“ວັນທີ 26 ເດືອນພຶດສະພາ–ວັນທີ 1 ເດືອນມິຖຸນາ: ‘ຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ’: ຄຳສອນ ແລະ ພັນທະສັນຍາ 51–57,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 51–57,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
First Furrow [ຮ່ອງທຳອິດ], ໂດຍ ເຈມສ໌ ເທເລີ ຮາວູດ
ວັນທີ 26 ເດືອນພຶດສະພາ–ວັນທີ 1 ເດືອນມິຖຸນາ: “ຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ”
ຄຳສອນ ແລະ ພັນທະສັນຍາ 51–57
ສຳລັບສະມາຊິກຂອງສາດສະໜາຈັກ ໃນຊ່ວງຊຸມປີ 1830, ການເຕົ້າໂຮມໄພ່ພົນ ແລະ ການສ້າງເມືອງຊີໂອນ ຖືເປັນວຽກງານທາງວິນຍານ ແລະ ທາງໂລກ, ໂດຍມີຫລາຍເລື່ອງທີ່ຕ້ອງຈັດການໃຫ້ຮຽບຮ້ອຍ: ບາງຄົນຕ້ອງໄດ້ຊື້ທີ່ດິນບ່ອນທີ່ໄພ່ພົນສາມາດຕັ້ງຖິ່ນຖານໄດ້. ບາງຄົນຕ້ອງໄດ້ພິມໜັງສື ແລະ ການຈັດພິມອື່ນໆ. ແລະ ບາງຄົນຕ້ອງດູແລຮ້ານຄ້າ ເພື່ອຈັດຫາສິ່ງຂອງໃຫ້ຜູ້ຄົນໃນຊີໂອນ. ໃນການເປີດເຜີຍທີ່ມີບັນທຶກໄວ້ໃນ ຄຳສອນ ແລະ ພັນທະສັນຍາ 51–57, ພຣະຜູ້ເປັນເຈົ້າໄດ້ກຳນົດ ແລະ ແນະນຳຜູ້ຄົນໃຫ້ຈັດການກັບໜ້າທີ່ວຽກງານເຫລົ່ານີ້.
ແຕ່ຂະນະທີ່ທັກສະດັ່ງກ່າວເປັນທີ່ຕ້ອງການໃນຊີໂອນ, ການເປີດເຜີຍເຫລົ່ານີ້ຍັງສິດສອນວ່າ ພຣະຜູ້ເປັນເຈົ້າປາດຖະໜາໃຫ້ໄພ່ພົນຂອງພຣະອົງມີຄ່າຄວນທາງວິນຍານ ເພື່ອທີ່ຈະຖືກເອີ້ນວ່າ ຜູ້ຄົນແຫ່ງຊີໂອນ—ຜູ້ຄົນຂອງພຣະອົງ. ພຣະອົງເອີ້ນເຮົາແຕ່ລະຄົນໃຫ້ “ຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ,” ໂດຍການມີວິນຍານທີ່ສຳນຶກຜິດ, “ຍຶດໝັ້ນ” ໃນໜ້າທີ່ຮັບຜິດຊອບທີ່ເຮົາໄດ້ຖືກກຳນົດໃຫ້ເຮັດ (ເບິ່ງ ຄຳສອນ ແລະ ພັນທະສັນຍາ 51:19; 52:15; 54:2). ຖ້າຫາກເຮົາສາມາດເຮັດສິ່ງນັ້ນໄດ້—ບໍ່ວ່າທັກສະທາງໂລກຂອງເຮົາຈະເປັນແນວໃດກໍຕາມ—ພຣະຜູ້ເປັນເຈົ້າສາມາດໃຊ້ເຮົາໃຫ້ສ້າງສາຊີໂອນໄດ້.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະຜູ້ເປັນເຈົ້າປະສົງໃຫ້ເຮົາເປັນຄົນຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ.
ຖ້າຫາກທ່ານເປັນສະມາຊິກຂອງສາດສະໜາຈັກ ໃນປີ 1831, ທ່ານອາດຖືກເຊື້ອເຊີນໃຫ້ໃຊ້ຊີວິດຕາມກົດແຫ່ງການອຸທິດຖວາຍ ໂດຍການເຊັນມອບຊັບສິນຂອງທ່ານ ໃຫ້ສາດສະໜາຈັກ ຜ່ານທາງອະທິການ. ໃນກໍລະນີສ່ວນຫລາຍແລ້ວ, ເພິ່ນຈະມອບສິ່ງທີ່ທ່ານບໍລິຈາກຄືນໃຫ້ທ່ານ, ບາງເທື່ອກໍຄືນໃຫ້ພ້ອມກັບສ່ວນເກີນ. ແຕ່ມັນຈະບໍ່ເປັນພຽງແຕ່ຊັບສິນຂອງທ່ານອີກຕໍ່ໄປ—ມັນເປັນສິ່ງທີ່ທ່ານພິທັກຮັກສາ.
ທຸກມື້ນີ້ ຂັ້ນຕອນປະຕິບັດແມ່ນແຕກຕ່າງ, ແຕ່ຫລັກທຳຍັງສຳຄັນຫລາຍຕໍ່ວຽກງານຂອງພຣະຜູ້ເປັນເຈົ້າຢູ່ຄືເກົ່າ. ຂະນະທີ່ທ່ານອ່ານ ພາກທີ 51, ໃຫ້ຄິດກ່ຽວກັບສິ່ງທີ່ພຣະເຈົ້າໄດ້ຝາກຝັງໄວ້ກັບທ່ານ. ຄຳວ່າ “ພິທັກຮັກສາ” (ຂໍ້ທີ 19) ແລະ “ອຸທິດຖວາຍ” (ຂໍ້ທີ 5) ໝາຍເຖິງສິ່ງໃດ ກ່ຽວກັບຄວາມຄາດຫວັງຂອງພຣະເຈົ້າໃນຕົວທ່ານ?
ປະທານສະເປັນເຊີ ດັບເບິນຢູ ຄິມໂບ ໄດ້ອະທິບາຍວ່າ: “ໃນສາດສະໜາຈັກ ການເປັນຜູ້ພິທັກຮັກສາເປັນຄວາມໄວ້ວາງໃຈທີ່ສັກສິດທາງວິນຍານ ແລະ ທາງຮ່າງກາຍ ຊຶ່ງມີຄວາມຮູ້ຈັກຮັບຜິດຊອບ. ຍ້ອນວ່າທຸກສິ່ງເປັນຂອງພຣະຜູ້ເປັນເຈົ້າ, ເຮົາຈຶ່ງເປັນຜູ້ພິທັກຮັກສາຂອງຮ່າງກາຍ, ຈິດໃຈ, ຄອບຄົວ, ແລະ ຊັບສິນຂອງເຮົາ. (ເບິ່ງ ຄຳສອນ ແລະ ພັນທະສັນຍາ 104:11–15.) ຜູ້ພິທັກຮັກສາທີ່ຊື່ສັດ ຄືຜູ້ທີ່ໃຊ້ອຳນາດປົກຄອງທີ່ຊອບທຳ, ດູແລຜູ້ຄົນຂອງຕົນ, ແລະ ເບິ່ງແຍງຄົນຍາກຈົນ ແລະ ຄົນຂັດສົນ” (“Welfare Services: The Gospel in Action,” Ensign, Nov. 1977, 78).
ເບິ່ງ “The Law of Consecration” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
The Law of Consecration
Historians Kate Holbrook and Steven C. Harper discuss what the Law of Consecration is, the three core doctrines pertaining to it, and how we can live it today.
ຄຳສອນ ແລະ ພັນທະສັນຍາ 52:9–11, 22–27
ເຮົາສາມາດເຊື້ອເຊີນໃຫ້ຄົນອື່ນໃຫ້ມາຫາພຣະຄຣິດໃນທຸກບ່ອນທີ່ເຮົາໄປ.
ເມື່ອພຣະຜູ້ເປັນເຈົ້າໄດ້ສົ່ງຜູ້ນຳສາດສະໜາຈັກຫລາຍຄົນໄປຍັງລັດມີເຊີຣີ, ພຣະອົງໄດ້ບອກພວກເພິ່ນໃຫ້ໃຊ້ເວລາໃນການເດີນທາງໃຫ້ເປັນປະໂຫຍດ ແລະ “ສັ່ງສອນໄປລະຫວ່າງທາງ” (ຂໍ້ທີ 25–27). ທ່ານຈະສາມາດແບ່ງປັນພຣະກິດຕິຄຸນ “ໄປລະຫວ່າງທາງ,” ຫລື ໃນລະຫວ່າງເຫດການປົກກະຕິໃນຊີວິດຂອງທ່ານໄດ້ແນວໃດ?
ຄຳສອນ ແລະ ພັນທະສັນຍາ 52:14–19
ພຣະຜູ້ເປັນເຈົ້າຊ່ວຍເຮົາໃຫ້ຫລີກລ້ຽງຈາກການຫລອກລວງ.
ໂດຍທີ່ມີຫລາຍຄົນອ້າງວ່າໄດ້ເຫັນການສະແດງໃຫ້ປະຈັກທາງວິນຍານ, ໄພ່ພົນລຸ້ນທຳອິດຈຶ່ງກັງວົນວ່າຈະຖືກຫລອກລວງ. ຄຳເຕືອນໃດທີ່ພຣະຜູ້ເປັນເຈົ້າໄດ້ມອບໃຫ້ພວກເຂົາໃນ ຄຳສອນ ແລະ ພັນທະສັນຍາ 52:14? ທາງອອກຂອງພຣະອົງແມ່ນຫຍັງ? (ເບິ່ງ ຂໍ້ທີ 14–19).
ແບບແຜນ ແມ່ນບາງຢ່າງທີ່ຊໍ້າກັນໃນວິທີທີ່ສະໝໍ່າສະເໝີ ແລະ ສາມາດຄາດເດົາໄດ້. ຕົວຢ່າງແມ່ນລວມທັງການນັບເປັນເລກຄູ່ ຫລື ຕາເວັນທີ່ຂຶ້ນ ແລະ ຕົກໃນແຕ່ລະມື້. ມີຕົວຢ່າງອື່ນໃດອີກແດ່ທີ່ທ່ານຄິດອອກ? ຂະນະທີ່ທ່ານຄົ້ນຄວ້າ ຄຳສອນ ແລະ ພັນທະສັນຍາ 52:14–19, ໃຫ້ລະບຸແບບແຜນຂອງພຣະຜູ້ເປັນເຈົ້າສຳລັບການຫລີກລ້ຽງຈາກການຫລອກລວງ. ນີ້ອາດຊ່ວຍໃຫ້ສັງເກດເຫັນວ່າ “ສຳນຶກຜິດ” ໝາຍເຖິງຄວາມຮູ້ສຶກຖ່ອມຕົວ ແລະ ການກັບໃຈ; “ອ່ອນໂຍນ” ໝາຍເຖິງຄວາມອ່ອນໂຍນ ແລະ ການຄວບຄຸມຕົວເອງ; ແລະ ການ “ເສີມສ້າງ” ໝາຍເຖິງການຊີ້ນຳ, ປັບປຸງ, ຫລື ການສ້າງຂຶ້ນ. ເປັນຫຍັງທ່ານຈຶ່ງຮູ້ສຶກວ່າ ແບບແຜນຂອງພຣະຜູ້ເປັນເຈົ້າແມ່ນລວມທັງຄຸນສົມບັດເຫລົ່ານີ້, ພ້ອມທັງການເຊື່ອຟັງ? ທ່ານຈະສາມາດນຳໃຊ້ແບບແຜນນີ້ເພື່ອຫລີກລ້ຽງຈາກການຫລອກລວງໄດ້ແນວໃດ?
ນິຍາມຄຳຍາກໆ. ໃນແອັບຫ້ອງສະໝຸດພຣະກິດຕິຄຸນ, ທ່ານສາມາດແຕະ ແລະ ຈຶ້ງຄຳ ແລ້ວເລືອກ “ນິຍາມ.” ແລ້ວທ່ານຈະຖືກນຳໄປສູ່ນິຍາມຂອງຄຳນັ້ນ. ໃຫ້ລອງສິ່ງນີ້ ເມື່ອທ່ານພົບຄຳທີ່ບໍ່ຄຸ້ນ—ຫລື ຄຳທີ່ເບິ່ງຄືວ່າຄຸ້ນທີ່ທ່ານຢາກເຂົ້າໃຈຫລາຍຂຶ້ນກວ່າເກົ່າ.
ມີຕົວຢ່າງຂອງການຫລອກລວງໃດແດ່ໃນສະໄໝຂອງເຮົາ? ເຮົາຈະສາມາດຮູ້ໄດ້ແນວໃດວ່າ ເຮົາກຳລັງຖືກຫລອກລວງ?
ຍົກຕົວຢ່າງ, ທ່ານອາດພິຈາລະນາທີ່ຈະປະເມີນການເລືອກຂອງທ່ານກ່ຽວກັບໜັງ, ເພງ, ແລະ ສື່ສັງຄົມ ອີງຕາມມາດຕະຖານໃນ “ເດີນໄປໃນຄວາມສະຫວ່າງຂອງພຣະເຈົ້າ” ໃນ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 16–21.
ເບິ່ງ ແກຣີ ອີ ສະຕີບເວັນສັນ, “Deceive Me Not,” Liahona, Nov. 2019, 93–96; “Guide Me to Thee,” Hymns, no. 101; Topics and Questions, “Seeking Truth and Avoiding Deception,” ຫ້ອງສະໝຸດພຣະກິດຕິຄຸນ ນຳອີກ.
ເຮົາສາມາດຫັນໄປຫາພຣະຜູ້ເປັນເຈົ້າ ເມື່ອເຮົາເຈັບປວດໂດຍການເລືອກຂອງຄົນອື່ນ.
ທ່ານເຄີຍທົນທຸກກັບຄວາມຜິດຫວັງເມື່ອຄົນບາງຄົນທີ່ທ່ານເພິ່ງພາອາໄສບໍ່ຮັກສາຄຳໝັ້ນສັນຍາບໍ່? ນີ້ໄດ້ເກີດຂຶ້ນກັບໄພ່ພົນຈາກເມືອງໂຄນສະວຽວ, ລັດນິວຢອກ, ຜູ້ທີ່ຄາດວ່າຈະຕັ້ງຖິ່ນຖານຢູ່ດິນຂອງ ລີມັນ ຄອບລີ ໃນລັດໂອໄຮໂອ. ເພື່ອຮຽນຮູ້ຈາກປະສົບການນີ້, ໃຫ້ພິຈາລະນາທີ່ຈະທົບທວນຫົວຂໍ້ຂອງ ພາກທີ 54 (ເບິ່ງ Saints, 1:125–28; “A Bishop unto the Church,” ໃນ Revelations in Context, 78–79) ນຳອີກ. ຖ້າຫາກທ່ານມີໝູ່ເພື່ອນທ່າມກາງໄພ່ພົນໂຄນສະວຽວແລ້ວ, ຄຳແນະນຳໃດທີ່ທ່ານສາມາດພົບເຫັນໃນ ພາກທີ 54 ເພື່ອແບ່ງປັນກັບພວກເຂົາ?
ຟາມຂອງລີມັນ ຄອບລີ
ຄຳສອນ ແລະ ພັນທະສັນຍາ 56:14–20
ຄົນທີ່ມີໃຈບໍລິສຸດຍ່ອມເປັນສຸກ.
ຢູ່ໃນຂໍ້ເຫລົ່ານີ້, ພຣະຜູ້ເປັນເຈົ້າໄດ້ກ່າວກັບທັງຄົນຮັ່ງມີ ແລະ ຄົນຍາກຈົນ; ມັນອາດເປັນສິ່ງໜ້າສົນໃຈທີ່ຈະປຽບທຽບຄຳແນະນຳຂອງພຣະອົງກັບຜູ້ຄົນສອງກຸ່ມເຫລົ່ານີ້. ສິ່ງໃດຢູ່ໃນຂໍ້ເຫລົ່ານີ້ທີ່ກ່ຽວຂ້ອງກັບທ່ານເປັນສ່ວນຕົວ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເຮົາສາມາດເປັນຄົນຊື່ສັດ.
-
ເພື່ອຊ່ວຍໃຫ້ລູກໆຂອງທ່ານຮຽນຮູ້ວ່າ ການເປັນຄົນຊື່ສັດນັ້ນໝາຍຄວາມວ່າຫຍັງ, ພວກທ່ານສາມາດອ່ານ ຄຳສອນ ແລະ ພັນທະສັນຍາ 51:9 ນຳກັນ ແລະ ແບ່ງປັນເລື່ອງລາວຂອງເດັກນ້ອຍທີ່ປະເຊີນກັບການຕັດສິນໃຈກ່ຽວກັບການເປັນຄົນຊື່ສັດ. ທ່ານສາມາດໃຊ້ຮູບພາບ, ຕຸກກະຕາຖົງຕີນ, ຫລື ຕຸກກະຕາເຈ້ຍ ເພື່ອເຮັດໃຫ້ເລື່ອງລາວໜ້າສົນໃຈຍິ່ງຂຶ້ນ. ພຣະຜູ້ເປັນເຈົ້າປະທານພອນໃຫ້ແກ່ເຮົາແນວໃດ ຂະນະທີ່ເຮົາພະຍາຍາມເປັນຄົນຊື່ສັດ?
-
ໃຫ້ພິຈາລະນາທີ່ຈະຫລິ້ນເກມກັບລູກໆຂອງທ່ານ. ຫລັງຈາກນັ້ນ, ໃຫ້ສົນທະນາວ່າ ເກມນັ້ນຈະແຕກຕ່າງໄປຈາກນີ້ແນວໃດ ຖ້າຫາກມີຄົນຂີ້ຫລັກ. ເປັນຫຍັງມັນຈຶ່ງສຳຄັນທີ່ຈະ “ປະຕິບັດຢ່າງຊື່ສັດ” ຕໍ່ກັນແລະກັນ?
ຄຳສອນ ແລະ ພັນທະສັນຍາ 52:10; 53:3; 55:1
ເຮົາຮັບຂອງປະທານແຫ່ງພຣະວິນຍານບໍລິສຸດ ໂດຍການວາງມື.
-
ການຮັບພຣະວິນຍານບໍລິສຸດໂດຍການວາງມື ໄດ້ມີກ່າວໄວ້ຫລາຍຄັ້ງໃນ ຄຳສອນ ແລະ ພັນທະສັນຍາ 51–57. ນີ້ອາດເປັນໂອກາດທີ່ດີທີ່ຈະສິດສອນລູກໆຂອງທ່ານກ່ຽວກັບພິທີການນີ້. ຍົກຕົວຢ່າງ, ທ່ານສາມາດເບິ່ງຮູບພາບຂອງເດັກນ້ອຍກຳລັງຮັບການຢືນຢັນ ແລະ ອະທິບາຍສິ່ງທີ່ກຳລັງເກີດຂຶ້ນໃນຮູບພາບນັ້ນ. ຂໍໃຫ້ພວກເຂົາຕົບມືເມື່ອພວກເຂົາໄດ້ຍິນ “ການວາງມື” ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 52:10; 53:3; 55:1.
-
ພວກທ່ານກໍສາມາດຮ້ອງເພງ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30) ຫລື ເພງທີ່ຄ້າຍຄືກັນນຳອີກ. ຊ່ວຍລູກໆຂອງທ່ານຊອກຫາຄຳ ແລະ ວະລີໃນເພງທີ່ສິດສອນກ່ຽວກັບຂອງປະທານແຫ່ງພຣະວິນຍານບໍລິສຸດ.
ຄຳສອນ ແລະ ພັນທະສັນຍາ 52:14–19
ພຣະເຈົ້າມີແບບແຜນເພື່ອຊ່ວຍບໍ່ໃຫ້ເຮົາຖືກຫລອກລວງ.
-
ເພື່ອສິດສອນກ່ຽວກັບແບບແຜນຂອງພຣະຜູ້ເປັນເຈົ້າເພື່ອຫລີກລ້ຽງຈາກການຫລອກລວງ, ທ່ານອາດເລີ່ມຕົ້ນໂດຍການຊ່ວຍລູກໆຊອກຫາຕົວຢ່າງຂອງແບບແຜນ—ໃນທຳມະຊາດ, ໃນຜ້າຫົ່ມ ຫລື ເສື້ອຜ້າທີ່ມີສີສັນ, ຫລື ໃນຊີວິດປະຈຳວັນ. ຊ່ວຍພວກເຂົາຊອກຫາແບບແຜນທີ່ພຣະຜູ້ເປັນເຈົ້າປະທານໃຫ້ໃນ ຄຳສອນ ແລະ ພັນທະສັນຍາ 52:14–15. ໃຫ້ແນ່ໃຈວ່າ ພວກເຂົາເຂົ້າໃຈຄຳໃດໆທີ່ບໍ່ຄຸ້ນໃນຂໍ້ເຫລົ່ານີ້. ເຮົາຈະສາມາດໃຊ້ແບບແຜນນີ້ເພື່ອທີ່ຈະຮູ້ຈັກຄວາມຈິງໄດ້ແນວໃດ?
ຄຳສອນ ແລະ ພັນທະສັນຍາ 54:4–6
ເຮົາຄວນຮັກສາພັນທະສັນຍາຂອງເຮົາສະເໝີ.
-
ໃນຄຳເວົ້າຂອງທ່ານເອງ, ໃຫ້ແບ່ງປັນກັບລູກໆຂອງທ່ານກ່ຽວກັບສິ່ງທີ່ເກີດຂຶ້ນກັບໄພ່ພົນທີ່ມາຢູ່ໃນດິນຂອງ ລີມັນ ຄອບລີ (ເບິ່ງຫົວຂໍ້ຂອງ ພາກທີ 54). ລູກໆຂອງທ່ານສາມາດທຳທ່າເປັນສະມາຊິກຂອງສາດສະໜາຈັກທີ່ຫາກໍມາຮອດລັດໂອໄຮໂອ. ພວກເຂົາຈະຮູ້ສຶກແນວໃດຫລັງຈາກລີມັນເຮັດຜິດພັນທະສັນຍາຂອງລາວ? ສິ່ງນີ້ສິດສອນເຮົາຫຍັງແດ່ກ່ຽວກັບການຮັກສາພັນທະສັນຍາ ແລະ ຄຳສັນຍາຂອງເຮົາ? ອ່ານ ຄຳສອນ ແລະ ພັນທະສັນຍາ 54:6 ນຳກັນ ເພື່ອຄົ້ນພົບພອນສຳລັບຜູ້ທີ່ຮັກສາພັນທະສັນຍາຂອງພວກເຂົາ.
ຄຳສອນ ແລະ ພັນທະສັນຍາ 55:1–4
ເຮົາສາມາດໃຊ້ພອນທີ່ພຣະເຈົ້າໄດ້ປະທານໃຫ້ເຮົາເພື່ອເປັນພອນໃຫ້ກັບຄົນອື່ນ.
-
ເພື່ອແນະນຳ ພາກທີ 55, ທ່ານອາດຢາກອະທິບາຍວ່າ ວິວລຽມ ດັບເບິນຢູ ແຟ້ວສ໌ ເປັນນັກພິມໜັງສືພິມ ຜູ້ທີ່ໄດ້ຮຽນຮູ້ກ່ຽວກັບພຣະກິດຕິຄຸນ ແລະ ໄດ້ເຂົ້າຮ່ວມສາດສະໜາຈັກ. ອ່ານ ຄຳສອນ ແລະ ພັນທະສັນຍາ 55:1–4 ກັບລູກໆຂອງທ່ານ, ແລະ ຊ່ວຍໃຫ້ພວກເຂົາຄົ້ນພົບສິ່ງທີ່ພຣະເຈົ້າຕ້ອງການໃຫ້ວິວລຽມເຮັດ. ພຣະອົງໄດ້ວາງແຜນທີ່ຈະໃຊ້ພອນສະຫວັນຂອງວິວລຽມແນວໃດ? ສິ່ງນີ້ສາມາດນຳໄປສູ່ການສົນທະນາກ່ຽວກັບວິທີທີ່ພຣະເຈົ້າອາດເຊື້ອເຊີນເຮົາໃຫ້ໃຊ້ພອນສະຫວັນຂອງເຮົາ ເພື່ອເປັນພອນໃຫ້ລູກໆຂອງພຣະອົງ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Bishop Partridge Receives Consecration [ອະທິການ ພາດທຣິດ ຮັບສິ່ງອຸທິດຖວາຍ], ໂດຍ ອາບິນ ເວແຊວກາ