“ວັນທີ 16–22 ເດືອນມິຖຸນາ: ‘ພຣະຜູ້ເປັນເຈົ້າຮຽກຮ້ອງຫົວໃຈ ແລະ ຈິດໃຈທີ່ເຕັມໃຈ’: ຄໍາສອນ ແລະ ພັນທະສັນຍາ 64–66,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 64–66,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ເຂດເດວີສ໌, ລັດມີເຊີຣີ
ຄຳສອນ ແລະ ພັນທະສັນຍາ 16–22: “ພຣະຜູ້ເປັນເຈົ້າຮຽກຮ້ອງຫົວໃຈ ແລະ ຈິດໃຈທີ່ເຕັມໃຈ”
ຄຳສອນ ແລະ ພັນທະສັນຍາ 64–66
ໃນຄວາມຮ້ອນອົບເອົ້າຂອງເດືອນສິງຫາ ປີ 1831, ພວກແອວເດີຫລາຍຄົນໄດ້ເດີນທາງກັບຄືນໄປເມືອງເຄີດແລນ ຈາກແຜ່ນດິນຊີໂອນ ໃນລັດມີເຊີຣີ. ຜູ້ເດີນທາງທັງຮ້ອນ ແລະ ເມື່ອຍລ້າ, ແລະ ບໍ່ດົນຄວາມຕຶງຄຽດກໍກາຍເປັນການຜິດຖຽງກັນ. ເບິ່ງຄືກັບວ່າ ການສ້າງຊີໂອນ, ເມືອງແຫ່ງຄວາມຮັກ, ເປັນອັນໜຶ່ງດຽວກັນ, ແລະ ສະຫງົບສຸກ, ຈະຕ້ອງໃຊ້ເວລາດົນນານ.
ໂຊກດີທີ່ ການສ້າງຊີໂອນ—ໃນລັດມີເຊີຣີ ໃນປີ 1831 ຫລື ໃນໃຈ, ໃນຄອບຄົວ, ແລະ ໃນຫວອດຂອງເຮົາໃນປະຈຸບັນ—ບໍ່ຮຽກຮ້ອງເຮົາໃຫ້ເປັນຄົນດີພ້ອມ. ກົງກັນຂ້າມ, “ເຈົ້າຖືກຮຽກຮ້ອງໃຫ້ອະໄພ,” ພຣະຜູ້ເປັນເຈົ້າໄດ້ກ່າວ (ຄຳສອນ ແລະ ພັນທະສັນຍາ 64:10). ພຣະອົງຮຽກຮ້ອງ “ຫົວໃຈ ແລະ ຈິດໃຈທີ່ເຕັມໃຈ” (ຂໍ້ທີ 34). ແລະ ພຣະອົງຮຽກຮ້ອງຄວາມອົດທົນ ແລະ ຄວາມພາກພຽນ, ເພາະຊີໂອນຖືກສ້າງຂຶ້ນດ້ວຍຮາກຖານຂອງ “ສິ່ງເລັກນ້ອຍ,” ສຳເລັດໂດຍຜູ້ທີ່ບໍ່ກາຍເປັນຄົນ “ເມື່ອຍລ້າໃນການເຮັດວຽກງານດີ” (ຂໍ້ທີ 33).
ເບິ່ງ Saints, 1:133–34, 136–37 ນຳອີກ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 64:1–11
“ຈົ່ງໃຫ້ອະໄພຊຶ່ງກັນແລະກັນ.”
ໃຫ້ພິຈາລະນາສິ່ງດັ່ງຕໍ່ໄປນີ້ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 64:1–11:
-
ໃຫ້ຄິດກ່ຽວກັບຕອນທີ່ພຣະຜູ້ເປັນເຈົ້າໄດ້ໃຫ້ອະໄພແກ່ທ່ານ. ທ່ານໄດ້ຮູ້ສຶກແນວໃດ?
-
ມີຄົນທີ່ທ່ານຕ້ອງໃຫ້ອະໄພຫລືບໍ່? ເປັນຫຍັງການໃຫ້ອະໄພຄົນອື່ນຈຶ່ງເປັນເລື່ອງຍາກຫລາຍ? ແມ່ນຫຍັງທີ່ຊ່ວຍທ່ານໃຫ້ເອົາຊະນະຄວາມຍາກລຳບາກເຫລົ່ານີ້ໄດ້?
-
ຄວາມຈິງໃດແດ່ກ່ຽວກັບການໃຫ້ອະໄພຢູ່ໃນ ຄຳສອນ ແລະ ພັນທະສັນຍາ 64:1–11 ເບິ່ງຄືສຳຄັນຕໍ່ທ່ານ? ທ່ານຄິດວ່າເປັນຫຍັງພຣະຜູ້ເປັນເຈົ້າຈຶ່ງບັນຊາເຮົາ “ໃຫ້ອະໄພແກ່ມະນຸດທຸກຄົນ”? (ຂໍ້ທີ 10).
ຖ້າຫາກທ່ານມີບັນຫາທີ່ຈະໃຫ້ອະໄພ, ໃຫ້ລອງສຶກສາຂ່າວສານຂອງແອວເດີ ແຈັບຟະຣີ ອາ ຮໍແລນ “The Ministry of Reconciliation” (Liahona, Nov. 2018, 77–79) ຫລື ຂ່າວສານຂອງ ຄຣິດສະຕິນ ເອັມ ຢີ “Beauty for Ashes: The Healing Path of Forgiveness” (Liahona, Nov. 2022, 36–38). ທ່ານຮຽນຮູ້ຫຍັງແດ່ກ່ຽວກັບພຣະຄຣິດ ທີ່ສາມາດຊ່ວຍທ່ານໃຫ້ອະໄພ?
ຄວາມສຳພັນຂອງຄອບຄົວສາມາດໃຫ້ໂອກາດຫລາຍຢ່າງເພື່ອໃຫ້ອະໄພ. ໃຫ້ຄິດກ່ຽວກັບສະມາຊິກໃນຄອບຄົວຂອງທ່ານ. ທ່ານຕ້ອງໃຫ້ອະໄພຄົນໃດ? ເຮົາ “ທຸກທໍລະມານ” ແນວໃດ (ຂໍ້ທີ 8) ເມື່ອເຮົາບໍ່ໃຫ້ອະໄພຊຶ່ງກັນແລະກັນ? ການໃຫ້ອະໄພມີຜົນກະທົບຕໍ່ຄວາມສຳພັນໃນຄອບຄົວຂອງທ່ານແນວໃດ?
ເບິ່ງ Topics and Questions, “Forgiveness,” ຫ້ອງສະໝຸດພຣະກິດຕິຄຸນ; “Forgiveness: My Burden Was Made Light” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
Forgiveness: My Burden Was Made Light
After a man loses his wife and several children in a car accident, he finds healing and is able to forgive the offending driver through the power of Jesus Christ.
“ພວກເຈົ້າຄວນອະໄພໃຫ້ກັນແລະກັນ” (ຄຳສອນ ແລະ ພັນທະສັນຍາ 64:9).
ຄຳສອນ ແລະ ພັນທະສັນຍາ 64:31–34
ພຣະຜູ້ເປັນເຈົ້າຂໍໃຫ້ເຮົາມີ “ຫົວໃຈ ແລະ ຈິດໃຈທີ່ເຕັມໃຈ.”
ທ່ານເຄີຍຮູ້ສຶກ “ເມື່ອຍລ້າ” ກັບ “ວຽກງານດີ” ທັງໝົດທີ່ທ່ານພະຍາຍາມເຮັດໃຫ້ສຳເລັດບໍ? ໃຫ້ຊອກຫາຂ່າວສານຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 64:31–34. ພຣະບິດາເທິງສະຫວັນຕ້ອງການໃຫ້ຄອບຄົວຂອງທ່ານເຮັດສິ່ງໃດ ເພື່ອເຮັດໃຫ້ “ວຽກງານອັນຍິ່ງໃຫຍ່” ຂອງພຣະອົງເກີດຂຶ້ນ?
ໃຫ້ຄິດເຖິງບົດຮຽນທີ່ໃຊ້ສິ່ງຂອງເພື່ອອະທິບາຍ ຂໍ້ທີ 33—ສິ່ງທີ່ຍິ່ງໃຫຍ່ທີ່ເຮັດຈາກສິ່ງເລັກນ້ອຍ, ເຊັ່ນ ຮູບທີ່ເຮັດດ້ວຍແກ້ວຕ່ອນນ້ອຍໆ ຫລື ອາຄານດິນຈີ່. “ສິ່ງເລັກນ້ອຍ” ໃດແດ່ທີ່ທ່ານເຮັດທຸກມື້ ເພື່ອ “ວາງຮາກຖານ” ວຽກງານອັນຍິ່ງໃຫຍ່ຂອງພຣະເຈົ້າ? ມີຕົວຢ່າງໃດແດ່ຂອງ “ວຽກງານອັນຍິ່ງໃຫຍ່” ທີ່ພຣະຜູ້ເປັນເຈົ້າໄດ້ມອບໃຫ້ທ່ານ?
ຄຳສອນ ແລະ ພັນທະສັນຍາ 64:31–34
“ຫົວໃຈ ແລະ ຈິດໃຈທີ່ເຕັມໃຈ”
ແອວເດີ ດອນໂນ ແອວ ຮໍສ໌ຕຣຳ ໄດ້ແນະນຳຄວາມໝາຍທີ່ເປັນໄປໄດ້ນີ້ ສຳລັບວະລີ “ຫົວໃຈ ແລະ ຈິດໃຈທີ່ເຕັມໃຈ”:
“ຫົວໃຈເປັນສັນຍາລັກຂອງຄວາມຮັກ ແລະ ຄວາມມຸ່ງໝັ້ນ. ເຮົາເສຍສະລະ ແລະ ແບກພາລະໃຫ້ຄົນທີ່ເຮົາຮັກ ຊຶ່ງເຮົາຈະບໍ່ອົດທົນດ້ວຍເຫດຜົນອື່ນໃດ. ຖ້າຫາກບໍ່ມີຄວາມຮັກ, ຄວາມມຸ່ງໝັ້ນຂອງເຮົາກໍຈະໝົດໄປ. …
“ການມີ ‘ຈິດໃຈທີ່ເຕັມໃຈ’ ໝາຍເຖິງການພະຍາຍາມຢ່າງດີທີ່ສຸດ ແລະ ການຄິດຢ່າງດີທີ່ສຸດ ແລະ ການສະແຫວງຫາປັນຍາຂອງພຣະເຈົ້າ. ມັນຊີ້ໃຫ້ເຫັນວ່າການສຶກສາຕະຫລອດຊີວິດຂອງເຮົາຄວນເປັນກ່ຽວກັບສິ່ງທີ່ມີລັກສະນະນິລັນດອນ. ມັນໝາຍຄວາມວ່າ ຈະຕ້ອງມີຄວາມສຳພັນຢ່າງແຍກອອກບໍ່ໄດ້ລະຫວ່າງການໄດ້ຍິນພຣະຄຳຂອງພຣະເຈົ້າ ແລະ ການເຊື່ອຟັງຕາມນັ້ນ” (“The Heart and a Willing Mind,” Ensign, June 2011, 31–32).
ຄຳສອນ ແລະ ພັນທະສັນຍາ 64:41–43
ຊີໂອນຈະເປັນ “ທຸງສັນຍານໃຫ້ແກ່ຜູ້ຄົນ.”
ທຸງສັນຍານຄື “ທຸງ ຫລື ສັນຍາລັກທີ່ຢູ່ອ້ອມຮອບ ໃນບ່ອນທີ່ຜູ້ຄົນເຕົ້າໂຮມກັນໃນຄວາມເປັນໜຶ່ງໃນຈຸດປະສົງ ຫລື ເອກະລັກ” (ຄູ່ມືພຣະຄຳພີ, “Ensign,” ຫ້ອງສະໝຸດພຣະກິດຕິຄຸນ). ຊີໂອນ—ຫລື ສາດສະໜາຈັກຂອງພຣະຜູ້ເປັນເຈົ້າ—ໄດ້ເປັນຄືກັນກັບທຸງສັນຍານຕໍ່ທ່ານແນວໃດ? ໃຫ້ພິຈາລະນາຕົວຢ່າງອື່ນໆເຫລົ່ານີ້ ເຖິງສິ່ງທີ່ຖືກຍົກຂຶ້ນ ຄືກັນກັບທຸງສັນຍານ, ເພື່ອເປັນພອນໃຫ້ແກ່ຜູ້ຄົນ: ຈົດບັນຊີ 21:6–9; ມັດທາຍ 5:14–16; ແອວມາ 46:11–20. ໃຫ້ຊອກຫາວິທີອື່ນທີ່ພຣະຜູ້ເປັນເຈົ້າບັນຍາຍກ່ຽວກັບຊີໂອນ ຢູ່ໃນ ຄຳສອນ ແລະ ພັນທະສັນຍາ 64:41–43.
ເບິ່ງ “Let Zion in Her Beauty Rise,” Hymns, no. 41 ນຳອີກ.
ອານາຈັກຂອງພຣະເຈົ້າຢູ່ເທິງແຜ່ນດິນໂລກກະກຽມໂລກສຳລັບການກັບມາຂອງພຣະຜູ້ຊ່ວຍໃຫ້ລອດ.
ຄຳສອນ ແລະ ພັນທະສັນຍາ 65 ໃຫ້ຄຳອະທິບາຍທີ່ດົນໃຈກ່ຽວກັບສາດສະໜາຈັກຂອງພຣະຜູ້ເປັນເຈົ້າ ໃນຍຸກສຸດທ້າຍ. ໃຫ້ພິຈາລະນາທີ່ຈະຄົ້ນຄວ້າພາກນີ້, ຊອກຫາຄຳຕອບໃຫ້ກັບຄຳຖາມເຫລົ່ານີ້: ພຣະຜູ້ເປັນເຈົ້າຕ້ອງການໃຫ້ອານາຈັກຂອງພຣະອົງບັນລຸສິ່ງໃດຢູ່ເທິງແຜ່ນດິນໂລກ? ພຣະອົງຕ້ອງການໃຫ້ເຮົາເຮັດຫຍັງເພື່ອຊ່ວຍເຫລືອ?
ເບິ່ງ “Prepare Today for the Second Coming” (ວິດີໂອ), ChurchofJesusChrist.org ນຳອີກ.
Prepare Today for the Second Coming
(Joseph Smith—Matthew 1:46–54; Matthew 24:42–51) An excerpt from “Preparation for the Second Coming,” Ensign or Liahona, May 2004, 8–9.
ພຣະຜູ້ເປັນເຈົ້າຮູ້ຈັກຄວາມຄິດຂອງໃຈເຮົາ.
ບໍ່ດົນຫລັງຈາກທີ່ໄດ້ເຂົ້າຮ່ວມສາດສະໜາຈັກ, ວິວລຽມ ອີ ມິກລີລິນ ໄດ້ຂໍໃຫ້ໂຈເຊັບ ສະມິດ ເປີດເຜີຍພຣະປະສົງຂອງພຣະເຈົ້າສຳລັບລາວ. ໂຈເຊັບບໍ່ຮູ້ວ່າ ວິວລຽມມີຄຳຖາມສ່ວນຕົວຫ້າຂໍ້ທີ່ລາວຫວັງວ່າພຣະຜູ້ເປັນເຈົ້າຈະຕອບ ຜ່ານທາງສາດສະດາຂອງພຣະອົງ. ເຮົາບໍ່ຮູ້ວ່າ ຄຳຖາມຂອງວິວລຽມແມ່ນກ່ຽວກັບຫຍັງ, ແຕ່ການເປີດເຜີຍແມ່ນກ່ຽວກັບລາວ, ບັດນີ້, ຄຳສອນ ແລະ ພັນທະສັນຍາ 66, ໄດ້ຕອບຄຳຖາມແຕ່ລະຂໍ້ຂອງວິວລຽມ “ຢ່າງສົມບູນ ແລະ ເພິ່ງພໍໃຈ” (“William McLellin’s Five Questions,” Revelations in Context,, 138).
ຂະນະທີ່ທ່ານອ່ານ ພາກທີ 66, ໃຫ້ຄິດກ່ຽວກັບສິ່ງທີ່ພຣະຜູ້ເປັນເຈົ້າຮູ້ຈັກກ່ຽວກັບວິວລຽມ ມິກລີລິນ ແລະ ຄວາມຫ່ວງໃຍ ແລະ ຄວາມເຈດຕະນາໃນໃຈຂອງລາວ. ພຣະຜູ້ເປັນເຈົ້າໄດ້ສະແດງໃນແບບໃດ ວ່າພຣະອົງຮູ້ຈັກທ່ານ? ຖ້າຫາກທ່ານມີໃບປິຕຸພອນ, ໃຫ້ຄິດທີ່ຈະສຶກສາມັນ. ເມື່ອທ່ານເຮັດສິ່ງນີ້, ພຣະວິນຍານບໍລິສຸດຈະຊ່ວຍທ່ານໃຫ້ເຂົ້າໃຈກ່ຽວກັບພຣະປະສົງຂອງພຣະເຈົ້າສຳລັບທ່ານແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 64:7–10
ພຣະເຢຊູຄຣິດຕ້ອງການໃຫ້ເຮົາອະໄພໃຫ້ທຸກຄົນ.
ໝາຍເຫດ: ຂະນະທີ່ທ່ານສິດສອນລູກໆຂອງທ່ານກ່ຽວກັບພຣະບັນຊາຂອງພຣະຜູ້ເປັນເຈົ້າ “ໃຫ້ອະໄພແກ່ມະນຸດທຸກຄົນ,” ທ່ານອາດຕ້ອງການໃຫ້ຄວາມແຈ້ງຊັດວ່າ ການໃຫ້ອະໄພບໍ່ໄດ້ໝາຍຄວາມວ່າ ຍອມໃຫ້ຜູ້ຄົນທຳຮ້າຍເຮົາ. ຊຸກຍູ້ພວກເຂົາໃຫ້ບອກຜູ້ໃຫຍ່ທີ່ໄວ້ໃຈໄດ້ ຖ້າຫາກມີຄົນທຳຮ້າຍພວກເຂົາ ຫລື ແຕະຕ້ອງພວກເຂົາຢ່າງບໍ່ເໝາະສົມ.
-
ຫລັງຈາກການອ່ານ ຄຳສອນ ແລະ ພັນທະສັນຍາ 64:10 ກັບລູກໆຂອງທ່ານແລ້ວ, ໃຫ້ເວົ້າລົມກັບພວກເຂົາກ່ຽວກັບວ່າ ການໃຫ້ອະໄພບາງຄົນໝາຍຄວາມວ່າແນວໃດ. ທ່ານສາມາດແບ່ງປັນຕົວຢ່າງທີ່ລຽບງ່າຍສອງສາມຢ່າງ. ບາງທີພວກເຂົາອາດຫລິ້ນລະຄອນກ້ອມຕົວຢ່າງເຫລົ່ານີ້ ເພື່ອຝຶກການໃຫ້ອະໄພ.
-
ທ່ານອາດຂໍໃຫ້ລູກໆຂອງທ່ານວາງແຜນວິທີທີ່ພວກເຂົາຈະສິດສອນຄົນໃດຄົນໜຶ່ງ—ເຊັ່ນ ສິດສອນນ້ອງ—ກ່ຽວກັບການໃຫ້ອະໄພຄົນອື່ນ. ຊ່ວຍພວກເຂົາຊອກຫາວະລີໃນ ຄຳສອນ ແລະ ພັນທະສັນຍາ 64:7–10 ທີ່ພວກເຂົາສາມາດໃຊ້ໃນຂະນະທີ່ພວກເຂົາສິດສອນ.
-
ຮ້ອງເພງນຳກັນກ່ຽວກັບການໃຫ້ອະໄພ, ເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72). ເພງນີ້ສິດສອນເຮົາຫຍັງແດ່ກ່ຽວກັບການໃຫ້ອະໄພຄົນອື່ນ?
ຄຳສອນ ແລະ ພັນທະສັນຍາ 64:33
“ວຽກງານອັນຍິ່ງໃຫຍ່” ຂອງພຣະເຈົ້າຖືກສ້າງຂຶ້ນດ້ວຍ “ສິ່ງເລັກນ້ອຍ.”
-
ທ່ານສາມາດສະແດງໃຫ້ລູກໆຂອງທ່ານເຫັນບາງສິ່ງທີ່ຖືກສ້າງຂຶ້ນດ້ວຍຊິ້ນສ່ວນເລັກນ້ອຍ, ເຊັ່ນ ຮູບຈິກຊໍ ຫລື ພົມ. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 64:33 ນຳກັນ. “ວຽກງານອັນຍິ່ງໃຫຍ່” ຂອງພຣະເຈົ້າຄືຫຍັງ? “ສິ່ງເລັກນ້ອຍ” ໃດແດ່ທີ່ເຮົາສາມາດເຮັດ ທີ່ຈະຊ່ວຍເຫລືອໄດ້?
ຄຳສອນ ແລະ ພັນທະສັນຍາ 64:34
ເຮົາສາມາດຕິດຕາມພຣະເຢຊູດ້ວຍໃຈ ແລະ ຈິດໃຈຂອງເຮົາ.
-
ຂະນະທີ່ທ່ານອ່ານໃຫ້ລູກໆຂອງທ່ານຟັງຈາກ ຄຳສອນ ແລະ ພັນທະສັນຍາ 64:34, ທ່ານສາມາດຊີ້ໃສ່ຫົວໃຈ ແລະ ໃສ່ຫົວຂອງທ່ານ ຂະນະທີ່ທ່ານອ່ານ “ຫົວໃຈ” ແລະ “ຈິດໃຈ,” ແລະ ເຊື້ອເຊີນລູກໆໃຫ້ເຮັດຄືກັນກັບທ່ານ. ເຮົາຈະມອບຫົວໃຈ (ຄວາມປາດຖະໜາ) ແລະ ຈິດໃຈ (ຄວາມຄິດ) ຂອງເຮົາໃຫ້ແກ່ພຣະຜູ້ຊ່ວຍໃຫ້ລອດແນວໃດ?
ເນັ້ນໜັກຕົວຢ່າງຂອງພຣະເຢຊູຄຣິດ. ໃຫ້ພິຈາລະນາວ່າ ທ່ານຈະສາມາດເນັ້ນໜັກຕົວຢ່າງຂອງພຣະຜູ້ເປັນເຈົ້າ ເມື່ອທ່ານສຶກສາ ຫລື ສິດສອນໄດ້ແນວໃດ. ຍົກຕົວຢ່າງ, ເມື່ອກຳລັງສິດສອນກ່ຽວກັບ ຄຳສອນ ແລະ ພັນທະສັນຍາ 64:34, ທ່ານສາມາດເວົ້າລົມກັບລູກໆຂອງທ່ານກ່ຽວກັບວ່າ ພຣະຜູ້ຊ່ວຍໃຫ້ລອດໄດ້ມອບພຣະໄທ (ຄວາມປາດຖະໜາ) ແລະ ຈິດໃຈ (ຄວາມຄິດ) ຂອງພຣະອົງໃຫ້ແກ່ພຣະບິດາຜູ້ສະຖິດຢູ່ໃນສະຫວັນຂອງພຣະອົງແນວໃດ. (ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 6.)
ພຣະຜູ້ເປັນເຈົ້າຮູ້ວ່າເຮົາເປັນໃຜ ແລະ ຮັກເຮົາ.
-
ຊ່ວຍລູກໆຂອງທ່ານໃຫ້ເຂົ້າໃຈວ່າ ວິວລຽມ ອີ ມິກລີລິນ ໄດ້ມີຄຳຖາມຫ້າຂໍ້ສຳລັບພຣະຜູ້ເປັນເຈົ້າ. ໂຈເຊັບ ສະມິດ ໄດ້ຮັບຄຳຕອບເພື່ອຕອບຄຳຖາມເຫລົ່ານີ້ ເຖິງແມ່ນວ່າເພິ່ນບໍ່ຮູ້ວ່າ ຄຳຖາມຂອງວິວລຽມນັ້ນແມ່ນຫຍັງ. ບອກລູກໆຂອງທ່ານກ່ຽວກັບຕອນທີ່ພຣະຜູ້ເປັນເຈົ້າໄດ້ສະແດງໃຫ້ທ່ານເຫັນເຖິງສິ່ງທີ່ພຣະອົງຕ້ອງການໃຫ້ທ່ານເຮັດ, ແລະ ເວົ້າລົມກ່ຽວກັບພອນທີ່ມີມາຈາກການເຮັດຕາມການຊີ້ນຳຂອງພຣະອົງ. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 66:4 ນຳກັນ ແລະ ເຊື້ອເຊີນລູກໆຂອງທ່ານໃຫ້ສະແຫວງຫາໂອກາດທີ່ຈະເຂົ້າໃຈເຖິງສິ່ງທີ່ພຣະຜູ້ເປັນເຈົ້າຕ້ອງການໃຫ້ພວກເຂົາເຮັດ.
ລາຍລະອຽດຈາກ The Second Coming [ການສະເດັດມາຄັ້ງທີສອງ], ໂດຍ ແຄວິນ ຂຽວ
ເຮົາສາມາດຊ່ວຍກະກຽມໂລກເພື່ອຮັບພຣະເຢຊູຄຣິດ.
-
ຂະນະທີ່ລູກໆຂອງທ່ານຫລຽວເບິ່ງຮູບພາບຂອງການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ, ຂໍໃຫ້ພວກເຂົາບັນຍາຍສິ່ງທີ່ພວກເຂົາເຫັນ ຫລື ສິ່ງທີ່ພວກເຂົາຮູ້ກ່ຽວກັບເຫດການນີ້. ທ່ານກໍສາມາດໃຫ້ຄຳ ແລະ ວະລີແກ່ລູກໆຂອງທ່ານນຳອີກກ່ຽວກັບການສະເດັດມາຄັ້ງທີສອງ ເພື່ອຊອກຫາໃນ ຄຳສອນ ແລະ ພັນທະສັນຍາ 65. ຄຳ ແລະ ວະລີເຫລົ່ານີ້ສິດສອນເຮົາຫຍັງແດ່? ເຮົາຈະສາມາດກະກຽມສຳລັບການກັບມາຂອງພຣະຜູ້ຊ່ວຍໃຫ້ລອດໄດ້ແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Forgiven [ຖືກໃຫ້ອະໄພ], ໂດຍ ກະເຣກ ອໍເຊັນ