“ວັນທີ 2–8 ເດືອນມິຖຸນາ: ‘ທຸ້ມເທຢ່າງກະຕືລືລົ້ນໃນອຸດົມການດີ’: ຄຳສອນ ແລະ ພັນທະສັນຍາ 58–59,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 58– 59,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
Independence, Missouri, 1831 [ເມືອງອິນດີເພັນເດັນສ໌, ລັດມີເຊີຣີ, 1831], ໂດຍ ອາລ໌ ຣາວສ໌
ວັນທີ 2–8 ເດືອນມີຖຸນາ: “ທຸ້ມເທຢ່າງກະຕືລືລົ້ນໃນອຸດົມການດີ”
ຄຳສອນ ແລະ ພັນທະສັນຍາ 58–59
ເມື່ອພວກແອວເດີຂອງສາດສະໜາຈັກໄດ້ເຫັນສະຖານທີ່ຂອງເມືອງຊີໂອນເປັນເທື່ອທຳອິດ—ເມືອງອິນດີເພັນເດັນສ໌, ລັດມີເຊີຣີ—ມັນບໍ່ເປັນຄືສິ່ງທີ່ເຂົາເຈົ້າຄາດຄິດ. ບາງຄົນຄິດວ່າ ເຂົາເຈົ້າຈະພົບເຫັນຊຸມຊົນທີ່ຈະເລີນຮຸ່ງເຮືອງ ແລະ ຂະຫຍັນໝັ່ນພຽນ ພ້ອມດ້ວຍກຸ່ມໄພ່ພົນທີ່ເຂັ້ມແຂງ. ກົງກັນຂ້າມ, ເຂົາເຈົ້າໄດ້ພົບເຫັນປະຊາກອນກະແຈກກະຈາຍກັນຢູ່, ຂາດຄວາມສີວິໄລທີ່ເຂົາເຈົ້າຄຸ້ນເຄີຍ ແລະ ຜູ້ຄົນຢູ່ທີ່ນັ້ນເປັນຄົນຫຍາບຄາຍ ຊຶ່ງຕັ້ງຖິ່ນຖານຢູ່ຊາຍແດນ ແທນທີ່ຈະເປັນໄພ່ພົນ. ມັນກັບເປັນວ່າ ພຣະຜູ້ເປັນເຈົ້າບໍ່ໄດ້ຂໍໃຫ້ເຂົາເຈົ້າພຽງແຕ່ມາຫາຊີໂອນ—ພຣະອົງປະສົງໃຫ້ເຂົາເຈົ້າ ສ້າງ ຊີໂອນ.
ເມື່ອຄວາມຄາດຫວັງຂອງເຮົາບໍ່ກົງກັບຄວາມເປັນຈິງ, ເຮົາສາມາດຈື່ຈຳສິ່ງທີ່ພຣະຜູ້ເປັນເຈົ້າໄດ້ບອກໄພ່ພົນໃນປີ 1831 ວ່າ: “ພວກເຈົ້າບໍ່ສາມາດຫລຽວເຫັນແຜນການຂອງພຣະເຈົ້າຂອງພວກເຈົ້າດ້ວຍຕາທຳມະຊາດຂອງພວກເຈົ້າໃນເວລານີ້ … ແລະ ລັດສະໝີພາບທີ່ຈະຕາມມາຫລັງຈາກຄວາມທຸກຍາກລຳບາກຢ່າງຫລວງຫລາຍ” (ຄຳສອນ ແລະ ພັນທະສັນຍາ 58:3). ແມ່ນແລ້ວ, ຊີວິດແມ່ນເຕັມໄປດ້ວຍຄວາມທຸກຍາກລຳບາກ, ແມ່ນແຕ່ຄວາມຊົ່ວຮ້າຍ, ແຕ່ເຮົາກໍຍັງສາມາດ “ເຮັດໃຫ້ເກີດຄວາມຊອບທຳຢ່າງຫລວງຫລາຍໄດ້; ເພາະພະລັງຢູ່ໃນຕົວ [ເຮົາ]” (ຂໍ້ທີ 27–28).
ເບິ່ງ Saints, 1:127–33 ນຳອີກ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 58:1–5; 59:23
“ຫລັງຈາກຄວາມທຸກຍາກລຳບາກພອນຈະມາເຖິງ.”
ໄພ່ພົນພາກັນຫວັງແທ້ໆວ່າ ໃນຊ່ວງຊີວິດຂອງເຂົາເຈົ້າ, ເຂດແຈ໊ກສັນຈະຈະເລີນຮຸ່ງເຮືອງກາຍເປັນຊີໂອນ, ສະຖານທີ່ ບ່ອນທີ່ໄພ່ພົນທຸກຄົນສາມາດມາເຕົ້າໂຮມ. ເຖິງຢ່າງໃດກໍຕາມ, ເວລາຂອງເຂົາເຈົ້າໃນເຂດແຈ໊ກສັນ ກໍໄດ້ເຕັມໄປດ້ວຍຄວາມຍາກລຳບາກ. ພາຍໃນສອງສາມປີ, ເຂົາເຈົ້າໄດ້ຖືກບັງຄັບໃຫ້ຍ້າຍໜີ ແລະ “ລໍຖ້າຊົ່ວໄລຍະໜຶ່ງສຳລັບການໄຖ່ຊີໂອນ” (ຄຳສອນ ແລະ ພັນທະສັນຍາ 105:9).
ທ່ານໄດ້ຮຽນຮູ້ຫຍັງແດ່ກ່ຽວກັບຄວາມຍາກລຳບາກ ຫລື ຄວາມທ້າທາຍຕ່າງໆ ຈາກພຣະຄຳຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 58:1–5? ທ່ານຄິດວ່າເປັນຫຍັງພອນບາງຢ່າງມີມາພຽງແຕ່ຫລັງຈາກຄວາມທຸກຍາກລຳບາກ? ພອນຢ່າງໃດແດ່ທີ່ທ່ານໄດ້ຮັບຫລັງຈາກຄວາມທຸກຍາກລຳບາກ?
ທ່ານຮຽນຮູ້ຫຍັງແດ່ຈາກ ຄຳສອນ ແລະ ພັນທະສັນຍາ 59:23 ທີ່ນຳຄວາມຫວັງມາສູ່ທ່ານ?
ຄຳສອນ ແລະ ພັນທະສັນຍາ 58:26–29
ເຮົາສາມາດ “ເຮັດໃຫ້ເກີດຄວາມຊອບທຳຢ່າງຫລວງຫລາຍ” ດ້ວຍ “ຄວາມສະໝັກໃຈຂອງຕົນເອງ.”
ໃນສ່ວນໜຶ່ງຂອງການສຶກສາຂໍ້ພຣະຄຳພີເຫລົ່ານີ້, ທ່ານອາດຈະຂຽນລາຍການບາງສິ່ງທີ່ທ່ານ “ທຸ້ມເທຢ່າງກະຕືລືລົ້ນ”. ສິ່ງທັງໝົດເຫລົ່ານັ້ນເປັນ “ອຸດົມການດີ” ບໍ? ໃຫ້ໄຕ່ຕອງສິ່ງທີ່ທ່ານສາມາດເຮັດໄດ້ ເພື່ອ “ເຮັດໃຫ້ເກີດຄວາມຊອບທຳຢ່າງຫລວງຫລາຍ”—ແລະ ໃຫ້ພິຈາລະນາ ຕັ້ງເປົ້າໝາຍທີ່ຈະລົງມືເຮັດ.
ທ່ານຄິດວ່າເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ທ່ານ “ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈ [ຂອງທ່ານ] ເອງ”? ຈະເກີດຜົນແນວໃດຖ້າທ່ານຖືກ “ບັງຄັບໃນທຸກສິ່ງ”? ຂໍ້ພຣະຄຳພີ 2 ນີໄຟ 2:27 ຊ່ວຍໃຫ້ທ່ານເຂົ້າໃຈຫລັກທຳນີ້ຫລາຍຂຶ້ນແນວໃດ?
ເບິ່ງ Dale G. Renlund, “Choose You This Day,” Liahona, Nov. 2018, 104–6 ນຳອີກ.
ຄຳສອນ ແລະ ພັນທະສັນຍາ 58:42–43.
ພຣະຜູ້ເປັນເຈົ້າໃຫ້ອະໄພເຮົາເມື່ອເຮົາກັບໃຈ.
ຄຳສັນຍາຂອງພຣະຜູ້ເປັນເຈົ້າໃນ ຄຳສອນ ແລະ ພັນທະສັນຍາ 58:42 ວ່າຈະໃຫ້ອະໄພຢ່າງສົມບູນແບບແກ່ຜູ້ທີ່ກັບໃຈນັ້ນຊ່າງເປັນການດົນໃຈ, ແຕ່ກໍຍັງເຮັດໃຫ້ເກີດຄຳຖາມບາງຂໍ້ເຊັ່ນ: ການກັບໃຈໝາຍເຖິງຫຍັງ? ເຮົາສາມາດຮູ້ໄດ້ແນວໃດວ່າເຮົາໄດ້ກັບໃຈແລ້ວ? ໂຊກດີທີ່, ພຣະຜູ້ເປັນເຈົ້າໄດ້ກ່າວຕໍ່ໄປວ່າ, “ໂດຍສິ່ງນີ້ເຈົ້າຈະຮູ້ວ່າ…” (ຂໍ້ທີ 43).
ຕໍ່ໄປນີ້ແມ່ນຄຳຖາມເພີ່ມເຕີມບາງຂໍ້ ທີ່ຜູ້ຄົນມີບາງຄັ້ງກ່ຽວກັບການກັບໃຈ. ພຣະວິນຍານໄດ້ສິດສອນທ່ານຫຍັງແດ່ ຂະນະທີ່ທ່ານສຶກສາແຫລ່ງຊ່ວຍເຫລືອທີ່ແນະນຳໄວ້ດັ່ງລຸ່ມນີ້?
ການສາລະພາບບາບຂອງເຮົາຊ່ວຍເຮົາໃຫ້ກັບໃຈໄດ້ແນວໃດ? ເບິ່ງ ເພງສັນລະເສີນ 32:1–5; ສຸພາສິດ 28:13; ໂມໄຊຢາ 27:34–37; ແອວມາ 39:12–13.
ເຮົາພະຍາຍາມປະຖິ້ມບາບຂອງເຮົາ, ແຕ່ເຮົາກໍຍັງເຮັດຜິດຢູ່ເລື້ອຍໆ. ການກັບໃຈຂອງເຮົານັ້ນຍັງໃຊ້ໄດ້ຢູ່ບໍ? ເບິ່ງ Bradley R. Wilcox, “Worthiness Is Not Flawlessness,” Liahona, Nov. 2021, 61–67; “Daily Restoration” (ວິດີໂອ), ຫ້ອງສະໝຸດພຣະກິດຕິຄຸນ.
Daily Restoration
Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.
ເຮົາຈະແນ່ໃຈໄດ້ແນວໃດວ່າພຣະຜູ້ຊ່ວຍໃຫ້ລອດໄດ້ໃຫ້ອະໄພເຮົາແລ້ວ? ເບິ່ງ Tad R. Callister, “The Atonement of Jesus Christ,” Liahona, May 2019, 85–87 ໂດຍສະເພາະຫົວບົດ ພາກທີ “2. ບາບ.”
ທ່ານສາມາດຊອກຫາຂໍ້ຄິດເພີ່ມເຕີມໄດ້ໃນ “Questions and Answers” ກ່ຽວກັບການກັບໃຈໃນ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (ໜ້າທີ 8–9).
ເບິ່ງ Topics and Questions, “Repentance,” ຫ້ອງສະໝຸດພຣະກິດຕິຄຸນ ນຳອີກ.
ພໍລີ ໄນ້ ແມ່ນໃຜ?
ພໍລີ ໄນ້ ແລະ ສາມີຂອງນາງ, ໂຈເຊັບ ໄນ້ ຜູ້ພໍ່, ເປັນໜຶ່ງໃນຜູ້ທີ່ເຊື່ອເລື່ອງການເອີ້ນຂອງໂຈເຊັບ ສະມິດ ໃຫ້ເປັນສາດສະດາ. ພໍລີ ແລະ ໂຈເຊັບ ໄດ້ໃຫ້ຄວາມຊ່ວຍເຫລືອທີ່ສຳຄັນຕໍ່ສາດສະດາ ໃນວຽກງານການແປພຣະຄຳພີມໍມອນ. ຄອບຄົວໄນ້ໄດ້ໜີຈາກເມືອງໂຄນສະວຽວ, ລັດນິວຢອກ, ໄປເຕົ້າໂຮມກັບໄພ່ພົນຢູ່ລັດໂອໄຮໂອ ແລະ ຕໍ່ມາໄດ້ຖືກບັນຊາໃຫ້ຍ້າຍໄປເຂດແຈ໊ກສັນ, ລັດມີເຊີຣີ. ຂະນະທີ່ເຂົາເຈົ້າເດີນທາງ, ສຸຂະພາບຂອງພໍລີໄດ້ອ່ອນເພຍລົງ, ແຕ່ນາງໄດ້ຕັ້ງໃຈວ່າ ຈະຕ້ອງເຫັນຊີໂອນ ກ່ອນນາງຕາຍ. ນາງໄດ້ຢູ່ລັດມີເຊີຣີ ພຽງສອງສາມວັນ ກ່ອນນາງໄດ້ເສຍຊີວິດ (ເບິ່ງ Saints, 1:127–28, 132–33). ຄຳສອນ ແລະ ພັນທະສັນຍາ 59 ໄດ້ຮັບໃນມື້ທີ່ນາງໄດ້ເສຍຊີວິດ, ແລະ ຂໍ້ທີ 1 ແລະ 2 ອາດຈະກ່ຽວກັບນາງໂດຍສະເພາະ.
ຄຳສອນ ແລະ ພັນທະສັນຍາ 59:4–19
ພຣະບັນຍັດຄືພອນປະການໜຶ່ງ.
ທ່ານຄິດວ່າ “ສວມມົງກຸດ … ດ້ວຍບັນຍັດ” ໝາຍຄວາມວ່າແນວໃດ? (ຂໍ້ທີ 4). ໃຫ້ພິຈາລະນາວ່າພຣະຜູ້ເປັນເຈົ້າປະທານພອນໃຫ້ທ່ານແນວໃດໃນຂະນະທີ່ທ່ານພະຍາຍາມຢ່າງພາກພຽນໃນການເຊື່ອຟັງພຣະບັນຍັດແຕ່ລະຂໍ້ໃນ ຂໍ້ທີ 5–19.
ແບ່ງປັນສິ່ງທີ່ທ່ານກຳລັງຮຽນຮູ້. ໃນຫລາຍກໍລະນີ, ຄວາມຮູ້ແຈ້ງທາງວິນຍານທີ່ທ່ານໄດ້ຮັບໃນຂະນະທີ່ທ່ານສຶກສາພຣະຄຳພີ ກໍສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງຄອບຄົວ, ໝູ່ເພື່ອນ, ແລະ ສະມາຊິກໃນຫວອດຂອງທ່ານໄດ້. ແບ່ງປັນປະສົບການ, ຄວາມຮູ້ສຶກ, ແລະ ປະຈັກພະຍານຂອງທ່ານເຖິງພຣະເຢຊູຄຣິດກັບເຂົາເຈົ້າ.
ຄຳສອນ ແລະ ພັນທະສັນຍາ 59:9–19
ວັນຊະບາໂຕຄືວັນຂອງພຣະຜູ້ເປັນເຈົ້າ.
ຫລັງຈາກໄດ້ສັນຍາທີ່ຈະໃຫ້ພອນແກ່ໄພ່ພົນໃນຊີໂອນ “ດ້ວຍບັນຍັດທີ່ບໍ່ແມ່ນໜ້ອຍ,” ພຣະຜູ້ເປັນເຈົ້າໄດ້ເນັ້ນພຣະບັນຍັດຂໍ້ໜຶ່ງໂດຍສະເພາະ: ການບັນຊາເພື່ອໃຫ້ກຽດແກ່ “ວັນສັກສິດ” ຂອງພຣະອົງ (ຄຳສອນ ແລະ ພັນທະສັນຍາ 59:4, 9). ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 59:9–19, ໃຫ້ໄຕ່ຕອງເຫດຜົນຂອງການໃຫ້ກຽດວັນຊະບາໂຕ ເປັນສິ່ງສຳຄັນຫລາຍຕໍ່ໄພ່ພົນເຫລົ່ານັ້ນ ຂະນະທີ່ເຂົາເຈົ້າສະແຫວງຫາທີ່ຈະສ້າງຊີໂອນແນວໃດ. ເປັນຫຍັງມັນຈຶ່ງສຳຄັນຕໍ່ທ່ານ?
ທ່ານກໍສາມາດໄຕ່ຕອງວ່າທ່ານໄດ້ໃຊ້ວັນຊະບາໂຕ ໃນວິທີທີ່ພຣະຜູ້ເປັນເຈົ້າເຈດຕະນາບໍ? ການຮັກສາວັນຊະບາໂຕໃຫ້ສັກສິດ ຊ່ວຍທ່ານໃຫ້ “ປາດສະຈາກມົນທິນຂອງໂລກ” ຕໍ່ໄປ ໄດ້ແນວໃດ? (ຂໍ້ທີ 9). ເຮັດແນວໃດທ່ານຈຶ່ງຈະສາມາດມີ “ຄວາມຈົງຮັກພັກດີແດ່ພຣະຜູ້ສູງສຸດ” ໄດ້? (ຂໍ້ທີ 10).
ທ່ານອາດສັງເກດໄດ້ວ່າພຣະຜູ້ເປັນເຈົ້າໃຊ້ ຄຳວ່າ “ປິຕິຍິນດີ,” “ຊື່ນບານ,” ແລະ “ຍິນດີ,” ເພື່ອສິດສອນກ່ຽວກັບວັນຊະບາໂຕ. ແມ່ນຫຍັງທີ່ເຮັດໃຫ້ວັນຊະບາໂຕເປັນທີ່ມ່ວນຊື່ນສຳລັບທ່ານ? ທ່ານຈະອະທິບາຍຕໍ່ບາງຄົນ ເຖິງເຫດຜົນທີ່ທ່ານເລືອກທີ່ຈະໃຫ້ກຽດວັນຂອງພຣະຜູ້ເປັນເຈົ້ານີ້ແນວໃດ?
ທ່ານໄດ້ຮຽນຮູ້ຫຍັງແດ່ຈາກເພງສວດ “Gently Raise the Sacred Strain” (Hymns, no. 146) ກ່ຽວກັບຈຸດປະສົງ ແລະ ພອນຕ່າງໆຂອງວັນຊະບາໂຕ?
ເບິ່ງ ປະຖົມມະການ 2:2–3; ເອເຊຢາ 58:13–14; Russell M. Nelson, “The Sabbath Is a Delight,” Liahona, May 2015, 129–32 ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 58:26–28
ພຣະບິດາເທິງສະຫວັນໄດ້ມອບອຳນາດໃຫ້ແກ່ເຮົາເພື່ອເລືອກ.
-
ການອ່ານ ຄຳສອນ ແລະ ພັນທະສັນຍາ 58:26–28 ນຳກັນ ສາມາດໃຫ້ໂອກາດທ່ານ ແລະ ລູກໆຂອງທ່ານເວົ້າລົມກ່ຽວກັບອຳນາດທີ່ພຣະບິດາເທິງສະຫວັນໄດ້ມອບໃຫ້ກັບເຮົາໃນການເລືອກເຮັດສິ່ງດີ. ທ່ານອາດຈະບອກກັນແລະກັນກ່ຽວກັບການເລືອກຕ່າງໆທີ່ທ່ານໄດ້ເຮັດ ແລະ ຜົນຕາມມາທີ່ເກີດຂຶ້ນ. ບາງທີລູກໆຂອງທ່ານອາດຢາກແຕ້ມຮູບກ່ຽວກັບປະສົບການຂອງພວກເຂົາ.
-
ທ່ານສາມາດຂຽນຄຳວ່າ ການເລືອກ ລົງໄວ້ໃນເຈ້ຍດ້ານໜຶ່ງ ແລະ ຜົນໄດ້ຮັບ ລົງໄວ້ອີກດ້ານໜຶ່ງ ແລະ ນຳໃຊ້ເຈ້ຍໃບນີ້ເພື່ອສະແດງໃຫ້ເຫັນວ່າການເລືອກຕ່າງໆຂອງພວກເຂົາ ແລະ ຜົນໄດ້ຮັບນັ້ນບໍ່ສາມາດແຍກຈາກກັນໄດ້. ບາງທີລູກໆຂອງທ່ານອາດຈະຂຽນທາງເລືອກສອງສາມຢ່າງ ແລະ ເວົ້າກ່ຽວກັບຜົນໄດ້ຮັບທີ່ມາຈາກທາງເລືອກນັ້ນ. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 58:27–28 ນຳກັນ ແລະ ເວົ້າລົມກ່ຽວກັບທາງເລືອກຕ່າງໆທີ່ “ເຮັດໃຫ້ເກີດຄວາມຊອບທຳຢ່າງຫລວງຫລາຍ” ຫລື ຜົນຮັບທີ່ດີ. ພຣະບິດາເທິງສະຫວັນໄດ້ມອບ “ລາງວັນ” ຫລື ໃຫ້ພອນເຮົາແນວໃດຂະນະທີ່ເຮົາພະຍາຍາມກະທຳສິ່ງທີ່ຖືກຕ້ອງ? (ຂໍ້ທີ 28).
ຄຳສອນ ແລະ ພັນທະສັນຍາ 59:7, 18–21
“ຂອບພຣະໄທພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າໃນທຸກສິ່ງ.”
-
ໃຫ້ພິຈາລະນາທີ່ຈະອ່ານຂໍ້ພຣະຄຳພີເຫລົ່ານີ້ໃນຂະນະທີ່ທ່ານ ແລະ ລູກໆຂອງທ່ານອອກໄປຍ່າງຫລິ້ນ ຫລື ເບິ່ງຮູບພາບທຳມະຊາດ, ສັງເກດເບິ່ງ “ສິ່ງປະທັບຕາ ແລະ … ຍິນດີໃນໃຈ” (ຂໍ້ທີ 18). ທ່ານກໍສາມາດສັງເກດເຫັນສິ່ງທີ່ຄ້າຍກັນນີ້ໃນບົດເພງໜຶ່ງເຊັ່ນ “My Heavenly Father Loves Me” (Children’s Songbook, 228–29) ນຳອີກ. ຫລື ທ່ານອາດຈະເຊື້ອເຊີນລູກໆຂອງທ່ານໃຫ້ແຕ້ມຮູບສິ່ງຕ່າງໆທີ່ພວກເຂົາກະຕັນຍູຕໍ່ ແລະ ໃຫ້ພວກເຂົາເລົ່າສູ່ທ່ານຟັງກ່ຽວກັບຮູບແຕ້ມຂອງເຂົາ. ເຮົາຈະສະແດງຄວາມກະຕັນຍູຂອງເຮົາສຳລັບສິ່ງເຫລົ່ານີ້ໃນວິທີໃດ?
ພຣະຜູ້ເປັນເຈົ້າໄດ້ສ້າງສິ່ງສວຍງາມຫລາຍຢ່າງເພື່ອນຳຄວາມສຸກມາສູ່ເຮົາ.
ຄຳສອນ ແລະ ພັນທະສັນຍາ 59:9–12
ວັນຊະບາໂຕຄືວັນຂອງພຣະຜູ້ເປັນເຈົ້າ.
-
ເຮົາສາມາດເຮັດຫຍັງໃນວັນອາທິດເພື່ອນະມັດສະການພຣະຜູ້ເປັນເຈົ້າ ແລະ ພົບຄວາມສຸກ? ຊ່ວຍລູກໆຂອງທ່ານຊອກຫາແນວຄິດຕ່າງໆໃນ ຄຳສອນ ແລະ ພັນທະສັນຍາ 59:9–12 ແລະ ໜ້າກິດຈະກຳ ຂອງອາທິດນີ້. ບາງທີພວກເຂົາກໍສາມາດຊອກຫາພາບ ຫລື ສິ່ງຂອງຕ່າງໆ ເພື່ອມາເປັນຕົວແທນສິ່ງທີ່ເຮົາເຮັດໃນວັນຊະບາໂຕ (ຕົວຢ່າງເຊັ່ນຮູບພາບສິນລະລຶກທີ່ຢູ່ໃນໂຄງຮ່າງນີ້). ສິ່ງເຫລົ່ານີ້ໄດ້ຊ່ວຍເຮົາໃຫ້ຮູ້ສຶກເຂົ້າໃກ້ພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
ຮູບພາບປະກອບ ໂດຍ ມາດີ ເມເຈີ