ້ຢູ່ໃນພຣະຄຳພີ. ເຖິງຢ່າງໃດກໍຕາມ, ຊາຕານກໍກະຕືລືລົ້ນທີ່ຈະຫລອກລວງພວກເຂົາ. ຖ້າຫາກທ່ານຖືກຂໍໃຫ້ຊ່ວຍສະມາຊິກເຫລົ່ານີ້ໃຫ້ເຂົ້າໃຈເຖິງວິທີທີ່ຈະຮູ້ຈັກການສະແດງໃຫ້ປະຈັກທີ່ແທ້ຈິງຂອງພຣະວິນຍານບໍລິສຸດ, ແລ້ວຫລັກທຳໃດໃນ ຄຳສອນ ແລະ ພັນທະສັນຍາ 50 ທີ່ທ່ານຈະແບ່ງປັນ? (ເບິ່ງ ໂດຍສະເພາະ ຂໍ້ທີ 22–25, 29–34, 40–46). ພຣະຜູ້ຊ່ວຍໃຫ້ລອດໄດ້ຊ່ວຍໃຫ້ທ່ານຮູ້ຈັກຄວາມແຕກຕ່າງລະຫວ່າງຄວາມຈິງ ແລະ ຄວາມບໍ່ຖືກຕ້ອງແນວໃດ?
ເບິ່ງ 1 ໂກຣິນໂທ 14:1–28; 2 ຕີໂມທຽວ 3:13–17 ນຳອີກ.
ຄຳສອນ ແລະ ພັນທະສັນຍາ 50:13–24
ຄູສອນ ແລະ ນັກຮຽນຈະໄດ້ຮັບຄວາມຮູ້ແຈ້ງນຳກັນໂດຍພຣະວິນຍານ.
ການໃຊ້ຊີວິດຕາມພຣະກິດຕິຄຸນຂອງພຣະເຢຊູຄຣິດເປີດໂອກາດຫລາຍໆຢ່າງໃນການເປັນຄູສອນ ແລະ ຜູ້ຮຽນ, ທັງຢູ່ທີ່ບ້ານ ແລະ ຢູ່ທີ່ໂບດ. ວິທີໜຶ່ງທີ່ທ່ານສາມາດສຶກສາ ຄຳສອນ ແລະ ພັນທະສັນຍາ 50:13–24 ແມ່ນການແຕ້ມຮູບຂອງຄູສອນ ແລະ ຜູ້ຮຽນ. ຢູ່ທາງຂ້າງແຕ່ລະຄົນ, ໃຫ້ຂຽນລາຍການຄຳ ແລະ ວະລີຕ່າງໆຈາກຂໍ້ເຫລົ່ານີ້ ທີ່ສິດສອນທ່ານບາງຢ່າງກ່ຽວກັບການຮຽນຮູ້ ແລະ ການສິດສອນພຣະກິດຕິຄຸນ. ເມື່ອໃດທີ່ທ່ານເຄີຍມີປະສົບການ ທີ່ສິດສອນທ່ານເຖິງຄວາມສຳຄັນຂອງພຣະວິນຍານ ໃນການສິດສອນ ແລະ ການຮຽນຮູ້? ໃຫ້ພິຈາລະນາສິ່ງທີ່ທ່ານສາມາດເຮັດ ເພື່ອປັບປຸງຄວາມພະຍາຍາມຂອງທ່ານ ໃນຖານະຜູ້ຮຽນ ແລະ ຄູສອນພຣະກິດຕິຄຸນ.
ຄຳສອນ ແລະ ພັນທະສັນຍາ 50:23–25
“ສິ່ງທີ່ມາຈາກພຣະເຈົ້າເປັນຄວາມສະຫວ່າງ.”
ຂະນະທີ່ທ່ານໄຕ່ຕອງພຣະຄຳຂອງພຣະຜູ້ຊ່ວຍໃຫ້ລອດໃນ ຄຳສອນ ແລະ ພັນທະສັນຍາ 50:23–25, ໃຫ້ຄິດກ່ຽວກັບວ່າ ທ່ານຮັບຄວາມສະຫວ່າງຂອງພຣະເຈົ້າໃນຊີວິດຂອງທ່ານແນວໃດ ແລະ ທ່ານ “ຂັບໄລ່ຄວາມມືດ” ອອກໄປແນວໃດ. ຍົກຕົວຢ່າງ, ຂໍ້ເຫລົ່ານີ້ນຳພາການເລືອກຂອງທ່ານກ່ຽວກັບວິທີໃຊ້ເວລາຂອງທ່ານແນວໃດ? ຄວາມບັນເທີງ ຫລື ສື່ໃດທີ່ທ່ານສະແຫວງຫາ? ການສົນທະນາໃດທີ່ທ່ານມີສ່ວນຮ່ວມນຳ? ການຕັດສິນໃຈໃດອີກແດ່ທີ່ຂໍ້ເຫລົ່ານີ້ສາມາດຊ່ວຍທ່ານໄດ້? ເພງສວດເຊັ່ນ “ພຣະຜູ້ໄຖ່ແຫ່ງອິດສະຣາເອນ” (ເພງສວດ ແລະ ເພງຂອງເດັກນ້ອຍ, 5) ອາດດົນໃຈຄວາມຄິດເພີ່ມເຕີມ.
ເບິ່ງ “ເດີນໄປໃນຄວາມສະຫວ່າງຂອງພຣະເຈົ້າ,” ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 16–21 ນຳອີກ.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 49:12–14
ເຮົາສາມາດຕິດຕາມພຣະເຢຊູຄຣິດ.
-
ເພື່ອສິດສອນລູກໆຂອງທ່ານເຖິງຫລັກທຳໃນຂໍ້ເຫລົ່ານີ້, ທ່ານສາມາດກຽມເຈ້ຍຮອຍຕີນສີ່ໃບ ແລະ ຮູບພາບສີ່ໃບທີ່ເປັນຕົວແທນເຖິງສັດທາໃນພຣະເຢຊູຄຣິດ, ການກັບໃຈ, ການບັບຕິສະມາ, ແລະ ການຮັບພຣະວິນຍານບໍລິສຸດ (ເບິ່ງຮູບພາບໃນ ໜ້າກິດຈະກຳ ຂອງອາທິດນີ້). ລູກໆຂອງທ່ານສາມາດວາງຮອຍຕີນເທິງພື້ນ ໂດຍມີຮູບພາບເຫລົ່ານັ້ນຢູ່ຂ້າງມັນ. ແລ້ວພວກທ່ານກໍສາມາດປ່ຽນຜຽນກັນຍ່າງຢູ່ເທິງຮອຍຕີນເຫລົ່ານັ້ນ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 49:12–14. ຊ່ວຍໃຫ້ພວກເຂົາເຂົ້າໃຈວ່າ ເມື່ອເຮົາເຮັດສິ່ງທີ່ຢູ່ໃນຮູບພາບເຫລົ່ານີ້, ເຮົາກໍກຳລັງຕິດຕາມພຣະເຢຊູຄຣິດ.
-
ທ່ານຍັງສາມາດເຊື້ອເຊີນລູກໆຂອງທ່ານໃຫ້ປຽບທຽບ ຄຳສອນ ແລະ ພັນທະສັນຍາ 49:12–14 ກັບ ກິດຈະການ 2:38 ແລະ ກັບ ຫລັກແຫ່ງຄວາມເຊື່ອຂໍ້ທີສີ່ ນຳອີກ. ພວກທ່ານພົບສິ່ງໃດແດ່ທີ່ຄ້າຍຄືກັນ? ເປັນຫຍັງຄວາມຈິງເຫລົ່ານີ້ຈຶ່ງສຳຄັນ?
ຄຳສອນ ແລະ ພັນທະສັນຍາ 49:15–17
ການແຕ່ງງານລະຫວ່າງຊາຍ ແລະ ຍິງ ເປັນສິ່ງທີ່ສຳຄັນຫລາຍຕໍ່ແຜນຂອງພຣະເຈົ້າ.
-
ເພື່ອທີ່ຈະແນະນຳຂໍ້ເຫລົ່ານີ້, ທ່ານສາມາດອະທິບາຍວ່າ ພວກເຊເກີແມ່ນກຸ່ມສາດສະໜາກຸ່ມໜຶ່ງທີ່ເຊື່ອວ່າ ຜູ້ຄົນບໍ່ຄວນແຕ່ງງານ (ເບິ່ງ ຫົວຂໍ້ພາກຂອງ ຄຳສອນ ແລະ ພັນທະສັນຍາ 49). ເຊື້ອເຊີນລູກໆຂອງທ່ານໃຫ້ຊອກຫາສິ່ງຕ່າງໆທີ່ພຣະຜູ້ເປັນເຈົ້າໄດ້ສິດສອນເຮົາກ່ຽວກັບການແຕ່ງງານໃນ ຄຳສອນ ແລະ ພັນທະສັນຍາ 49:15–17. “ການແຕ່ງງານໄດ້ຮັບການແຕ່ງຕັ້ງຈາກພຣະເຈົ້າ” ແມ່ນໝາຍຄວາມວ່າຫຍັງ? ບາງເທື່ອພວກທ່ານກໍສາມາດອ່ານສາມວັກທຳອິດຂອງ “ຄອບຄົວ: ການປະກາດຕໍ່ໂລກ” ນຳກັນ. ແລ້ວເວົ້າກ່ຽວກັບວ່າ ເປັນຫຍັງການແຕ່ງງານ ແລະ ຄອບຄົວຈຶ່ງສຳຄັນຕໍ່ພຣະບິດາເທິງສະຫວັນ.
ຄຳສອນ ແລະ ພັນທະສັນຍາ 50:23–25
“ສິ່ງທີ່ມາຈາກພຣະເຈົ້າເປັນ ຄວາມສະຫວ່າງ.”
-
ເພື່ອທີ່ຈະແນະນຳ ຄຳສອນ ແລະ ພັນທະສັນຍາ 50:23–25, ໃຫ້ເວົ້າກັບລູກໆຂອງທ່ານກ່ຽວກັບຄວາມແຕກຕ່າງລະຫວ່າງຄວາມສະຫວ່າງ ແລະ ຄວາມມືດ. ເປັນຫຍັງເຮົາຈຶ່ງຕ້ອງການຄວາມສະຫວ່າງ? ພວກທ່ານສາມາດອ່ານວັກທຳອິດຂອງ “ເດີນໄປໃນຄວາມສະຫວ່າງຂອງພຣະເຈົ້າ” ໃນ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (ໜ້າທີ 17) ພ້ອມດ້ວຍ ຄຳສອນ ແລະ ພັນທະສັນຍາ 50:23–25 ນຳກັນ. ເວົ້າກ່ຽວກັບວິທີທີ່ເຮົາຮັບຄວາມສະຫວ່າງຂອງພຣະເຈົ້າ ແລະ ວິທີທີ່ເຮົາສາມາດຂັບໄລ່ຄວາມມືດອອກໄປ. ແລ້ວທ່ານກໍສາມາດຮ້ອງເພງນຳກັນກ່ຽວກັບຄວາມສະຫວ່າງທາງວິນຍານຂອງພວກເຂົາ, ເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72).
ຄຳສອນ ແລະ ພັນທະສັນຍາ 50:40–46
ພຣະເຢຊູຄຣິດຄືຜູ້ລ້ຽງແກະທີ່ດີຂອງເຮົາ.
-
ຫລັງຈາກທີ່ອ່ານ ຄຳສອນ ແລະ ພັນທະສັນຍາ 50:40–46 ນຳກັນ, ທ່ານສາມາດສະແດງຮູບຂອງພຣະຜູ້ຊ່ວຍໃຫ້ລອດທີ່ຢູ່ທ້າຍໂຄງຮ່າງນີ້ ແລະ ຖາມຄຳຖາມດັ່ງຕໍ່ໄປນີ້: ຜູ້ລ້ຽງແກະຮູ້ສຶກແນວໃດກ່ຽວກັບແກະຂອງພຣະອົງ? ພຣະຜູ້ຊ່ວຍໃຫ້ລອດເປັນເໝືອນດັ່ງຜູ້ລ້ຽງແກະຕໍ່ເຮົາແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Gentle Shepherd [ຜູ້ລ້ຽງແກະທີ່ອ່ອນໂຍນ], ໂດຍ ຢອງຊຸງ ຄິມ