“ວັນທີ 9–15 ເດືອນມິຖຸນາ: ‘ເຮົາຢູ່ກັບຄົນທີ່ຊື່ສັດສະເໝີໄປ’: ຄຳສອນ ແລະ ພັນທະສັນຍາ 60–63,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 60–63,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ລາຍລະອຽດຈາກ Campfire on the Missouri [ກອງໄຟຢູ່ໃກ້ແມ່ນ້ຳລັດມີເຊີຣີ], ໂດຍ ບຣາຍແອນ ມາກ ເທເລີ
ວັນທີ 9–15 ເດືອນມິຖຸນາ: “ເຮົາຢູ່ກັບຄົນທີ່ຊື່ສັດສະເໝີໄປ”
ຄຳສອນ ແລະ ພັນທະສັນຍາ 60–63
ໃນຊ່ວງຕົ້ນເດືອນສິງຫາ ປີ 1831, ໂຈເຊັບ ສະມິດ ແລະ ແອວເດີຄົນອື່ນໆຂອງສາດສະໜາຈັກໄດ້ກຳລັງກຽມຕົວກັບຄືນໄປເມືອງເຄີດແລນ ຫລັງຈາກການຢ້ຽມຢາມ “ແຜ່ນດິນຊີໂອນ” ໄລຍະສັ້ນ (ຄຳສອນ ແລະ ພັນທະສັນຍາ 59:3). ພຣະຜູ້ເປັນເຈົ້າຕ້ອງການໃຫ້ພວກເພິ່ນສັ່ງສອນພຣະກິດຕິຄຸນໃນລະຫວ່າງການເດີນທາງຂອງພວກເພິ່ນ (ເບິ່ງ ຄຳສອນ ແລະ ພັນທະສັນຍາ 52:10), ແລະ ບາງຄົນໃນພວກເພິ່ນກໍໄດ້ປະຕິບັດຢ່າງພາກພຽນ. ແຕ່ບາງຄົນກໍຍັງລັງເລຢູ່. “ພວກເຂົາເຊື່ອງຊ້ອນພອນສະຫວັນທີ່ເຮົາໄດ້ມອບໃຫ້ພວກເຂົາ,” ພຣະຜູ້ເປັນເຈົ້າກ່າວ, “ເພາະຄວາມຢ້ານກົວມະນຸດ” (ຄຳສອນ ແລະ ພັນທະສັນຍາ 60:2). ຫລາຍຄົນໃນພວກເຮົາຍ່ອມເຂົ້າໃຈວ່າແອວເດີເຫລົ່ານີ້ຮູ້ສຶກແນວໃດ. ເຖິງແມ່ນວ່າເຮົາຈະຮັກພຣະກິດຕິຄຸນກໍຕາມ, ຄວາມຢ້ານກົວ ແລະ ຄວາມສົງໄສອາດຈະກີດກັນເຮົາໄວ້ບໍ່ໃຫ້ແບ່ງປັນ. ແຕ່ພຣະຜູ້ເປັນເຈົ້າເຕັມໄປດ້ວຍຄວາມເມດຕາ. ພຣະອົງ “ຮູ້ຈັກຄວາມອ່ອນແອຂອງມະນຸດ ແລະ ຮູ້ຈັກວິທີຊ່ວຍເຫລືອ [ເຮົາ]” (ຄຳສອນ ແລະ ພັນທະສັນຍາ 62:1). ໃນຫລາຍບ່ອນຕະຫລອດທົ່ວການເປີດເຜີຍເຫລົ່ານີ້ ຜູ້ສອນສາດສະໜາລຸ້ນທຳອິດ ໄດ້ຮັບຄວາມໝັ້ນໃຈ ອັນທີ່ສາມາດຊ່ວຍເຮົາໃຫ້ເອົາຊະນະຄວາມຢ້ານກົວ ແລະ ຄວາມບົກພ່ອງຂອງເຮົາ: “ເຮົາສາມາດເຮັດໃຫ້ພວກເຈົ້າບໍລິສຸດ.” “ເພາະວ່າເນື້ອໜັງທັງປວງຢູ່ໃນມືຂອງເຮົາ.” “ເຮົາຢູ່ກັບຄົນທີ່ຊື່ສັດສະເໝີໄປ.” ແລະ “ຄົນທີ່ຊື່ສັດ ແລະ ອົດທົນ ຈະເອົາຊະນະໂລກ.” (ຄຳສອນ ແລະ ພັນທະສັນຍາ 60:7; 61:6; 62:19; 63:47)
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 60; 62
ເຮົາສາມາດແບ່ງປັນຄວາມຮັກ ແລະ ປະຈັກພະຍານຂອງເຮົາເຖິງພຣະເຢຊູຄຣິດ.
ປະຈັກພະຍານຂອງທ່ານກ່ຽວກັບພຣະກິດຕິຄຸນ ເປັນເໝືອນດັ່ງ “ພອນສະຫວັນ,” ຫລື ຊັບສົມບັດຈາກພຣະເຈົ້າແນວໃດ? ບາງເທື່ອເຮົາ “ເຊື່ອງຊ້ອນພອນສະຫວັນ [ຂອງເຮົາ]” ແນວໃດ? (ຄຳສອນ ແລະ ພັນທະສັນຍາ 60:2; ເບິ່ງ ມັດທາຍ 25:14–30 ນຳອີກ).
ມີຂ່າວສານທີ່ໃຫ້ກຳລັງໃຈແນວໃດແດ່ຈາກພຣະຜູ້ເປັນເຈົ້າ ທີ່ທ່ານເຫັນຢູ່ໃນ ພາກທີ 60 ແລະ 62? ຂ່າວສານເຫລົ່ານີ້ສ້າງຄວາມໝັ້ນໃຈຂອງທ່ານແນວໃດແດ່ ໃນການແບ່ງປັນພຣະກິດຕິຄຸນ? ຂະນະທີ່ທ່ານໄຕ່ຕອງຄຳຖາມເຫລົ່ານີ້, ໃຫ້ຄິດທີ່ຈະຮ້ອງ ຫລື ອ່ານເນື້ອເພງໃນບົດເພງ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50). ທ່ານຮຽນຮູ້ຫຍັງແດ່ຈາກບົດເພງນີ້ກ່ຽວກັບການແບ່ງປັນພຣະກິດຕິຄຸນ?
ເບິ່ງບ່ອນເກັບກຳ “Sharing the Gospel” ໃນຫ້ອງສະໝຸດພຣະກິດຕິຄຸນ ນຳອີກ.
ເຮົາບໍ່ອາຍທີ່ຈະແບ່ງປັນສັດທາຂອງເຮົາໃນພຣະຄຣິດ.
ຄຳສອນ ແລະ ພັນທະສັນຍາ 60:2–4; 61:1–2, 20, 36–38; 62:1, 6
ພຣະຄຳພີສິດສອນເຖິງພຣະເຢຊູຄຣິດ.
ຂະນະທີ່ພຣະອົງໄດ້ແນະນຳຜູ້ສອນສາດສະໜາຂອງພຣະອົງ, ພຣະຜູ້ເປັນເຈົ້າໄດ້ເປີດເຜີຍຄວາມຈິງທີ່ສຳຄັນກ່ຽວກັບພຣະອົງເອງ. ຊອກຫາຄວາມຈິງເຫລົ່ານີ້ໃນ ຄຳສອນ ແລະ ພັນທະສັນຍາ 60:2–4; 61:1–2, 20, 36–38; 62:1, 6. ມີເລື່ອງໃດແດ່ຈາກພຣະຄຳພີທີ່ສາທິດໃຫ້ເຫັນເຖິງບົດບາດ ແລະ ຄຸນລັກຊະນະຂອງພຣະຜູ້ຊ່ວຍໃຫ້ລອດທີ່ທ່ານຊອກເຫັນ? (ເບິ່ງ, ຍົກຕົວຢ່າງ, ໂຢຮັນ 8:1–11; ອີເທີ 2:14–15).
ການຕັດສິນໃຈຂອງເຮົາຄວນສົມດຸນລະຫວ່າງ “ການພິພາກສາ ແລະ ການຊີ້ນຳຂອງພຣະວິນຍານ.”
ພຣະຜູ້ເປັນເຈົ້າໃຫ້ການຊີ້ນຳກ່ຽວກັບຄວາມຈິງ ແລະ ຫລັກທຳນິລັນດອນ, ແຕ່ພຣະອົງມັກຈະປ່ອຍໃຫ້ເຮົາກຳນົດລາຍລະອຽດກ່ຽວກັບວິທີການປະຕິບັດຕາມຫລັກທຳເຫລົ່ານີ້. ທ່ານເຫັນຫລັກທຳຂໍ້ນີ້ສາທິດຢູ່ໃນ ຄຳສອນ ແລະ ພັນທະສັນຍາ 62 ແນວໃດ? (ເບິ່ງ ຄຳສອນ ແລະ ພັນທະສັນຍາ 60:5; 61:22 ນຳອີກ). ທ່ານເຫັນຫລັກທຳຂໍ້ນີ້ຢູ່ໃນຊີວິດຂອງທ່ານແນວໃດ? ເປັນຫຍັງມັນຈຶ່ງເປັນການດີສຳລັບເຮົາ ທີ່ຈະຕັດສິນໃຈເຮັດບາງຢ່າງ ໂດຍບໍ່ຄາດຫວັງໃຫ້ພຣະເຈົ້າບອກກັບເຮົາຢ່າງຊັດເຈນວ່າຕ້ອງເຮັດຫຍັງແດ່?
ເບິ່ງ ອີເທີ 2:18–25; ຄຳສອນ ແລະ ພັນທະສັນຍາ 58:27–28 ນຳອີກ.
ຄຳສອນ ແລະ ພັນທະສັນຍາ 63:7–12
ເຄື່ອງໝາຍເກີດຂຶ້ນໂດຍສັດທາ ແລະ ພຣະປະສົງຂອງພຣະເຈົ້າ.
ໃນຕອນທ້າຍຂອງໂຄງຮ່າງນີ້, ມີພາບປະກອບຂອງເລື່ອງອັດສະຈັນທີ່ປະທັບໃຈ ເອຊະຣາ ບູທ໌ ຢ່າງສຸດຊຶ້ງ: ແຂນຂອງ ແອວຊາ ຈອນສັນ ໄດ້ຮັບການປິ່ນປົວຢ່າງອັດສະຈັນ. ຫລັງຈາກທີ່ໄດ້ເຫັນແນວນັ້ນແລ້ວ, ເອຊະຣາກໍໄດ້ຮັບບັບຕິສະມາຢ່າງກະຕືລືລົ້ນ. ແລະ ພຽງແຕ່ພາຍໃນສອງສາມເດືອນ, ເອຊະຣາກໍເສື່ອມສັດທາ ແລະ ກາຍເປັນຄົນວິຈານສາດສະດາ. ສິ່ງນີ້ເປັນໄປໄດ້ແນວໃດ, ເຖິງແມ່ນວ່າລາວໄດ້ເຫັນການມະຫັດສະຈັນແລ້ວ?
ໃຫ້ໄຕ່ຕອງກ່ຽວກັບເລື່ອງນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 63:7–12. ທ່ານຮຽນຮູ້ຄວາມຈິງຫຍັງແດ່ກ່ຽວກັບເຄື່ອງໝາຍ ແລະ ສັດທາ?
ເບິ່ງ ມັດທາຍ 16:1–4; ໂຢຮັນ 12:37; ມໍມອນ 9:10–21; ອີເທີ 12:12, 18 ນຳອີກ.
ຄຳສອນ ແລະ ພັນທະສັນຍາ 63:16
ເຮົາສາມາດເປັນຄົນບໍລິສຸດທັງຄວາມຄິດ ແລະ ການກະທຳຂອງເຮົາ.
ໃນ ຄຳສອນ ແລະ ພັນທະສັນຍາ 63:16, ພຣະຜູ້ຊ່ວຍໃຫ້ລອດໄດ້ຢ້ຳອີກຄັ້ງເຖິງສິ່ງທີ່ພຣະອົງໄດ້ສິດສອນໃນພຣະຄຳພີໃໝ່—ວ່າກົດພົມມະຈັນບໍ່ຄວນຄວບຄຸມພຽງແຕ່ການກະທຳຂອງເຮົາເທົ່ານັ້ນ ແຕ່ຄວບຄຸມຄວາມຄິດຂອງເຮົານຳອີກ (ເບິ່ງ ມັດທາຍ 5:27–28). ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 63:16, ໃຫ້ບັນທຶກຄຳຕັກເຕືອນກ່ຽວກັບຄວາມຄິດຕັນຫາທີ່ພຣະຜູ້ຊ່ວຍໃຫ້ລອດຊົງບອກໄວ້. ທ່ານກໍອາດຢາກໄຕ່ຕອງສິ່ງກົງກັນຂ້າມກັບຄຳຕັກເຕືອນແຕ່ລະຢ່າງ. ຍົກຕົວຢ່າງ, ມີຄຳ ຫລື ວະລີໃດແດ່ທີ່ກົງກັນຂ້າມກັບຄຳວ່າ ຢ້ານກົວ? ພອນອື່ນໆໃດແດ່ທີ່ມາຈາກການມີຄວາມຄິດ ແລະ ການກະທຳທີ່ບໍລິສຸດ?
ຫລາຍຄົນຄິດວ່າມາດຕະຖານຂອງພຣະຜູ້ເປັນເຈົ້າໃນເລື່ອງຄວາມບໍລິສຸດທາງຄວາມຄິດ ແລະ ການກະທຳນັ້ນເປັນການກະທຳລ້າສະໄໝ ຫລື ແມ່ນແຕ່ເປັນການບັງຄັບອີກຊ້ຳ. ມັນຈະສ້າງຄວາມແຕກຕ່າງຫຍັງແດ່ຖ້າວ່າລູກໆຂອງພຣະເຈົ້າໝົດທຸກຄົນພະຍາຍາມດຳລົງຊີວິດຕາມກົດນີ້? ທ່ານອາດຈະຊອກຫາຄຳຕອບໃຫ້ກັບຄຳຖາມນີ້ໄດ້ໃນຂ່າວສານຂອງແອວເດີ ເດວິດ ເອ ແບ໊ດນາ “We Believe in Being Chaste” (Liahona, May 2013, 41–44) ຫລື “ຮ່າງກາຍຂອງເຈົ້າສັກສິດ” (ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 23–26). ຂ່າວສານຂອງຄວາມຫວັງຢ່າງໃດແດ່ທີ່ທ່ານພົບເຫັນ?
ເຖິງແມ່ນເມື່ອເຮົາຮູ້ຈັກເຖິງພອນຂອງການເປັນຄົນບໍລິສຸດທັງຄວາມຄິດ ແລະ ການກະທຳກໍຕາມ, ນັ້ນບໍ່ໄດ້ໝາຍຄວາມວ່າມັນເປັນເລື່ອງງ່າຍ. ທ່ານອາດຕ້ອງໃຊ້ເວລາໄລຍະໜຶ່ງເພື່ອໄຕ່ຕອງວ່າແມ່ນຫຍັງທີ່ເຮັດໃຫ້ຍາກສຳລັບທ່ານໃນການຮັກສາມາດຕະຖານຂອງພຣະຜູ້ຊ່ວຍໃຫ້ລອດ ກ່ຽວກັບກົດພົມມະຈັນ—ແລະ ແມ່ນຫຍັງທີ່ເຮັດໃຫ້ມັນງ່າຍຂຶ້ນ. ທ່ານມີເຄັດລັບຫຍັງແດ່ທີ່ທ່ານອາດຈະແບ່ງປັນກັບຄົນອື່ນກ່ຽວກັບສິ່ງທີ່ຄວນເຮັດ ເມື່ອທ່ານຖືກລໍ້ລວງດ້ວຍຄວາມຄິດທີ່ບໍ່ເໝາະສົມ?
ຈົ່ງຊ່ວຍເຫລືອຊຶ່ງກັນແລະກັນ. ພອນອັນຍິ່ງໃຫຍ່ຢ່າງໜຶ່ງຂອງການປະຊຸມດ້ວຍກັນ ແລະ ມີຫ້ອງຮຽນຕ່າງໆໃນສາດສະໜາຈັກຄືໂອກາດທີ່ໄດ້ຮັບການສະໜັບສະໜູນຈາກໝູ່ເພື່ອນໄພ່ພົນ ໃນຄວາມພະຍາຍາມຂອງເຮົາເພື່ອຕິດຕາມພຣະຜູ້ຊ່ວຍໃຫ້ລອດ. ຫລາຍຄົນໃນພວກເຮົາປະເຊີນກັບຄວາມທ້າທາຍທີ່ຄ້າຍຄືກັນ, ແລະ ປະສົບການເໝືອນກັນຂອງເຮົາສາມາດເປັນຄວາມເຂັ້ມແຂງທີ່ຍິ່ງໃຫຍ່ໄດ້. ຢ່າຢ້ານທີ່ຈະຍອມຮັບວ່າທ່ານກໍປະສົບກັບຄວາມທ້າທາຍຕ່າງໆ. ຈົ່ງແບ່ງປັນປະສົບການນຳກັນວ່າແມ່ນຫຍັງທີ່ຊ່ວຍທ່ານໃຫ້ດຳລົງຊີວິດຕາມກົດຂອງພຣະເຈົ້າ ແລະ ເອົາຊະນະການລໍ້ລວງໄດ້.
ເບິ່ງ ຄຳສອນ ແລະ ພັນທະສັນຍາ 121:45; Topics and Questions, “Virtue,” ຫ້ອງສະໝຸດພຣະກິດຕິຄຸນ; “Standards: Sexual Purity and Modesty—True Confidence” (ວິດີໂອ), ຫ້ອງສະໝຸດພຣະກິດຕິຄຸນ; AddressingPornography.ChurchofJesusChrist.org ນຳອີກ.
Standards: Sexual Purity and Modesty - True Confidence
Two young women share their secret for confidence and self-worth: the companionship of the Holy Ghost.
ຄຳສອນ ແລະ ພັນທະສັນຍາ 63:58–64
ສິ່ງທີ່ສັກສິດຄວນໄດ້ຮັບການປະຕິບັດຕໍ່ດ້ວຍຄວາມເຄົາລົບ.
ຫລັກທຳໃນ ຄຳສອນ ແລະ ພັນທະສັນຍາ 63:58–64 ເປັນໄດ້ເກີນກວ່າການຮັບພຣະນາມຂອງພຣະຜູ້ເປັນເຈົ້າຢ່າງບໍ່ເໝາະສົມ. ມີສິ່ງສັກສິດອື່ນໆໃດແດ່ທີ່ມາ “ຈາກເບື້ອງເທິງ,” ຫລື ຈາກພຣະເຈົ້າ? ສຳລັບທ່ານແລ້ວ ການກ່າວເຖິງສິ່ງເຫລົ່ານີ້ “ດ້ວຍຄວາມລະມັດລະວັງ” ນັ້ນມີຄວາມໝາຍວ່າແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 60:4; 61:1–2, 36; 62:1
ພຣະຄຳພີສິດສອນເຖິງພຣະເຢຊູຄຣິດ
-
ບາງທີທ່ານອາດຈະຂຽນຂໍ້ຄວາມບາງຂໍ້ກ່ຽວກັບພຣະຜູ້ຊ່ວຍໃຫ້ລອດທີ່ພົບເຫັນໃນ ຄຳສອນ ແລະ ພັນທະສັນຍາ 60–62 ລົງໃນເຈ້ຍນ້ອຍແຜ່ນໜຶ່ງ. ຈາກນັ້ນລູກໆຂອງທ່ານສາມາດຈັບຄູ່ຂໍ້ຄວາມເຫລົ່ານີ້ເຂົ້າກັບຮູບພາບຂອງພຣະເຢຊູ ຈາກການປະຕິບັດສາດສະໜາກິດຂອງພຣະອົງຢູ່ເທິງໂລກນີ້ (ເບິ່ງ ປຶ້ມຮູບພຣະກິດຕິຄຸນ, ເລກທີ 34–61) ທີ່ສະແດງໃຫ້ເຫັນກ່ຽວກັບຄຸນລັກສະນະເຫລົ່ານີ້. ພຣະອົງໄດ້ເຮັດແນວໃດໃຫ້ເຮົາຮູ້ກ່ຽວກັບພຣະອົງເອງໃນປະຈຸບັນນີ້?
ລາຍລະອຽດຈາກ For This Purpose [ດ້ວຍຈຸດປະສົງນີ້], ໂດຍ ຢອງຊຸງ ຄິມ
ຄຳສອນ ແລະ ພັນທະສັນຍາ 60:7; 61:1–2; 62:1
ພຣະຜູ້ເປັນເຈົ້າຈະໃຫ້ອະໄພເຮົາຖ້າເຮົາກັບໃຈ.
-
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 60:7; 61:2 ກັບລູກໆຂອງທ່ານ, ຈົ່ງຊ່ວຍພວກເຂົາຊອກຫາຄຳທີ່ຂໍ້ເຫລົ່ານີ້ມີຄືກັນ. ເຕືອນພວກເຂົາວ່າການເປີດເຜີຍເຫລົ່ານີ້ໄດ້ຖືກມອບໃຫ້ໂຈເຊັບ ສະມິດ ແລະ ບັນດາຜູ້ນຳຄົນອື່ນໆຂອງສາດສະໜາຈັກ. ພຣະຜູ້ເປັນເຈົ້າຢາກໃຫ້ພວກເພິ່ນຮູ້ຈັກຫຍັງແດ່? ພວກທ່ານກໍຍັງສາມາດເວົ້າລົມກັນກ່ຽວກັບຄວາມຮູ້ສຶກຂອງພຣະຜູ້ຊ່ວຍໃຫ້ລອດທີ່ມີຕໍ່ເຮົາແນວໃດ ເມື່ອເຮົາກະທຳຜິດ ແລະ ການກັບໃຈໝາຍຄວາມວ່າແນວໃດ. ອີງຕາມ ຄຳສອນ ແລະ ພັນທະສັນຍາ 62:1, ພຣະເຢຊູສາມາດຊ່ວຍເຫລືອແນວໃດເມື່ອເຮົາຖືກລໍ້ລວງ?
ຄຳສອນ ແລະ ພັນທະສັນຍາ 62:3, 9
ພຣະເຢຊູຄຣິດຕ້ອງການໃຫ້ເຮົາແບ່ງປັນພຣະກິດຕິຄຸນຂອງພຣະອົງ.
-
ທ່ານອາດຈະຖາມລູກໆຂອງທ່ານວ່າພວກເຂົາຈະຕອບແນວໃດ ຖ້າວ່າຄົນໃດຄົນໜຶ່ງຖາມພວກເຂົາວ່າພວກເຂົາມັກຫຍັງແດ່ກ່ຽວກັບພຣະເຢຊູຄຣິດ ແລະ ສາດສະໜາຈັກຂອງພຣະອົງ. ການຮ້ອງເພງກ່ຽວກັບການແບ່ງປັນພຣະກິດຕິຄຸນນຳກັນ, ເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50), ສາມາດໃຫ້ແນວຄິດພວກເຂົາໄດ້. ຈາກນັ້ນທ່ານກໍສາມາດອ່ານ ຄຳສອນ ແລະ ພັນທະສັນຍາ 62:3 ແລະ ຂໍໃຫ້ລູກໆຂອງທ່ານຟັງວ່າແມ່ນຫຍັງຈະເກີດຂຶ້ນ ເມື່ອເຮົາແບ່ງປັນປະຈັກພະຍານຂອງເຮົາ. ຄຳສັນຍາໃນ ຂໍ້ທີ 9 ສາມາດຊ່ວຍເຮົາແນວໃດ ຖ້າວ່າເຮົາຮູ້ສຶກວິຕົກກັງວົນ?
ຄຳສອນ ແລະ ພັນທະສັນຍາ 63:64
ເຮົາສາມາດສະແດງຄວາມຄາລະວະ.
-
ເພື່ອແນະນຳ ຄຳສອນ ແລະ ພັນທະສັນຍາ 63:64, ທ່ານສາມາດຮ້ອງເພງກ່ຽວກັບຄວາມຄາລະວະກັບລູກໆຂອງທ່ານ, ເຊັ່ນ “ຂໍເພິ່ງພຣະທຸກຊົ່ວໂມງ” (ເພງສວດ ແລະ ເພງຂອງເດັກນ້ອຍ, 12). ແລ້ວພວກທ່ານສາມາດເວົ້າລົມກັນກ່ຽວກັບວິທີທີ່ແຕກຕ່າງກັນໄປໃນການສະແດງຄວາມຄາລະວະຕໍ່ພຣະບິດາເທິງສະຫວັນ ແລະ ພຣະເຢຊູຄຣິດ.
-
ທ່ານສາມາດຊ່ວຍລູກໆຂອງທ່ານໃຫ້ເຂົ້າໃຈວ່າຄວາມຄາລະວະແມ່ນຫຍັງ ໂດຍການເວົ້າລົມກັບພວກເຂົາກ່ຽວກັບສິ່ງໜຶ່ງທີ່ພິເສດຕໍ່ພວກເຂົາ, ເຊັ່ນຂອງຫລິ້ນ, ປຶ້ມອ່ານ, ຫລື ຜ້າຫົ່ມທີ່ມັກທີ່ສຸດຂອງພວກເຂົາ. ຖາມພວກເຂົາກ່ຽວກັບວິທີທີ່ພວກເຂົາດູແລ ແລະ ປົກປ້ອງສິ່ງທີ່ພິເສດຂອງພວກເຂົາແນວໃດ. ຈາກນັ້ນພວກທ່ານສາມາດອ່ານ ຄຳສອນ ແລະ ພັນທະສັນຍາ 63:64 ນຳກັນ. ສິ່ງໃດທີ່ພິເສດ—ຫລື ສັກສິດ—ຕໍ່ພຣະບິດາເທິງສະຫວັນ? (ເບິ່ງ, ຍົກຕົວຢ່າງ, ຂໍ້ທີ 61 ແລະ ໜ້າກິດຈະກຳ ຂອງອາທິດນີ້). ເຮົາຄວນປະຕິບັດຕໍ່ສິ່ງເຫລົ່ານີ້ແນວໃດ—ດ້ວຍຄຳເວົ້າຂອງເຮົາ ແລະ ການກະທຳຂອງເຮົາ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Healing of Elsa Johnson’s Shoulder [ການປິ່ນປົວບ່າໄຫລ່ຂອງນາງແອວສາ ຈອນສັນ], ໂດຍ ແຊມ ລໍເລີ